Uw Rogon e Gabul nge Langleth Ni Ga Ba Adag ni Nge Yog ko Bitir Rom?

GA BE lemnag ni bitir rom e yad e taw’ath ni ri baga’ fan fa? (Psalm 127:3) Fa ga be lemnag ni maruwel ko chugul bitir e ba tomal ma de mudugil ni ra yib angin? Chugul bitir e dabi yibnag e fel’ rogon ko salpiy ya boor e salpiy nib t’uf ni ngan chuguliy e bitir ngay nge mada’ ko ngiyal’ nrayog ni ngar ayuweged yad ko tin nib t’uf rorad. Faanra ke yib e salpiy ni boor ngak be’ ya ke yim’ e girdi’ rok, ma ba t’uf ni nge lemnag ko uw rogon ni nge ayuweg e binem e salpiy nib fel’ rogon, maku aram rogon ni thingari rin’ e piin gallabthir ko bitir rorad.

Piin gallabthir nib t’uf e bitir rorad e yad ba adag ni ngar ayuweged e bitir rorad nge fel’ e par rorad. Yugu aram rogon nrayog ni nge buch boch ban’en nra k’aring e kireban’ u lan e re fayleng ney machane boor ban’en nrayog ni nge rin’ e gallabthir ngar ayuweged e bitir rorad riy. Mu lemnag Werner nge Eva, ni fagali bitir ni kan weliy morngaagen ko fa binem e article.a

Nap’an ni Ri Ma T’ufeg e Gallabthir e Bitir Rorad

I weliy Werner ni gallabthir rok e dar pagew ni nga yigi buch e pi n’en nem ngak, ya kar lemnagew e n’en nra buch ngak u skul. Ke gaar: “Ri gu ma pining e magar ngorow ko pi n’en ni ur weliyew ngog, ma kug nang ni ri gub t’uf rorow ma yow be ayuwegeg. Ba mudugil e thin rorow, machane gu manang ni yow e bin riyul’ e fager rog.” Ma nap’an ni ke kireban’ Eva ni bochan e schoolwork me magafan’ ngay ma de yog ni nge mol nib fel’ rogon, ma gallabthir rok ni Francisco nge Inez e kar ayuwegew nib elmirin mi yow non ngak ni ngan ayuweg nge fel’ laniyan’ me fel’ rogon ko tirok Got ban’en.

Uw rogon ni ke ayuweg Francisco nge Inez e bitir rorow me fl’eg rogorow ni fan ko par nga m’on u nap’an ni kar ilalgow? Nap’an ni kab madway e bitir rorow ma gubin ngiyal’ ni ur tiyan’row ko pi n’en ni be rin’ e bitir u gubin e rran. De par Inez nge Francisco ni yugu yow be un ko pi fager rorad mar digeyew e bitir rorow, ya gubin yang ni ka ranow ngay me un e bitir rorow ngorow. Maku ur piew e fonow ngak e bitir rorow ni pagal nge ppin u fithik’ e t’ufeg. Gaar Inez: “Kug skulnagrow ni ngar ayuwegew e tabinaw, mar ayuwegew e salpiy nib puluw, mar ayuwegew e mad rorow. Ma kug ayuwegew yow ni ngar turguyew ko mang maruwel ni yow ra un ngay me thabthabel e tin nib mil fan ngorow ni ngar rin’ew ko tirok Got ban’en.”

Rib ga’ fan ni ngam nang e bitir rom ma ga pow’iyrad nib fel’ rogon! Ngad lemnaged dalip i kanawo’ nrayog ni ngam rin’ e re n’ey: (1) Ngam ayuweg e bitir rom ngar mel’eged e maruwel nib puluw ni ngar uned ngay; (2) ma ngam ayuwegrad nge yog ni ngar ayuweged yad ko magawon u skul nge tabon e maruwel; (3) ma ga dag ngorad ko uw rogon ni ngar ayuweged yad ko tirok Got ban’en.

