Kan Skengng Fare “Tapigpig Nib Yul’yul’” Ma Ke Gel’ Ko Skeng!

“Ya ke taw nga nap’an ni nge tabab e pufthin, ma piin ni girdien Got e yad e somm’on ni ngan pufthinnagrad.”​—1 PETER 4:17.

1. Mang e ke pirieg Jesus u nap’an ni ke fl’eg I yaliy fare “tapigpig”?

NAP’AN Pentecost ko duw ni 33 C.E. me duguliy Jesus reb e “tapigpig” ni nge pi’ e ggan ko ngiyal’ ni ngan pi’ riy ngak e “tin ni ka bay e tapigpig.” Ke pilung Jesus ko duw ni 1914 me chugur ko ngiyal’ ni nge lekag fare “tapigpig.” Ma baga’ ni ke pirieg ni ba “yul’yul’mab gonop” fare “tapigpig.” Ere ke tay ni nge “mil fan urngin ban’en rok ngak.” (Matthew 24:45-47) Machane ku bay yugu reb e tapigpig nib kireb maku de yul’yul’ ma de gonop.

“Fare Tapigpig Nib Kireb”

2, 3. U uw e ke yib “fare tapigpig nib kireb” riy, ma uw rogon ni ke sum?

² I weliy Jesus morngaagen fare tapigpig nib kireb u tomren ni weliy morngaagen fare “tapigpig nib yul’yul’ mab gonop.” Be gaar: “Ma faanra ir reb e tapigpignib kireb, ma ra gaar u wan’, Masta rog e kab n’uw nap’an mfini sul, ma aram me tabab i pirdiiy e pi tapigpig ni yad, ma be un ngak e piin ni yad ba tamuun rrum ko abich nge muun rrum. Ma aram e bayi reb e rran me sul fare masta rok fare tapigpig nder finey nra sul riy ngu ba ngiyal’ nde nang; ma aram e bayi thetha’b fare masta faanem nnochiyang min uneg ko n’en ni ngan rin’ ngak fapi cha’ ni yad ma dake modingniged yad. Ni aram e gin ni bay i yor riy ma be chachafin nguwelen.” (Matthew 24:48-51) I yog Jesus “fare tapigpig nib kireb” ma be yip’ fan fare thin ni ka fini weliy morngaagen fare tapigpig nib yul’yul’ mab gonop. Arrogon, fare “tapigpig nib kireb” e ra yib u fithik’ fare tapigpig nib yul’yul’.a Uw rogon?

³ U m’on ko duw ni 1914 ma boor girdien fare tapigpig nib yul’yul’ ni ur athapeged ni ngar mada’gad Jesus u tharmiy ko re duw nem, machane de lebug e n’en ni kar athapeged. Me ere ke mulan’rad ma boch I yad e ke awan’rad ni bochan e de lebug e n’en ni kar athapeged. Boch I yad e gowa kar “pirdiiyed” e pi walagrad ni yad be yog e thin nib kireb ngorad ma kar chaggad e “pi tamuun rrum” ni yad e pi yurba’ I teliw nu Kristendom.​—Isaiah 28:1-3; 32:6.

4. Mang e rin’ Jesus ngak “fare tapigpig nib kireb” nge urngin e piin nib taareb rogon lanin’rad?

⁴ Pi chap’ nem ni kar thaygad ko Kristiano e yad fare “tapigpig nib kireb” mab gel e gechig ni pi’ Jesus ngorad. Uw rogon? Ke n’agrad ma dabiyog ni ngar uned nga tharmiy. Machane dan thangrad ko chi ngiyal’ nem. Somm’on ma thingar ra gafgowgad ni yad be yor ma be chachafin nguwelrad “u fithik’ e lumor” u wuru’ e ulung ni Kristiano. (Matthew 8:12) Ka nap’an e ngiyal’ nem ma ke un boch girdien fachi ulung ko fare “tapigpig nib kireb” ni yad be dag e lem nib kireb. Boch e girdi’ ko “yugu boch e saf” e kar folgad rok e piin ni dar yul’yul’gad. (John 10:16) Urngin e pi toogor rok Kristus nem e ra “pared u wen u fithik’ e lumor.”

