Tamilang Rok Got E Ke Chuweg E Talumor!

“Somol, i gur e tamilang rog; gur e kam chuweg e lumor ni ug par u fithik’.”—2 SAMUEL 22:29.

1. Uw rogon ni bay rogon e tamilang nge yafas?

“ME NON Got ni gaar: ‘Nge tamilang’—me tamilang.” (Genesis 1:3) Re thin ney ni baga’ fan u Genesis e ma tamilangnag ni Jehovah e ir e ani ma pi’ e tamilang, ma faan manga dariy e tamilang ma dabiyog e yafas u fayleng. Ma Jehovah e ku ir e gini yib e tamilang ni be yip’ fan e machib, ma ri baga’ fan e re tamilang nem ni nge pow’iydad u kanawoen e yafas. (Psalm 43:3) I tamilangnag David ni Pilung ni bay rogon e tamilang ni be yip’ fan e machib nge yafas, ni gaar: “Gur e yib e tamilang rom, ma bochan fare tamilang ni yib rom e rayog ni ngguyed e tamilang.”—Psalm 36:9.

2. I yog apostal Paul ni mang e bay rogon ko tamilang?

² Gonapan 1,000 e duw nga tomren David me weliy apostal Paul morngaagen e ngiyal’ ni sunmiy Got e fayleng. I yol ngak e ulung ni Kristiano u Korinth ni gaar: “Fare Got ni ir e yog ni gaar, “Nge m’ug e tamilang u fithik’ e lumor!” Me yog Paul ni fare tamilang ni be yip’ fan e machib e bay rogon ko tamilangan’ ni yib rok Jehovah, ya ke ulul ngay ni gaar: “Ku ereram e re Got ni ir e ke tamilangnag an’mad kug nanged e flaab rok ni be gal ramaen u owchen Kristus.” (2 Korinth 4:6) Uw rogon ni ke taw e re tamilang ney ngodad?

Fare Bible—Ma Gal Ramaen E Tamilang

3. Mang tamilang ni ke pi’ Jehovah u daken e Bible?

³ Baga’ ni ma gal e tamilang rok Jehovah u daken e Thin Rok ni Bible. Ere nap’an ni gad ra fil e Bible ma ke yog e tamilangan’ rok Got ngodad, ma aram e kada paged ni nge gal ramaen Got ngodad. Ma tamilangnag Jehovah e pi n’en nib m’agan’ ngay me weliy ngodad rogon ni ngada rin’ed e tin nib m’agan’ ngay u daken e Bible. Re tamilang ney e ma tamilangnag fan e yafas rodad me ayuwegdad ni ngada fasgad ko tirok Got ban’en. (Ecclesiastes 12:1; Matthew 5:3) I tamilangnag Jesus ni thingar da nanged nib t’uf e tirok Got ban’en rodad u nap’an ni i bieg e Motochiyel rok Moses ni gaar: “Fare babyor ni thothup e be gaar, Girdi’ e dabiyog ni yigoo flowa e ra i kay mi i par nib fos, machane urngin bug e thin ni be yog Got e ir e ra i tay e girdi’ nib fos ndabi yim’.”—Matthew 4:4; Deuteronomy 8:3.

4. Uw rogon ni Jesus e ir e “tamilang ko girdi’ nu fayleng”?

⁴ Bay rogon Jesus nge fare tamilang ni be yip’ fan e machib. I yog Jesus ni gaar: “I gag e tamilang ko girdi’ nu fayleng. En nra i lekeg e ke yog e tamilang ko yafas ngak ma dab ki yan u fithik’ e lumor biid.” (John 8:12) Re thin ney e ma ayuwegdad ni ngada nanged fan e maruwel rok Jesus ni nge pi’ e machib nriyul’ rok Jehovah ngak e girdi’ nu fayleng. Thingar da folgad ko urngin ban’en ni yog Jesus ma ngada folwokgad rok ma ngada folgad ko machib rok ni kan yoloy u Bible ni fan e ngada chuwgad ko lumor ma gad yan u fithik’ e tamilang rok Got.

