Bay Tapgin ni Ngan Lemnag Felngin Ban’en ko Ngiyal’ ney
BE’ ni historian nge sociologist ni H. G. Wells fithingan ni kan gargelnag ko duw ni 1866, ma ke suwey laniyan’ e girdi’ u nap’an e bin 20th e chibog. Ke yoloy boch e babyor ni be weliy ni ke mich u wan’ ni nap’an fare biyu’ e duw science e ra mon’og iyan. Ere fare babyor ni Collier’s Encyclopedia e be weliy morngaagen Wells ni ir be’ ni “kari lemnag felngin ban’en” u nap’an ni ke m’oneg e n’en ni ke lemnag. Machane ki weliy ni daki lemnag felngin ban’en u nap’an ni sum e World War II.
Ke tamilang u wan’ Wells ni “rayog ni nge n’igin e science e pi n’en nib kireb nge pi n’en nib fel’, ma aram e kem’’ ndakuriy e michan’ rok, me par ni kari mus ni kireben ban’en e be lemnag,” arrogon ni yog fare babyor ni Chambers’s Biographical Dictionary. Mang fan ni ke buch e re n’em?
Michan’ nge lem nib fel’ ku Wells e ke tor nga daken e pi n’en nrayog ni nge fl’eg e girdi’ ma kari mus. Nap’an ni ke tamilang u wan’ ni dabiyog ko girdi’ ni ngar feked iyib e par nib fel’ rogon ma dakuriy e n’en ni nge sap ngay. Ere ke maga’fan me mulan’.
Ku aram rogon boor e girdi’ ko ngiyal’ ney. Yad be lemnag felngin urngin ban’en u nap’an ni ka yad ba fel’ yangaren machane nap’an ni yad ra ilal iyan ma ke mulan’rad mi yad lemnag kirebun urngin ban’en. Ma bay e piin fel’ yangaren ni ke mulan’rad mar paged e par nib yalen mi yad un ko drug abuse, nge ngongol ndarngal, nge yugu boch ban’en ni ma kirebnigey. Mang e ra pithig e magawon?
Ngan Lemnag Felngin Ban’en u Fithik’ e Magawon
Yog David ni Pilung ni gaar: “Dab mpag nge wageynag lanin’um e kireb ni be ngongliy e girdi’ ni kireb; dabi awan’um ngak e piin ni yad be ngongliy e kireb.” (Psalm 37:1) Aram e fonow nib gonop ni fan ko ngiyal’ ney ya boor ban’en nde mat’aw mab sasalap.—Eklesiastes 8:11.
Mus ni daruda awan’gad ko piin ni be ngongliy e kireb, machane mom ni nge chalbadad u nap’an ni gad ra guy e piin nib fel’ ni be gafgownagrad e piin nib kireb fa nap’an ni dan ngongol ngodad u rogon nib mat’aw. Pi n’en nem e rayog ni nge n’igin ni nge mulan’dad ngad lemnaged Kireben urngin ban’en. Nap’an ni gad ra lem ni aram rogon ma mang e susun ni ngad rin’ed? Som’on ma dabda paged talin ni dabiyog ni nge pagan’iy ko piin nib kireb ni dabni fulweg taban e kireb rorad. Psalm 37 e be micheg ngodad ko verse 2 ni gaar: “Ya bayi math owcherad [piin nib kireb] ni bod e pan ni mororoy, bay ra m’ad ni bod rogon e woldug ni mororoy.”
Maku rayog ni ngad ululgad i rin’ e tin nib fel’ ban’en, ma gad lemnaged felngin ban’en, ma nge l’agan’dad ku Jehovah. Ul’ul e thin ko Psalm me gaar: “Mu pi’ keruum ko kireb ngam rin’ e tin nib fel’, me yog ni um par u daken e binaw; yi Jehovah e ba t’uf rok e tin nib mat’aw, ma der ma pag e piin ni yad ba yul’yul’ ngak, ni aram girdien.”—Psalm 37:27, 28.
[Sasing ko page 4]
H. G. Wells
[Credit Line]
Corbis-Bettmann