“Ngal’an E Gapas” E Ke Chuchugur!

“Kan dugliy ngal’an ni fan ko urngin ban’en, . . . ngal’an e mahl nge ngal’an e gapas.”​—ECCLESIASTES 3:1, 8, New World Translation.

1. Mang e tin ni de puluw ni ke m’ug ko fa bin reliw e chibog nib m’ag ko mahl nge gapas?

BAGA’ ni girdi’ e ma athapeg ni ngeb e gapas, ma bay fan e re n’ey. Nap’an fa bin reliw e chibog ma kan guy ni ke buchuw e ngiyal ni bay e gapas riy ko yugu boch e chibog faram. Ma ba togopuluw e re n’ey, ya dawor ni rin’ ban’en ba ngiyal’ ni bod fani yoor ni yibe rin’ e chiney ni fan ko gapas. Duw ni 1920 e kan sunmiy fare League of Nations. Ma duw ni 1928 ma fare Kellogg-Briand Pact, ni rogon ni ke yog reb e reference work u murung’agen e ir “e bin th’abi ga’ ko urngin e ulung ni kar athamgilgad ni ngar awnaged e gapas u tomren fa bin 1 e Mahl nu fayleng,” ma ke ayuwegrad “e pi nam u fayleng ni ke chuchugur ni yad urngin . . . ma kan nog ni ke taareban’rad ni ngan taleg e mahl ma dabkun fanay fare motochiyel ko am nib m’ag ngay.” Me ere, duw ni 1945 e kan tay fare United Nations organization nga luwan e League of Nations ya aram e ulung faram ni ke war.

2. Mang e n’en ni be nameg fare United Nations, ma mang angin ni ke yib riy ngorad?

² Tin ni be nameg fare United Nations e taabrogon ko League of Nations ni aram e nge yib e gapas nga fayleng. Machane ke mus ni buchuw angin ni ke yib riy. Riyul’, ni dakuriy e mahl u fayleng e chiney ni taabrogon ko gali mahl nem kafram ni ke wer nga urngin e nam u fayleng. Machane, ka bay boch e magawon ko mahl nib achichig ma be gafgownag bokum biyu’ e girdi’ ma aram e kan chuweg e gapas u laniyan’rad, nge tin ni ba mil fan ngorad, me munmun ma ke un e yafas rorad ngay. Ere rayog ni ngad athapeged ni fare United Nations e rayog ni nge thiliyeg e bin 21 e chibog nge mang “ngal’an e gapas”?

Fare Def ko Gapas nib Riyul’

3. Mang fan ni dabiyog ni par u taabang e gapas nib riyul’ nge fanenikan?

³ Ra nge yog e gapas u thilin e girdi’ nge pi nam ma bay ban’en nib t’uf riy ma gathi ke mus ni ngan pag urngin ban’en. Rayog ni nge gapas laniyan’ be’ nfaanra yow be par be’ ni be fanenikay? Dangay rogon ni yog e 1 John 3:15: “En ni be fanenikay walagen ni girdi’en Kristus e be’ ni ma thang e fan ko girdi’.” Rogon e n’en ni buch ndawori n’uw nap’an e be micheg ni fanenikay nib gel e ra mom ni nge sum e cham riy.

4. Ke mus ni mini’ e rayog ni nge yibnag e gapas ngorad, ma mang fan?

⁴ Bochan ni Jehovah “e ba Got ni ma pi’ e gapas,” ere ke mus ni piin nib t’uf Got rorad ma yad ma tayfan e motochiyel rok nib mat’aw e ma yib e gapas ngorad. Ba tamilang ni dabi pag Jehovah ni nge yog e gapas ngak urngin e girdi’. “‘Dariy e gapas,’ ke yog e Got rog, ‘ngak e piin nib kireb.’” Susun aram rogon ya dabun e piin nib kireb ni nge pow’iyrad e kan ni thothup rok Got, nreb wom’ngin e aram e gapas.​—Romans 15:33; Isaiah 57:21; Galatians 5:22.

