“Urngin Ban’en Ma Ke Mudugil Ngal’an”

“Urngin ban’en ma ke mudugil ngal’an, ni mus ko tin ni buch u tan e pi tharmiy ma bay ngal’an.”​—ECCLESIASTES 3:1, New World Translation.

1. Mang e magawon ni bay ko girdi’ ni dawora flontgad, ma yu ngiyal’ e ke pow’iyrad e re n’ey ko mang?

GIRDI’ e baga’ niy ma yog ni, “Susun manga kug rin’ nib papey.” Ara faanra ke buch ban’en ma ga ra gaar, “Susun faan gomanga kug son buchuw.” Pi n’ey e be dag nib mo’maw ko girdi’ ni dawora flontgad ni ngar mel’eged e tayim nib puluw ni ngan rin’ boch ban’en ni thingar ni rin’. Bochan e re magawon n’ey ma boor e girdi’ ni ke kireb thilrad. Ma boch e girdi’ e ke mulan’rad ma ke kankanan’rad ni bochan. Ma n’en nrib kireb riy e aram ke war e michan’ ko girdi’ ku Jehovah nge ulung rok.

2, 3. (a) Mang fan ni nib gonop nfaanra ngan fol u rogon ni ke dugliy Jehovah ngal’an? (b) Mang lem nib thabthabel ni thingari yog ngodad nib l’ag rogon ni ra lebug e thin nu Bible nni yiiynag?

² Bochan ni Jehovah e bay e gonop rok ma bay e pin’en ni manang ni girdi’ e dar nanged murung’agen, arfan ni bay gelngin ni nge nang boch ban’en ndawori yib, nge angin ni ma yib ko urngin ban’en ni kan rin’, nfaanra baadag. Rayog ni nge nang “ko tabolngin e n’en ni bay ko tungun.” (Isaiah 46:10) Arfan, ni rayog ni nge mel’eg e tayim ni rib puluw ni nge rin’ e n’en ni baadag ma der ma thil. Arfan ni gad ra gonop ni faan gad ra fol ko ngal’an ni ke dugliy Jehovah ma dabda pagedan’dad nga rogon ni gad be sananag e tayim!

³ Bod rogon e piin ni Kristiano ni yad ba yul’yul’ ni yad be sonnag ko wuin e ra yib i m’ug nib riyul’ boch e thin ni kan yiiynag u lan e Bible. Yad be par ni boor e maruwel rorad ni yad be pigpig ngak, ma gubin ngiyal’ e yad ma lemnag e thin ni bay ko Lamentations 3:26 (NW) ni be gaar: “Ffel’ ni nge son be’, ma dabi yog ban’en, ni fan ni nge thap ngak Jehovah.” (Mu taarebnag ko Habakkuk 3:16.) Ku, ke michan’rad ko thin ni kan wereg u murung’agen e gechig ni ra rin’ Jehovah ni be gaar, “bay mu lemnag nib sowath ni be yib, . . . ya ra yib i m’ug ko ngiyal’ ni kug dugliy. Ma dabi sowath.”​—Habakkuk 2:3.

4. Uw rogon ni nge ayuwegdad e thin nu Bible ko Amos 3:7 nge Matthew 24:45 ni ngad sonniged e rran rok Jehovah u fithik’ e g’uman’?