5. Mang e mmil fan ngak pi gachalpen Jesus u tomren ni yim’ Jesus?

⁵ In e rran u m’on ni yim’ Jesus me yog ngak pi gachalpen ni ir fare tamilang ni gaar: “Bayi par fare tamilang u fithik’med nib n’uw boch nap’an. N’en ni gimed be rin’ e ngam rin’ed ko ngiyal’ ni ka bay e tamilang romed, nge dabi yib e lumor nga dakenmed; ya cha’ ni ma par u fithik’ e lumor e der nang e gin ni be sor ngay. Ere nge mich u wun’med fare tamilang ko ngiyal’ ni ka ba’ romed, nge yog ni mmanged girdien e re tamilang nem.” (John 12:35, 36) Piin ni kar manged girdien e tamilang e kar filed “fapi thin nib riyul’” ni bay ko Bible. (2 Timothy 1:13, 14) Ma kar fanayed fare thin nib riyul’ ni ngar ayuweged yugu boch e girdi’ nib yul’yul’ ni ngar chuwgad ko talumor ngar bad ko tamilang rok Got.

6. Mang thin nriyul’ u morngaagen e tamilang nge talumor ni bay ko 1 John 1:5?

⁶ I yol apostal John ni gaar: “I Got e tamilang, dariy buchuuw e lumor u fithik’.” (1 John 1:5) Mu tay fanam iyan riy ko n’en nib thil ko tamilang nge talumor. Tamilang ni machib e yib rok Jehovah, ma dariy buchuuw e talumor nib fanathin rok. Ere mini’ e ma yib e re talumor nem rok?

Talumor—Ani Ke Yib Rok

7. Mini’ e n’igin e talumor nu fayleng, ma mang gelngin ni bay rok?

⁷ I weliy apostal Paul morngaagen “fare got ko re m’ag ney.” Fan e re thin nem e Satan ni Moonyan’. Me ulul ngay ni gaar, “Ke tay lanin’rad u fithik’ e lumor. Ya ke ta’rad ndab ra guyed ramaen fare tamilang ni be mat nga dakenrad, ni fare tamilang ni be yib ko Thin Nib Fel’ ni yib rok Got ni murung’agen e flaab rok Kristus.” (2 Korinth 4:4) Boor e girdi’ ni ma yog ni ke mich Got u wan’rad; machane ka be yoor iyan e girdi’ ni de mich u wan’rad ni bay Moonyan’. Mang fan? Ya dubrad ni ngar lemnaged ni bay ban’en nib kireb nib gel ko girdi’ ni be suruy rogon e lem rorad. Machane ke dag Paul ni bay e Moonyan’ ma ma suruy laniyan’ e girdi’ ni fan e nge dab ra guyed e tamilang ko machib nriyul’. Ke m’ug ko thin ko profet gelngin Satan ni nge suruy laniyan’ e girdi’ ya “ir faanem ni bannag e girdi’ nu fayleng ni polo’.” (Revelation 12:9) Bochan wenegan e maruwel rok Satan, ke yan i lebug e thin rok Isaiah ni profet u daken urngin e girdi’ ni dar pigpiggad ngak Jehovah. I gaar Isaiah: “Yugu boch e nam e bay ra pired u fithik’ e lumor.”—Isaiah 60:2.

8. Uw rogon ni ma dag e piin ni bay ko talumor ni ke balyangan’rad?

⁸ Dabiyog ni ngan guy ban’en u fithik’ e lumor. Rib mom ni nge malog be’ ara nge balyangan’. Ku arrogon e piin ni yad bay u fithik’ e lumor ko tirok Got ban’en ni dariy e gonop rorad ma ke balyangan’rad. Dabiyog ni ngar kieged e thin nriyul’ ko malulfith ara tin nib fel’ ko tin nib kireb. I weliy Isaiah ni profet u morngaagen e piin ni bay u fithik’ e lumor ni aram rogon ni gaar: “Nge gafgow e piin ni yad be yog ni ba fel’ e tin nib kireb ma ba kireb e tin nib fel’, ni yad be yog ni ba talumor e tamilang ma ba tamilang e talumor, ni yad be yog ni ba mooy e athibthib ma ba athibthib e mooy!” (Isaiah 5:20) Satan ni Moonyan’ ni ir e got ko lumor e ir e be suruy laniyan’ e piin ni yad ma par u fithik’ e lumor, ere aram fan ni yad ba dar ko ani ma yib e tamilang nge yafas rok.—Efesus 4:17-19.