Ngam Ayuwegrad Ngar Mel’eged e Maruwel nib Puluw

Maruwel ni be un be’ ngay e ma turguy rarogon ko salpiy maku boor e tayim ni thingari fanay riy, me ere gallabthir nib fel’ e ra ayuweg e bitir ngar lemnaged e tin ni ra felan’nag e bitir nge tin nrayog rorad ni ngar rin’ed. Dariy be’ ni ba adag ni nge tomalnag yugu boch e girdi’ ere piin gallabthir e susun ni ngar ayuweged e bitir rorad nge yog ni ngar pared ni yad be ayuwegrad maku rayog ni ngar ayuweged e tabinaw rorad u nap’an ni yad ra un ko mabgol. Ba t’uf ko bitir rom ni pumoon ara ppin ni nge fil reb e maruwel u skul ni nge yog ni nge ayuweg ir ko salpiy fa? Ngam ayuweg e bitir rom nge athamgil ni nge mang be’ nib madangdang, nge be’ ni ba adag ni nge fil ban’en, nge be’ nrayog ni nge fel’ thilrad yugu boch e girdi’.

Mu lemnag Nicole. Ke gaar: “Kug un ko maruwel ko gallabthir rog ko business rorow ni yow ma klin. Kar rognew ngog ni nggu pi’ boch e salpiy ngorow ni fan ni ngan thang e malfith ko tin nib t’uf ko tabinaw, ma tin ni ka bay e salpiy e nggu fanay ni fan ni nggu chuw’iy e tin nib t’uf rog ma nggu chaariy boch. Aram e kug fil rogon ni nggu ayuweg e tin nib mil fan ngog ma aram e ke ayuwegneg ko par rog u nap’an ni kug ilal.”

De yog ko Bible ni Thin Rok Got ko miti mang maruwel ni susun ni nge un be’ ngay. Machane ma weliy boch ban’en ni nge pow’iydad. Ya yog apostal Paul ni gaar: “Cha’ ndabun ni nge maruwel e dabi abich.” Miki yoloy ngak e pi Kristiano u Thessalonika ni gaar: “Kug rung’aged ni ba’ boch e girdi’ u fithik’med ni yad be par ni yad mmalmal ndarir uned nga reb e maruwel, ni piin ndariy ban’en ni yad be rin’, ma ke mus ni yad be magawon ko maruwel rok boch e girdi’. Gamad be non ngak e pi girdi’ ney ma gamad be ning chilen ngorad u fithingan Somol ni Jesus Kristus: nthingar ra maruwelgad ma dab ku ur magawonniged e girdi’, nge yog e salpiy ngorad ni fan ko par rorad.”​—2 Thessalonika 3:10-12.

Machane gathi ke mus ni maruwel nge salpiy e aram e n’en nib baga’ fan ko yafas. Ya piin ni ma lemnag ni ngar mon’oggad ko pi n’en nem nib elmirin e dabi yib e falfalan’ ngorad ni bochan ni yad ra pirieg ni bod ni yad be “l’ol’og e nifeng ngan kol.” (Eklesiastes 1:14) Ere piin gallabthir e dabra filed ko bitir rorad ni ngar leked e liw nib tolang ara par nib fel’ rogon, ya yad ra ayuwegrad ni ngar nanged nib gonop e pi thin ni kan thagthagnag nga laniyan’ apostal John ni gaar: “Dabi t’uf romed e tin ni ba’ u roy u fayleng ara n’en nib mil fan nga fayleng. Faanra t’uf romed e tin ni bay u fayleng, ma aram e de t’uf e en ni Chitamangiy romed. Gubin ban’en nib mil fan ngaray nga fayleng ni aram e tin nib tagan ban’en ni yima ar’arnag, ni tin nra guy e girdi’ ma yad ba adag ni nge yog ngorad, nge urngin ban’en ni bay u roy u fayleng nri ma uf e girdi’ ngay, dariy reb e pi n’ey ni yib rok e en ni Chitamangiy; ya urngin me yib rok e fayleng. Re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay; machane en nra rin’ e tin nib m’agan’ Got ngay e ra par nib fos ndariy n’umngin nap’an.”​—1 John 2:15-17.

Uw Rogon Ni Ngam Ayuwegrad Nge Fel’ Lanin’rad?

