Mu Fil Ma Ga Fil Ngak Yugu Boch E Girdi’ E Yalen E Kristiano

“Ga be machibnag boch e girdi’−mang fan ndab mmachibnigem?”​—Roma 2:21.

1, 2. Mang boch i fan ni ga ba adag ni ngam fil e Bible?

Sana bay boor fan ni ga ma fil e Thin Rok Got. Sana ga ba adag ni ngam nang morngaagen e girdi’ riy, ara pi n’en ni ke buch ara gini ke buch riy nge yugu boch ban’en. Ga ba adag ni ngam nang e machib nriyul’ ni gathi machib ni yugu ban’en ni bod e Trinitas nge nifiy ko infierno. (John 8:32) Ma ku ga ba adag ni ngam nang Jehovah ya ngam folwok rok ma ga ngongol nrogon nib mat’aw u p’eowchen​—1 Kings 15:4, 5.

² Ma ku reb i fan ni ngam fil e Thin Rok Got e nge yog rogom ni ngam machibnag yugu boch e girdi’​—ni piin ni yad ba t’uf rom, nge pi tafager rom nge piin ni dawor manang owcherad. Thingari rin’ e tin riyul’ e Kristiano e re n’en ney. I yog Jesus ngak pi gachalpen ni gaar: “Ere mmarod ngak girdien e pi nam u gubin yang ngam pingeged yad ngar manged pi gachalpeg, . . . mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.”​—Matthew 28:19, 20.

3, 4. Mang fan ni yira tay fam ni faan ga ra machib ni bod ni yog Jesus ni ngan rin’?

³ Bay e falfalan’ riy ni ngan fil e Bible ni fan e ngan fil e machib ngak yugu boch e girdi’. Kab kakrom ma yima tay fan e piin ni sensey. I gaar fare ke babyor ni The Encarta Encyclopedia ni gaar: “Ma lemnag piyu Jew ni piin ni sensey e yad ma pow’iy e girdi’ ni ngar thapgad, ma kab gel e tay fan ni nge tay e piin nib bitir ngak e pi sensey rorad ngak e pi gallabthir rorad.” Maku bay e tay fan riy ni nge fil e pi Kristiano e Bible mi yad fil ngak yugu boch e girdi’.

⁴ “Ka boor boch e piin nib sensey ngak yugu reb e maruwel. Gonapan 48 million e pumoon nge ppin ni yad e sensey u fayleng iyan.” (The World Book Encyclopedia) Ke mil fan laniyan’ e piin nib bitir ngak be’ nib sensey ma pi n’en ni ra fil ngorad e ra suruy e pi n’en ni ra rinˈ e pi bitir nem u nap’an e yafas rorad. Ma kab gel wenegan e machib ni ga ra fil ngak yugu boch e girdi’; ya faan ga ra fol ko motochiyel rok Jesus ni ngam machibnag yugu boch e girdi’ ma ga ra ayuweg e yafas rorad ni manemus. I tamilangnag apostal Paul ni aram rogon u nap’an ni yog ngak Timothy ni gaar: “Mu ayuwegem, ma ga ayuweg rogon ni ga be weliy murung’agen e thin rok Got ngak e girdi’. Um rin’ e pi n’ey iyan, ya faanra mu rin’ ma ga ra ayuwegem nge piin ni yad ma motoyil ngom ngar thapgad ngak Got.” (1 Timothy 4:16) Arrogon, machib ni ga ra tay e ra thapeg e girdi’.

5. Mang fan ni machib ni ma tay e Kristiano e aram e bin th’abi fel’ e maruwel?

⁵ Ani Th’abi Tolang ni ir e Pilung ko urngin e ir e ke pi’ mat’awem ni ngam fil e machib ma ga machibnag yugu boch e girdi’. Re n’en ney e ma tay ni machib ni gad be fil e ka ba ga’ fan ngak urngin ban’en ni yima fil ni aram e skul, ara maruwel ni yima fil, ma ka baga’ ko tafalay ni yima fil. Pi Kristiano e ma fil rogon ni ngar folwokgad rok Kristus Jesus ni Fak Got mi yad fil ngak yugu boch e girdi’ ni ngar folwokgad rok.​—John 15:10.