⁴ Ma reb, e faanra gathi rib tamilang uwan’um reb e thin nu Bible ara tin ni kan weliy u lan e babyor ni ke ngongliy fare Watch Tower, ma bay tapgin ni dab kud guman’gad? Ngan sonnag e tayim ni ke dugliy Jehovah ni ngan tamilangnag boch ban’en ya aram e ngongol nib gonop. “I Somol ni Jehovah e dariy ban’en ni ma rin’ nder ma weliy ngak e pi tapigpig rok ni yad e pi prophet rok e n’en nib mith.” (Amos 3:7, NW) Uw feni fel’ e re n’em ni ke micheg! Machane ba t’uf ni nge tamilang uwan’dad ni ra n’igin Jehovah ni ngan nang e tin nib mith ko ngiyal’ ni ke mich uwan’ ni ke fel’ rogon. Bochan e re n’ey me pi’ Got mat’awon ngak e piin ni kan nog “fare tapigpig nib yul’yul’ ma ba gonop” ngorad ni ngar pied ngak e girdi’ rok “e ggan [spiritual] ngorad ko ngiyal nib m’ag ngay.” (Matthew 24:45) Ere, dariy e tapgin ni nga ri magafan’dad, ara nge wagey laniyan’dad, ni bochan bay boch ban’en ni gathi rib tamilang rogon ni kan weliy. Machane, rayog ni nge pagan’dad ni nge pi’ Jehovah ngodad e n’en nib t’uf rodad “ko ngiyal’ nib puluw” u daken fare tapigpig nib yul’yul’ nfaanra ngad sonnaged Jehovah u fithik’ e gum’an’.”

5. Mang angin ni ra yib ngodad nfaan rani fal’eg i lemnag e thin ni bay ko Ecclesiastes 3:1-8?

⁵ I Solomon ni ir e Pilung nib gonop e i weliy u murung’agen 28 ban’en nib thilthil, ni urngin ma bay “ngal’an ni kan dugliy.” (Ecclesiastes 3:1-8) Yira nang ko mang fan e thin ni i yog Solomon nge mang e yibe skulnag ni ra ayuwegdad ni ngad nanged e tayim nib fel’ nge tayim nib kireb ko boch ban’en ni ngan rin’, nrogon ni be finey Got. (Hebrews 5:14) Ma aram rogon, nrayog ni ngad ayuweged e par rodad nrogon nib puluw.

“Ngal’an e Dolo’loy nge Ngal’an ni ngan Minmin”

6, 7. (a) Mang tapgin ni be “dolo’loy” e girdi’ ni ke magafan’rad? (b) Uw rogon ni be guy rogon e fayleng ni nge togopuluw ko re magawon ney nib gel ni kar pirieged e chiney?

⁶ Yugu aram rogon ni bay “ngalan e dolo’loy nge ngal’an ni ngan minmin,” mini’ e dabi mel’eg e bin som’on me n’ag reb? (Ecclesiastes 3:4) Bay e kireban’ riy, ya gad be par ko re fayleng ney ni boor ban’en riy ni ma k’aringdad ni ngad yorgad. Boor e news ni yima rung’ag u media ni ma kireban’ e girdi’ ngay. Bod ni kan diliiyem nga but’ ko kireban’ ni faan gad ra rung’ag ni boch e piin ni fel’ yangaren ni ma un ko skul e kar boyochnaged yugu boch e girdi’ ko re skul nem, nge pi gallabthir ni ma gafgownag e bitir rorad, nge girdi’ ni kan nog e terrorist ngorad ni ma li’ e girdi’ ngem’ ara ma gafgownag e girdi’ ni dariy e n’en ke bucheg, nge fare n’en ni kan nog e natural disaster ngay ni ma kirebnag e yafas nge chugum ko girdi’. Piin bitir ni be yim’ ko bilig ma ke toar lan owcherad nge piin ni kan nog e refugees ngorad ni yug be mil iyan ma aram e pin’en ni gad baadag ni ngad yaliyed ko TV. Boch ban’en ni gathi rib tamilang uwan’ e girdi’ ni bod ethnic cleansing, nge AIDS, nge germ warfare, nge El Niño e be magawonnag lanin’dad nge gum’ircha’dad​—ni ra reb ma be yan u kanawoen.