Nga Nib U Fithik’ E Lumor Nga Lan E Tamilang—Magawon Riy

9. Mu weliy rogon ni ba adag e piin nib kireb e talumor, ni talumor ni ri talumor nge talumor nib fanathin.

⁹ I weliy Job ni piin ni ma ngongliy e kireb e yad ba adag e talumor ni faani gaar: “Ani ma un ko ngongol ndarngal e ma sonnag e lumor nnep’ ni be gaar: “Dariy be’ nra guyeg!” Me tay e upong nga owchen.” (Job 24:15) Ma par e piin ni ma ngongliy e kireb u fithik’ ba talumor nib fanathin, ma rib gel e re talumor nem. I yog apostal Paul ni piin ni ma par ko re talumor nem e yad ma un ko ngongol ndarngal, nge moro’ro’, nge chogow, nge chingaw, nge cham, nge bugel. Machane rayog ni nge thil be’ ni ra yib nga lan e tamilang ko Thin Rok Got. I tamilangnag Paul nrayog ni nge thil e girdi’ u nap’an ni yoloy e babyor rok ngak piyu Korinth. Boor e pi Kristiano nu Korinth ni kar uned ko ngongolen e lumor u m’on ni kar uned ko machib, machane i yog Paul ngorad ni gaar: “Machane ke n’ag Got fan e denen romed ke beechnagmed; ma ka ni pi’med ngak Got; ma ka ni mat’awnagmed ngak Got u daken fithingan Somol Jesus Kristus ngu daken fare kan ni thothup rok e Got rodad.”—1 Korinth 6:9-11.

10, 11. (a) Uw rogon ni tay Jesus fan fare moon nib malmit ni ke golnag? (b) Mang fan ni de yoor e girdi’ ni kar mel’eged e tamilang?

¹⁰ Nap’an nra chuw be’ u fithik’ e lumor nge yib nga lan e tamilang ma dabi siy ni ba t’uf ba ngiyal’ ni nge mecham owchen ko tamilang. I golnag Jesus be’ ni moon nib malmit u Bethsaida, machane i rin’ ni buchuw nge buchuw. “Me kol pa’ fare malmit i yan nga wuru’ fare binaw, me thuwag e nguboch nga lan mit me ta’ pa’ nruw raba’ nga daken me fith ni gaar, “Kam guy ban’en fa?” Me pug fare malmit owchen nga lang me gaar, “Gu be guy e girdi’ ni yad be yan, machane yad bod yaan e gek’iy ni be yan.” Me ta’ Jesus pa nruw raba’ biyay nga daken lan mit facha’. Me changar faanem ni ke uthum e changar rok, me sul e changar rok nga rogon, me guy gubin ban’en ni ke motabgol u owchen.” (Mark 8:23-25) Dabi siy ni ke golnag Jesus facha’ ni buchuw nge buchuw ni fan e nge mecham owchen ko fare tamilang. Kari falfalan’ faanem u nap’an ni ke yog rok ni nge guy ban’en.

¹¹ Machane kab gel boch e falfalan’ rok e piin ni kan ayuwegrad ni ngar chuwgad u fithik’ e lumor ni buchuw nge buchuw ngar bad nga lan e tamilang ko machib nriyul’. Nap’an ni gad ra guy fene falfalan’ e girdi’ ni kar chuwgad ko lumor, sana gad ra lemnag ko mang fan ni de yoor e girdi’ ni ba adag ni ngar bad nga lan e tamilang. I weliy Jesus fan ni gaar: “Baara’ rogon ni ma yib e gechig: fare tamilang e yib ngak e girdi’ nu fayleng, machane girdi’ e kab t’uf e lumor rorad ko fare tamilang, ya ka yad be rin’ e tin nib kireb. Ya en ni ma rin’ e tin nib kireb e fanenikan fare tamilang ma dabi yib ko fare tamilang, ya dubun ngongolen nib kireb ni nge m’ug.” (John 3:19, 20) Arrogon, boor e girdi’ nib t’uf rorad e “tin nib kireb ban’en”—ni bod e ngongol ko darngal, bugel, malulfith, sasalap, nge moro’ro’—ma rayog ni ngar rin’ed e tin ni yad ba adag u lan e lumor rok Satan.

