Mu Athamgil U Fithik’ E ”Rachangel” Ni Ke Kan Ngom

“Ayuw rog ngom e ke mus e taare’ n’en ni ir e thingari yog ngom.”—2 KORINTH 12:9.

1, 2. (a) Mang fan ni dabi wagey lanin’dad ni bochan e pi skeng nge magawon ni ke yib ngodad? (b) Mang fan nrayog ni ngada pagedan’dad u fithik’ e pi magawon rodad?

“URNGIN e girdi’ ni yad ba adag ni ngar pired u reb e pangin nib m’agan’ Got ngay e kar taab girdi’gad Kristus Jesus e bay ni gafgownagrad.” (2 Timothy 3:12) Mang fan ni aram rogon? Aram rogon ni bochan e ke tay Satan ni ma pigpig e girdi’ ngak Got ni ke mus ni fan e nge fel’ ngorad riy, ma ri ba adag Satan ni nge micheg e thin rok. I yog Jesus ngak e pi apostal rok ni yad ba yul’yul’ ni gaar: “Kan pi’ mat’awen Satan ni nge sikengnagmed ni gimed gubin, ni bod rogon be’ ni girdien e woldug ni be chuweg fiteyru’ wom’engin e wheat.” (Luke 22:31) Manang Jesus ni ke pag Got Satan ni nge pi’ e magawon ngodad nib gel e amith riy ya nge skengnagdad Satan. Riyul’ ni aram rogon, machane gathi be yip’ fan ni urngin e magawon rodad e ke yib rok Satan ara pi moonyan’ rok. (Ecclesiastes 9:11) Machane ra fanay Satan urngin ban’en nrayog rok ya nge kirebnag e yul’yul’ ni gad be tay.

² I yog e Bible ni susun dabi wagey lanin’dad ni bochan e pi skeng ni ma yib ngodad. Ya yugu demutrug e n’en nra yib ngodad ma ka ma yib ngak urngin e girdi’. (1 Peter 4:12) “Ya gimed manang ni piin ni yad be par u roy u fayleng ni polo’ ni Kristus e ke michan’rad ngak e gafgow ni be yib ngomed e ku ir e be yib ngorad.” (1 Peter 5:9) Ngiyal’ ney e rib gel e towasar ni ke tay Satan ngak urngin e pi tapigpig rok Got. Ri ma falfalan’ Moonyan’ ngay ni nge gafgownagdad ko pi magawon ni bod rogon e rachangel. Ma fanay e m’ag rok nib kireb ya nge gelnag e amith ko pi “rachangel ni ke kan ngodad.” (2 Korinth 12:7) Arrogon, machane rayog ni ngada yul’yul’gad u fithik’ e togopuluw ni ke tay Satan ko yul’yul’ ni gad be tay. Ra pi’ Jehovah e “kanawo’ ni ngada bad riy nga wuru’ e pi n’en ni ma waliydad” ere ku ra pi’ e ayuw ko e pi magawon ni ba taareb rogon ko pi rachangel ni ke kan ngodad.—1 Korinth 10:13.

Rogon Ni Ngada Athamgilgad Ko Ba Rachangel

3. Mang e fulweg rok Jehovah ngak Paul u nap’an ni wenig ngak ni nge chuweg fare rachangel ni ke kan ngak?

³ I wenig apostal Paul ngak Got ni nge chuweg fare rachangel ni ke kan ngak. “Nga dalip yay ni kug meybil ngak Somol u murung’agen e re n’ey ni gu be wenig ngak ni nge chuweg rog.” Mang e fulweg rok Jehovah ko meybil rok Paul? “Ayuw rog ngom e taare n’en ni ir e thingari yog ngom; ya gelngig e rib gel ko ngiyal’ ni gab meewar.” (2 Korinth 12:8, 9) Ngada fl’eg i yaliy e fulweg rok Got ma ngada filed rogon ni rayog ni nge ayuwegdad ni ngada athamgilgad u fithik’ e pi magawon rodad ni bod rogon e rachangel nib gel e amith riy.