⁷ Dariy e maruwar riy, ni ke sug ko gafgow nge amith ko gum’ircha’ e re fayleng ney. Yugu aram rogon, ma fare entertainment industry e ma rin’ boch ban’en ni dariy fan ya ban’en ni gathi rib fel’ ma baga’ ni ba m’ag ko ngongol ni darngal nge cham ya nge guy e girdi’ ni fan ni ngar paged talin e gafgow ni be yib ngak yugu boch e girdi’. Machane fapi gosgos ni dariy fan ni yima ta’ e ma minmin e girdi’ ngay, machane, e gathi taab rogon ko felfelan’ nib riyul’. Fare felfelan’ ni aram reb e wom’ngin e kan ni thothup e aram e n’en ni ri dabiyog ngak e fayleng rok Satan’.​—Galatians 5:22, 23; Ephesians 5:3, 4.

8. Piin Kristiano e chiney e thingari tiyan’rad ko ngan dolo’loy fa ngan minmin, fa? Ngam weliy.

⁸ Bochan kan guy ni be gafgow e fayleng ko ngiyal’ n’ey, ma kad nanged ni chiney e gathi aram ngal’an ni nga ud minmingad. Chiney e gathi ngal’an ni ngad tiyan’dad ko fafel nge gosgos ara ngan pag ni nge par e “fafel” nib m’on ko tirok Got ban’en. (Mu taarebnag ko Ecclesiastes 7:2-4.) “Piin ni yad ma ngongliy e tin nu fayleng ban’en” e ngar pared ni “dabi mang ir e nge m’on uwan’rad,” ke yog Paul ni apostal. Mang fan? Bochan re fayleng n’ey e be thil iyan.” (1 Corinthians 7:31, NW) Gubin e rran ma tin riyul’ e Kristiano e ri yad ma nang ni gad be par ko ngiyal’ nri baga’ fan.​—Philippians 4:8.

Be Dolo’loy, Machane Riyul’ nib Felfelan’!

9. Uw rarogon e girdi’ ko ngiyal’ ni dawori mathrow e fayleng ko ran, ma mang e be fil ngodad e re nem ko ngiyal’ ney?

⁹ Girdi’ ni ur moyed ko ngiyal’ ni kan tharey e fayleng ko ran e gathi ri ur tiyan’rad ko par rorad. Kar ululgad ko maruwel ni yad ma tay u gubin e rran ma da ur dolo’loygad ni bochan e “kireb ko girdi’ [ni] ke yoor u fayleng ko ngiyal’ nem,” ma dariy fan uwan’rad ni yugu aram rogon ni “ke wer e kireb nga gubin yang.” (Genesis 6:5, 11) I weliy Jesus u murung’agrad ni yad ba gafgow, ma i yiiynag ni ngongol ko girdi’ e chiney e ku taabrogon ko ngiyal’ nem. Ke ginangdad: “Ni bod rogon fapi rran ni immoy nga m’on ko fa ngiyal’ i nem ni yib e ran nge tharey e binaw, un abich ma yibe garbod, ma be mabgol e pumoon nge ppin nge yan i mada’ ko rofen ni baaram ni yan Noah riy nga lan fare ark; machane da ur nanged e n’en ni ba yib ngorad nge yan i mada’ ko ngiyal’ ni baaram ni yib e ran nge tharey e binaw nge fekrad ni yad gubin. Ere aram rogon e ngiyal’ ni baaram ni bay yib e en ni Fak e girdi’ riy.”​—Matthew 24:38, 39.

10. Uw rogon piyu Israel ni ur moyed u nap’an Haggai ma kar daged ni gathi ri yad ma tayfan e tayim ni ke dugliy Jehovah?

¹⁰ Sogonapan 1,850 e duw u tomren, fapi rran ni immoy Haggai riy, ma boor e piin ni yad piyu Israel ni aram rogon e ngongol rorad ni yad ma dariyfannag e tirok Got ban’en. Bochan e yad be par ni boor e maruwel rorad ko ngiyal’ nem, ma aram ma dar poyed ni aram ngal’an ni ngar tiyan’rad ko tirok Jehovah ban’en. Be gaar: “Girdi’ e kar rogned nra gaargad: ‘Dawori taw ngal’an, fare tayim ni fan ko naun rok Jehovah, ni ngan toy.’ Ma ke yib biyay e thin rok Jehovah u daken Haggai ni prophet, ni be gaar: ‘Ffel’ ni ngam pared ko naun romed ni bay e panel riy ko ngiyal’ nra kireb e re naun ney? Ma chiney e ki yog Jehovah boch e thin ni gaar, “Mu tiyan’med ko kanawo’ romed.” ’ ”​—Haggai 1:1-5.