Mang Fan Ni Ngam Machibnagem?

6, 7. (a) Mang fan ni thingar da machibnagdad ko somm’on? (b) Uw rogon ni de m’ag e maruwel rok e tin somm’on yu Jew ni ngar filed e machib ngak e girdi’?

⁶ Mang fan ni thingar da filed e machib ngodad ko somm’on? Ya dabiyog ni ngada filed e machib ngak yugu boch e girdi’ ni faan manga dab da filed e machib ngodad. I tamilangnag Paul e re n’en ney ni bay fan ngak piyu Jew ko ngiyal’ nem maku bay fan ngak e pi Kristiano e ngiyal’ ney. I fith Paul ni gaar: “Ga be machibnag boch e girdi’​—mang fan ndab mmachibnigem? Ga be machibnag ni be lungum, “Dab ni moro’ro’”​—me gur ga ma moro’ro’, fa? Be lungum, “Dab mu pirew be’ ni gathi mabgol rom,”​—me gur gimew be par be’ ni gathi mabgol rom, fa? Ri dabum e liyos ni ma meybil boch e girdi’ ngay​—ma ga ma moro’ro’ u lan e pi tempel ni yad ba’ riy fa? Ga be uf nga murung’agen e motochiyel rok Got ni ba’ rom​—ma ga be girngiy e tamra’ nga daken Got ni bochan e ga be th’ab e motochiyel rok fa?​—Roma 2:21-23.

⁷ I weliy Paul l’agruw e denen ni bay ko Fa Ragag I Motochiyel: Dab ni moro’ro’ nge dab ni un ko ngongol ndarngal. (Exodus 20:14, 15) Ke uf boch e girdi’ u nap’an Paul ni bochan e bay e Motochiyel rok Got rorad. “Ke fil e Motochiyel ngorad rogon ni ngar nanged e tin nib mat’aw ma yad be finey ni yad e be pow’iy e piin ni yad mmalmit, mi yad be fonownag e piin ni yad bbalyang, mi yad e sensey ko piin ni bitir.” (Roma 2:17-20) Machane boch i yad e yad be dake yad mat’aw ya yad be un ko moro’ro’ ara ngongol ndarngal ni yad be mith. Ngongol rorad e ma tamra’nag fare Motochiyel nge Ani ma par u tharmiy ni ke pi’ fare Motochiyel. Ere dabiyog ni ngar machibnaged yugu boch e girdi’; ya de yog rorad ni ngar filed e machib ngorad.

8. Uw rogon ni i “moro’ro’ u tempel” boch yu Jew u nap’an Paul?

⁸ I weliy Paul morngaagen e moro’ro’ ni yibe tay u lan e tempel. Aram e n’en ni rin’ boch yu Jew, fa? Mang e be weliy Paul morngaagen? Bin riyul’ riy e gathi ri boor ban’en ni yima nang u morngaagen e thin rok Paul, ere dabiyog ni nga dogned rogon ni i “moro’ro’” boch yu Jew u lan e pi tempel. Ani ta yol nu Efesus e i yog ni Paul nge piin ni yad e “dar iringed ban’en u tempel,” ma be m’ug ko thin rok ni boch e girdi’ e ur lemnaged ni ma moro’ro’ boch yu Jew u lan e pi tempel. (Acts 19:29-37) Ku rayog ni nge aw ni yibe fanay ara yibe fol chuway’ ko pi n’en ni kan iring u tempel u nap’an e mahl, fa? Rogon e Motochiyel rok Got e thingar ni gothey e pi liyos nfl’eg ko gol ara silver ma dabiyog ni ngan fanay. (Deuteronomy 7:25)a Ere rayog ni nge aw ni be weliy Paul morngaagen boch yu Jew ni dar folgad ko motochiyel rok Got mi yad fanay ara fol chuway’ ko pi n’en ni yib ko tempel rok e pi nam.