4. Uw rogon ni ke fel’ rogon Paul ni bochan e runguy rok Jehovah?

⁴ Mu tay fanam iyan riy ni i yog Got ngak Paul ni nge tay fan e runguy ni ke tay Got ngak u daken Kristus. Riyul’ ni kari flaab Paul u boor e kanawo’. Bochan e runguy rok Got e rayog ni nge mang reb e gachalpen Kristus ni yugu aram rogon ni rib gel e togopuluw ni tay ngak pi gachalpen Jesus. (Acts 7:58; 8:3; 9:1-4) Tomur riy me pi’ Jehovah boor e maruwel ngak Paul ni ke falan’ ngay ma ke taw’athnag ko machib ni ke tay. Rib tamilang e n’en ni gad be fil ko n’en ni buch rok Paul. Yugu demutrug gelngin e gafgow ni gad be tay machane ku boor e flaab ni bay rodad ni rayog ni ngada falan’gad ngay. Dab da paged e pi gafgow ni gad be tay ni nge n’igindad ni ngada paged talin e pi taw’ath ni ma pi’ Jehovah ngodad.—Psalm 31:19.

5, 6. (a) Uw rogon ni ke fil Jehovah ngak Paul ni “gelngin Got e rib gel ko ngiyal’ ni ke meewar Paul”? (b) Uw rogon ni ke micheg Paul nib malulfith Satan ni bochan e athamgil ni ke tay Paul?

⁵ Ba gaman e runguy rok Jehovah u yugu reb e kanawo’. Ba gaman gelngin Got ni nge ayuwegdad ko pi magawon rodad. (Efesus 3:20) I fil Jehovah ngak Paul ni gelngin Got e “rib gel ko ngiyal’ ni gab meewar.” Uw rogon? I pi’ Got gelngin Paul ni nge athamgil u fithik’ e pi gafgow rok. Ma k’adan’ ni tay Paul nge pagan’ ni tay ngak Jehovah e ke tamilangnag ngak urngin e girdi’ ni yugu aram rogon nib meewar Paul ni ir be’ ni tadenen machane ke gel e ayuw rok Jehovah u daken. Ku mu lemnag angin e athamgil ni ke tay Paul ya ma yog Moonyan’ ni ma pigpig e girdi’ ngak Got ni ke mus ni faanra yad ba flaab ma ke fel’ rogorad. Gowa ke pag Paul e bat nga owchen faanem nib malulfith ni bochan e yul’yul’ ni ke tay!

⁶ Ba aray Paul, ni ir be’ ni i ayuweg Satan faram ni i togopuluw ngak Got me gafgownag e pi Kristiano, ni ir reb e Farise faram ni ke fel’ rogon ni bochan e ni gargeleg ko ba thal e giyow. Ma chiney e be pigpig Paul ngak Jehovah nge Kristus ni ir e bin “th’abi sobut’ u fithik’ urngin e apostal.” (1 Korinth 15:9) Me sobut’nag ir nga tan pa’ fare governing body rok e tin somm’on e Kristiano. Ma be athamgil u fithik’ e yul’yul’ ni yugu aram rogon ni bay e rachangel ni ke kan ngak. Kari damumuw Satan ngay ya de war e pasig ni tay Paul ni yugu aram rogon ni boor e magawon rok. Ke l’ag owchen Paul ko athap ni tay ni nge un ngak Kristus u Gil’ilungun u thamiy. (2 Timothy 2:12; 4:18) Dariy reb e rachangel ni yugu demutrug gelngin e amith riy nrayog ni nge warnag e pasig ni tay Paul. Ngaygi par e pasigan’ rodad ni aram rogon gelngin! Nap’an ni ayuwegdad Jehovah u fithik’ e pi gafgow rodad e be tay fadad ya be taw’athnagdad ni ngada micheged ni ba malulfith Satan.—Proverbs 27:11.

Ba T’uf E Ayuw Rok Jehovah

7, 8. (a) Uw rogon ni ma gelnag Jehovah e pi tapigpig rok e ngiyal’ ney? (b) Mang fan nib t’uf ni ngan bieg e Bible ara ngan fil e Bible ni gubin e rran ya ngan athamgil ko pi rachangel ni ke kan ngodad?