5. Mang e n’en ni de yib nga laniyan’ e tin riyul’ e Kristiano?

⁵ I mahl boch e girdi’​—ni taabrogon ko pi n’en ni ma rin’ e piin ni yima yog e pi Kristiano ngorad, ni bod rogon ko mang e ke buch ko fa bin 20 e chibog​—e n’en ni der ma lemnag e tin riyul’ e Kristiano. (James 4:1-4) Riyul’, ni yad ma togopuluw ko machib ni der weliy e tin riyul’ u murung’agen Got, machane re cham n’ey e kan tay ni fan ni nge ayuweg boch e girdi’, ma gathi ngan kirebnagrad. Ngan togopuluw ko yugu boch e girdi’ ni bochan ni ba thil e teliw rorad ara ngan gafgownag e dowef rok yugu boch e girdi’ ni bochan e ba thilthil e nam rorad e ra aram rogon ma kari togopuluw ko machib ko tin riyul’ e Kristiano. “Faanra ke mab e kanawo’, nge yan u rogon ni gabe lemnag ban’en,” ma ke weliy Paul ngak e piin Kristiano nu Roma ni gaar, “ngam pired ni ba aw e gapas u thilmed nge urngin e girdi’.”​—Romans 12:17-19; 2 Timothy 2:24, 25.

6. U uw e rayog ni ngam pirieg e gapas nib riyul’ riy e chiney?

⁶ Ngiyal’ ney, ma fare gapas ni yib rok Got e kari mus ni rayog ni ngan pirieg ko piin ni riyul’ ni yad be pigpig ku Jehovah. (Psalm 119:165; Isaiah 48:18) Dariy e magawon ni bod e towal ni be magawonnag e gapas u fithik’rad, ya yad gubin u urngin yang u fayleng ni yad be par u mathilin ma darir uned ko towal. (John 15:19; 17:14) Ya yad gubin e yad ba “taareb ma taab pa’ laniyan’rad ma taa ban’en ni yad be nameg,” dariy e magawon ko teliw rorad nra kirebnag e gapas u fithik’rad. (1 Corinthians 1:10) Fare gapas ni bay ko Pi Mich rok Jehovah e aram reb e maangang ko ngiyal’ ney, ma Got e ke n’igin ni nge yib ngorad e re ney nib puluw ko thin ni ke micheg ni gaar: “Bay gu tay ni gapas e ir e ga’ romed nge tin nib mat’aw ban’en e ra mang maruwel romed.”​—Isaiah 60:17, NW; Hebrews 8:10.

Mang Fan “e Ngal’an e Mahl”?

7, 8. (a) Yugu demtrug ni yad e piin ni baadag e gapas, ma be finey e Pi Mich rok Jehovah ni chiney e aram e ngal’an e mang? (b) Mang e bin baga’ e talin e cham ni rib t’uf ko reb e Kristiano?

⁷ Yugu demtrug ni yad be par u fithik’ e gapas, machane Pi Mich rok Jehovah e yad be lemnag ni chiney e ri aram “e ngal’an e mahl.” Ma gathi mahl nib riyul’ e aram, ya ngan fanay e talin e cham ni ngan towasariy yugu boch e girdi’ ni ngar folgad ko thin nu Bible e de puluw ko pong ni ke yog ni “en ni baadag e nge fek fare ran ko yafas ndariy puluwon.” (Revelation 22:17) Dan towasariy e girdi’ u roy! Fare mahl nib spiritual e be un e Pi Mich rok Jehovah ngay. Ke yoloy Paul ni gaar: “Talin e cham ni gamad be maruwel ngay ko cham ni gamad be tay e gathi talin e cham nu roy u fayleng, ya talin e cham nib yargel ni yib rok Got, ni ir e ngan kirebnag ngay yungi n’en ni ke fal’eg moonyan’ rogon ni ke par riy ni be cham ngodad.”​—2 Corinthians 10:4; 1 Timothy 1:18.