11. Mang boch e deer nib puluw ni ngad fithed gadad riy?

¹¹ Ere gadad e Pi Mich rok Jehovah ko ngiyal’ ney, ma bay ban’en nib mil fan ngodad nge boch e maruwel ni fan ku Jehovah ni taabrogon ko piyu Israel ko ngiyal’ ni immoy Haggai, mab fel’ ni ngad tiyan’dad ko uw rogon e par rodad e chiney, ma ngad rin’ed e re n’ey ni nge mus mus rogodad riy. Gad be “dolo’loy” ya ke gafgow e girdi’ ko re fayleng n’ey ma ke kireb fithingan Got ni bochan, fa? Ke amith uwan’dad ko ngongol ko girdi’ ni de mich Got uwan’rad ma ri dubrad ni ngar folgad ko kenggin e motochiyel rok nib mat’aw, fa? Kad boded e piin ni kan tay e pow nga dakenrad ni ke guyrad Ezekiel u nap’an ni kan pingeg e changar rok ni 2,500 e duw kakrom? Baaray boch e thin u murung’agrad ni gaar: “Ma ke yog Jehovah ngak [fare pumoon ni be fek tafen e tinta] ni gaar: ‘Man nga lan fare mach, man nga lan yu Jerusalem, ma ngam tay e pow nga peri’ e girdi’ ni be dolo’loy nge piin ni be gel’gel’ ko amith ni bochan e tin nib kireb ni yibe rin’ u fithik’rad.’ ”​—Ezekiel 9:4.

12. Mang e tin ni baga’fan u Ezekiel 9:5, 6 ni fan ko girdi’ e ngiyal’ n’ey?

¹² Ke tamilang uwan’dad feni ga’ fan e pi thin n’ey ngodad e chiney nfaan gad ra bieg e n’en ni kan nog ngak fa nel’ i pumoon ni be fek e talin e cham ni ngan pirdiiy ban’en ma be gaar: “Ngam man nga lan fare mach ma ngam li’rad. Ma dab mu runguyrad. Piin ni ke pillibthir, nge piin ni kab pagal ma dawori mabgol nge bitir ni kab achichig nge piin ni ppin ngam mu li’rad​—ni ngar m’ad ni yad gubin. Machane fa en ni bay e pow u daken e dabmu chuchugur ngak, ma ngam tabab u lan e gin thothup rog.” (Ezekiel 9:5, 6) Gad ra magay nib fas ko gafgow ni baga’ ni be yib nib papey e ma yan u rogon ni ke tamilang uwan’dad ni chiney e ri aram e tayim ko dolo’loy.

13, 14. (a) Miti mang girdi’ e ba felfelan’ ni yog Jesus? (b) Ngam weliy ko mang fan ni ga be lemnag ni pi thin ney e ba puluw ko Pi Mich rok Jehovah.

¹³ Pi tapigpig rok Jehovah e yad be “dolo’loy” ni bochan ke kireb e ngongol ko girdi’ ko re fayleng n’ey, machane, dabi talegrad e re n’ey ni nge dabra felan’rad. Ri ba thil! Ya yad e piin ni ri yad ba felfelan’ u fayleng. Ke pi’Jesus ban’en ni rayog ni ngan skengnag e felfelan’ riy u nap’an ni ke yog ni gaar: “Nge felan’ e piin ni ri ma lemnag e tirok Got ban’en, . . . piin ni ke kireban’rad, . . . piin ni ba sumunguy, . . . piin ni ke yib e bilig ngorad ko tin nib mat’aw ban’en, . . . piin ni ma dag e runguy, . . . piin ni ke machalbog e gum’ircha’rad, . . . piin ni ba gapas laniyan’rad, . . . piin ni yibe gafgownagrad ni bochan e yad be rin’ e tin nib mat’aw ban’en.” (Matthew 5:3-10) Bay boor e mich riy ni be dag ni pi n’ey e ba m’ag ko Pi Mich Rok Jehovah, ma kab fel’ nga rogon ni ma rin’ yugu boch e teliw.