⁷ Ngiyal’ ney e ma gelnag Jehovah e pi Kristiano ni yad ba yul’yul’ u daken e kan ni thothup rok, nge Thin Rok, nge fare ulung i walag ni Kristiano. Ma ku rayog ni ngada yin’ed e pi magawon rodad nga daken Jehovah u fithik’ e meybil ni bod rogon ni rin’ apostal Paul. (Psalm 55:22) Yugu aram rogon ni dabi chuweg Got e pi skeng rodad, ma ra pi’ e gonop ngodad ni ngada athamgilgad u fithik’ e pi magawon rodad, ni mus ko pi magawon ni rib mo’maw’. Rayog ni nge gelnag Jehovah lanin’dad—nge yog ngodad e “re gelngin nem ni th’abi gel ni yib rok Got, ma gathi gamad e yib romad”—ma aram e rayog ni ngada k’adedan’dad.—2 Korinth 4:7.

⁸ Uw rogon nrayog e re ayuw nem ngodad? Thingar da tedan’dad ko fol Bible, ya bay e thin riy ni fa fl’eg lanin’dad. (Psalm 94:19) Gad ra bieg u lan e Bible morngaagen e pi tapigpig rok Got ni yad be wenignag e ayuw rok Got. Rayog ni ngada fl’eged i lemnag rogon ni fulweg Jehovah taban e meybil rorad me fl’eg lanin’rad riy. Fol babyor e ra gelnagdad me yog ngodad e “re gelngin nem ni ir e th’abi gel e yib rok Got, ma gathi gamad e yib romad.” Thingar da abichgad ni gubin e rran ya nge yog e gel nga fithik’ i dowef rodad, ere ku arrogon ni thingar da ked e Thin Rok Got ni gubin e rran. Gad ma rin’, fa? Faanra gad ma rin’ ma gad ra pirieg ni rayog ngodad e “re gelngin ni ir e th’abi gel” ni ra ayuwegdad ni ngada athamgilgad u fithik’ e pi rachangel ni ra gafgownagdad e ngiyal’ ney.

9. Uw rogon nrayog ni nge ayuweg e piin ni piilal e piin ni yad be athamgil ko pi magawon rorad?

⁹ Rayog ni nge mang e piin ni piilal ni Kristiano e “tagil’ e manab ko nifeng” ni be yip’ fan e gafgow, ara ngar manged “bang ni ngan mith riy ko n’uw” ni be yip’ fan e magawon. Ra ning e piin ni piilal e ayuw rok Jehovah u fithik’ e sobut’an nge yul’yul’ ya nge pi’ Jehovah ngorad “l’igin e piin nib gonop” ya nge yog ni ngar “pied e athamgil nga laniyan’ e piin ni ke mulan’rad.” Thin rok e piin ni piilal e bod bochi yang e n’uw ni be sa aw aw ni be fl’eg lanin’dad ma be pi’ e athamgil nga lanin’dad ko ngiyal’ ni gad ba gafgow. Nap’an ni ra pi’ e piin ni piilal e “athamgil nga laniyan’ e piin ni ke mulan’rad,” be ayuweg e piin ni piilal e pi walagrad ni kar magafgad ara kar wargad ni bochan e rachangel ni ke kan ngorad.—Isaiah 32:2; 50:4; 1 Thessalonika 5:14.

10, 11. Uw rogon nrayog ni nge pi’ e pi tapigpig rok Got e athamgil nga laniyan’ e piin ni boor e magawon rorad?

¹⁰ Urngin e pi tapigpig rok Jehovah e yad girdien e tabinaw rok ni yad taab girdi’. Arrogon, “gadad pire’, machane taareb dowdad ni kan puthuy ngak Kristus,” me “ere susun e nge bagadad me t’uf rok bagadad.” (Roma 12:5; 1 John 4:11) Uw rogon ni gad ra rin’ e re n’en ney ni susun ngada rin’ed? Rogon e thin ni bay ko 1 Peter 3:8 e “thingari gadad gubin ni nge taareb rogon e lem rodad ma da runguyed gadad; me bagadad me t’uf rok bagadad nrogon e piin ni walag ni girdien Kristus, ma ngada pired nib fel’ e thin rodad ngodad ma ba sobut’ lanin’dad ngodad.” Ma rayog ni ngada ayuweged e piin ni yad ba gafgow ni bochan ba rachangel ni ke kan ngorad ni yugu demutrug ko yad ba pilibthir ara ke fel’ yangarrad. Uw rogon?