⁸ Fare “talin e cham rodad ni fan ko mahl nib gel” e aram “fare sayden ko kan, ni aram e thin rok Got.” (Ephesians 6:17) Aram e thin ni bay gelngin. “Ya thin rok Got e ba fas ma ba’ gelngin ni ma maruwel. Ya kab m’uth nga bangi sayden ni ruw raba’ ma mm’uth.Ya ma yan nge yan i taw nga fithik’ i laniyan’dad ko n’en ni gadad be lemnag, nge fithik’ e ul’ul nge yil, ma ma pufthinnag e n’en ni yima yim’ ni bochan nge tin ni yima lemnag.” (Hebrews 4:12) Ran fanay e re sayden ney, ma piin Kristiano e rayog ni ngar buthuged “urngin e lem nib tolang ni yibe togopuluwnag ko tin ni kan nang ni murung’agen Got.” (2 Corinthians 10:5) Ma rayog ni ngar kirebnaged e machib ni googsur ni bochan, nge boch e ngongol ni ma kirebnagey, nge philosophies ni aram e llowan’ ko girdi’ ma gathi birok Got e gonop.​—1 Corinthians 2:6-8; Ephesians 6:11-13.

9. Mang fan ni dabni tal ni ngan cham ko dowef ni tadenen?

⁹ Yugu reb e mahl nib spiritual e aram e cham ko dowef ni tadenen. Piin Kristiano e yad be fol ko tin ni ke rin’ Paul, me gaar: “Kug gelnag dowag ko tug ni be aw ngay ke yan i par ni be fol rog, ni fan e nge dab nn’igeg u tomren ni kug pining boch e girdi’ ni ngar uned ko re gosgos nem.” (1 Corinthians 9:27) Piin Kristiano u Kolose e kan fonownagrad ni ngar lied ngem’ “e ar’ar nu fayleng ni be maruwel u fithik’ i dowrad ni aram e darngal, puwlag, nge ar’ar nib kireb ni ma wawliy e girdi’ ko denen, nge chogow, ni aram ba m’ag e re n’ey ko meybil ko liyos.” (Colossians 3:5) Ma reb e ta yol ko Bible ni Jude e i fanownag e piin Kristiano ni ngar “athamgilgad ni nge mus mus rogorad riy ni nge par nib gel e michan’ rorad ni ke mus ni taab yay ni kan pi’ ngak e piin nib thothup.” (Jude 3, NW) Mang fan ni thingarda rin’ed e re n’ey? Be fulweg Paul ni gaar: “Ya faanra um ngongolgad nrogon nib m’agan’ e dowef romed ngay ma gimed ra yim’; machane faan gimed ra li’ ngem’ e ngongol romed nib kireb nga gelngin fare Kan ni Thothup, ma gimed ra fas.” (Romans 8:13) Bochan e pi thin n’ey nib tamilang, ma dabda talgad ko cham ni gad ma ta’ ni fan ko ar’ar nib kireb.

10. Mang e ke buch ko duw ni 1914, ma ra pow’iy e re n’ey ni ngeb e mang dabki n’uw nap’an nga m’on?

¹⁰ Ku yugu reb e kanawo’ nrayog ni ngad lemnaged ni chiney e aram e ngal’an e mahl ni bochan be chuchugur iyan “fare rran rok Got ni nge fulweg taban e tin nib kireb. (Isaiah 61:1, 2) Duw ni 1914, ma ke taw ngal’an ni ke dugliy Jehovah ni nge sunmiy gil’ilungun Jesus Kristus ma ra pi’ mat’awon ni nge cham ko maruwel rok Satan nib gel. Fare ngal’an ni kan dugliy ni nge guy e girdi’ rogon ni nge gagiyegnag yugu boch e girdi’ ni dabi rin’ Got ban’en ngorad e ke m’ay ko ngiyal’ nem. Susun nge fel’ e gagiyeg rok Kristus uwan’ e girdi’, machane dangay, ya boor i yad e ri dabun, ya aram rogon e girdi’ ni ur moyed ko fa bin som’on e chibog ni boor i yad e kar dabuyed Jesus. (Acts 28:27) Ma bochan kan togopuluw ko gagiyeg rok Kristus, ma aram e be athamgil ni nge “suwey u fithik’ e pi toogor [rok].” (Psalm 110:2) Ma Revelation 6:2 e be micheg u fithik’ e felfelan’ u murung’agen Jesus ni “nge yan ko mahl nge gel.” Ma ra rin’ e re n’ey u nap’an “fare mahl ni aram fare rran rok Got ni ir e bin Th’abi Tolan . . . , ma re mahl nem e yima yog ko thin ni Hebrew ni Har–Magedon.”​—Revelation 16:14, 16.

