Kari Bung Rogodad Ni Ngada Machibnaged E Thin Rok Got
“Ya gelngimad ni nggu muruwliyed ngay e Got e ke pi’ ngomad.”—2 CORINTHIANS 3:5, 6.
1, 2. Mang e rin’ boch e girdi’ ni yad be guy rogon ni ngar machibgad, ma mang fan ni dariy angin e machib rorad?
RA UW rogon u wan’um ni faanra kan pi’ ba maruwel ngom ni dariy rogon ni ngam un ngay? Amu lemnag: Bay u p’eowchem urngin fapi n’en ni ngam maruweliy, ma bay talin e maruwel rom. Machane dam manang rogon ni ngam maruweliy. Ma baga’ fan e re maruwel ney. Ke tay e girdi’ ni nge mil fan e re maruwel ney ngom. Ri ra kankanan’um ni faanra arrogon!
2 Machane gathi ke mus ni gad be sananag e re magawon ney. Amu lemnag e re n’ey. Yu ngiyal’ e ma yarmiy e pi yurba’ i teliw nu Kristendom e girdi’ rorad ngar guyed rogon ni ngar machibgad u mit e tabinaw. Yima athamgil ni in e wik ara in e pul me tal e machib rorad. Mang fan? Ya de ayuweg Kristendom e girdi’ rok ni nge bung rogorad ko re maruwel nem. Ni mus ko pi tamachib rorad e de bung rogorad ni ngar machibgad ni yugu aram rogon ni boor e duw ni ur skulgad u university ara skul ko tamachib. Mang fan nrayog ni nga dogned ni aram rogon?
3. Mang thin ni ke m’ug ni dalip yay u 2 Korinth 3:5, 6, ma mang fan e re thin nem?
3 Thin Rok Got e ma weliy e n’en ni ma duguliy e bin riyul’ e tamachib ni Kristiano nge bung rogon ni nge weliy fare thin nib fel’. Kan thagthag nga laniyan’ apostal Paul ni nge yoloy ni gaar: “Ya dariy rogomad ni nggogned nrayog ni gu ngongliyed e re maruwel ney, ya Got e ke tay ni ke bung rogomad ma ir e ke tay ni bay rogomad ni gamad e tamachib.” (2 Korinth 3:5, 6) Mu tay fanam iyan riy fare bugithin ni kan fanay ni dalip yay ni—“bung rogon” ara “bay rogon.” Mang fan e re bugithin nem? Fare ke babyor ni Vine’s Expository Dictionary of Biblical Words e ke gaar: “Nap’an ni yira fanay e re bugithin nem [nthin nu Greek] ni fan nga ban’en ma be yip’ fan ni “ba gaman” . . . ; machane faan yira fanay ngak be’ ma be yip’ fan ni “ba salap” ara “bay rogon.” Ere be’ ni ke “bung rogon” e bay e salap rok ara bay rogon ni nge un ko reb e maruwel. Arrogon, tin riyul’ e tamachib ko fare thin nib fel’ e bay rogorad ni ngar uned ko re maruwel nem. Bay e salap rorad ara bay rogorad ni ngar machibgad.
4. (a) Uw rogon ni be m’ug rok Paul ni gathi ke mus ni buchuw e girdi’ ni bay rogorad ni ngar manged tamachib ni Kristiano? (b) Mang dalip e kanawo’ ni ma fanay Jehovah ni nge ayuwegdad ni nge bung rogodad ni ngada manged tamachib?
4 Machane uw e ma yib rogorad riy ni ngar machibgad? Bay rogorad ni bochan e salap rorad, fa? Ara yad ba lichow, fa? Ara kar uned ko skul ni baga’, fa? Immoy e pi n’en ney rok apostal Paul. (Acts 22:3; Filippi 3:4, 5) Machane i tamilangnag ni bay rogon ni nge machib ni gathi bochan e skul ni baga’, ya Jehovah Got e ke tay ni bay rogon ni nge machib. Ke mus ni boch e girdi’ ni bay rogorad ni ngar machibgad, fa? I yol Paul ngak e ulung nu Korinth me yog ni “bay rogomad.” Be m’ug ko re thin ney ni ke duguliy Jehovah ni urngin e pi tapigpig rok e nge yog ngorad e salap ni ngar rin’ed fare maruwel ni ke pi’ ngorad. Uw rogon ni ma ngongliy Jehovah rogon e tin riyul’ e Kristiano e ngiyal’ ney? Ngada weliyed dalip e kanawo’ ni ma fanay Jehovah: (1) Thin Rok, (2) nge kan ni thothup rok, (3) nge ulung rok u fayleng.