Ngan Mon’og U Fithik’ E Tamilang

12. Uw rogon ni ke fel’ rogodad ni bochan e kada bad nga lan e tamilang?

¹² Mang boch ban’en nib thil ni kada guyed ko ngongol rodad ni ka nap’an ni kada nanged fare tamilang? Yu ngiyal’ mab fel’ ni ngada sapgad nga keru’dad ngada guyed rogon ni kada mon’oggad ko machib nriyul’. Mang boch e ngongol nib kireb ni kada paged? Mang boch e magawon rodad ni ke yo rodad ni ngada yal’uweged? Uw rogon ni ke thil u wan’dad e pi n’en ni bay nga m’on rodad? Ku rayog ni ngku da mon’oggad iyan ni nge thil rarogodad ma ngki thil rogon e lem rodad, ya Jehovah e ra pi’ gelngin ngodad nge ayuwegdad maku ra ayuwegdad e kan ni thothup rok. (Efesus 4:23, 24) I weliy Paul ni aray rogon: “Ya gimed ma um moyed u fithik’ e lumor, machane nap’an ni mmanged girdien Somol ma gimed be par u fithik’ e tamilang. Ere thingar um ngongolgad ni bod rogon e girdi’ nib mil suwrad ko tamilang. Ya tamilang e boor wom’engin urngin mit e fel’, nge mat’aw, nge tin riyul’ ni ma pi’.” (Efesus 5:8, 9) Faan gad ra pag e tamilang rok Jehovah ni nge gagiyegnagdad ma rayog e athap ngodad, maku bay fan e yafas rodad maku ra fel’ rogon yugu boch e girdi’. Maku ra falfalan’ gumerchaen Jehovah ni bochan e ke thil e ngongol rodad!—Proverbs 27:11.

13. Uw rogon nrayog ni ngada pininged e magar ngak Jehovah ni bochan e tamilang ni ke pi’ ngodad, ma mang e ba t’uf ya ngada rin’ed e re n’en ney?

¹³ Rayog ni ngada pininged e magar ko falfalan’ ni ke yog ngodad ni gad be gal ramaen e tamilang rok Jehovah—ni aram e gad be weliy e pi n’en ni kada filed ko Bible ngak girdien e tabinaw rodad, ara pi tafager rodad, ara girdi’ nu lan e binaw. (Matthew 5:12-16; 24:14) Boch e girdi’ e dab ra motoyilgad, machane machib rodad nge ngongol rodad ni ngongolen e Kristiano e ra ginangrad. I weliy Paul ni gaar: “Mu guyed rogon ngam nanged e n’en ni ir e mm’agan’ Somol ngay. Ere dab um chaggad ngak e girdi’ ni yad ma rin’ e tin ndabi yib fan ban’en, nib mil suwon nga fithik’ e lumor. Machane ngam feked e pi n’ey i yib ko tamilang.” (Efesus 5:10, 11) Thingar dab da rusgad ni ngada ayuweged yugu boch e girdi’ ni ngar chuwgad ko lumor ngar bad nga lan e tamilang. Maku ba t’uf ni ngada runguyed e yugu girdi’ ma ngada adaged ni ngada ayuweged yad ko fare tamilang ni machib nriyul’ ni ra fel’ rogorad riy ni manemus.—Matthew 28:19, 20.

Mu Ayuw Ko Tamilang Ni Gathi Ir E Tamilang!