Chiney e “Ngal’an ni Ngan Non”

11. Mang fan ni ri be par Jehovah nib gum’an’, machane mang e n’en nra yib?

¹¹ Ka nap’an e duw ni 1914 ni aram e ngiyal’ ni kari thil e par ko girdi’ u fayleng, ma ke yan 85 e duw e chiney. I Jehovah e kari k’adan’ rok e girdi’. Me n’igin ni ngari nang e Pi mich rok ni ke buchuw e tayim ma ba t’uf ni ngan rin’ ban’en nib papey. Bokum million e girdi’ ni bay e riya’ ko yafas rorad e chiney. Ma pi girdi’ nem e ba t’uf ni ngan ginangrad ya “dabun Jehovah . . . ni bay be’ ni nge yim’ ya baadag ni nge urngin e girdi’ ma ra pied keru’rad ko urngin e denen ni yad be rin’.” (2 Peter 3:9, NW) Machane, daki n’uw nap’an ma “ra m’ug Somol Jesus u lan e lang ni ke yib u tharmiy ni yad e pi engel rok nib yargel.” Me ere, urngin e piin ni kar siyeged fare thin nib m’ag ko Gil’ilungun Got ni lem rorad e ra aw ngorad fare “filben” ni nge fek Jesus i yib ngak e “piin nde t’uf rorad ni ngar nanged murung;agen Got nge piin ndarir folgad ko thin nib fel’ ni yib rok Got ni murung’agen e Somol Rodad i Jesus.”​—2 Thessalonians 1:6-9.

12. (a) Mang fan ni dariy fan ni ngan sumarnag ko wuin e ra tabab fare gafgow ni baga’? (b) Ma mang e riya’ ni bay riy ni ke ginangrad Jesus?

¹² Wuin e ra m’ay e gum’an’ rok Jehovah? Dariy fan ni ngan sumarnag ko wuin e ra tabab fare “gafgow ni baga’”. I weliy Jesus nib tamilang ni gaar: “Machane re rran nem nge re awa nem e dariy be’ ni manang e ngiyal’ nra taw riy.” Ma aram, i fonownagrad ni gaar: “Ere mu fal’eged rogomed ngam pired, ya da mu nanged e chirofen ni bay yib e Somol romed riy. . . . Ereray fan ni ngkum pired ni gubin ngiyal’ ni kam fal’eged rogomed kam pired, ya en fak e girdi’ e ra yib u reb e awa ndamur fineyed nra yib riy.” (Matthew 24:21, 36, 42, 44) Ran weliy rogon nib mom, ma pi thin nem e be dag ni gubin e rran ma thingarda pired ni gad be yaliy ko mang e be buch u fayleng ma nga uda lemnaged nra tabab fare gafgow ni baga’. (1 Thessalonians 5:1-5) Bay e riya’ riy ni ra ngad lemnaged ni rayog ni ngad pared ko par nib mom ni bod rogon u gubin e rran nga ud songad ngan guy ko mang boch ban’en ni be mon’og! Me gaar Jesus: “Mu ayuwgad, ma dab mpaged gimed nguum pired ni ba ga’ ni mur ni ke pag rogon nge muun rrum e gimed be maruweliy, nge pi n’en ni ma magafan’uy ngay ko biney e tamilang, ya richey mi gimed da’da’ ko re rran nem ni ke taw ngomed. Ya ra taw ngak urngin e girdi’ nu fayleng ni bod rogon ba wup ni pangthal.” (Luke 21:34, 35) Bay ban’en ni ke mudugil uwan’dad: Fa “aningeg e nifeng” ko magothgoth ni fa “aningeg e engel” rok Jehovah e be taleg ni nge dabi kirebnag e girdi’ e dabni taleg ni dariy n’umngin nap’an.​—Revelation 7:1-3.