5. Mang e rin’ fare tapigpig nib yul’yul’ mab gonop nib thil ko n’en ni rin’ fare “tapigpig nib kireb”?

⁵ Machane kan skengnag fare tapigpig nib yul’yul’ mab gonop ni taareb rogon ko skeng ntay ko “fare tapigpig nib kireb.” Machane de awan’ fare tapigpig nib yul’yul’ ya kan yal’uweg lanin’rad. (2 Korinth 13:11) Kan gelnag e t’ufeg rorad ngak Jehovah nge pi walagrad. Ere kar manged ba “duga’ me ir e be dunubiy fare thin nib riyul’” u nap’an e “tin tomren e rran” ni boor e wagey riy.​—1 Timothy 3:15; 2 Timothy 3:1.

Pi Rugod Ni Yad Ba Gonop Nge Pi Rugod Ni Yad Bbalyang

6. (a) Uw rogon ni nge tamilangnag Jesus fene gonop e tapigpig rok nib yul’yul’ u lan fare fanathin? (b) Mang machib ni i wereg fapi Kristiano ni kan duguliyrad u m’on ko 1914?

⁶ Tomren ni weliy Jesus morngaagen “fare tapigpig nib kireb,” me weliy l’agruw e fanathin ni be tamilangnag fan ni be yul’yul’ mab gonop boch e Kristiano ni kan duguliyrad ma boch I yad e danga’.b I tamilangnag ko be mang e gonop ni gaar: “Chirofen nem e gagiyeg rok Got ni yib u tharmiy e ra bod ragag I rugod nra feked e magal ni gapgep nga ranod ni ngar mada’niged be’ nib moon ni ir e nge mabgol. Lal I yad e bbalyuang, ma lal I yad e ba gonop. Fa piiinnib balyang u fithik’;rad e ra feked e magal rorad machane dar feked boch e gafgep ni talapen e ke m’ay e gafgep u magal rorad, ma fa piin ni yad ba gonop e ra feked bogi ba’en ni kansuguy e gafgep ngay ngar chagiyed ko magal rorad.” (Matthew 25:1-4) Fa ragag I rugod e yad be yip’ fan pi Kristiano ni kan duguliy ko kan ni thothup u m’on ko duw ni 1914. Kar sumarnaged ni ra chugur ni nge yib Jesus Kristus ni ir fare moon ni nge mabgol. Ere “kar ranod ngar mada’niged” Jesus ni yad be machibnag ni ra m’ay e “ngiyal’ ni kan duguliy ni fan ko pi nam” ko duw ni 1914.​—Luke 21:24.

7. Wuin nge mang fan ni gowa ke “mol” e pi Kristiano ni kan duguliyrad?

⁷ Bpuluw e thin rorad. Ya ke m’ay e ngiyal’ ni kan duguliy ni fan ko pi nam ko 1914 me tabab Gil’ilungun Got u pa’ Kristus Jesus ko gagiyeg. Ke buch e re n’ey u tharmiy ni dan guy. Machane ke “gafgow” e girdi’ u fayleng nrogon ni ka nog u m’on riy. (Revelation 12:10, 12) Ke tabab e ngiyal’ ni ngan skengnagrad. De tamilangan’ e pi Kristiano ni kan duguliyrad ere kar lemnaged ni “ke sagaal fare moon ni ir e nge mabgol.” Ke wagey lanin’rad ma ba ga’ e togopuluw ni yib ko fayleng, ere dakur pasiggad ko machib ma ke tal e machib ni yad be wereg. Yad bod e pi rugod ko fare fanathin ni “Ke yib e chuchuw ngorad nguur chinggad mi yad mol” ni bod rogon ni rin’ e pi Kristiano ni dar yul’yul’gad u tomren ni yim’ e pi apostal rok Jesus.​—Matthew 25:5; Revelation 11:7, 8; 12:17.

8. Mang e ke buch min pong: “Ke taw fare moon ni ir e nge mabgol”? Ma ke taw nga nap’an ni nge rin’ e pi Kristiano e mang?