Thin Rok Jehovah E Ma Ayuwegdad Ni Nge Bung Rogodad
5, 6. Mang angin e Babyor ni Thothup u daken e tin riyul’ e Kristiano?
5 Bin taareb, uw rogon ni ma ayuwegdad e Thin Rok Got ni nge bung rogodad ni ngada manged e tamachib? Be gaar apostal Paul: “Ya urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoliyed nga babyor me ir e ba ga’ fan ya ma fil e tin nib riyul’ e thin ngodad, ma be yal’uweg e tin ni be oloboch e girdi’ riy, ma be fulweg e girdi’ ko ngongol nib fel’, ma be fonownag e girdi’ u rogon e ngongol ni ngar pired riy ni ir e mmat’aw u mit Got, ya en ni be pigpig ngak Got e nge par ni ke bung rogon nrayog ni nge rin’ urngin mit e ngongol nib fel’.” (2 Timothy 3:16, 17) Ere fare Babyor nib Thothup e ma ayuwegdad ni nge “bung rogodad” ni ngada rin’ed “urngin mit e ngongol nib fel’” ni aram e gad be fil e Thin Rok Got ngak e girdi’. Machane uw rogon girdien pi yurba’ i teliw nu Kristendom? Bay e Bible rorad. Ke diin ma ke bung rogon boch e girdi’ ngar manged tamachib ni bochan e ayuw ko Bible, ma dabi ayuweg yugu boch e girdi’? Fulweg ko re deer nem e bay rogon ko uw rogon e Bible u lanin’dad.
6 Boor e girdi’ ni ma un ko pi yurba’ i teliw ni de mich u wan’rad ni machib nu Bible e “ri ir e thin rok Got.” (1 Thessalonika 2:13) Aram rogon e pi yurba’ i teliw nu Kristendom. Ma un e pi tamachib nu Kristendom ko skul ko tamachib ni bokum e duw, ma aram e ke bung rogorad ni ngar filed e Thin Rok Got ngak yugu boch e girdi’, fa? Danga’. Boch i yad e ke mich e Bible u wan’rad u m’on ni kar uned ko skul ko tamachib, machane ke maruwar’anrad u nap’an ni kar mu’gad ko skul! Ma tomur riy e gathi Thin Rok Got ni yad ma machibnag—ya de mich e Bible u wan’rad—machane yad ma machibnag yugu boch ban’en, mi yad un ko ngongol ko am, ara yad ma machibnag yalen e girdi’, ara llowan’ ko girdi’ u lan e misa rorad. (2 Timothy 4:3) Mab thil e tin riyul’ e Kristiano, ya yad ma folwok rok Jesus Kristus.
7, 8. Uw rogon e Thin Rok Got u wan’ Jesus nib thil u rogon e re Thin nem u wan’ e pi tamachib ko ngiyal’ i n’em?
7 De pag Jesus e pi tamachib ni ngar gagiyegnaged rogon e lem rok. Yugu demutrug ko be machibnag Jesus buchuw e girdi’ ara be machibnag bokum e girdi’, ma i machibnag e thin ni bay ko babyor nib thothup. (Matthew 13:10-17; 15:1-11) Ba thil Jesus ko pi tamachib ko ngiyal’ i n’em ni bochan e i machibnag e Thin Rok Got. Ya dubun e pi tamachib nem ni nge bieg e yug girdi’ e tin toar e thin ko tirok Got ban’en. I tay e pi tamachib nem ni kayigi mo’maw’ boch e machib nu Bible ma dabi weliy ngak yugu girdi’ ma ke mus ni ra weliy ngak pi gachalpen—ma ra non nib sakathkath ma bay ba urwech u daken lolgen. Ke tay e pi tamachib nem nib mach mach boch e thin ko Bible ni bod rogon ni yad ma tay nib mach mach ni nga nog e ngochol rok Got!