14. Miti mang tamilang ni ngada ayuwgad riy?

¹⁴ Piin ni ma yan u maday nnep’ e ma falfalan’ ni ngar guyed raen e tamilang. Kakrom e yima k’eg e nifiy u dap’e l’ay ya ngan nang e gin nrayog ni ngan nab ngay u nap’an nra kireb e lang. Ri ma falfalan’ girdien e barkow ni ngar guyed e pi nifiy nem ma ngar nanged e gini bay e dubchol riy. Machane boch e pi nifiy nem e ba sasalap. Ya ra fol e barkow ngay ma dabi pirieg e dubchol machane ra ser e barkow nga daken e malang u dap’e l’ay me yib e moro’ro’ ngar iringed e chugum riy. Ri boor e sasalap ko re fayleng ney, ere thingar da ayuwgad ni dab da folgad ko tamilang ni ba sasalap me pil e barkow rodad ni aram e michan’ rodad. Begaar e Bible: “Ya ku rayog rok moonyan’ ni nge piliyeg ir nge bod yaan ba engel ko tamilang.” Maku arrogon e pi tapigpig rok moonyan’ nrayog rorad ni ngar “piliyeged yad ngar boded yaan e pi tapigpig ko tin nib mat’aw.” Faan manga gad ra motoyil ko girdi’ ni aram rogon ma rayog ni nge war e michan’ rodad ko Thin Rok Jehovah nriyul’ ni aram e Bible ma rayog ni nge yim’ e michan’ rodad.—2 Korinth 11:13-15; 1 Timothy 1:19.

15. Mang e ra ayuwegdad ni nguuda pared ko kanawo’ nra sor ko yafas?

¹⁵ I yog e ani yoloy e psalm ni gaar: “Thin rom e ba magal ni be pow’iyeg, me ir e tamilang ko kanawo’ ni gu be yan riy.” (Psalm 119:105) Arrogon, ke tamilangnag Jehovah ni Got rodad fare “kanawo’ nib wen’in ni kanawoen e yafas” ya ri ma t’ufegdad ma “ba adag urngin e girdi’ ni ngar thapgad ngak ma ngar nanged e tin nib riyul’.” (Matthew 7:14; 1 Timothy 2:4) Gad ra fol ko machib ko Bible ma ra ayuwegdad ni nge dab da chuwgad ko fare kanawoen e yafas ngada sorgad nga fithik’ e lumor. I gaar Paul: “Ya urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoliyed nga babyor, me ir e ba ga’ fan ya ma fil e tin nib riyul’ e thin ngodad, ma be yal’uweg e tin ni be oloboch e girdi’ riy, ma be fulweg e girdi’ ko ngongol nib fel’, ma be fonownag e girdi’ u rogon e ngongol ni ngar pired riy ni ir e mmat’aw u mit Got.” (2 Timothy 3:16) Nap’an ni gad ra ilal nrogon e Kristiano ma Thin Rok Got e ra skulnagdad. Rayog ni ngada ginanged gadad ko tamilang ni yib ko Thin Rok Got, maku rayog ni nge ginangdad e piin ni piilal u lan e ulung. Maku rayog ni ngada yal’uweged boch e magawon rodad ma rayog ni ngada sobut’nag lanin’dad ngada folgad ko fonow nib mat’aw nra ayuwegdad ni nguuda pared u kanawoen e yafas.

Ngada Ted Fan E Tamilang Ni Gad Be Yan Riy

16. Uw rogon nrayog ni ngada ted fan e taw’ath rok Jehovah ni aram e tamilang?

¹⁶ Uw rogon ni rayog ni ngada ted fan fare tamilang ni ma pi’ Jehovah? Bay ko John ko guruy ni 9 morngaagen be’ ni moon ni kan gargeleg ni malmit, me golnag Jesus faanem me pining e magar riy ngak Jesus. Uw rogon? I mich u wan’ ni Jesus e ir Fak Got me yog faanem u fithik’ e girdi’ ni Jesus e ir e “profet.” Ma de rus ni nge togopuluw ngak e piin ni kar dariy fannaged e maang’ang ni fl’eg Jesus. (John 9:17, 30-34) I yog apostal Peter ni girdien fachi ulung e yad “girdien Got ni ke mel’eg Got.” Mang fan? Bochan e yad bod fare moon nib malmit ni kan golnag ni yad ma pining e magar ngak Got. Yad ma tay fan Jehovah ni ir e ke Ayuwegrad mi yad “wereg murung’agen e n’en nrib fel’ ni ke ngongliy Got ni ir e piningrad u fithik’ e lumor ngar bad nga fithik’ e tamilang rok nrib fel’.” (1 Peter 2:9; Kolose 1:13) Piin ni yad ma athapeg ni ngar pared u fayleng e ku yad ma pining e magar ngak Got mi yad ayuweg pi walagrad ni kan duguliyrad ko kan ni thothup ni ngar wereged morngaagen “fene sorok” Jehovah. Rib fel’ e taw’ath ni ke pi’ Jehovah ngak e girdi’ nib tadenen!

