Ba “Tapigpig” Ni Ba Yul’yul’ Ma Kub Gonop

“Ere mini’ e en ni ir fare tapigpig nib yul’yul’ mab gonop? I ir e en ni masta rok e ke tay ni nge mil fan e tin ni ka bay e tapigpig ngak, ni nge pi’ garad ko ngiyal’ ni yima pi’ riy.”​—MATTHEW 24:45.

1, 2. Mang fan ni thingari yog e ggan ni machib ngodad e ngiyal’ ney?

L’AGRUW fene maruwel ko Nisan 11 ko duw ni 33 C.E. e ke fith pi gachalpen Jesus ba deer ni baga’ fan ngodad e ngiyal’ ney. Kar fithed Jesus: “Mog ngomad ko wuin e ra yib urngin fapi n’en ni ka mog, nge n’en nra yib ni nge dag ni ke taw ko ngiyal’ ni bay mub riy nge ngiyal’ ni tomren e fayleng.” I fulweg Jesus e deer rorad me yog e pi n’en ni bay fini’ yib. I weliy morngaagen e wagey nra yib ni bochan e pi mahl nge uyungol nge pi duru’ nge liliy. Machane pi n’en ney e “bod e bin som’on e amith ni ma yib ngak be’ ni nge gargel.” Tomur riy ma ra yib e pi n’en ni kab gel e kireb riy. Ri yira tamdag ngay!​—Matthew 24:3, 7, 8, 15-22; Luke 21:10, 11.

² Ka nap’an e duw ni 1914 ma baga’ ni ke lebug e pi n’en ni yog Jesus ni ra yib. Ke taw fare “amith ni ma yib ngak be’ ni nge gargel” mab gel e amith riy. Machane dariy rogon ni nge tamdag e tin riyul’ e Kristiano. Ya ke micheg Jesus ni ra gelnagrad ko ggan ni machib. Bay Jesus u tharmiy e chiney, ere uw rogon ni ke yarmiy rogon ni nge yog e ggan ni machib ngodad u fayleng?

3. Mang e yarmiy Jesus ni fan e nge yog e “ggan ko ngiyal’ ni ngan pi’ riy” ngodad e ngiyal’ ney?

³ Ke tamilangnag Jesus e fulweg ko re deer nem. Nap’an ni be weliy e pi n’en ni bay fini yib me fith ni gaar: “Ere mini’ e en ni ir fare tapigpig nib yul’yul’ ma ba gonop? I ir e en ni masta rok e ke tay ni nge mil fan e tin ni ka bay e tapigpig ngak, ni nge pi’ garad ko ngiyal’ ni yima pi’ riy.” Miki gaar: “Rib ga’ ba felfelan’ nra tay e re tapigpig nem ni faanra sul e masta rok nga tabinaw me pirieg ni ereray e n’en ni be rin’! Nggog ngomed nrib mudugil nra tay fare masta fare tapigpig ni ir e nge mil fan urngin ban’en rok ngak.” (Matthew 24:45-47) Arrogon, ra moy ba “tapigpig” ni ke mil fan ngak ni nge pi’ e ggan ni machib, ni ir ba “tapigpig” nib yul’yul’ ma kub gonop. Ma re tapigpig nem e ir taa be’, ara ir be’ ni ke yon’ lon yugu be’, fa? Gad ba adag ni ngada nanged e fulweg ko re deer ney ya re tapigpig nem e ma pi’ e ggan ni machib ni rib t’uf rodad.

Ir Be’ Fa Ir Ba Ulung I Girdi’?

4. Ke diin ma gad manang ni fare “tapigpig nib yul’yul’ mab gonop” e gathi ir taa be’?

⁴ Dabiyog ni nge aw ni fare “tapigpig nib yul’yul’ mab gonop” e ir taa be’. Mang fan? Ya re tapigpig nem e ke pi’ e ggan ni machib u nap’an e bin somm’on e chibog ma rogon e thin rok Jesus e ka be pi’ e re tapigpig nem e ggan ni machib u nap’an ni ra sul e Masta rok ko duw ni 1914. Ere gonapan 1,900 e duw ni be pigpig faanem u fithik’ e yul’yul’. Mus ko Methuselah ma de par nib fas ni aram n’umngin nap’an!​—Genesis 5:27.