8 Machane gathi aram rogon Kristus. De lemnag ni ke mus ni boch e Thin Rok Got ni nge mich u wan’ e girdi’, ya thingari mich u wan’rad “urngin bug e thin ni be yog Got.” Ma de lemnag Jesus ni ke mus ni tin tolang e girdi’ e nge yog e tamilangan’ ngorad. Ya i yog ngak pi gachalpen ni gaar: “Ma n’en ni gu be yog ngomed u fithik’ e lumor e thingar mogned ni rran, ma n’en ni kam rung’aged nde rung’ag e girdi’ e thingar mu weliyed u daken e naun.” (Matthew 4:4; 10:27) Ri ba adag Jesus ni nge ayuweg urngin e girdi’ ni nge yog e tamilangan’ ngorad.
9. Uw rogon ni ma maruweliy e tin riyul’ e Kristiano e Bible?
9 Thingari aw ni Thin Rok Got e aram e kenggin e machib rodad. Nap’an ni gad ra welthin u lan e Kingdom Hall ko Pi Mich Rok Jehovah, ma dabi gaman ni ke mus ni ngan bieg boch e thin ko Bible. Ya thingar da weliyed fan, ma ngada weliyed ba fanathin ni ra tamilangnag fare thin, ara ngada weliyed rogon ni ngan maruweliy fare thin. Gad ba adag ni nge af fare thin ni bay ko Bible nge mit nga gumerchen e piin ni yad be motoyil ngodad. (Nehemiah 8:8, 12) Maku thingar da bieged e Bible u nap’an ni gad be fonownag e girdi’ ara gad be yal’uweg e girdi’ ni kar olobochgad. Yugu aram rogon nib thil thil e thin rok e girdi’ rok Jehovah mab thil thil e yalen rorad, machane yad gubin e yad ma tay fan e bin th’abi ga’ fan e Babyor—ni aram e Bible.
10. Mang angin e machib nu Bible u dakendad?
10 Faan yira ta’ fan e Bible ni aram rogon ma bay gelngin e machib riy. (Hebrews 4:12) Bay gelngin ni nge n’igin e girdi’ nge thil e ngongol rorad, ni ngar paged e ngongol ni darngal, nge meybil ko liyos, nge chingaw nge moro’ro’. Ke ayuweg e Bible boor e girdi’ ni ngar n’aged e bin kakrom e pangiy mi yad fanay e bin nib biech e pangiy. (Efesus 4:20-24) Arrogon, faan gad ra tay fan e Bible ma gad tay ni kab ga’ fan ko yalen e girdi’, ma gad fol ko machib riy ma rayog ni nge ayuwegdad e Bible ni nge bung rogodad ni ngada manged e tamachib ko Thin Rok Got.
Gelngin Jehovah E Ma Ayuwegdad Ni Nge Bung Rogodad
11. Mang fan nib puluw ni nga nog e “ani ma ayuwegdad” ngak e kan ni thothup rok Jehovah?
11 Bin l’agruw, ngada weliyed rogon ni ma ayuwegdad e kan ni thothup rok Jehovah, ara gelngin nib thothup ni nge bung rogodad. Thingar dab da paged talin ni gelngin Jehovah e aram e bin th’abi gel e gelngiy. I pi’ Jehovah mat’awen Fak ni nge maruweliy e re gelngin nem ni fan ngak urngin e tin riyul’ e Kristiano. Bpuluw e thin rok Jesus ni i yog ni fare kan ni thothup e aram e “en ni nge ayuwegmed.” (John 16:7) I yog Jesus ngak pi gachalpen ni ngar wenignaged Jehovah ni nge pi’ gelngin ngorad, me micheg ni ri ra pi’ Jehovah gelngin ngorad.—Luke 11:10-13; James 1:17.
12, 13. (a) Mang fan ni baga’ fan ni ngada yibilayed e kan ni thothup ni nge ayuwegdad ko machib ni gad ma tay? (b) Uw rogon ni ke m’ug ni de maruwel fare kan ni thothup u daken e pi Farise?