¹¹ Thingar da guyed rogon ni ngada nanged rarogon e gafgow rorad. Faan manga dariy fan u wan’dad e gafgow ni yad be tay, ma rayog ni nge aw ni ra gel boch e gafgow rorad. Bochan ni gad manang rarogorad nge pi skeng ni yad be tay ma gad ra ayuw ko thin rodad, nge rogon ni gad ma non, nge rogon e ngongol rodad. Rayog ni nge war boch e amith ko pi rachangel ni be gafgownagrad ni bochan e thin rodad nib fel’ ni gad be pi’ e athamgil nga lanin’rad. Ma aram e rayog ni ngada gelnaged yad.—Kolose 4:11.

Rogon Ni Ke Athamgil Boch E Girdi’

12-14. (a) Mang e rin’ reb e ppin ni Kristiano ya nge athamgil ko cancer ni ke yib ngak? (b) Mang e rin’ e pi walag ko ulung ni ngar ayuweged e re ppin ney ngar pied e athamgil nga laniyan’?

¹² Ra gel boch e “amith” ni be tay e girdi’ ni bochan e gad be chugur iyan ko tomur. (Matthew 24:8) Ere ra gafgow gubin e girdi’ nu fayleng, ni baga’ ni pi tapigpig rok Jehovah ni yad be guy rogon ni ngar rin’ed e tin nib m’agan’ ngay. Susun, bay be’ ni ppin ni Kristiano ni ma machib ni gubin e rran. Ke yog e togta ngak ni bay e cancer rok ma thingar ni soweg ngan luf boch ban’en u k’angan. Nap’an’ ni rung’ag fare ppin nge pumoon rok ni bay e m’ar rok, kar meybilgow ngak Jehovah ni kar weniggow ngak. Boch nga tomren me weliy fare ppin rogon e gapas ni yib nga lanin’row. Riyul’ ni thingari athamgil ko gafgow ni tay, ni baga’ ni bochan e tafalay ni be tay.

¹³ Ke fil e re ppin ney urngin ban’en nrayog rok u morngaagen e cancer ya nge yog rok ni nge athamgil boch. I bieg u lan e Watchtower nge Awake! u morngaagen boch e girdi’ ni ur athamgilgad ni bochan e cancer. I bieg u lan e Bible ni be weliy gelngin Jehovah ni nge ayuweg e pi girdi’ rok ni yad ba gafgow, miki bieg yugu boch ban’en ni ke ayuweg ni nge athamgil.

¹⁴ I bieg reb e babyor u rogon ni ngan athamgil u fithik’ e mulan’uy. Ma bay riy e re thin ney: “Ani ra chuw u fithik’ e girdi’ me par ni goo ir e ke mus ni tirok e ra lemnag.” (Proverbs 18:1) Me yog e re babyor nem ni gaar: “Dab mu par ni goo gur.”a Be gaar fare ppin: “Boor e girdi’ ni ur weliyed rogon ni ur yibilayed gag, yugu boch e girdi’ e kar telephone ngog. L’agruw e piilal e ur bow nga tabinaw rog ni gubin ngiyal’. Kan pi’ boor e floras ngog me yib boor e babyor ngog u post. Boch e girdi’ e ur lumgad ni fan ngog. Ma boor e girdi’ ni ur feked gag ko tafalay.”

15-17. (a) Uw rogon ni athamgil reb e ppin ni Kristiano ni bochan e maadad ni tay? (b) Mang ayuw ni yib rok girdien e ulung?

¹⁵ Reb e ppin ni tapigpig rok Jehovah u New Mexico u Meriken e l’agruw yay ni i maadad u karro. I maadad u ngorongren me ubchiya’ reb e m’ar rok ni i athamgil riy ni 25 e duw. I gaar fare ppin: “Rib mo’maw’ ni nggu pug owcheg nga lang ara nggu chibiy ban’en nib tomal ko lal e pawn. Machane baga’ e ayuw ni yib ngog ko pi meybil rog ngak Jehovah. Ku baga’ e ayuw ni yib ko fapi thin ni kug fil u lan e Watchtower. Reb e thin ko Watchtower ni kug bieg e be weliy morngaagen Micah 6:8 ni be yog ni sobut’an’ e be yip’ fan ni nge nang be’ e gini mus gelngin riy. Re thin ney e ke ayuwegeg ni nggu nang ni yugu aram rogon ni gub m’ar machane dariy rogon ni nge mulan’ug. Yugu aram rogon ni ba lich e machib ni gu ma tay, bin ni baga’ fan e gu ma pigpig ku Jehovah u polo’ i gumerchaeg.”