5. Mu weliy fan ni fare “tapigpig nib yul’yul’ mab gonop” e gathi be yip’ fan ra reb e Kristiano.

⁵ Ere fare bugithin ni “tapigpig nib yul’yul’ mab gonop” e rayog ni nge aw ni be yip’ fan ra reb e Kristiano, fa? Riyul’ ni thingari yul’yul’ ma thingari gonop urngin e Kristiano; machane gathi aram e n’en ni be yip’ fan Jesus u nap’an ni weliy morngaagen fare “tapigpig nib yul’yul’ mab gonop.” Ke diin ma gad manang ni arrogon? Arrogon, ya i yog Jesus ni nap’an “nra sul e masta rok nga tabinaw” ma ra “tay fare masta fare tapigpig ni ir e nge mil fan urngin ban’en rok ngak.” Rayog rok ra reb e Kristiano ni nge mil fan “urngin” ban’en rok Somol ngak, fa? Dabiyog!

6. Uw rogon ni nam nu Israel e ir e “tapigpig” rok Got?

⁶ Ere bpuluw ni ngan lemnag ni be yip’ Jesus fan ni ba ulung i Kristiano e yad “fare tapigpig nib yul’yul’ mab gonop.” Rayog ni nge aw ni ba ulung i girdi’ e yad taareb e tapigpig, fa? Rayog. Ya medlip miriay e duw u m’on rok Kristus ma i non Jehovah ngak fare nam nu Israel ni yad e “pi mich rog” maku yad “fare tapigpig”. (Isaiah 43:10) Gubin e girdi’ ko nam nu Israel ni ka nap’an e duw ni 1513 ko B.C.E. ni ir fare duw nni pi’ fare Motochiyel Rok Moses riy nge mada’ ko Pentecost ko 33 C.E. e yad girdien e re ulung i tapigpig nem. Baga’ ni de un piyu Israel ko gagiyeg ara ngar machibnaged e girdi’. I tay Jehovah e pi pilung, nge pi tapufthin, nge pi profet nge pi prist nge piyu Levi ni ngar gagiyeggad ara ngar machibnaged e girdi’. Machane fare nam nu Israel e yad owchen Jehovah nge gagiyeg rok maku thingar ra pininged e sorok ngak Got u fithik’ e pi nam. Ra be’ u Israel e ir e mich rok Jehovah.​—Deuteronomy 26:19; Isaiah 43:21; Malachi 2:7; Roma 3:1, 2.

Kan N’ag Reb e “Tapigpig”

7. Mang fan ni de bung rogon fare nam nu Israel kakrom ni ngii par ni “tapigpig” rok Got?

⁷ Nam nu Israel e ir fare “tapigpig” rok Got kakrom, ere ku ir fare tapigpig ni be weliy Jesus morngaagen, fa? Danga’, ya fare nam nu Israel kakrom e gathi ir e ba yul’yul’ maku gathi ir ba gonop. I weliy Paul u morngaagrad u nap’an ni bieg e thin rok Jehovah ngak fare nam ni gaar: “Piin ni gathi yad piyu Israel e yad be yog e thin nib kireb nga fithingan Got ni bochan e ngongol romed piyu Israel.” (Roma 2:24) Ke n’uw nap’an ni de fol piyu Israel ma tomur riy e kar n’aged Jesus, ma aram e ke n’agrad Jehovah.​—Matthew 21:42, 43.

