Rayog Ni Ngam Nang E Tin Mmat’aw Ko Tin De Mat’aw?

“Kug li’ 25 e girdi’ kar m’ad. . . . Ma gubin e nep’ ngu gubin e rran ma gu ma guy e re n’em u lanin’ug. Gu ma lik’aynag morngaagen e re n’em. . . . Nap’an ni gu ra yan nga bang ni gu ra guy owchen be’ me puguran ngan’ug e pi girdi’ ni kug li’rad kar m’ad. Gu ma guy e re n’em ni gowa ka fini buch e daba’, ara chiney. . . . Dabiyog ni nggu n’ag fan rog e pi n’en ni kug rin’.”​—V.S.

“Ka nog ngog ni nggu wan ngaram ma ngug li’ e pi toogor ngar m’ad. . . . Dagu par ni gu be lemnag e pi girdi’ nem ni yad e piin pumoon nge ppin nge bitir. . . . Lem rog ko ngiyal’ nem nge ngiyal’ ney e kug rin’ e n’en ni ka nog ngog ni nggu rin’, ma kug fol ko n’en ni kan tay chilen ngog ma da ug lemnag nib kireb e n’en ni kug rin’.”​—W.C.

NAP’AN e March 16, 1968 ma gali pumoon nem e kar unew nga ban’en ni kan nog war crime ngay. Ka ranod yugu boch e salthaw nga lan e binaw nu Vietnam mar lied bokum miriay e girdi’ ni gathi yad e salthaw​—ni piin ppin, nge bitir nge piin pillibthir. Machane mu tiyan’um ko uw rogon e re n’em u wan’ e gali salthaw ney nib thil reb nga reb. Fa bin som’on e salthaw e ke kireban’ ko n’en ni ke rin’. Ma fa bin migid e be lemnag ni ke ngongol u rogon nib yal’uw. Mang fan nib thil e lem ko girdi’ u morngaagen taa ban’en?

Fulweg riy e bay rogon ko nangan’​—aram ban’en ni pi’ Got ko girdi’ ni nge ayuwegdad ngad yaliyed gadad ma ngad turguyed ko uw rogon e ngongol rodad nge lem rodad. Nangan’ e aram ban’en u fithik’dad ni ma tamilangnagan’dad ko tin nib mat’aw nge tin nde mat’aw.

Nap’an ni ngan turguy ban’en ma boch e girdi’ e ma gaar, “Nge pow’iyem e nangan’ rom.” Machane gathi gubin ngiyal’ ma rayog ni ngan pagan’iy ko nangan’. Ya boor e girdi’ e ke fel’ u wan’rad boch ban’en ni rib gel e kireb riy ma boch e girdi’ e ur rin’ed e pi n’en nem ma de kireb ko nangan’ rorad. (John 16:2; Acts 8:1) Rogon ni yog Samuel Butler ni be’ ni English ni ma yoloy e novel ma “dabki n’uw nap’an me chuw fare nangan’ ndabki non ko piin ndubrad ni ngar motoyilgad ngay.”

Rayog ni nge pagan’um ko nangan’ rom? Fulweg riy e ma tor ko uw fene fel’ rogon ni kan llowan’nag, ma aram e n’en nran weliy ko bin migid e article.

[Credit Line]

Yaan e mahl: Sasing ko U.S. Signal Corps