17, 18. (a) Mang e mmil fan ngak urngin e girdi’? (b) Ngada boded Timothy ma mang e dab da rin’ed?

¹⁷ Ri baga’ fan ni ngada ted fan e tamilang ko machib nriyul’. Dab mu pag talin ni dariy bagadad ni kan gargeleg ma ka manang e machib nriyul’. Boch i gadad ni kada filed e machib nriyul’ u nap’an ni kada ilalgad, ma gad guy ni kab fel’ e tamilang ko talumor. Boch i gadad e ba taw’ath ya gallabthir rodad ni bay madgun Got u wan’rad e ke chuguliydad. Pi girdi’ ni aray rogon e kab mom boch rorad ni nge dab ra ted fan e tamilang. Bay reb e ppin ni Mich Rok Jehovah ni gallabthir rok e ur pigpiggow ngak Jehovah u m’on ni kan gargeleg e i yog nib ke n’uw boch nap’an ma ke gel e athamgil ni tay ya nge nang fene ga’ fan e machib ni i fil ni kab bitir. (2 Timothy 3:15) Yugu demutrug ko gad ba ilal ara gad ba fel’ yangaren, machane nge bagadad e thingari tay fan fare machib nriyul’ ni ke tamilangnag Jehovah ngodad.

¹⁸ Kan fil e “thin ni bay u lan e babyor nib thothup” ngak Timothy ni ka nap’an ni kab bitir, machane ke ilal nrogon e Kristiano ni bochan ni i athamgil ko machib. (2 Timothy 3:15) Ma aram e rayog ni nge ayuweg apostal Paul. Me gaar Paul ngak: “Mu athamgiliy u rogon nrayog rom nge par e maruwel rom nrib fel’ u mit Got, ni bod rogon be’ ni girdien e maruwel nder tamra’ ko maruwel rok, ni ir be’ ni ma machibnag e thin rok Got nrogon.” Ere ngada boded Timothy ma dab da rin’ed ban’en ni gad ra tamra’ ngay—ara nge tamra’ Jehovah ngodad!—2 Timothy 2:15.

19. (a) Mang e rayog ni ngad dogned ni bod rogon ni yog David? (b) Mang e gad ra fil ko bin migid e thin?

¹⁹ Ere bay fan ni nga dogned e sorok ngak Jehovah ni ir e ke pi’ e tamilang ngodad ni aram e machib nriyul’. Taareb e thin rodad David ni Pilung ni ke gaar: “Somol, i gur e tamilang rog, gur e kam chuw e lumor ni ug par u fithik’.” (2 Samuel 22:29) Machane dabiyog ni ngada pared ni kaygi pagan’dad ngodad ya rayog ni ngada sulod ko fare talumor ni kada bad riy. Ma bin migid e thin e ra ayuwegdad ni ngada gonopiyed fene ga’ fan fare machib rok Got nriyul’ u wan’dad.

Mang E Kam Fil?

• Uw rogon ni ma pi’ Jehovah e tamilang ni machib?

• Mang magawon ni bay rodad ni bochan e talumor ni bay u fayleng e chiney?

• Mang boch e riya’ ni ngada paloggad riy?

• Uw rogon nrayog ni ngada daged ni gad be pining e magar ko tamilang ni machib ni ke yog ngodad?

[Picture on page 20]

Jehovah e ma pi’ e tamilang ni yib u lan e lang nge tamilang ni machib

[Picture on page 22]

I golnag Jesus be’ ni malmit ni buchuw nge buchuw maku aram rogon ni ma ayuwegdad ni ngada chuwgad u fithik’ e lumor nib fanathin

[Picture on page 23]

Ani ra fol ko tamilang rok Satan nib sasalap e ra ser e barkow rok