9. Mang boch e kireb ni un rin’ u tempel u Jerusalem ni ba taareb rogon ko moro’ro’ u tempel?

⁹ Machane i weliy Josephus morngaagen aningeg e Jew, ma ga’ rorad e ir e tamachib ko Motochiyel. Pi cha’ ney e ur bannaged reb e ppin nu Roma ni i fol ko raba’ i teliw rok yu Jew, me pi’ fare ppin e gol nge boch e machaf nib tolang puluwon ngorad nge mang maligach rok ko tempel u Jerusalem. Ma pi cha’ nem e kar fanayed e re maligach nem​—ere gowa kar iringed e chugum ko tempel.b Yugu boch e girdi’ e gowa yad be moro’ro’ u tempel rok Got ni bochan e ur pied e maligach ni bay thibngin riy ara yad be fol chuway’ u lan e tempel nge mang e tempel “bangi n’en ni ma mith e moro’ro’ riy.”​—Matthew 21:12, 13; Malachi 1:12-14; 3:8, 9.

Ngan Fil Ngak Yugu Boch e Girdi’ Yalen e Kristiano

10. Mang fan ni dab da paged ko mang fan e thin rok Paul u Roma 2:21-23?

¹⁰ Yugu demutrug e n’en ni be yip’ Paul fan ngay u nap’an ni weliy morngaagen e moro’ro’ ara ngongolen e darngal ara moro’ro’ u tempel dab da paged ko mang fan e thin rok. I fith faram: “Ga be machibnag boch e girdi’​—mang fan ndab mmachibnigem?” Mu tayan’um ngay ni be weliy Paul morngaagen yalen e Kristiano. Gathi be weliy Paul morngaagen chepin e Bible. Pi n’en ni be weliy Paul ni ngada filed ma ngada filed ngak yugu boch e girdi’ e morngaagen yalen e Kristiano.

11. Mang fan ni thingar mu tayan’um ko yalen e Kristiano u nap’an ni ga be fil e Thin Rok Got?

¹¹ Faan gad ra fol ko fare thin u Roma 2:21-23 ma thingar da filed yalen e Kristiano ni bay ko Thin Rok Got, ma ngada folgad ko tin ni kada filed, ma aram e ngada machibnaged ngak yugu boch e girdi’ ni ngar folgad ko re yalen nem. Ere nap’an ni ga ra fil e Bible ma ga tayan’um ngay ko mang e pi motochiyel rok Jehovah, ya yalen e Kristiano e ma yan u rogon e pi motochiyel nem. Mu fl’eg i lemnag e fonow ni ga ra pirieg u Bible. Ma dab mu rus ngay ni ngam fol riy. Ya ba t’uf ni dab mu rus ma ga duguliy lanin’um ni ngam fol ngay. Rib mom rok e girdi’ nib tadenen ni nge tawey ngay ara nge lemnag ni bay fan ni nge dabi fol ko yalen e Kristiano. Sana aram e n’en ni rin’ boch piyu Jew u nap’an Paul ni yad be tawey ara yad be guy rogon ni ngar bannaged yugu boch e girdi’. Machane be m’ug ko thin rok Paul ni dabiyog ni ngan dariy fannag yalen e Kristiano.

12. Uw rogon ni bay rogon e ngongol rodad nib fel’ ara kireb ngak Jehovah, ma mang fan ni ra fel’ rogodad riy ni faanra dab da paged talin e re thin nem?

¹² I tamilangnag fare apostal ko mang fan ni ngam fil yalen ni bay ko Bible ma ga fol ngay. Ngongol nib kireb rok yu Jew e ma girngiy e kireb nga daken Jehovah: “Ga be uf nga murung’agen e motochiyel rok Got ni ba’ rom−ma ga be girngiy e tamra’ nga daken Got ni bochan e ga be th’ab e motochiyel rok fa? Ya be gaar e babyor nib thothup, “Piin ni gathi yad piyu Israel e yad be yog e thin nib kireb nga fithingan Got ni bochan e ngongol romed piyu Israel.”” (Roma 2:23, 24) Maku arrogon e chiney ni faan manga dab da folgad ko yalen e Kristiano ma gad ra girngiy e tamra’ nga daken e Ani sunmiy e re yalen nem. Machane faan gad ra fol ko motochiyel rok Got ma gad ra girngiy e fel’ nga daken ma yira tay fan Got. (Isaiah 52:5; Ezekiel 36:20) Faan ga ra nang ni aram rogon ma rayog ni nge gel lanin’um u nap’an ni yira waliyem ara ga ra lemnag ni bin nib mom e kanawo’ e ba togopuluw ko yalen e Kristiano. Machane ku bay ban’en ni rayog ni ngada filed ko thin rok Paul. Ga manang ni bay rogon e ngongol rom ko tay fan ni yima tay ngak Got, ere nap’an ni ga ra machibnag e girdi’, mu ayuwegrad ni ngar nanged ni rayog ni ngar girngiyed e fel’ nga daken Jehovah ni bochan e yad be fol ko pi motochiyel ni yad be fil. Ra fel’ laniyan’ be’ ni ra fol ko yalen e Kristiano maku ra fel’ fithik’ i downgin. Maku ra fel’ morngaagen e Ani ke pi’ e re yalen nem me pi’ e athamgil nga laniyan’ e girdi’ ni ngar folgad ko re yalen nem.​—Psalm 74:10; James 3:17.