¹⁶ Ki gaar fare ppin: “Gubin ngiyal’ ni ma pining e piin ni piilal e magar ngog ko athamgil ni gu ma tay ni nggu un ko pi muulung ara machib u mit e tabinaw. Piin nib fel’ yangaren e ma gumuchmuch ngog. Ma guman’ e pi pioneer u puluwog mi yad yarmiy rogon e machib ni yad ma tay ya nggu un ngorad. Ma nap’an ni ba kireb e yafang mi yad piningeg ni nggu un ko Bible study ni yad ma fil ngak boch e girdi’. Ma bochan ni dabiyog rog ni nggu fek e kabang rog, boch e girdi’ e ur ted e pi babyor rog nga lan e kabang rorad u nap’an ni gu ra un ngorad ko machib u mit e tabinaw.”

¹⁷ Mu tay fanam iyan riy u rogon ni i ayuweg e piin ni piilal ara yugu boch e walag e gali ppin ney ni ngar athamgilgow u fithik’ e pi rachangel ni ke gafgownagrow. Kar pied e ayuw ngorow ni rib puluw ko pi n’en nib t’uf ni fan ko michan’ rorow ara ba t’uf ko dowef rorow ara lanin’row. Ke pi’ e re thin ney e athamgil nga lanin’um ni ngam ayuweg yugu boch e pi walagdad ni boor e magawon rorad, fa? Mus ko gimed e piin nib fel’ yangaren ni rayog ni ngam ayuweged e girdi’ u lan e ulung ni yad be athamgil ni bochan e pi rachangel ni ke kan ngorad.—Proverbs 20:29.

18. Uw rogon nra yib e athamgil nga lanin’dad ko pi thin u lan e Watchtower nge Awake u morngaagen e piin ni ur athamgilgad u fithik’ e magawon rorad?

¹⁸ Boor e thin ni bay ko Watchtower nge Awake! u morngaagen e Pi Mich Rok Jehovah ni yad be athamgil u fithik’ e pi magawon rorad. Ga ra bieg e pi thin nem ma ga ra guy ni boor e pi walagdad u fayleng iyan ni yad be athamgil u fithik’ e magawon ko salpiy, ara kireban’ ni bochan girdi’ rorad ni kar m’ad, ara riya’ ni bochan e mahl. Yugu boch e pi walagdad e kar gafgowgad ni bochan e liliy. Boch i yad e dabiyog ni ngar rin’ed e tin nib mom ni yugu ma rin’ e piin nib fel’ fithik’ i dowrad. Rib gel e skeng rorad ni bochan e m’ar rorad, ni bochan e ri yad ba adag ni ngar maruweliyed e tin ni ma maruweliy e pi Kristiano machane dabiyog rorad. Ere ri yad ma pining e magar ni bochan e ayuw ni ma pi’ e pi walagrad ngorad!

Yi Ma Falfalan’ Ni Bochan E K’adan’