⁸ Ma nap’an e duw ni 1919 me buch ban’en ni dan lemnag nra buch. Gad ra bieg: “Ke lukngun e nep’ me non be’ ni ba ga’ laman ni gaar, Ke yib fare moon ni ir e nge mabgol! Mirem ngam mada’gad! Me od fa ragag I rugod ngar ngongled rogon e magal rorad.” (Matthew 25:6, 7) Nap’an ni kari gel e lumor min pong ni ngan pasig ko maruwel! Nap’an e duw ko 1918 e ke yib Jesus ni ir fare “mol’og ni fan ko fare m’ag” nga tempel nib fanathin rok Jehovah ya nge lekag e ulung rok Got ma nge biechnag. (Malachi 3:1) Chiney ni ke yib Kristus ma thingari yan urngin e Kristiano ni kan duguliyrad ni ngar mada’gad Kristus u lan e garog ko re tempel nib spiritual nem. Ke taw nga nga nap’an ni nge “gal ramaerad.”​—Isaiah 60:1; Filippi 2:14, 15.

9, 10. Nap’an e duw ni 1919, mang fan ni ke “gonop” boch e Kristiano ma bochi yad e “bbalyang”?

⁹ Machane u lan e re fanathin nem e bay e magawon rok boch e pi rugod nem. I ulul Jesus ngay ni gaar: “Me gaar fa tinem e ppin ni yad bbalyang ngak fa tinem ni yad ba gonop, Mpied boch e gapgep romed ngomad, ya nge math e mal romad.” (Matthew 25:8) Faanra dariy e gapgep ni fan ko fapi magal ma dabi yib e tamilang riy. Ere fare gapgep e be yip’ fan e Thin Rok Got nib riyul’ nge kan ni thothup rok ni ma ayuweg e piin ni ma liyor ngak Got ni nge gal ramaerad. (Psalm 119:130; Daniel 5:14) U m’on ko 1919 e ke guy rogon e pi Kristiano ni kan duguliyrad ni ngar gongopiyed e tin nib m’agan’ Got ngay ni ngar rin’ed, ni yugu aram rogon ni yad meewar. Ere nap’an ni kan piningrad ni nge gal ramaerad ma ke m’ay I fl’eg rogorad.​—2 Timothy 4:2; Hebrews 10:24, 25.

¹⁰ Machane boch e pi Kristiano ni kan duguliyrad e dar ted talprad ni ngar paged farad ara ngar athamgilgad−ni yugu aram rogon ni ri yad ba adag ni ngar uned ngak fare Moon ni ir e nge mabgol. Ere faani taw nga nap’an ni ngar pasiggd I makchibnag fare thin nib fel’ ma dawora fl’eged rogorad ni ngar machibgad. (Matthew 24:14) Kar guyed rogon ni ngar taleged e piin ni yad ni yad be ning boch e gapgep rorad. Man e fulweg rok fapi rugod ni yad ba gonop u lan e fanathin rok Jesus? Ke lungurad: “Ri dabiyog, ya dab da gamangad riy. Mmarod nga kantin ngam chuw’iyed boch.” (Matthew 25:9) Ku aram n’en ni rin’ e pi Kristiano ni kan duguliyrad ni dubrad ni ngar rin’ed ban’en ni ra magawonnag e tamilang ni ke yib rorad. Ere kar gelgad ko skeng.

11. Mang e buch rok e pi rugod ni yad bbalyang?

¹¹ Me gaar Jesus: “Ma aram me yan fa tinem e ppin ni yad bbalyang ninar chuw’iyed boch e gapgep, ma nap’an ni ka ranod me aw fare moon ni ir e nge mabgol. Ma fa lal I ppin nra fal’eged rogorad kar pired e ra uned ngak nga ranod nga lan fare naun ni nan ngongliy e madnom ko mabgol riy, min ning e mab. Fini taaboch me tgaw fa tinem e ppin. Mi yad non ni ba ga’ lungurad ni be lungurad, Somol, Somol! Mbing e mab ngomad! Me fulweg fare moon ni ir e nge mabgol ni gaar, Da gu nangmed.” (Matthew 25:10-12) Arrogon, boch e girdi’ e dar ted talprad ni fan ko ngiyal’ nra taw fare Moon ni ir e nge mabgol. Ere dar gelgad ko skeng ma de yog rorad ni ngar uned ko fare madnom ko mabgol u tharmiy. Kar gafgowgad!