¹⁴ Ka nap’an e duw ni 1919 ni aram e tayim ni kan sulweg fare liyor nib riyul’ nga rogon ma girdien Jehovah nib felfelan’ e bay tapgin ni ngara “minmingad”.” Bod ni kar uned ngak e piin ni kar bad u Babylon u fithik’ e felfelan’ ko bin nel e chibog B.C.E.: “Nap’an ni fulweg Jehovah e piin ni kan kolrad nga Zion, e gowa kada boded fapi cha’ ni kar lik’aygad. Ngiyal’ nem e ud minmingad, ma kad tanggad u fithik’ e felfelan’. . . . Jehovah e ke ayuwegdad, ma rogon ni ke rin’ e ka ni ngat ngay. Rib gel e felfelan’ ni ke yib ngodad.” (Psalm 126:1-3, NW) Machane, yugu aram rogon ni ya be felfelan’ ko tirok Got ban’en, ma Pi Mich rok Jehovah e ri ku yad ma lemnag ni gad bay ko tayim nib mo’maw. Fin nap’an ni ra yib i m’ug ni ke riyul’ fa bin nib biech e fayleng ma “ke yog ngak e girdi’ e yafas ni ir e bin riyul’ e yafas,” ma aram ke yib e tayim ni fare dolo’loy e kan thiliyeg ko minmin ni manemus.​—1 Timothy 6:19; Revelation 21:3, 4.

“Ngal’an ni Ngan Gumuchmuch nge Ngal’an ni Dabni Gumuchmuch”

15. Mang fan ni piin Kristiano e susun ni ngar mel’eged e girdi’ ni nge mang tafager rorad u fithik’ e gonop?

¹⁵ Piin ni Kristiano e yad ba gonop u rogon ni yad ma mel’eg be’ ni nge mang tafager rorad. Yad ma tiyan’rad ko fonow ni ke yog Paul ni gaar: “Dab mpaged gimed nga ni bannagmed, ya ra yan i bod ni ke lunguy. Nchag ngak e girdi’ nib kireb me kireb pangiy nib fel’.” (1 Corinthians 15:33) Ma i yog Solomon ni Pilung nib gonop ni gaar: “Fa cha’ ni ma un ko piin nib gonop e ra mang be’ nib gonop, machane fa en ni ma un ko piin nib balyang ma ra gafgow.”​—Proverbs 13:20, NW.

16, 17. Uw rogon e pi’ n’en ni bod e fager, nge dating, nge mabgol uwan’ e Pi Mich rok Jehovah, ma mang fan?

¹⁶ Pi tapigpig rok Jehovah e ma mel’eg be’ nib t’uf Jehovah rok nge be’ nib t’uf e kanawo’ rok Got nib mat’aw rok ni bod yad nge mang e tafager rorad. Yad be felfelan’ ni ngar chaggad ngak e pi tafager rorad, machane der ma pag ni pumoon nge ppin e ngar ranow nga bayang ni goo yow nfaanra dawora unew ko mabgol, ni bod ni ma yima rin’ e re n’ey u yugu boch e nam e chiney. Danir lemnag ni bay e magawon ni ra yib riy ya ke mus ni ya be un ko fafel, danga’, ya yad manang ni girdi’ ni nge un ko dating e susun yad e piin ni ke chuchugur ni ngar uned ko mabgol, ku susun yad e piin ni dowrad, nge lem rorad, nge tirok Got ban’en ma kar fal’eged rogorad ​—ku ra yodor ma dariy e thin nu Bible nni th’ab⁠—ma aram bay rogorad ni ngar uned ko mabgol.​—1 Corinthians 7:36.

