Mang E Thingar Mu Nang U Murung’agen E Pig

CHINEY-KO tiney e rran e ba mo’maw’ ni ngan weliy fan e pig. Ni bochan ni piin ni ma pig e rib thil thil e pi n’en ni yad ma rin’. Dariy ban’en ni thingar ur fol gad riy fa ba machib ni yad be fol riy fa bake babyor nib thothup ni be taareb nag e michan’ rorad. Ma kub thil thil yalrad, ulung rorad, nge ngongol rorad, nge lem rorad ko kun Got e ngar tayed fan. I yog reb e tayol ni gaar: “Fare occult e be dag ko girdi’ boor e kanawo’ ni rayog ni ngar folgad riy.” Ma reb e gaar: “Boor e Neo-Pagan ni gathi ri ma taareban’rad nga ban’en.”

Ma oren i yad, e dariy e magawon riy ni fan ni der taareban’rad ara ba thil thil e pi n’en ni yad be yog. Baken e babyor ni fen i piin i yad baadag e pig e be gaar: “Faan bay mu magawon u ban’en ni bochan e daki papuluw fa pi n’en ni kanog, me ere mu fal’eg i guy e pi n’en ney ko re babyor ney nge mang gur e mu guy ko bin ngan e ngam rin’. I gur e nga mu lemnag e bin nib fel’ ni ngam rin’. Ni aram i gur, e ba puf rogom ni rayog ni gur e ngam guy ere mit ni ngan e pig ara reb e babyor ni kam pateg ni ga baadag fa ga be finey nib mat’aw ni ngam rin’”

Ma piin ni kar nanged ni bay e tin riyul’, e faanra thil thil ban’en ma kar nanged ni ke kireb fa daki puluw fapi n’em. Ya ban’en nib riyul’ e ba mich, nib riyul’. Pi n’en nib riyul’ e gathi kemus ni bochan ni be lemnag be’ fa be athapeg be’ fa be mich uwan’ be’ nib riyul’ fa pi n’en. Wod rogon, ba ngiyal ni mich uwan’ e togta ni rayog ni ngan golnag e pneumonia ni faan yira sey ba nimen nib fas ngani tay nga daken ngorngoren fare m’ar. De maruwar, ni boor e m’ar ni mich uwan’rad ni yad ra gol ko re tafalay nem. Pi n’en i mich uwan’rad muur athapegned, e dariy e mich riy​—ni rayog ni nge golnag e pneumonia. Girdi’ e dar ma sunumiy e riyul’; yad ma guy rogon ni ngar nanged fan.

Bible e bay e tin riyul’ riy ni murung’agen e tirok Got ban’en. Jesus kristus, ni immoy u but, e meybil ngak e Chitamangin ni gaar: “Thin rom e ba riyul’.” (John 17:17, New World Translation) Me yol apostal Paul ni gaar: “Urngin e thin ni bay ulan e babyor nib thothup e Got e yib i pi’ nga laniyan’ e girdi’.” (2 Timothy 3:16) Boor e girdi’ nib ta pig e der mich uwan’rad. Ere, ki yad be gay boch e tamilang nge n’en ni nge pow’iyrad ko yat ara chep ni kakrom, nge teliw ni kakrom, ma ku e ri tay e thin ko lowan ni bogi n’en ni yibe susunag ma gathi riyul’. Ere gathi kab puluw, ni ngam lemnag e n’en be yog e Bible? Ya ba dake, ga’ngin yang u fayleng e kar nanged nib ke babyor nib thothup. Ku e ri tay ni kub ken e tin thabi kakrom e babyor ko teliw ni ke par ke mada’ ko chiney. Bible ni kan yoloy ni ke pag e 1,600 e duw, ma ka yugu rogon e pi n’en be yog ara be fil ni dawori thil. Ere ngad taareb niged boch e n’en ni be fil e Bible nga boch e n’en nib ga’ ni be yog e piin yad ma mon’ognag e pig ni baga’ ni ma michan’rad ngay.

Mini’ e Ma Par ko birok e Kan e Giyow?