Gur reb e gallabthir, mang ni dab mu bod be’ ni ma skulnag e girdi’ ni ma un ko gosgos ni ir e athlete? Ya gathi ke mus ni ma lemnag ni nge ayuweg e girdi’ nge pay boch rogon ni yad be mil ara nge palog boch rogon ni yad ma og. Ya ku ma ayuwegrad nge fel’ lanin’rad, ma aram e ra mudugil e tafinay rorad. Ere uw rogon nrayog ni ngam ayuweg e bitir rom ngam pi’ e athamgil nga lanin’rad, ma ngam ubingrad, ma ngam k’aringrad ngar mon’oggad iyan?

Mu lemnag Rogério ni be’ nib fel’ yangaren ni 13 e duw rok. Bochan ni be ilal ma be thil boch ban’en u fithik’ i dow miki magafan’ ni bochan e magawon u thilin e gallabthir rok ma dan tiyan’uy ngak. Mang e rayog ni ngan rin’ ko piin fel’ yangaren ni aram rogon? Dabiyog ni ngam siyeg nge dabi yib ko bitir rom urngin e magawon nge kireb, machane dab mu pag e maruwel nib mil fan ko piin gallabthir. Dab mu ayuweg e bitir rom ni kaygi pag rogon, ma ngam pi’ e fonow nge gechig u fithik’ e gonop, ma ga lemnag ni ra reb e bitir mab thil nga yugu reb. Faanra ngam gol ngak e bitir rom ma ga t’ufegrad ma aram e ga be fl’eg laniyan’rad. Aram e ra siyeg nge ilal ma de mudugil laniyan’ ma der lemnag ir.

Demtrug ko uw rogon ni ke ayuwegem e gallabthir rom nge fel’ lanin’um, ma bay dalip i ban’en nrayog ni nge ayuwegem ngam ayuweg e bitir rom: (1) Mu siyeg e par ni kari mus ni go’ magawon rom e ga be lemnag ma aram e ga be lemnag ni ba achig e magawon ko bitir rom; (2) mu athamgil ni ngam sabethingad e bitir rom u gubin e rran me puf e thin u thilmed; (3) mu pi’ e athamgil nga laniyan’ e bitir ni ngar pithiged e magawon nib fel’ rogon mar nanged rogon ni ngar ngongolgad ngak yugu boch e girdi’.

Ke sap Birgit nga tomur ko ngiyal’ nib fel’ yangaren me gaar: “Kug fil ni dabiyog ni ngam thiliyeg be’ nge mang cha’ ni ga ba adag ni nge mang. Ke weliy e chitinag ngog ni faanra ku guy pangin be’ ni dabug, ma n’en ni rayog ni nggu rin’ e nggu athamgil ni dab gu bod e cha’ nem. Miki yog ngog ni nap’an ni ka gub bitir e aram e ngiyal’ nib th’abi fel’ ni nggu athamgil ni nggu thiliyeg e ngongol rog.”

Machane gathi ke mus nib t’uf ko bitir rom e maruwel nib fel’ ma ngan fl’eg lanin’rad. Mu fithem, ‘Gu be lemnag ni maruwel ko gallabthir e yib rok Got fa?’ Faanra er rogon, ma ga ba adag ni ngam ayuweg e bitir rom ko tirok Got ban’en.

Rogon ni Ngan Ayuwegrad ko Tirok Got Ban’en

Nap’an ni pi’ Jesus Kristus fare welthin u daken e burey me gaar: “Nge felan’ e piin ni yad manang nib t’uf rorad e tirok Got ban’en ya gagiyeg nu tharmiy e ke thap ngorad.” (Matthew 5:3, NW.) Mang e ba muun ngay ko tin nib t’uf ko tirok Got ban’en? Ma yib angin ko bitir nfaanra ra tay e gallabthir e kanawo’ nib fel’ mi yad dag ni ke michan’rad ku Jehovah Got. I yoloy apostal Paul ni gaar: “Dariy be’ nra fel’ u wan’ Got ni faanra de mich Got u wan’. Ya en nra yib ngak Got e thingari mich u wan’ ni ba’ Got ma ra tow’athnag e piin ni yad be gayiy Got.” (Hebrews 11:6) Ni nge yog e bin riyul’ e michan’uy ma ba t’uf e meybil. (Roma 12:12) Faanra ga manang nib t’uf rom e tirok Got ban’en, ma aram e ga ra gayiy e ayuw rok Got ni bod ni rin’ fa en ni chitamangin fare tir ni ke ilal me mang reb e tapuf oloboch nu Israel ni Samson fithingan. (Judges 13:8) Ma gathi ke mus ni ga ra meybil ya ku ga ra poy e thin ni ke thagthagnag Got ni bay ko Bible ni nge ayuwegem.—2 Timothy 3:16, 17.b