8. Wuin e kan duguliy reb e “tapigpig” ni nge yan nga luwan Israel, ma mang e buch e ngiyal’ nem?

⁸ Daki yul’yul’ e re tapigpig nem ni yad piyu Israel, machane gathi be yip’ fan ni dabki yib e ggan ni machib ngak e piin ni yad ba yul’yul’ ni yad ma meybil ngak Got. Nap’an Pentecost ko duw ni 33 C.E ni aram e 50 e rran u tomren ni fas Jesus ko yam’, min puog e kan ni thothup nga daken 120 i gachalpen Jesus ni yad be muulung u reb e singgil u Jerusalem. Chi ngiyal’ nem e ke sum reb e nam ni biech. Kan weliy u fithik’ e yoor ni ke sum e re nam nem u nap’an ni wereg girdien e re nam nem ngak piyu Jerusalem u “morngaagen e pi n’en nib sorok Got ni ke ngongliy.” (Acts 2:11) Ere re nam nib biech nem ni ir reb e nam nib spiritual e ke mang fare “tapigpig” ni ra wereg morngaagen fene sorok Jehovah u fithik’ e pi nam ma nge pi’ e ggan ni machib ko ngiyal’ nib m’ag ngay. (1 Peter 2:9) Bpuluw ni ngan pining e “Israel rok Got” ko re nam nem.​—Galatia 6:16.

9. (a) Chon mini’ e yad “fare tapigpig nib yul’yul’ mab gonop” (b) Ma chon mini’ e yad e “tin ni ka bay e tapigpig”?

⁹ Gubin girdien e re “Israel rok Got” nem e ir reb e Kristiano ni ke ognag ir ngak Got ke un ko taufe min duguliy ko kan ni thothup ma ke athapeg e tharmiy. Ere fare “tapigpig nib yul’yul’ mab gonop” e be yip’ fan urngin girdien fare nam nib spiritual ni yad ba fas u fayleng ni yugu demutrug e ngiyal’ ni ka nap’an e duw ko 33 C.E. nge mada’ ko chiney. Ma re n’ey e ba taareb rogon ko fare nam nu Israel ni gubin e girdi’ nu Israel ni yad ba fas ko yugu demutrug e ngiyal’ ni ka nap’an e duw ni 1513 B.C.E. nge mada’ ko Pentecost ko 33 C.E. e yad fare tapigpig. Machane chon mini’ e yad “e tin ni ka bay e tapigpig” ni ma yog e ggan ngorad rok fare tapigpig? U nap’an e bin somm’on e chibog ma gubin e Kristiano e yad ma athapeg e yan nga tharmiy. Ere tin ni ka bay e tapigpig e ku yad e pi Kristiano ni kan duguliyrad ko kan ni thothup, ni gathi yad taab ulung i girdi’ ya be’ nge be’. Ere urngin girdien e ulung ni mus ngak e piin ni yad be yog e thin u lan e ulung e ba t’uf rorad e ggan ni machib ni ma yib rok fare tapigpig.​—1 Korinth 12:12, 19-27; Hebrews 5:11-13; 2 Peter 3:15, 16.

“Ra Bagayad Ma Maruwel Rok”

10, 11. Uw rogon ni gad manang ni gathi urngin girdien fare tapigpig e taareb rogon e maruwel rorad?

¹⁰ Fare “Israel rok Got” e ir fare tapigpig nib yul’yul’ mab gonop ni bay e maruwel ni kan pi’ ngak ni nge rin’, machane ra be’ ko re ulung nem e bay e maruwel ni kan pi’ ngak ni nge rin’. Ke tamilang ni arrogon ko thin rok Jesus u Mark 13:34. Be gaar Jesus: “Susun e be’ nib moon ni digey e tabinaw rok me yan ko milekag, me pag fan urngin ban’en ngak e pi tapigpig rok, nra bagayad ma maruwel rok; me yog ngak e en ni ma matanagiy e mab ni nge tiyan’ ko matanag.” Ere ra be’ ni girdien fare tapigpig e kan pi’ e maruwel ngak​−ni aram e nge yoornag e tirok Kristus u fayleng. Ma ra rin’ e maruwel rok nrogon e salap ni bay rok nge rogon e kanawo’ nra mab ngak.​—Matthew 25:14, 15.