Reb e deer ni ba’ ko baaray ni yibe gay ni ngan nang murung’agen e kan e baaray ni gaar, Mini’ e be par ko birok e kan e giyow? Napan e tin chiney e witches e yad ma maruwel bogi ban’en ko re fayleng ney, ma boor e got ni ma michan’rad ngay, bochi yad e ma liyor nga ba got ni yad ma yog ni baga’ nib matin ni rogon ni yad ma changar ngay e dalip gosgoson ma m’ug ni bochi rugod, fa ba matin, ara ba pillibthir ni ke mo’duldul dow, ni aram e be sorfan ko yangren e girdi’. Ma bay reb e got ni pumoon nib fel’ e thin rorow ni bay e gagey rok. Ma boch e pi witches nem e ma liyor ngak ba got ni pumoon nge ba got ni ppin u taabang. Reb e girdi’ nib ta yol e gaar: “Fare Got nib pumoon nge ppin e ma m’ug bagayow e ba sumunguy gelngin ma ba ga yow e ba rarogon i pumoon nib gel gelngin. Ra ba ga yow ma bathil rogon gelngin ara gosgoson ngak bagayow ma nap’an ni yira puthuy gelngirow nga taabang me sum e yafas.” Maku reb e tayol e gaar: “Reb e ban’en ni ri ma rin’ e pi ta pig nem e gur e ba mil fan ngom ni nga mu mel’eg ko tin ngan e Got (tini Pumoon fa/tini Ppin) e ngam maruwelgow. . . . Tiney e girdi’ e yad ma pi’ matawum ni gur e ngam mel’eg e bin ngan e Got e nguum ta’ fan.”

Urngin e pi n’en ney ma dariy reb ni ba puluw ko Bible. Jesus Kristus e n’umngin napan e machib rok ni i machibnag ngak e girdi’ murung’agen Jehovah, “ni goo ir e bin riyul’ e Got.” (John 17:3) Bay u Bible ni gaar: “Jehovah e ir ani ga’ ma thingar ni ta’ fan, me ir e nga un rus ngak u fithik’ urngin e got. Ya urngin e yug got ko girdi’ e dariy farad.”​—1 Chronicles 16:25, 26.

Me ere ba uw rogon fare Moonyan’? Fare babyor ni Webster’s Ninth New Collegiate Dictionary e yog fan e pig ni “yibe non ko moonyan’.” Ke mo’maw’ ni ngan pirieg reb e girdi’ ni ta pig ni ra gaar e aram rogon fan e pig, ya boor i yad e der lemnag ni ba’ Satan ni Moonyan’. Bay reb e rugod, ni weliy murung’agen u lan e The Irish Times ni ir reb “e ta pig nib tolang ma ir e ga’ u reb e ulung ko pi girdi’ ni ta pig nem u Ireland,” e baaray rogon ni weliy ni gaar: “Michan ko Moonyan’ e aram e be m’ug ni kam adag e Kristiano . . . [Fare Moonyan’] e dabiyog ni par u palpalthib ni dariy e Got riy.”

Bible e be micheg ni bay Moonyan’ me yog ni ir tapgin boor e gafgow nge wagagey u fayleng. (Revelation 12:12) Jesus e gathi ke mus ni i fil ko girdi’ ni bay Moonyan’ ya ki dag ko girdi’ ni ku rayog ni nga un rin’ e tin magan’ Moonyan’ ngay ni dan nang. Ni bod rogon, e pi tayugang ko teliw rorad kakrom u nap’an e bin som’on e chibog ni ur lemniged ni teliw rorad e ba mat’aw ma yad ma lemnag, ni yad pi fak Got ma be mich uwan’rad ni yad be rin’ e tin m’agan’ Got ngay. I Jesus, ni rayog ni nge nang e n’en bay u gum’ercharad, e manang ni gathi aram rogon. Ri yog ngorad ni gaar: “Gimed e pi fak e chitamangimed, ni fare Moonyan’, ma gimed baadag ni ngam folgad ko tin nib magan’ e chitamangimed ngay.” (John 8:44) Ma ku, errogon ni ba’ ko Bible ko Revelation ni be yog ni fare Moonyan’ e be “bannag e girdi’ nu fayleng ni polo’.”​—Revelation 12:9.