12 Thingar da yibilayed ni nge yog e kan ni thothup ngodad ni gubin e rran, ni baga’ ni gad be ning ni nge ayuwegdad ko machib ni gad be tay. Mang angin e kan ni thothup ni be maruwel u dakendad? Rayog ni nge maruwel u daken lanin’dad nge gumercha’dad ma aram e ra thil e ngongol rodad, ma gad ilal nrogon e Kristiano, ma nge biech pangidad. (Kolose 3:9, 10) Rayog ni nge ayuwegdad ni nge yog rarogon Kristus ngodad. Boor i gadad ni ke mit fare thin ni bay u Galatia 5:22,23 ma rayog ni ngada bieged ni dariy e babyor riy. Bay ko re thin ney waamngin gelngin Got. Bin somm’on e t’ufeg. Ri baga’ fan e t’ufeg u nap’an ni gad ra machib. Mang fan?
13 T’ufeg e ma n’igin e girdi’ ni ngar rin’ed ban’en. Tin riyul’ e Kristiano e ma machibnag fare thin nib fel’ ni bochan e ba t’uf Jehovah rorad maku ba t’uf e girdi’ rorad. (Mark 12:28-31) Faan manga dariy e re t’ufeg ney rodad ma dabi bung rogodad ni ngada machibnaged e Thin Rok Got. Mu tay fanam iyan riy ko n’en nib thil rok Jesus nge fapi Farise. I weliy Matthew 9:36 u morngaagen Jesus ni gaar: “Ma faani guy e pi girdi’ nem ni aram urngirad, me taganan’ ngorad, ya kar pired ni ke magafan’rad ndar nanged e n’en ni ngar rin’ed, ya yad bod e saf nde moy rorad e en ni ma gafaliyrad.” Ma uw rogon yugu girdi’ u wan’ e pi Farise. I lungurad: “Pi girdi’ ney ni ara’ urngirad e dar nanged e Motochiyel rok Moses, ere ke bucheg Got waathrad.” (John 7:49) De t’ufeg e pi Farise e yugu girdi’ ya ri dariy fan e girdi’ u wan’ e pi Farise. Rib tamilang ni der ma maruwel gelngin Jehovah u daken e pi Farise.
14. Susun mang e ngada rin’ed ni bochan e ke dag Jesus e kanawo’ ngodad u rogon ni ngan t’ufeg u nap’an e machib?
14 I runguy Jesus e girdi’. Manang rarogon e amith rorad. Manang farad ni kan gafgownagrad ni yad bod e saf ni dariy be’ ni be gafaliyrad. Be yog John 2:25 ni “ri manang Jesus e n’en ni be lemnag e girdi’.” I ayuweg Jesus Jehovah u nap’an ni sunmiy Jehovah e girdi’ ni ir e Tamaruwel rok, ere manang Jesus rarogon e girdi’. (Proverbs 8:30, 31) Bochan e manang fan rarogon e girdi’, ri yad ba t’uf rok. Susun aram rogon e t’ufeg rodad u nap’an ni gad be machibnag e girdi’! Faan gad ra lemnag ni rayog ni ngki gel boch e t’ufeg rodad ma ngada yibilayed e kan ni thothup rok Jehovah ma gad ngongol nrogon e meybil rodad. Ra fulweg Jehovah taban e meybil rodad. Ra pi’ gelngin ni ir e bin th’abi gel ni nge ayuwegdad ni ngada boded Kristus, ni ir e ke bung rogon ni nge machibnag fare thin nib fel’.
15. Uw rogon ni ke lebug e thin u Isaiah 61:1-3 u daken Jesus ma uw rogon ni ke tamilangnag e kireb rok e pi tamachib ko motochiyel nge pi Farise?
15 Ke diin ma ke bung rogon Kristus ni nge machib? I gaar: “Fare kan ni thothup rok Somol e ke yib nga dakenag.” (Luke 4:17-21) Arrogon, ke duguliy Jehovah Jesus u daken e kan ni thothup. De t’uf rok Jesus bangi babyor ni nge yog ni ke bung rogon ni nge machib. Ke duguliy e kan ni thothup e pi tamachib u nap’an Jesus, fa? Danga’. Maku de yog rorad ni ngar lebguyed fare thin u Isaiah 61:1-3, machane ke yog rok Jesus ni nge bieg fare thin nga lang nge yog ni ke lebug fare thin. Amu bieg fare thin u Isaiah ngam guy ni der rin’ e pi tamachib ko motochiyel nge pi Farise e thin ni bay riy. Dariy e thin nib fel’ rorad ni ngar machibnaged ngak e piin ni yad ba gafgow. Ma uw rogon nrayog ni ngar machibnaged ni ngan pag e piin ni yad e kalbus, ma nge yog ni nge guy e piin ni yad malmit? Ya gowa mmalmit e pi tamachib nem, ma yad e kalbus ni bochan yalen e girdi’! Ke bung rogodad ni ngada machibgad, ma gathi gad bod e pi tamachib nem, fa?