13. Ke chuchugur ko nel’ e million e girdi’ ni kar poyed?

¹³ Bochan ni ba papey ni be chugur iyan ni ngani pufthinnag e piin nib kireb, ma aram pi thin rok Solomon ni gaar ni bay e “ngal’an ni ngan welthin” e ri baga’ fan ko ngiyal’ ney. (Ecclesiastes 3:7) Ma bochan ni kar nanged ni chiney e ri aram e ngal’an ni ngan welthin ngak be’, ma aram ke chuchugur ko nel e million e Pi Mich rok Jehovah ni be non ko girdi’ u fithik’ e pasig u murung’agen rogon nib felfelan’ e gagiyeg rok Got ma yad be ginang e girdi’ u murung’agen e rran rok Got ni nge fulweg taban e tin nib kireb. Kar pied yad ku Got u fithik’ e felfelan’ ko ngiyal’ n’ey ni aram e rran ko pi salthaw rok Kristus.​—Psalm 110:3; 145:10-12.

Piin Ma Yog e “Gapas, ko Ngiyal’ ni Dariy e Gapas”

14. Mini’ e pi profet ni googsur ni ur moyed u nap’an e bin dalip e chibog B.C.E.?

¹⁴ Nap’an fa bin medlip e chibog B.C.E., ma gali profet rok Got ni Jeremiah nge Ezekiel e kar weregew e thin ni fan ni ngan pufthinnag Jerusalem ni bochan e kar folgad ko kanawo’ nib kireb ma kar togopuluwgad ku Got. Fare magothgoth ni kar rogned ngorad e ke lebug ko 607 B.C.E., yugu demtrug ko piin ni ke l’og Got ngorad e ke togopuluw ngorad e pi tayugang nib gilbuguwan ko boch teliw. Ma ke m’ug ni pi cha’ nem e yad e “pi profet nib balyang [ni yad] . . . be bannag e girdi’ [rok Got], me gaar, ‘Bay e gapas!’ ko ngiyal’ ndariy e gapas riy.”​—Ezekiel 13:1-16; Jeremiah 6:14, 15; 8:8-12.

15. Bay e pi profet e chiney ni bod yad, fa? Ngam weliy.

¹⁵ Taab rogon ko “fapi profet nib balyang” ko ngiyal’ nem, ma pi tayugang ko yugu boch e teliw ko ngiyal’ n’ey e baga’ ni da ur rogned ngak e girdi’ murung’agen fare rran rok Got ni bay yib ni nge pufthinnag e girdi’ riy. Ma n’en ni kar rin’ed, e aram kar fal’eged e sasing nib fel’ yaan ni be dag ni bay ba ngiyal’ ni nge yog e gapas nge par nib mudugil ngak girdien e am. Bochan ni yad baadag ni ngar felfelan’aged e girdi’ ko bin ni ngar felfelan’ag Got, ma aram kar rogned ngorad e pi n’en ni yad baadag ni ngar motoyilgad ngay ma dar weliyed ngorad u murung’agen Gil’ilungun Got ni kan sunmiy ma Kristus ni ir e Pilung riy ni ke chuchugur ni nge gel ko mahl ni polo’. (Daniel 2:44; 2 Timothy 4:3, 4; Revelation 6:2) Bochan ni yad e pi profet ni googsur, ku yad ma yog u murung’ agen e “gapas, ko ngiyal’ ni dariy e gapas riy.” Machane dabki n’uw nap’an ma ra m’ay e pagan’ rorad nge yib e ma rus ngorad nib tomgin u nap’an ngar guyed Fa En ni kari damumuw ngorad ya kar t’ared e thin nga daken ma kari kirebnaged fithingan. Fapi tayugang ko pi yuraba’ i teliw ni googsur, e bod be’ ni ppin ni ma un ko darngal rogon ni yog e Bible, ma ri yad ra l’ad u nap’an ni yad be tolulnag e gapas u fithik’ e sasalap.​—Revelation 18:7, 8.