Bay Boch e Pig nib Fel’?

Pig, e gubin ngiyal’ nib chag ko sothuw.a Boor e girdi’ kakrom nge chiney ni ma mich uwan’rad ni pig ni ma tay fa pi cha’ ni kan nog e witches ngorad e ma yib nag e gafgow fa riya’ ngak e girdi’. Pi girdi’ ney ni Witches e kan nog ni yad ba manging ko pig ni ngebnag e amith nib gel fa yam’. Rogon laniyan’ e girdi’, e pi girdi’ ni witch nem e goo yad e yad be bucheg waathan e girdi’, ma yad be k’aring e m’ar, yam’, nge yong’ol ko but’ ni kar kirebniged.

Pi girdi’ nem e yad be yog ni pi n’en nem ni yibe yog ni yad ma rin’ e gathi riyul’. Chiney ni goo kan nang ni bay boch e witch ni yad ba kireb ma dar yul’yul’gad ni yad ma ngongliy bogi n’en nib kireb, e boor i yad e yad be yog ni pig ni fel’, ni ma fel’ rogoy riy e yad ma rin’ ma gathi tin kireb e pig. Yad ma yog ni angin e pig ni ma tay be’ e ma sul angin ngak ni gonapan dalip yay gelngin ni ra sul ko faani pig ma rogned ni aram e n’en ni rib togopuluw ko pi yaba’. Boch e pig ni yad ma tay e wod e pig ni nge ayuwegem, fa pig ni nge n’ag fan e pig ni manga tay be’ ni ki i par ko naun kam man mu par ngay, fa pig ni nge adagem be’, fa pig ni nge golnigem ko m’ar ma ga par ni dab kuum m’ar, fa pig ni nge dab ni chuwegem ko maruwel rom, fa pig ni nge yog e salpiy. Ere aray urngin e pi n’en ni rayog ni nge rin’ e pig, ere dab da gin’gad nga fan ni ke yoor fa ke gel e pig.

Machane Bible, e der yog nib thil e pig nib fel’ nge pig nib kireb. Bay ko Motochiyel nni pi’ ku Moses, mi ri weliy Got rogon e lem rok ni rib tamilang. I gaar: “Dariy mmit e pig nge bey ni ngam uned ngay.” (Leviticus 19:26) Ma ba gad ra bieg ni gaar: “Ri dab ni pirieg be’ u fithik’med . . . ni ba ta pig fa be’ ni ma guy e pow u ban’en ni nge buch, fa be’ nib mach mach, fa be’ ni ma pig ngak boch e girdi’ nge buch ban’en rorad fa pi sothuw ara pong thagith.”​—Deuteronomy 18:10, 11, NW.

Mang fan ni yog Got ere n’em? Gathi bochan ni be lemnag ni nge talegdad u ban’en nib manigil. I Jehovah e pi’ e pi motochiyel ney ko girdi’ rok ni bochan ni yad ba t’uf rok ma dabun ni ngar manged sib ko marus nge bogi ban’en ni de riyul’. Ere arfan, ni yog ko pi ta pigpig rok ni nga ur bad ngak ngar ninged e tin ba t’uf rorad. Ya Ir e ba Tamapi’ “urngin e tin nib manigil nge urngin e taw’ath ni rib manigil.” (James 1:17, NW) I apostal John e micheg ngak e piin ni ke michan’rad ni gaar: “Demtrug e n’en ni gadad ra ning ngak ma ma pi’ [Got] ngodad, ni bochan e gadad be fol ko tin ni ke yog ngodad ma gadad be rin’ e tin nib magan’ ngay.”​—1 John 3:22.

Ma Uw Rogon e Tin Kireb e Kan?