Boor e maruwel riy ni ngan ayuweg e bitir min pi’ e fonow ngorad ma ngan ayuweg nge fel’ lanin’rad, ma ngan ayuwegrad ko tirok Got ban’en, machane ra yib angin ko gallabthir. Be’ ni matam ni l’agruw e bitir rok u Brazil e ke gaar: “Dabiyog ni nggu lemnag ni dariy e bitir rog. Boor ban’en nib fel’ ni rayog ni nggu ayuwegrow riy.” Miki weliy fare matin ko mang fan ni ke fel’ rarogon e bitir rorow ni gaar: “Ya gubin ngiyal’ ma gamad be par u taabang ma gamow ma guy rogon ni nggu pared u fithik’ e falfalan’. Ma n’en th’abi ga’ fan ni gamow ma rin’ e gamow ma yibilay e bitir romow.”

Ke lemnag Priscilla e t’ufeg nge k’adan’ ni tay e gallabthir rok ngak u gubin ngiyal’ ni ke magawon. Ke gaar: “Yow e tin riyul’ e fager rog kar ayuwegew gag ko urngin ban’en. Ma nap’an ni gub bitir ma gu nang ni kan ngongol ngog ni gag e ‘taw’ath ni pi’ Jehovah.’” (Psalm 127:3) Bod yugu boch e gallabthir ma mang ni dab mu fl’eg e schedule ko bitir rom ni ngam poyed e Bible u taabang ma gimed fil yugu boch e babyor ko Kristiano? Rayog ni ngam ayuweg e bitir rom nge mudugil lanin’rad mar pagedan’rad ko athap nga m’on nfaanra ngam filed e thin ko Bible rogon nib puluw.

Ngiyal’ Nra Par Urngin e Bitir nib Pagan’

Boor e bitir ko ngiyal’ ney e yad ma lemnag nra kireb e gabul nge langleth, machane Thin Rok Got e be micheg ni fayleng e ra mang tafen e girdi’ ni rayog ni ngan pagan’ riy. Mu lemnag e bin nib biech e fayleng ni ke micheg Got ma dabki t’uf ko piin gallabthir ni nge magafan’rad ko bitir rorad ya dabi yib e riya ngorad! (2 Peter 3:13) Mu lemnag e ngiyal’ nra lebug e pi thin ko profet ney ni be gaar: “Pi gamanman ni wolf nge saf e bay ur pired nib fel’ thilrad, ma gamanman ni leopard e bay ra paged yad nga but’ u fithik’ pi fak e kaming. Pi fak e garbaw nge pi fak e layon e bay ur abichgad u taabang, ma bbitir ni kab achig e bay i pow’iyrad.” (Isaiah 11:6) Mus ko ngiyal’ ney ma ke lebug e pi thin nem u rogon nib spiritual ya be par nib pagan’ e piin ni be pigpig ku Jehovah. U fithik’rad ma ga ra thamiy e ayuw ni be pi’ Got u fithik’ e t’ufeg. Faanra ngam dag nib t’uf Got rom, ma rayog ni nge mich u wan’um ni manang Got fan e lem rom ni gur e gallabthir ma ra ayuwegem ngam ayuweg e bitir rom ko pi n’en ni be pi’ e magafan’ nge magawon ngom. Mu fil e Thin Rok ma ga l’agan’um ko athap ko Gil’ilungun.

Mu ayuweg e bitir rom ngar uned ko kanawo’ ni be yan ko yafas ni manemus ma ngan dag e kanawo’ ngorad. Faanra kam tay ni Jehovah Got e manab rom ni ngam naf ngay, ma ra fel’ e gabul nge langleth ni fan ngom nge bitir rom, ma felngin e ra pag rogon ni ga be lemnag. Rayog ni nge pagan’um ni bod e en ni ke yoloy e Psalm ni gaar: “Ngar mu t’ufeg Jehovah, me fel’ u wun’um, me pi’ ngom e tin ni ir e ri gab adag.”​—Psalm 37:4.

[Boch e Thin nra Tamilangnag Murung’agen]