16. (a) Pi Mich rok Jehovah e kan nang ni yad e piin ni mang? (b) Uw rogon ni yad ba thil ko piin ni ma tolulnag ni bay e “gapas, ko ngiyal’ ney ni dariy e gapas riy”?

¹⁶ Riyul’ ni piin nib tolang e liw rorad ma boor e girdi’ ni ma sap ngorad e baga’ ni ka yad ma yog ni ngeb e gapas ngodad. Machane, piin ni ke michan’rad ko tin ni ke micheg Got ngorad ni nge yib e gapas nib riyul’ e be par nib mudugil laniyan’rad. Ke pag taareb chibog, ni Pi Mich rok Jehovah e kar daged ni yad e piin ni ma ayuweg e thin rok Got u fithik’ e yul’yul’, darur rusgad ni ngar togopuluwnaged e machib ni ma ta’ e teliw ni googsur, ku darur rusgad ni yad be par ni yad e ta ayuw ko Gil’ilungun Got. Gathi ke mus ni bod ni yad be tang ni nge mol e girdi’ ko boch e thin u murung’agen e gapas ni fel’ ni ngani motoyil ngay, ya yad ma athamgil ni ngar puged yad ni ngar nanged ni chiney e aram e ngal’an mahl.​—Isaiah 56:10-12; Romans 13:11, 12; 1 Thessalonians 5:6.

Dabki Th’ab Jehovah Gulungan

17. Mang fan fare bugithin ni dabki n’uw nap’an ni nge th’ab Got gulungan?

¹⁷ Ku ke yog Solomon ni gaar: “Fare Got ni riyul’ e ra pufthinnag e piin nib mat’aw nge piin nib kireb, ya bay ngal’an ni fan ko urngin ban’en.” (Ecclesiastes 3:17) Arrogon, bay ngal’an ni ke dugliy Jehovah ni nge pufthinnag e pi teliw ni googsur nge “pi pilung nu fayleng ni [yad] be par nib . . . togopuluw ngak maku yad be par nib togopuluw ko piin ni kan dugliyrad.” (Psalm 2:1-6; Revelation 16:13-16) Faan ra yib e re ngiyal’ nem, ma dabkun “th’ab” gulungan Jehovah. (Psalm 83:1; Isaiah 62:1; Jeremiah 47:6, 7) Ma ra “non” Got u daken Jesus Kristus ni ir e Pilung ni kan dugliy ko thin nib mudugil ni manang e pi toogor rok fan: “I Jehovah e ke yan ni bod rogon be’ nib falu’ ma ba sorok. Ke fal’eg rogon ni fan ko mahl. Ra tolul, arrogon, bayi tolulnag ni ngan mahl; me dag ni kab gel gelngin ko pi toogor rok. ‘Ke n’uw nap’an ni ug par ni kug th’ab gulungag. Kug par ni da gu non. Kug t’ar laniyan’ug. Gu be non ni baga’ lungug ni bod be’ ni ppin ni nge gargel ma gu ra gel’gel’ ko amith, ma gu be rin’ u taabangiyal’. Bay gu kirebnag e yungi ted nge pi burey, mu gu mororoynag e pan nge gek’iy riy. Bay gu gagiyegnag e pi lul’ ni nge melik. Ma bay gu ayuweg e piin nib malmit ni ngar ranod ko kanawo’ ni dar nanged; u daken yu pa’ i kanawo’ ni dawora milekaggad riy. Lumor ni yad be par u fithik’ e bay gu pingeg nge ngal’ ni tamilang, ma yungi ted ni bay nga m’on rorad e bay gu pacheg. Pi n’ey e ri gu ra rin’ ma ri dabgu pagrad.’ ”​—Isaiah 42:13-16, NW.

18. Uw rogon ni pi girdien Got e dabki n’uw nap’an ma yad ra “th’ab gulungrad”?

¹⁸ Nap’an ni ra ‘non’ Jehovah ni nge ayuweg e liw rok ni ri ir e Got, ma daki t’uf ni ngar rogned bbugithin ni ngar ayuweged yad. Ya aram ngal’an ni ngar “th’abed gulungrad.” Taab rogon ko pi tapigpig rok Got kakrom, ma pi thin ni ba aray e ba m’ag ngorad ni gaar: “De t’uf ni ngam un ko cham ko ngiyal’ nem. Ngam par ko gin kan tayem riy, ngam par ni gab sak’iy mag guy ko uw rogon ni nge ayuwegem Jehovah.”​—2 Chronicles 20:17, NW.