¹⁷ Boch e girdi’ e yad ma lemnag ni piin ni der ma un ko re ngongol ney nib m’ag ko dating nge mabgol e yad be fol ko yalen ni kakrom. Machane Pi mich Rok Jehovah e der ma pag ni yugu boch e girdi’ e ra gagiyegnagrad nrogon ni ngar dugliyed ban’en nib m’ag ko dating nge mabgol. Yad manang ni “gonop rok Got e ke m’ug nib riyul’ ko tin ni kan guy ni ke yib.” (Matthew 11:19) Ri manang Jehovah urngin ban’en, arfan ni yad be fol ko fonow ni ke pi’ ngorad ni ngan mabgol ni “rogon nib puluw ko lem rok Somol.” (1 Corinthians 7:39; 2 Corinthians 6:14) Yad ma palog ko lem ni ngar uned ko mabgol nib papey ni faan ra magawon e mabgol ma ngar dargow. Gathi yad be gurgur ni ngar gayed fa en nib fel’ ni nge mang an mabgol rorad, ya yad manang ni tomren ni kar uned ko mabgol ma chingiyal’ nem e yad be par u tan e motochiyel rok Jehovah ni gaar: “Ya aram e gathi ku yow ba ruw ni girdi’, ya kar taab girdi’gow. Ere thingari dabi dareg e girdi’ e gali cha’ ni Got e ke chagiyrow.”​—Matthew 19:6; Mark 10:9.

18. Mang e rayog ni ngan rin’ ko tabolngin e mabgol ni nge yibnag e felfelan’ ko mabgol?

¹⁸ Mabgol e aram e yaram ni nge par nge mada’ko yam’ arfan ni ba t’uf ni ngan gonopiy u m’on ni ngan un ngay. Ma fare pumoon ni ma lemnag ni nge un ko mabgol e ffel’ ni nge fith ir, ‘Riyul’ ni ir fa en ni fel’ ni nggu mabgolgow?’ Machane ku baga’ fan, ni susun ni ngki fith, ‘Riyul’ ni gag e pumoon nib fel’ ni ngan figirngiy? Kug mon’og ko tirok Got ban’en ma aram rogon ma rayog rog ni nggu pi’ ngak e tin ba spiritual nib t’uf rok?’ Yow l’agruw ni yow be lemnag ni ngar mabgolgow e mil fan ngorow ni ngar mangew e tapigpig ku Jehovah nib gel e michan’ rorow, ma susun yow manang rogon ni ngar ayuwegew e mabgol nge par nib fel’ ma ra par nib m’ag ko lem rok Got. Bokum biyu’ e piin Kristiano ni kar rogned ni bochan kan weliy ni kab fel’ ni ngan pi’ ban’en ngak be’ ko bin ni be’ e nge pi’ ban’en ngom, ere ra yib e felfelan’ ko gali cha’ ni kefin ra mabgolgow nfaan yow ra un ko machib ni polo’ e tayim rorow.

19. Mang fan ni yugu boch e Kristiano e kar mel’eged ni ngar pared ni yad ba muchugbil?

¹⁹ Boch e piin Kristiano e kar folgad ko thin ni gaar, “ngal’an ni dabni gumuchmuch” ma aram kar dugliyed ni dabra uned ko mabgol ni bochan fare thin nib fel’. (Ecclesiastes 3:5) Ma boch e kar dugliyed ni dabra uned ko mabgol nge mada’ ko ngiyal’ kar mon’ogad ko tirok Got ban’en ma aram e tayim ni ngar pirieged be’ ni yad ra m’ag. Machane dabda paged talin ni piin Kristiano ni kar tafinaynaged ni ngar uned ko mabgol machane dawora pirieged be’ ni ngar mabgolgad. Ri gad manang ni be felfelan’ Jehovah ya dar th’abed e motochiyel rok ke mus ni bochan e yad baadag ni ngar uned ko mabgol. Kub manigil ni ngad daged ngorad ni gad be felfelan’ ya kar pared nib yul’yul’ ku Got mab fel’ ni ngad pied e athamgil nga laniyan’rad ya bay rogon ni ni ngan rin’ e re n’ey ni fan ngorad.