¹¹ Miki yog apostal Peter ngak e pi Kristiano ko ngiyal’ nem ni gaar: “Ra be’ ma tow’ath rok ni ke pi’ Got ngak ni nge gagiyegnag e thingari maruwel ngay nge yib fan ngak boch e girdi’.” (1 Peter 4:10) Ere piin ni kan duguliyrad ko kan ni thothup e ke mil fan ngorad ni nge bagayad e nge pigpig ngak bagayad ni be fanay e pi taw’ath ni ke pi’ Got ngak. Ma ke m’ug ko thin rok Peter ni de taareb rogon e salap rok urngin e Kristiano, ma de taareb rogon e maruwel ni ke mil fan ngorad maku de taareb rogon e taw’ath ni kan pi’ ngorad. Machane ra be’ ko re tapigpig nem e ra un i ayuweg e re nam nib spiritual nem ni nge ga’. Uw rogon?

12. Uw rogon ni ma ayuweg urngin chon fare tapigpig ni nge yoor girdien fare ulung i tapigpig ni yugu demutrug ko yad e pumoon ara ppin?

¹² Somm’on ma ra be’ e ke mil fan ngak ni nge mang e mich rok Jehovah ma nge machibnag fare thin nib fel’ u morngaagen Gil’ilungun Got. (Isaiah 43:10-12; Matthew 24:14) U m’on ni yan Jesus nga tharmiy me tay chilen ngak urngin pi gachalpen ni yad e piin ni ppin nge piin ni pumoon ni ngar machibgad. I gaar: “Ere mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare kan ni thothup, mi gimed fil ngorad rogon ni nguur folgad u gubin e thin ni ku gog ngomed ni nguum rin’ed. Ma dab mpaged talin ni gubin ngiyal’ ma gu ba’ romed, nge yan i mada’ nga tomren e fayleng.”​—Matthew 28:19, 20.

13. Mang taw’ath ni yog ngak urngin e piin ni kan duguliyrad?

¹³ Nap’an ni yira pirieg e piin ni yad ba adag ni ngar manged pi gachalpen Jesus ma yira fil ngorad rogon ni ngar folgad ko urngin e pi n’en ni tay Kristus chilen ni nge rin’ pi gachalpen. Munmun ma rayog rok e pi cha’ ney ni ngkur filed yugu boch e girdi’. Ke yog e ggan ni machib ngak girdien fare tapigpig u boor e nam. Urngin e pi Kristiano ni kan duguliyrad ko kan ni thothup ni yad e pumoon nge ppin e yad ma un ko fare maruwel ni ngan ayuweg yugu boch e girdi’ ni ngar manged pi gachalpen Jesus. (Acts 2:17, 18) Ke ul’ul e re maruwel ney ni ka nap’an ni sum fare tapigpig nge mada’ ko tomren e re m’ag ney.

14. Ke mus ni chon mini’ e rayog ni nge machib u lan e ulung, ma uw rogon e re n’en ney u wan’ e piin ni ppin ni kan duguliyrad kakrom?

¹⁴ Piin ni kan duguliyrad ko kan ni thothup ni ka fin nra uned ko taufe e kar manged bang ko fare tapigpig ni demutrug ko mini’ e ke machibnagrad ko somm’on, ma girdien e ulung ni bung rogorad ni ngar manged e piilal ko ulung e ra fil e machib ngak e pi cha’ ney ni ka fin nra uned ko taufe. (1 Timothy 3:1-7; Titus 1:6-9) Piin ni piilal ney e yad ba taw’ath ya rayog ni ngar ayuweged fare nam nib spiritual ni nge yoor. Der kireban’ e pi ppin ni Kristiano ni kan duguliyrad ko kan ni thothup ya ke mus ni pi Kristiano ni pumoon e yad ma machibnag e ulung. (1 Korinth 14:34, 35) Danga’, ya yad ma falfalan’ ni ke yog ngorad angin e maruwel ko piin ni pumoon u lan e ulung, maku yad ma falfalan’ ko pi taw’ath ni rayog rok e piin ni ppin ma reb riy e rayog rorad ni ngar wereged e thin nib fel’ nge rung’ag yugu boch e girdi’. Piin ni piin ni kan duguliyrad ko kan ni thothup e ngiyal’ ney ni yad ba pasig e ku yad ba sobut’an’ ni yugu demutrug ko piin ni piilal e kan duguliyrad ko kan ni thothup fa danga’.