Fanathin U Morngaagen E Salpiy

12. (a) Mang fanathin ni weliy Jesus ya nge tamilangnag ko mang e yul’yul’? (b) Mini fare moon ni “yan ko milekag”?

¹² Atomren e fanathin rok Jesus u morngaagen e gonop, me weliy yugu reb e fanathin u morngaagen e yul’yul’. Be gaar: “Ra bod be’ nib moon ni nge digey e abinaw rok nge yan ko milekag, me pining e pi tapigpig rok nge midilnag urngn ban’en rok ngorad. Ma ra bagayad me pi’ e salpiy ngak nrogon e mruwel nrayog rok: I pi’ lal I biyu’ e dollar ngak bagayad, ma bagayad e pi’ l’agruw I biyu’ e dollar ngak, ma agayad e pi’ taareb e biyu’ e dollar ngak. Ma aram me yan ko milekag.” (Matthew 25:14, 15) Fare moon ko fare fanathin e ir Jesus ni ke “digey e tabinaw rok” u nap’an ni yan nga tharmiy ko duw ni 33 C.E. Machane u m’on ni yan nga thrmiy I “midilnag urngin ban’en rok” ngak pi gachalpen ni yad ba yul’yul’. Uw rogon?

13. Mang e rin’ Jesus ni ke fl’eg rogon reb e maruwel ni baga’ me pi’ mat’awen e “pi tapigpig” rok ni ngar maruweliyed e salpiy rok?

¹³ Nap’an ni I machib Jesus u fayleng e ke tababnag reb e maruwel ni ke machibnag fare thin nib fel’ u morngaagen Gil’ilungun Got u lan e nam nu Israel iyan. (Matthew 9:35-38) Ma u m’on ni “digeg e tabinaw rok” me pi’ e re maruwel ney ngak pi gachalpen ni yad ba yul’yul’ ni gaar: “Ere mmardog ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare kan ni thothup, mi gimed filngroadf rogon ni nguur folgad u gubin e tin ni ku gog ngomed ni nguum rin’ed.” (Matthew 28:18-20) Re thin ney e ke pi’ mat’awen e pi “tapigpig” rok Jesus ni ngar maruwelgad ko fare salpiy ni kan pi’ ngorad nge yan I mada’ ko ngiyal’ nra sul riy “ni ra bagayad me pi’ e salpiy ngak nrogon e maruwel nrayog rok.”

14. Mang fan ni dan lemnag ni nge taareb rogon e maruwel rok urngin e tapigpig?

¹⁴ Re bugithin nem e be yip’ fan ni de taareb rarogon e pi Kristiano ko bin somm’on e chibog maku de taareb rogon e kanawo’ ni ke mab ngorad. Boch I yad e bod Paul nge Timothy ni ke yoor e machib nrayog ni ngar uned ngay. Ma yugu boch e girdi’ e de yoor e machib nrayog ni ngar ted. Boch e Kristiano e yad e sib, yugu boch e yad mm’ar, ara kar pilibthirgad ara bay e tin ni ke mil fan ngorad u lan e tabinaw rorad. Ma boch e maruwel u lan e ulung e de mab ni fan ngak urngin e gachalpen Jesus. Piin ni ppin nge boch e pumoon ni kan duguliyrad e dar machibgad u lan e ulung. (1 Korinth 14:34; 1 Timothy 3:1; James 3:1) Machane yugu demutrug rarogon pi gachalpen Kristus ni kan duguliyrad​−ni piin ni pumoon nge piin ni ppin—​ma ka nog ngorad ni yad gubin ni ngar maruwelgad ko fare salpiy ni kan pi’ ngorad ara ngar machibgad nrogon nrayog rorad nge rogon e kanawo’ nra mab ngorad. Ku aram e n’en ni be rin’ e pi Kristiano e ngiyal’ ney.