13. (a) Uw rogon ni ma ayuwegdad e Bible ni ngada pared ni gad ba yalen? (b) Mu weliy e fonow ni bay ko 1 Thessalonika 4:3-7.

¹³ Bay wenegan e ngongol rodad ngak yugu boch e girdi’. Rayog ni ngam fil morngaagen e girdi’ u lan e Thin Rok Got ni be tamilangnag nib fel’ ni ngan fol ko yalen ni yib rok Got ma be tamilang wenegan nra yib ngak e piin ni yad ma dariy fannag e motochiyel rok Got. (Genesis 39:1-9, 21; Joshua 7:1-25) Rayog ni ngam pirieg e fonow u rogon yalen ni bod e biney: “Baara e n’en ni ba adag Got ni ngam rin’ed: ba adag ni ngam pired ni gimed ba thothup ma da mur darngalgad ara par be’ nge be’ ni gathi mabgol rok. Ra bigimed e piin ni pumoon ma susun e nge nang rogon ni nge fek be’ ni ppin nge leay u lan e kanawo’ nib thothup ma dariy thibngirow riy, ma gathi bochan e ar’ar’ rok, ni bod e piin ndar nanged Got. Dariy be’ nib moon ni nge ngongliy e kireb ngak be’ ni walagen ni girdien Kristus ara kirebnag mat’awun faanem ko re bugithin ney, . . . Ya Got e de piningdad ni nguud pired ni gadad be darngal, ya nguud pired ni gadad ba thothup.”​—1 Thessalonika 4:3-7.

14. Mang e rayog ni ngam fithem u morngaagen fare fonow ni bay ko 1 Thessalonika 4:3-7?

¹⁴ Ri ba tamilang ko re thin ney ni ba togopuluw e ngongol ndarngal ko yalen e Kristiano. Machane ku bay boch ban’en riy ni gathi ri ba tamilang. Ga ra fil ma ga fl’eg i lemnag ma rayog ni nge yog e gonop ngom. Susun, ngam fl’eg i lemnag e n’en ni be yog Paul ni be’ ni ke un ko ngongol ko darngal e rayog ni nge “ngongliy e kireb ngak walagen ara kirebnag mat’awun faanem ko re bugithin ney.” Mang mat’awen e be weliy morngaagen, ma uw rogon ni ra gel e athamgil u lanin’um ni ngam fol ko yalen e Kristiano ni faanra tamilang u wan’um ko mang mat’awen ni be weliy morngaagen? Uw rogon ni ra fel’ e machib ni ga ra tay ngak yugu boch e girdi’ ni ga be ayuwegrad ni ngar ted fan Got ni faan ga ra fl’eg i gay e fulweg ko re deer nem?