15. U uw e ke yib kenggin e ggan ni machib riy u nap’an e bin somm’on e chibog, ma chon mini’ e ke wereg e re ggan nem?

¹⁵ Nap’an e bin somm’on e chibog ma ggan ni machib e ke yib rok e pi apostal nge piin ni yad be yog e thin nge pi babyor ni kar yoloyed. Pi babyor ni kar yoloyed​−ni baga’ ni fa 27 e babyor ni bang ko Bible nyoloy nthin nu Greek−​e kan wereg u lan e pi ulung ni Kristiano ma aram e pi n’en ni machibnag e piin ni piilal ko pi ulung. Aram rogon ni wereg girdien fare tapigpig e ggan ni machib ni fan ko pi Kristiano ni yad ba yul’yul’. I rin’ fare tapigpig ko bin somm’on e chibog e maruwel rorad ni ngar pied e ggan ko ngiyal’ ni ngan pi’ riy.

Fare “Tapigpig” E Chiney ni 19 Miriay E Duw Nga Tomren

16, 17. Uw rogon nib yul’yul’ fare tapigpig ko maruwel ni be rin’ u lan fapi duw u m’on ko 1914?

¹⁶ Ma uw rogon e chiney? Nap’an e wub rok Jesus ko 1914, ke pirieg ba ulung i Kristiano ni kan duguliyrad ko kan ni thothup ni yad be wereg e ggan ko ngiyal’ ni ngan pi’ riy, fa? Ke pirieg. Rayog ni ngan poy e re ulung nem ni bochan waamngirad nib fel’. (Matthew 7:20) Chep ko girdi’ ni ka nap’an e ngiyal’ nem e ma micheg ni ri yad fare tapigpig.

¹⁷ Nap’an e wub rok Jesus ma gonapan 5,000 e tapigpig rok e yad be wereg e machib nu Bible. Ba lich girdien e maruwel machane ba salap fare tapigpig ni be fanay boor e kanawo’ ni ngar wereged fare thin nib fel’. (Matthew 9:38) Kan yarmiy rogon ni ngan yoloy boch e machib ko Bible nge m’ug ko 2,000 e shimbung. Aram rogon ni ke yog ni nge taw e machib ko Thin Rok Got ngak bokum biyu’ e girdi’ u taab ngiyal’. Ma kun fl’eg e kachido nge slides ni meruk e awa n’umngin nap’an. Ma re kachido nem e ke weliy e machib ni ka nap’an ni sum e fayleng nge mada’ ko tomren e Gagiyeg Rok Kristus ni Biyu’ e Duw. Ke pag mereb million e girdi’ ni guy e re kachido nem u lan dalip e continent. Kur yoloyed e pi babyor nge mang reb e kanawo’ ni ngar wereged e ggan ni machib. Nap’an e duw ni 1914 ma 50,000 ken e Watchtower ni kan yoloy.

18. Wuin ni ke duguliy Jesus fare tapigpig ni nge mil fan urngin e tirok ban’en ngak, ma mang fan ni duguliyrad?

¹⁸ Arrogon, nap’an ni yib e Masta ma ke pirieg e tapigpig rok ni be pi’ e ggan ngak fa tin ni ka bay e tapigpig maku be wereg fare thin nib fel’. Ere chiney e bay e maruwel ni ka baga’ boch ni fan ko re tapigpig nem. Be gaar Jesus: “Nggog ngomed nrib mudugil nra tay fare masta fare tapigpig ni ir e nge mil fan urngin ban’en rok ngak.” (Matthew 24:47) Aram e n’en ni rin’ Jesus ko duw ni 1919 u tomren ni kan skengnag fare tapigpig. Mang fan ni kan pi’ boch e maruwel ni baga’ ngak fare “tapigpig nib yul’yul’ mab gonop”? Kan pi’ e maruwel ni baga’ ya ke yoor tirok fare Masta. Ke mang Jesus pilung ko duw ni 1914.