20. Mang fan ni yu ngiyal’ ma piin ni kar uned ko mabgol e ngar folgad ko thin nu Bible ni gaar, “dabni gumuchmuch?”

²⁰ Susun mus ko piin kar uned ko mabgol ma bay “ngal’an ndab ni gumuchmuch” fa? Ba tamilang ni aram rogon, ya ke yog Paul ni apostal ni gaar: “Pi walageg, baaray ban’en ni gu be yog, daki yoor e tayim ni ke magay, chiney iyan nga m’on e pumoon ni kar mabgolgad e ngar pired ni gowa dawor ra mabgolgad.” (1 Corinthians 7:29) Riyul’, ni boch e felfelan’ nge taw’ath ko mabgol ma ra tomur boch e maruwel ni fan ku Got. Rani lemnag e re n’ey nib thabthabel ma dabi warnag e mabgol machane ra gel iyan ya re n’ey e ra ayuweg fare pumoon nge ppin rok ni Jehovah e ir fa en ni ri rayog ni nge ayuwegrow ni ngar gel me par nib fel’ thilrow.​—Ecclesiastes 4:12.

21. Mangfan ni thingar dabda dugliy ban’en ngak e piin ni kar uned ko mabgol ko uw rogon ni ngar ayuweged e tabinaw rorad?

²¹ Ma ku reb, e boch e piin ni kar uned ko mabgol e kar dabuyed ni nge yog e bitir ngorad ya yad baadag ni nge yoor e tayim rorad ni fan ko pigpig ku Got. Ma biney e be dag ni ba t’uf ni ngar paged farad, me Jehovah e ra taw’athnagrad ni bochan. Yugu aram rogon, ma riyul’ ni be pi’ e Bible e athamgil nga laniyan’ be’ ni nge par ndariy e pumoon fa ppin rok ni fan ko thin nib fel’, machane de yog ni bochan nib fel’ ni dabi yog e bitir ngak e piin ni kar uned ko mabgol. (Matthew 19:10-12; 1 Corinthians 7:38; mu taarebnag ko Matthew 24:19 nge Luke 23:28-30.) Arfan, ni piin ni kar uned ko mabgol ma thingara dugliyed ni nge yan u rogon e par rorad nge rogon ni yad be lemnag u murung’agen. Yugu demtrug ko mang e yow ra dugliy, ma susun dab nog e thin nib togopuluw ko fa wu’ i mabgol.

22. Mang e n’en ni baga’ fan ni nge mudugil laniyan’dad ngay?

²² Arrogon, “urngin ban’en ma bay ngal’an ni ke mudugil ni ma buch u tan e pi tharmiy.” Ma aram bay “ngal’an e mahl nge ngal’an e gapas.” (Ecclesiastes 3:1, 8) Ma bin migid e article e ra weliy ko mang fan ni baga’ fan ni nge mudugilan’dad ko fagal tayim ma bin ngan ereray ngal’an.

Rayog ni Mu Weliy Fan?

◻ Mang fan ni baga’ fan ni ngad nanged ni “bay e tayim ni fan ko urngin ban’en”?

◻ Mang fan ni chiney ma ri aram “e tayim ko dolo’loy”?

◻ Mang fan ni piin Kristiano, yugu aram rogon ni “yad be dolo’loy,” machane riyul’ ni yad be felfelan’?

◻ Uw rogon ni be dag yugu boch e piin Kristiano ni yad manang “ngal’an ni dabni gumuchmuch”?

[Pictures on page 6, 7]

Mus ko piin ni Kristiano e yad be “dolo’loy” ni bochan ni ke kireb e fayleng e chiney . . .

. . . yad e girdi’ ni th’abi felfelan’ u ga’ngin yang e fayleng