16. Mang e rayog ni nge pagan’ e girdi’ rok Jehovah ngay ni ke bung rogorad ni ngar manged tamachib?
16 Riyul’, ni dada uned ko skul ko tamachib nu Kristendom. Dariy e babyor rodad ni be yog ni ke m’ay e skul rodad ni skul ko tamachib. Ere, de bung rogodad ni ngada machibgad, fa? Ri danga’! Ya Jehovah e ke duguliydad ni ngada manged e Pi Mich Rok. (Isaiah 43:10-12) Faan gad ra yibilayed gelngin Got ma ngada ngongolgad nrogon e meybil rodad, ma aram e ke bung rogodad. Riyul’ ni ka gad ba tadenen, ma dabiyog rodad ni ngada folwokgad rok Jesus nri rogon. Machane, gad ma pining e magar ngak Jehovah ni bochan e ma fanay e kan ni thothup rok ni nge ayuwegdad ni nge bung rogodad ni ngada machibnaged e Thin Rok, fa?
Ulung Rok Jehovah E Ma Ayuwegdad Ni Nge Bung Rogodad
17-19. Uw rogon ni ma ayuwegdad fa lal e muulung ko yu wik ni ke fl’eg e ulung rok Jehovah ni nge bung rogodad ni ngada machibgad?
17 Chiney e ngada weliyed e bin dalip e kanawo’ ni ma fanay Jehovah ni nge ayuwegdad ni nge bung rogodad ni ngada machibnaged e Thin rok—ni aram e ulung rok u fayleng ni ma skulnagdad rogon ni ngada manged e tamachib. Uw rogon? Amu lemnag urngin e skul ni bay rodad! Gubin e wik ma gad ma un ko lal e muulung ko Kristiano. (Hebrews 10:24, 25) Gad ma un ko Congregation Book Study ni gad ma fil e babyor ni ke pi’ e ulung rok Jehovah ni ma weliy fan e machib nu Bible. Baga’ ni de yoor e girdi’ ko reb e Book Study. Girdien fare Book Study e nge bagayad e nge pi’ e athamgil nga laniyan’ bagayad u nap’an ni yad ra pi’ e fulweg ko fapi deer ara yad ra motoyil ko welthin. Maku ra ayuweg fare Book Study overseer girdien e Book Study ni be’ nge be’. U nap’an e Public Talk nge Watchtower Study e boor e machib ni ke yog ngodad.
18 Muulung rodad ni Theocratic Ministry School e ma ayuwegdad ni ngada nanged rogon ni ngada filed e machib ngak yugu boch e girdi’. Nap’an ni gad ra yoloy e welthin rodad e gad be fil e n’en ni be yog e Thin Rok Got u morngaagen boor ban’en. (1 Peter 3:15) Sana ka nog ngom ni ngam yoloy reb e welthin u morngaagen ban’en ni kam fil biyay, machane nap’an ni ga fl’eg fare welthin ma ka boor ban’en nib biech ni ga ra fil, fa? Boor e girdi’ e ke pirieg ni aram rogon. Ya nap’an ni gad ra weliy ban’en ngak yugu boch e girdi’ maku ra tamilang fare thin u wan’dad. Mus ko ngiyal’ ni gathi gadad ni gad be pi’ reb e welthin machane gad ra fil rok faanem ni be welthin rogon ni ngan sensey. Gad ra yaliy girdien fare skul ni yad be welthin ma gad ra fil rorad rogon ni ngan machib ma rayog ni ngada folwokgad rorad.