19. Mang fan nrayog ni nge falfalan’ Paul ni yugu aram rogon nib meewar ma bay e rachangel ni ke kan ngak?

¹⁹ I falfalan’ Paul ni bochan e ke guy e ayuw ni ke pi’ Got ngak. I gaar: “Ere kari gu felfelan’ ni nggu uf ko meewar rog, ni fan e nggu thamiy rog ni ke yib gelngin Kristus ngog ni nge mang yoror rog. Ba fel’ u wun’ug e meewar, nge tin nib kireb ni nga nog ngog, nge tin nib mo’maw’ ban’en ni gu be mada’nag ni fan ngak Kristus. Ya ngiyal’ ni gub meewar, e aram e ngiyal’ ni gub gel.” (2 Korinth 12:9, 10) Bochan e pi gafgow ni tay Paul ma rayog ni nge gaar: “Ma gathi gu be yog e re bugithin ney ni bochan e gu be finey ni kam paged gag mdakumur lemniged gag; ya kug fil rogon ni nge fel’ u wun’ug e tin ni ba’ rog ban’en. Ya gu manang rogon ni baaray ni kan gafgow u ban’en, nge rogon ni baaray ni ke pag urngin ban’en ni ke yog ngog. Kug nang rogon e re n’ey, ere demturug e gin’en ma demturug e re ngiyal’ i n’en, ma ba fel’ u wun’ug ndemturug ko gub fos ara gub yam’ ko bilig, ma demturug ko pire’ ban’en ni ba’ rog ara rib lich. Demturug e mit i n’en ni gu ra mada’nag ma ba’ gelngig ni ke pi’ Kristus nrayog ni gu par riy.”—Filippi 4:11-13.

20, 21. (a) Mang fan nrayog ni ngada falfalan’gad ni gad be lemnag e “pi n’en ni dab ni guy nga owchey”? (b) Gur mang boch e “pi n’en ndab ni guy nga owchey” ni ga be athapeg ni ngam guy u Paradis u fayleng?

²⁰ Ere nap’an ni gad ra athamgil ko pi rachangel ni ke kan ngodad, rayog ni ngada falfalan’gad ni be m’ug gelngin Jehovah u fithik’ e pi n’en ni gad meewar riy. I gaar Paul: “Ereray fan ni der mulan’dad. Yugu ra be meewar dowdad iyan, ma lanin’dad e yibe beechnag u reb e rran ngu reb. Re gafgow ney ni gadad be tay nib gafgow nib achig ma dabi n’uw nap’an me m’ay e bayi fek i yib ngodad ba flaab ni ba ga’ ndabi m’ay biid nri kab gel feni ga’ ko re gafgow ney. Ya gathi pi n’en ni yibe guy nga owchey e ir e ke l’agan’dad ngay, ya pi n’en ndab ni guy nga owchey . . . ma n’en ndab ni guy nga owchey e bay i par ndariy n’umngin nap’an.”—2 Korinth 4:16-18.

²¹ Baga’ ni be athapeg e girdi’ rok Jehovah ni ngar pared nib fas u Paradis u fayleng mi yad falfalan’ ko pi flaab ni ke micheg. “Dabiyog ni ngan guy nga owchey” e pi flaab nem e ngiyal’ ney. Machane be chugur iyib e ngiyal’ ni gad ra guy e pi flaab nem nga owchedad, arrogon, ngada falfalan’ riy ni manemus. Reb e pi flaab nem e nge chuw e pi rachangel ni be gafgownagdad ma dabi sul biid! Ani Fak Got e ra “kirebnag e maruwel rok moonyan” me “kirebnag gelngin moonyan’ yi moonyan’ e bay e yam’ u pa’.”—1 John 3:8; Hebrews 2:14.

22. Mang e ke mich u wan’dad, ma mang e kada duguliyed u wan’dad ni ngada rin’ed?

²² Ere ngada athamgilgad u fithik’ e pi rachangel ni be gafgownagdad e ngiyal’ ney. Ma gad ra bod Paul ni rayog ni ngada athamgilgad ni bochan e ra pi’ Jehovah gelngin ngodad. Ma nap’an ni gad ra par u lan e Paradis u fayleng e gad ra yog e sorok ngak Got ni gubin e rran ni bochan e pi maruwel rok nib fel’ ni ma rin’ ni fan ngodad.—Psalm 103:2.

[Footnotes]

Uw Rogon Ni Ga Ra Fulweg?

• Mang fan ma uw rogon ni ma guy Moonyan’ rogon ni nge kirebnag e yul’yul’ ni be tay e pi Kristiano?

• Uw rogon ni ke gel gelngin Jehovah ko ngiyal’ ni gadad meewar?

• Uw rogon nrayog ni nge ayuweg e piin ni piilal ara yugu boch e girdi’ e piin ni kar gafgowgad?

[Picture on page 10]

Dalip yay ni i meybil Paul ngak Got ni nge chuweg fare rachangel ni ke kan ngak