Ke Tabab E Ngiyal’ Ni Ngan Lekag!

15, 16. (a) Wuin ni ke taw nga nap’an ni ngan thieg e salpiy? (b) Mang maruwel ni biech ni kan pi’ ngak e piin ni yad ba yul’yul’ ni ngar “maruweliyed e salpiy”?

¹⁵ Ke ulul fare fanathin ni gaar: “Ma ba n’uw nap’an me sul fare masta rok fapi tapigpig, ma ra bad ra theeed fapi salpiy.” (Matthew 25:19) Ke tabab e wub rok Kristus Jesus ni nge pilung ko 1914​−mab n’uw nap’an u tomren e 33 C.E. Dalip nge baley e duw nga tomren ni aram e 1918 me yib ko tempel rok Got nib fanathin ni nge lebug e thin rok Peter ni gaar: “Ya ke taw nga nap’an ni nge tabab e pufthin, ma piin ni girdien Got e yad e som’on ni ngan pufthinnagrad.” (1 Peter 4:17; Malachi 3:1) Ke taw nga nap’an ni ngan thieg e salpiy.

¹⁶ Mang e ke rin’ e pi tapigpig ni yad pi walagen Jesus ko fapi “salpiy” ni ke pi’ fare Pilung ngorad? Ka nap’an e duw ni 33 C.E. nge mada’ ko 1914 ma boor e girdi’ ni yad be “maruweliy e salpiy” rok Jesus. (Matthew 25:16) Nap’an e bin somm’on e mahl ko fayleng e ri yad ba adag ni ngar pigpiggadngak e Masta rorad. Chiney e bpuluw ni nge mab e kanawo’ nib biech ngak e piin nib yul’yul’ ni ngar “maruweliyed e salpiy.” Ke taw ko ngiyal’ ko tomren e re m’ag ney. Thingar ni machibnag fare thin nib fel’ u fayleng iyan. “Ke taw nga nap’an ni ngan t’ar wom’engin e woldug u fayleng.” (Revelation 14:6, 7, 14-16) Thingar ni gay e tin ni ka bay ko girdien e woldug ni wheat ma ngan kunuy “fare ulung ni baga’” ko yugu boch e saf.​—Revelation 7:9; Matthew 13:24-30.

17. Uw rogon ni ke un e pi Kristiano ni yad ba yul’yul’ ko “felfelan’ rok e masta rorad”?

¹⁷ Baga’ e falfalan’ ko ngiyal’ ni ngan kunuy e woldug. (Psalm 126:6) Ere bpuluw e thin rok Jesus ko duw ni 1919 u nap’an ni ke yoornag e maruwel rok pi walagen ni yad ba yul’yul’ ni gaar: “Ya kam yul’yul’ u rogon e maruwel ni mu tay ko salpiy nib lich, ere bay gu tiyem ni gur e nge mil fan pire’ ban’en ngom. Ere moy ngam un ngog ko felfelan’!” (Matthew 25:21, 23) Dabiyog ni ngada nanged fene gel e falfalan’ rok fare Masta ni ka fini mang Pilung u Gil’ilungun Got. (Psalm 45:1, 2, 6, 7) Ke un fare tapigpig nib yul’yul’ ko fare falfalan’ nem ni yad owchen fare Pilung ma yad be yoornag e tirok u fayleng. (2 Korinth 5:20) Ke m’ug e falfalan’ rorad ko fare thin u Isaiah 61:10 ni gaar: “Jerusalem e be felfelan’ ni bochan e tin ni ke rin Somnol. Ir e bod be’ ni ppin ni ke chuw nga mada e m’agpa’. Roogn ni ke yib Got I ayuweg ke mat’awng ngak e bod ba mad ni ke yin’ Got nga daken e re ppin nem!”