Ngam Fol Babyor Ni Fan e Ngam Machibnag e Girdi’

15. Mang boch talin e maruwel ni rayog ni ngam fanay ni ngam machibnagem u nap’an ni ga be fol babyor?

¹⁵ Bay talin e maruwel rok e Pi Mich Rok Jehovah ni ngar filed ya ngar nanged e fulweg ko deer ni yira fith u nap’an ni yad ra fil e babyor ara yad ra machibnag yugu boch e girdi’. Reb e talin e maruwel rodad ni kan pilyeg u boor miti thin e aram e the Watch Tower Publications Index. Faan manga bay e re ke babyor ney rom ma rayog ni ngam gay e tin ni bay ko yugu boch e babyor rok e Pi Mich Rok Jehovah. U lan e re ke babyor nem e rayog ni ngam gay morngaagen bugithin ara ngam gay e gini bay morngaagen ba guruy ko Bible. Yugu reb e talin e maruwel ni bay rok e Pi Mich Rok Jehovah e aram e Watchtower Library. Re n’en ney e bay ko computer ni yima yog e CD-ROM ngay ni bay riy boor e babyor rodad. Rayog ni ngan gay riy morngaagen bugithin ara gini be weliy morngaagen ba guruy ko Bible. Faanra bay e re talin e maruwel ney rom, ma ga fanay u nap’an ni ga be fil e Thin Rok Got ara ga be machibnag yugu boch e girdi’.

16, 17. (a) Uw e gin nrayog ni ngam pirieg e thin riy ni be weliy morngaagen mat’awen be’ ni be weliy 1 Thessalonika 4:6 morngaagen? (b) Uw rogon nrayog ni nge kirebnag be’ mat’awen yugu boch e girdi’ ni bochan e ngongol ko darngal ni ke un ngay?

¹⁶ Ngada weliyed fare thin ko Bible ni bay ko 1 Thessalonika 4:3-7. Kan fith fare deer u morngaagen mat’awen be’. Mat’awen mini’? Ma uw rogon nrayog ni ngan kirebnag mat’awen be’? Faan ga ra maruweliy fa gali talin e maruwel ni kada weliyed morngaagen ma rayog ni ngam pirieg boch ban’en ni ra tamilangnag e thin rok Paul u morngaagen mat’awen be’. Rayog ni ngam bieg e thin ni bay ko fare ke babyor ni Insight on the Scriptures, Volume 1, pages 863-4; ara True Peace and Security​—How Can You Find It?, page 145; ara The Watchtower, November 15, 1989, page 31.

¹⁷ Ga ra gay u lan e pi babyor ney ma ga ra pirieg fene riyul’ e thin rok Paul. Be’ ni ke un ko ngongol ko darngal e ke denen nib togopuluw ngak Got ma rayog ni nge yib e m’ar ngak ni bochan e ngongol ko darngal. (1 Korinth 6:18, 19; Hebrews 13:4) Be’ ni moon ni ra un ko ngongol ndarngal e ra kirebnag mat’awen fare ppin ni ke un ngak ko denen. I kirebnag morngaagen fare ppin me kireb e nangan’ rok. Faan manga dawori un fare ppin ko mabgol ma ke kirebnag fare moon mat’awen fare ppin ni nge un ko mabgol ni ir e machalbog, maku i kirebnag mat’awen e pumoon nra figirngiy fare ppin. Ra kirebnag fare moon mat’awen e gallabthir rok fare ppin ma faan manga ke mabgol fare ppin ma ra kireb mat’awen e pumoon rok. Ma fare moon nra un ko ngongol ko darngal e ra kirebnag mat’awen chon e tabinaw rok ni nge fel’ morngaagrad. Ma faan manga ir be’ ni Kristiano ma ra girngiy e kireb nga daken e ulung me kirebnag morngaagen.​—1 Korinth 5:1.

18. Uw rogon ni ke fel’ rogom riy ni bochan e kam fil e Bible u morngaagen yalen e Kristiano?

¹⁸ Pi thin ney u morngaagen mat’awen be’ e ma tamilangnag fare thin ko Bible, fa? Ere baga’ fan ni ngan fil e babyor ni aram rogon. Nap’an ni ga ra fol babyor ma ga be machibnagem. Ra gel e michan’ rom ni ba riyul’ e thin rok Got mab puluw e thin riy. Maku ra yib e athamgil nga lanin’um ni ngam fol ko yalen e Kristiano ni yugu demutrug e skeng nra yib ngom. Amu lemnag fene fel’ e machib ni ngam tay ni bochan e kam fol babyor! Susun, nap’an ni ga be machibnag ngak boch e girdi’ e machib nu Bible ma rayog ni ngam tamilangnag fare thin ni bay ko 1 Thessalonika 4:3-7 ma ra tamilang u wan’rad ko mang e yalen e Kristiano. Ere fol babyor ni ga ra tay e ra ayuwegem maku ra ayuweg yugu boch e girdi’ ni ngar ted fan Got. Ke mus ni taareb e thin ni kada weliyed ni bay ko thin rok Paul ngak piyu Thessalonika. Bay boor ban’en nib sor fan ko yalen e Kristiano ma boor e thin ko Bible nge fonow ko Bible ni rayog ni ngam fil ma ga fol ngay ma ga machibnag ngak yugu boch e girdi’.

