Uw Rogon Nrayog ni Ngam Ayuweg e Bitir Rom ko Riya’?

IN e duw ni ke un Wernera ko reb e skul u lan e binaw rok, nge mu’ me un ko skul nib tolang u São Paulo, Brazil ma bay 3,000 e bitir ni be un ko re skul nem. Aram e yay nsom’on ni ke guy e bitir ni be fanay e drug ma yad be pi’ nchuway’. Ir be’ nib achichig me ere de n’uw nap’an ma pi student ni bi ilal ngak e ur gafgownaged ya ir be’ nib biech ko re skul nem.

Miki magawon Eva ni walagen Werner. Ba adag ni nge rin’ e n’en nth’abi fel’ nrayog rok me ere ke fil e babyor nib elmirin ma aram me magaf laniyan’ me maathuk laniyan’. Bod rogon yugu boch e piin fel’ yangaren ma ba t’uf rok Werner nge Eva ni ngan ayuweg dowrow nge lanin’row. Miti mang ayuw nib t’uf ko bitir rom? Uw rogon nrayog ni ngam ayuwegrad nge fel’ rogorad u nap’an ni kar ilalgad? Arrogon, uw rogon e gabul nge langleth ni ga ba adag ni fan ko bitir rom?

Gathi Ke Mus ni Tin nib T’uf nga Dowrad e Ba T’uf Rorad

Mu lemnag fene gel e mo’maw ko piin gallabthir ni ngar ayuweged e bitir rorad ko ngiyal’ ney. Bochan ni be kireb iyan e par u tabinaw ma be gel iyan e gafgow ko salpiy u lan boor e binaw ma ke yoor e bitir ni be par u kanawo’. Bochan ni dan ayuweg e bitir ndabi kirebnagrad e piin nib kireb ma wenegan ni ke yib riy e child labor. Ma boor e piin fel’ yangaren e kar magawongad ni bochan e drug abuse. Susun, reb e fel’ yangaren u Brazil e ke mang reb e drug addict, ma aram me m’ay e gapas u tabinaw rok. Ma gathi ke mus ni ke magawon laniyan’ e gallabthir rok ko re n’em ya kar magawongad ko salpiy ni ngan ayuweg ni nge sul nga rogon, ma piin ni ma pi’ e drugs nchuway’ e kar bad nga taferad ni yad be yog ni ngan pi’ puluwrad.

Yugu aram rogon ni boor ban’en ni be diliiy lanin’uy, ma boor e piin gallabthir e be athamgil ni ngar ayuweged e bitir rorad ko ggan, nge mad, nge naun, maku yad be ayuwegrad ngar siyeged e cham, nge drug, nge yugu boch e magawon. Aram ban’en nib manigil machane ba gaman e re n’em fa? Uw rogon ni ngan ayuweg lanin’rad ma ngan ayuwegrad ko tirok Got ban’en? Boor e girdi’ e goo yad manang ni reb e ban’en ni susun ni nge rin’ e gallabthir e ngar tedan’rad ko uw rogon e piin ni yad e fager ko bitir rorad nge miti mang fafel ni yad be un ngay. Machane uw rogon nrayog ni nge siy e gallabthir i ayuweg e bitir rorad ni kaygi pag rogon fa ni pagrad ngar rin’ed e n’en ni yad ba adag ni kaygi pag rogon? Yibe piningem ngam lemnag e fulweg ni ran pi’ u lan e bin migid e article.

[Boch e Thin nra Tamilangnag Murung’agen]