19. Mang angin e maruwel ni pi walagen Kristus e ke chuchugur ni nge yib ngorad?

¹⁹ Rib gel e gafgow ni ngeb ngak Satan nge ulung rok ko ngiyal’ nem! Pi walagen Kristus ni kan tolangnagrad e yad ra un ngak ni ngar kirebnaged e tin nib kireb ma ri yad ra gel ko re mahl nem nib mat’aw, nib puluw ko tin ni kan micheg ni gaar: “Mi Got ni ir e ma pi’ e gapas ngodad e dab ki n’uw nap’an me pirdiiy Satan u tan e rifrif u aymed.” (Romans 16:20) Fare ngal’an e gapas ni be sonnag e girdi’ nib n’uw nap’an e ke chuchugur.

20. Mang e ke chuchugur ngal’an ni nge yib?

²⁰ Rib taw’ath urngin e tin nib fas u fayleng ni kar magaygad nib fas u tomren ni ke dag Jehovah gelngin ko re mahl nem! Ma dabki n’uw nap’an u tomren ma ra yib fare ngal’an e fas ko yam’ ma rayog ni ngan chag ngorad e piin ni pumoon nge piin ni ppin ni kar m’ad nib yul’yul’ ku Got. Nap’an e gagiyeg rok Kristus u lan taareb e biyu’ e duw e riyul’ ni aram “e ngal’an ni ngan yung ban’en  . . . , nge ngal’an ni ngan golnag e piin nib m’ar . . . , nge ngal’an ni ngan toy e naun . . . , nge ngal’an ni ngan minmin . . . , ma ngal’an ni ngan titimog . . . , nge ngal’an ni ngan gumuchmuch . . . nge ngal’an ni ngan dag e t’ufeg.” Arrogon, ma aram e “ngal’an e gapas” ni dariy n’umngin nap’an”!​—Ecclesiastes 3:1-8; Psalm 29:11; 37:11; 72:7.

Mang E Fulweg Rom?

◻ Mang e def ko gapas ndariy n’umngin nap’an?

◻ Mang fan ni Pi Mich rok Jehovah e yad be lemnag ni chiney e aram fare “ngal’an e mahl”?

◻ Wuin e “ra non” e girdien Got, ma wuin e yad ra “th’ab gulungrad”?

◻ Uw rogon ma wuin e ra th’ab Jehovah gulungan?

[Box/​Pictures on page 13]

Ke Dugliy Jehovah Ngal’an

◻ ni nge cham Gog ngak girdien.​—Ezekiel 38:3, 4, 10-12

◻ ni ngan ta’ nga gum’ircha’en e piin ni baga’ lungungrad ni ngar kirebnaged fare Babylon nib gilbuguwan.​—Revelation 17:15-17; 19:2

◻ ni ngan ayuweg e mabgol ko fare Fak e Saf.​—Revelation 19:6, 7

◻ ni ngan tababnag fare mahl ni Har–Magedon.​—Revelation 19:11-16, 19-21

◻ ni yira m’ag Satan ya nge tababnag Jesus e gagiyeg rok u lan reb i biyu’ e duw.​—Revelation 20:1-3

Pi n’en n’ey e kan yoloy ko re ke babyor ney ni yaram riy e bpuluw ko uw rogon ni kan yoloy e pi thin ney u Bible. Ba mudugil ni nge lebug fa lal e n’en ni kan yoloy ni nge buch nga m’on nib puluw ko mang e be finey Jehovah u murung’agen nge ri wuin.

[Pictures on page 15]

Nap’an e gagiyeg rok Kristus u lan taareb e biyu’ e duw ma riyul’ ni aram fare ngal’an . . .

e minmin . . .

e gumuchmuch . . .

e t’ufeg . . .

e ngan yung . . .

e titimog . . .

e toy e naun . . .