18. Mang fan ni de gel boch e tapigpig ko skeng, ma mang e buch rorad?

¹⁸ Ba gafgow ya kan lekag e ulung ma de fel’ boch e girdi’. Gad ra bieg: “Me yib fa binem e tapigpig nni pi’ taareb e biyu’ e dollar ngak me gaar, Gu manang ni gur reb e girdi’ ndamur runguy be’; ga ma fek ban’en ko gin nda mu yng ban’en riy, ma ga ma kunuy e ggan ko gin nda mwereg awochngin e woldugriy. Ere gu amdag, ma aram mu gu wan mu gu mithag e salpiy rom nga fithik’ e but’. Ere baaray e salpiy rom.” (Matthew 25:24, 25) Ku arrogon boch e Kristiano ni kan duguliyrad ni dar “maruwelgad ko fare salpiy.” U m’on ko 1914 e dar weliyed e tin ni ke l’agan’rad ngay nge rung’ag yugu boch e girdi’, maku dubrad ni ngar rin’ed u tomren e 1919. Mang e rin’ Jesus ni bochan e yad ba gelan’? Ke chuweg urngin e taw’ath nni pi’ ngorad. Ka “non’rad nga wen nga fithik’ e lumor; ya bay ra yorgad ma be chachafin nguwelrad u rom.”​—Matthew 25:28, 30.

Ka Be Lekag E Ulung

19. Uw rogon ni ka yibe skengnag e pi Kristiano ni kan duguliyrad, mang ke mudugil u wan’rad ni ngar rin’ed?

¹⁹ Baga’ ni piin ni kar manged e pi tapigpig rok Kristus ko ngiyal’ ko tomur e dawora pigpiggad ngak Jehovah u nap’an ni tabab Jesus I lekag e ulung ko duw ni 1918. Ere dan skengnagrad, fa? Danga’. Ya kan tabab I skengnag e ulung ko 1918/19 ma ke gel fare tapigpig nib yul’yul’ mab gonop ko skeng ntay ngorad ni yad ba ulung I girdi’. Ka yibe skengnag e pi Kristiano ni kan duguliyrad ni be’ nge be’ nge yan I mada’ ko ngiyal’ ni kan “tay e pow nga peri’rad.” (Revelation 7:1-3) Manang pi walagen Kristus ni arrogon, ere ke mudugil lanin’rad ni ngar “maruweliyed e salpiy” u fithik’ e yul’yul’. Ke mudugil lanin’rad ni nguur gonopgad ma nge par ni boor e gapgep rorad ni fan e nge ga’ e tamilang ko magal rorad. Yad manang ni faanra yul’yul’ bagayad nge mada’ ko tungun e yafas rok ma ra un ngak Jesus u tharmiy.​—Matthew 24:13; John 14:2-4; 1 Korinth 15:50, 51.

20. (a) Mang e mudugil u wan’ e piin ni yugu boch e saf ni ngar rin’ed? (b) Mang e ke tamilang u wan’ e pi Kristiano ni kan duguliyrad?

²⁰ Be folwok fare ulung ni baga’ ko yugu boch e saf rok pi walagrad ni kan duguliyrad. Yad manang ni ke yoor ban’en ni ke mil fan ngoad ni bochan e ke tamilangan’rad ko tin nib m’agan’ Got ngay. (Ezekiel 3:17-21) Thin Rok Got nge fare kan ni thothup e ke ayuwegrad ni nge yoor e gapgep rorad ni yad be fol babyor ma yad be un ko muulung. Ma ke mat raerad ni yad be machibnag fare thin nib fel’ ma yad be “maruweliy e salpiy” u taabang ko pi walagrad ni kan duguliyrad. Machane manang e pi Kristiano ni kan duguliyrad ni kan pi’ fapi salpiy nga pa’rad. Ere thingara weliyed rogon ni kar maruweliyed e tirok Somol u fayleng. Yugu aram rogon ni yad ba lich ma dabiyog ni ngar digeyed e maruwel rorad ngar pied ngak fare ulung ni baga’. Manang fare tapigpig nib yul’yul’ mab gonop ni arrogon, ere yad ma dag e kanawo’ u rogon ni ngan maruweliy e salpiy rok e Pilung, ma yad be pining e magar ngak fare ulung ni baga’ ni be pi’ e ayuw ngorad. Manang girdien fare ulung ni baga’ ni baga’ e maruwel ni ke mil fan ngak pi walagrad ni kan duguliyrad ma yad ba taw’ath ni ngar maruwelgad u tan pa’rad.