Boor e pi witch ney e ba taareban’rad ko Bible u murung’agen e biney: Bay e Kan nib kireb. Ba’ ni yoloy be’ ni ma mon’ognag fa ma ta’ fan e pig ni yog ni ngan ayuw ni gaar: “Fapi kan e goo yad bayi yan: Yad ba’, u reb e fayleng ni danir guy ma taareb rogon ko birodad, yad bogi ban’en nib fas. . . . Fare n’en ni yima yog e Kan nib tir ara Kan nib achichig, ‘Kan nib kireb’ nge ‘Moonyan’ e rib puluw. Ri yad ba gel. . . . Ma yad ba lowan’ . . . ma ba’ gelngirad nib gel (faanra bing be’ e mab ngorad) ngar bad kobirodad e fayleng. . . . Ma rayog ni ngar bad ngar yinggad ngom  . . . , ma rayog ni nga ur gagiyegniged gur. Arrogon, re n’ey e ri taareb rogon ko fapi yat ni kakrom ni murung’agen e Moonyan’ ni ma gabaliyey.”

Nap’an e Bible, ma moonyan’ ni ma gabliy e girdi’ e boor rogon ni ma gafgownagrad. Boch e girdi’ e ran’en ma dab ki yog ni non, ma boch e be malmit, ma boch e ma aliliy, ma boch e ke yib gelngirad ni ke pag rogon nga gelngin e girdi’. (Matthew 9:32; 12:22; 17:15, 18; Mark 5:2-5; Luke 8:29; 9:42; 11:14; Acts 19:16) Yu ngiyal’ ma ba gel e gafgow nge amith ni ma tay be’ ni faanra boor e moonyan’ ni ke gabliy faanem taab yay. (Luke 8:2, 30) Ere, rib mudugil, ni arfan ni tay Jehovah chilen ni dab ni chag ngorad min par u orel ko girdi’ ni ta pig nge pi ngongol rorad.

Teliw ni Sum ko Tin Riyul’

Boor e girdi’ e chiney e kar ta uned ko pig ni bochan e ban’en nib dake de kireb, ma ba fel’, ma barba’ i teliw ni sum ko pi n’en ko fayleng. U yu yang e kan adag e pig riy. Ma danir tamdag ngay. Makub, ga’ ni bayi n’en ma yugub m’ay fan. Ma yuyang ni yu raba’ i teliw e ke fek e girdi’ i yan nga bang ke mich uwan’rad bogi ban’en ni googsur, e kari fel’ e pig uwan’ e girdi’ riy.

Ere arfan ni, yu raba’ i teliw e ke wod ba market ni ba puf mat’awun e girdi’ ni nge be’ me guy e ba’ ni nge un ngay nib m’ag ko tin ba t’uf rok, taareb rogon ngak be’ ni ke yan i chuwiy e bin baadag e sus. Ma rib thil ko tini yog Jesus, ni ri l’agruw pa’ e kanawo’ ni bay. I gaar: “Marod ko bin wen’in e garog; ya baga’ langan e garog ni sor ko magothgoth, ma kanawo’ ni yan ngay e ba mmom, ma boor e girdi’ ni be yan u daken. Ma garog ko yafas e ba wen’in, ma kanawo’ ni yan ngay e ba mo’maw’ ma ba lich e girdi’ ni be pirieg.” (Matthew 7:13, 14, NW) Bin ragon, e gadad gubin ma ba puf rogodad ni ngada mel’eged ko bin ngan e kanawo’ e ngadarod riy. Machane faanra urngin ban’en ko yafas rodad ni manemus e be yan, u rogon e pa’ ni kada mel’eged e kanawo’ me ere rib ga’ fan ni thingari fel’ i mel’eg rodad. Faanra nge yog e tamilangan’ rok Got ngodad, me ere thingar u darod u kanawoen e yul’yul’​—ni fare kanawo’ ni kemus ni Thin rok Got, e yira pirieg riy ni aram e Bible.

[Footnote]

[Picture on page 5]

Boor e girdi’ e chiney e yad be lemnag ni pig e dariy e kireb riy kemus ni barba’ i teliw ko fayleng

[Picture on page 6]

Pig nge sothuw e yow ma yan u taabang

[Picture on page 6]

Piin ni ma pig e dar nanged ni yad be rin’ e tin ni ba m’agan Moonyan’ ngay?

[Picture on page 7]

Fare Bible e be dag e bin riyul’ e kanawo’