19. Mu weliy rogon ni kan ayuweg “fare ulung ni baga’” ni nge yog e tirok Got ban’en ngorad.

¹⁹ Mang e tirok fare Masta ni ka fini pilung ni ke mil fan ngak fare tapigpig rok nib yul’yul’? Urngin e tin nib mil fan ngak fare Masta u fayleng. Boch tirok fare masta e ke m’ug ni gonapan reliw e duw nga tomren ni pilung Kristus ko 1914 me tamilang ko mini’ chon fare “ulung ni baga’” ko “yugu boch e saf”. (Revelation 7:9; John 10:16) Pi cha’ ney e gathi yad girdien fare “Israel rok Got” ni kan duguliyrad ko kan ni thothup, ya yad e pumoon nge ppin ni yad be athapeg e yafas u fayleng, mab t’uf Jehovah rorad ma yad ba adag ni ngar pigpiggad ngak ni bod ni be rin’ e piin ni kan duguliyrad. Gowa yad be yog ngak fare “tapigpig nib yul’yul’ mab gonop” ni lungurad: “Gamad ra un ngomed, ya kug rung’aged ni bay Got romed.” (Zechariah 8:23) Pi Kristiano ney e kar uned ko taufe ma kar ked fare ggan ni machib u taa bang rok e pi tapigpig ni kan duguliyrad ma gali ulung ney e yad ma abich u taab e tebel. Rib flaab girdien fare “ulung ni baga’”!

20. Mang e maruwel rok fare “ulung ni baga’” ni yad be un i yoornag e tirok Somol?

²⁰ Ma falfalan’ girdien fare “ulung ni baga’” ni ngar uned ngak fare tapigpig ni ngar machibnaged fare thin nib fel’. Bochan ni yad be machib e ke yoor tirok fare Masta u fayleng miki yoor e tin ni ke mil fan ngak fare “tapigpig nib yul’yul’ mab gonop.” Ke yoor iyan e piin ni yad be gay e machib, ere ba t’uf ni ngan toy e pi naun ni ngan fl’eg e pi babyor riy ni ma weliy fan e machib nu Bible. Kan ngongliy e branch ofis ko Pi Mich Rok Jehovah u reb e nam nge reb. Ka nol’og e pi missionary nga ranod “ko yungi n’en ni yan i mus e fayleng ngay.” (Acts 1:8) Gonapan lal biyu’ e piin ni kan duguliyrad ko kan ni thothup ko duw ni 1914, ma ke yoor e piin ni yad be pining e sorok ngak Got ya chiney e ke pag nel’ million urngirad, ma baga’ ni yad girdien fare “ulung ni baga’.” Arrogon, ke yoor i yoor tirok fare Pilung ni ka nap’an ni ke pilung ko duw ni 1914!

21. Mang l’agruw e fanathin ni gad ra weliy ko bin migid e thin?

²¹ Urngin e pi n’en ney e ke micheg ni “ba yul’yul’ ma kub gonop” fare tapigpig. Tomren ni weliy Jesus morngaagen fare “tapigpig nib yul’yul’ mab gonop” me weliy l’agruw e fanathin be be gagiyelnag e yul’yul’ nge gonop: I weliy fare fanathin u morngaagen e pi rugod ni yad ba gonop nge pi rugod ni yad bbalyang ma ke weliy e fanathin u morngaagen e salpiy. (Matthew 25:1-30) Gad ba adag ni ngada nanged fan! Mang e be yip’ fan e fagali fanathin nem ni fan ngodad e ngiyal’ ney? Gad ra weliy e re deer ney ko bin migid e thin.

Mang E Ga Be Lemnag?

• Mini’ girdien fare “tapigpig nib yul’yul’ mab gonop”?

• Mini’ e “tin ni ka bay e tapigpig”?

• Wuin ni ke mil fan urngin tirok Somol ngak fare tapigpig nib yul’yul’, ma mang fan ni ke mil fan ngorad ko ngiyal’ nem?

• Mini’ e ke ayuweg ni nge yoor e tirok Somol e ngiyal’ ney, ma uw rogon ni kar yoornaged?

[Pictures on page 18]

I yul’yul’ fare tapigpig ko bin somm’on e chibog ko maruwel ni kan pi’ ngak