19. Mang fan ni baga’ fan ni ngam fol ko yalen e Kristiano?

¹⁹ Dariy e maruwar riy ni bay e gonop riy ni ngam rin’ e pi n’ey. I gaar James 3:17 ni “fare gonop ni yib u tharmiy” ara ke yib rok Jehovah Got e “bin somm’on ma ba machalbog.” Be m’ug ko re thin nem ni thingar ni fol ko yalen ni yib rok Got. Ke tay Jehovah chilen ngak e piin ni yad owchen ni yad ma machibnag e Bible ni ngar “machalboggad.” (1 Timothy 4:12) Ngongol rok e tin somm’on i gachalpen Jesus ni bod Paul nge Timothy e ma tamilangnag ni aram rogon; dar uned ko ngongol ko darngal. I yog Paul ni gaar: “De mat’aw ni nge un u l’ugunmed e thin ko darngal, ara thin nib golong, ara thin ko chogow, ni bochan e gimed girdien Got. Ma ku de m’ag ngomed ni ngam mogned e thin nib puwlag, ara thin ni ma yog e balyang, ara thin ni yima tamra’ ngay.”​—Efesus 5:3, 4.

20, 21. Mang fan ni ke taareban’um ko n’en ni yog apostal John u 1 John 5:3?

²⁰ Fare yalen ni bay ko Thin Rok Got e rib tamilang, machane gathi ban’en ni kaygi tomal ma ra gafgow be’ riy. Ba tamilang ni aram rogon ko thin rok John, ma ir fare apostal ni i par nib fas ni th’abi n’uw nap’an. Manang John ni dariy e tagan nra yib ngak be’ ni faanra fol ko yalen e Kristiano, me nang ni aram rogon ko tin ni ke guy u nap’an e yafas rok. Machane ke nang ni ke fel’ rogon e girdi’ ma yad ba flaab ni bochan yalen e Kristiano. I tamilangnag John ni aray rogon ni gaar: “Ba aray fan ni nge t’uf Got rodad: fan e ngad folgad ko tin ni ke yog ni ngad rin’ed. Ma tin ni ke yog ni ngad rin’ed e gathi rib mo’maw’.”​—1 John 5:3

²¹ Mu tayan’um ngay ni de yog John ni ngan fol rok Got nge yalen e Kristiano ni bochan e aram e bin nib fel’ e kanawo’ ni dariy e magawon riy ara nge siy wenegan e togopuluw ko motochiyel. Bpuluw e thin rok ya be yog ni ngada folgad ko motochiyel ni bochan e ba t’uf Jehovah Got rodad, ma aram kanawoen ni gad ma dag ni ba t’uf Got rodad. Faanra gad be fil rogon ni nge t’uf Got rodad ara gad be machibnag yugu boch e girdi’ ni ngar t’ufeged Got ma thingar da folgad ko pi motochiyel rok nib tolang. Arrogon, thingar da filed ngodad ara ngada filed ngak yugu boch e girdi’ ni ngar folgad ko yalen e Kristiano.

[Footnotes]

Ka Ga Manang?

• Mang fan ni thingar da machibnaged gadad u m’on ni ngada machibnaged yugu boch e girdi’?

• Uw rogon nrayog ngada girngiyed e kireb ara fel’ ngak Jehovah ni bochan e ngongol rodad?

• Be’ ni ra un ko ngongol ko darngal e re kirebnag mat’awen chon mini’?

• Mang e ke mudugil u wan’um u rogon yalen e Kristiano?

[Picture on page 18]

“De tomal e motochiyel rok”