19 Maku arrogon fare Service Meeting ni kan fl’eg ni ngan fil ngodad rogon ni ngada machibnaged e Thin Rok Got. Gubin e wik ma gad ra rung’ag e welthin rok taa be’, ara boch e girdi’, maku boch i yad e ra yan u yaan e machib. Mang e gad ra weliy u mit e tabinaw? Mang e gad ra rin’ ni faanra togopuluw be’ u nap’an ni gad be machib? Mang yugu boch e kanawo’ nrayog ni ngada wereged e machib? Mang e ra ayuwegdad ni nge yib angin e machib ni gad be tay u nap’an ni gad be yan ko return visit ara gad be fil e Bible study ngak be’? (1 Korinth 9:19-22) Aram boch e deer ni yima weliy u nap’an e Service Meeting. Boor e welthin ko Service Meeting ni bay ko Our Kingdom Ministry ni ku aram reb e talin e maruwel rodad ni ma ayuwegdad ko machib ni gad ma tay.
20. Uw rogon nrayog ni nge fel’ rogodad ko pi muulung nge pi assembly?
20 Faan gad ra fil babyoren e muulung u m’on ko muulung ma aram e gad ra un ko pi muulung, ma gad maruweliy e pi n’en ni kada filed u nap’an ni gad be machib, ma aram e ke yog e skul ni baga’ ngodad. Machane ku bay boch. Bay boch e pi muulung ni baga’—ni aram e pi assembly nge convention rodad—ma pi muulung ney e ma ayuwegdad ni nge bung rogodad ni ngada machibnaged e Thin Rok Got. Ma gad ma sonnag e ngiyal’ ni ngada uned ko pi muulung nem ma ngada motoyilgad ma ngada folgad ko pi machib riy!—Luke 8:18.
21. Mang e ma micheg ni bay angin e skul rodad, ma mini’ e nga nog e sorok ngak?
21 Bay angin e skul ni ke pi’ Jehovah ngodad, fa? Tin ni ke buch e aram e mich riy. Gubin e duw ma yima ayuweg bokum miriay biyu’ e girdi’ ni ngar nanged e machib nu Bible ma yima ayuwegrad ni ngar folgad ko tin ni ke tay Got chilen ngodad. Kada yoorgad iyan, machane dariy bagadad nrayog ni nga nog e sorok ngak. Thingar da guyed e re n’en ney nrogon ni guy Jesus. I gaar: “Dariy be’ nrayog ni nge yib ngog ni faanra gathi en ni Chitamangiy e pow’iy nge yib ngog.” Gad bod e pi apostal kakrom ni baga’ ni dariy e skul rodad ma gad bod yugu girdi’. (John 6:44; Acts 4:13) Jehovah e pi’ angin e machib rodad, ma ir e ma pow’iy e girdi’ nib yul’yul’ ngar nanged e machib nriyul’. Bpuluw e thin rok Paul ni gaar: “I gag e gu yung e awoch me tugul, mi Apollos e i puog e ran ngay, machane Got e be pi’ gelngin be ga’.”—1 Korinth 3:6.
22. Mang fan ni nge dabi mulan’dad u nap’an ni gad be wereg e machib ni Kristiano?
22 Arrogon, be un Jehovah Got ko maruwel rodad ni gad e tamachib ko Thin Rok. Sana dab da lemnaged ni ke bung rogodad ni ngada manged tamachib. Machane dab mu pag talin ni Jehovah e ir e ani be pow’iy e girdi’ ni ngar bad ngorow Fak. Jehovah e ir e ani ke ayuwegdad ni nge bung rogodad ni ngada machibnaged e piin ni dawor ra rung’aged e machib, ma ke ayuwegdad u daken e Thin Rok, nge kan ni thothup rok, nge ulung rok u fayleng. Ere ngada folgad ko fare skul ni ke pi’ Jehovah ngodad ma ngada maruweliyed e tin nib fel’ ni ke pi’ ngodad ni fan ni nge bung rogodad ni ngada machibnaged e Thin Rok Got!
Uw Rogon Ni Ga Ra Fulweg?
• Uw rogon ni ma ayuwegdad e Bible ni nge yog rogodad ni ngada machibgad?
• Mang e maruwel rok e kan ni thothup ni be ayuwegdad ni nge bung rogodad ni ngada manged tamachib?
• Gur, uw rogon ni ke ayuwegem e ulung rok Jehovah u fayleng ni nge bung rogom ni ngam machibnag fare thin nib fel’?
• Mang fan nrayog ni nge pagan’dad u nap’an ni gad be wereg e machib?
[Picture on page 16]
I t’ufeg Jesus e girdi’ u nap’an ni i machibnag e Thin Rok Got