21. Mang thin e fan ngak urngin e Kristiano ni ka nap’an e 1919 nge mada’ ko chiney?

²¹ Gali fanathin ney e ma tamilangnag e n’en ni buch u nap’an e 1919, machane ku rayog ni ngan fanay e thin riy ngak urngin e Kristiano ni yad ma par ko tin tomren e rran. Ere thin rok Jesus u tomren fare fanathin ko fa ragag I rugod e be yip’ fan ko fapi Kristiano ni kan duguliyrad u m’on ko duw ni 1919, machane ku rayog ni nge yip’ fan ngak urngin e Kristiano. Ere gad gubin e ngada folgad ko thin rok Jesus ni gaar: “Ere mkfal’eged rogomed ngam pired, ya da munanged e re rran fa re awa.”​—Matthew 25:13.

[Footnotes]

Rayog Ni Ngam Weliy Fan?

• Wuin ni yib Jesus ni nge yaliy pi gachalpen, ma mang e ke pirieg?

• Ke diin me yib laniyan’ “fare tapigpig nib kireb” ngak boch e Kristiano ni kan duguliyrad?

• Uw rogon ni ngada daged ni gad ba gonop?

• Uw rogon ni ngada folwokgad rok e pi walagen Jesus ni nguuda “maruweliyed e salpiy” rok Jesus?

[Box on page 24]

WUIN NI KE YIB JESUS?

U Matthew guruy ni 24 nge 25 e ka nog ni ke “yib” Jesus mab thilthil fan e re bugithin nem. De t’uf ni nge mithmith ni fan e nge “yib”. Danga’, ya “ke yib” ni ke tayan’ ngak e girdi’ nu fayleng ara pi gachalpen, ma baga’ ni ke yib ni fan ko pufthin. Ere nap’an e 1914 ma ke “yib” ni nge tabab e “wub” rok ni be gagiyeg ni ir e Pilung. (Matthew 16:28; 17:1; Acts 1:11) Nap’an e duw ni 1918 ma ke “yib” ni ir e mol’og ni fan ko fare m’ag me tabab ni nge pufthinnag e piin ni yad be yog ni yad be pigpig ku Jehovah. (Malachi 3:1-3; 1 Peter 4:17) U nap’an Armageddon ma ra “yib” ni nge gechignag e pi toogor rok Jehovah.​—Revelation 19:11-16.

Fare wub rok ni be weliy e Matthew 24:29-44 nge 25:31-46 e morngaagen fare “gafgow ni baga’.” (Revelation 7:14) Machane fare wub ni be weliy e Matthew 24:45 nge mada’ ko 25:30 e morngaagen e pufthin ni ra tay ni ka nap’an e 1918 ni be pufthinnag pi gachalpen. De puluw ni nga nog ni fin nra taw ko fare gafgow ni baga’ ma ran taw’athnag fare tapigpig nib yul’yul’ ara ngan pufthinnag fapi rugod ni yad bbalyang ara ngan pufthinnag fare tapigpig nib malmal ni ke mithag e salpiy rok e Masta rok. Ya faan manga arrogon ma gowa ra yan i aw ni de yul’yul’ boor e piin ni kan duguliyrad ko kan ni thothup ma thingari yib yugu boch e girdi’ nga luwrad. Machane be yog Revelation 7:3 ni ra taw ko fare gafgow ni baga’ ma ke m’ay “i tay e pow nga peri’” urngin e pi tapigpig rok Kristus.

[Picture on page 22]

Dan pi’ e taw’ath ngak “fare tapigpig nib kireb” ko 1919

[Picture on page 23]

Ke fl’eg e pi rogon ni yad ba gonop rogorad u m’on ni ke yib fare moon ni ir e nge mabgol

[Picture on page 25]

Fapi tapigpig nib yul’yul’ e ur “maruweliyed e salpiy”

Fare tapigpig nib malmal e de “maruweliy e salpiy”

[Pictures on page 26]

Piin ni kan duguliyrad nge fare “ulung ni baga’” e ke mat raerad