Mu Ayuw Ko Ban

“Mu guyed rogomed ya ri kolmed be’ ngam manged kalbus rok ni be’ ni be maruwel . . . ko sabanban ndariy rogon nga bayang.”​—KOLOSE 2:8.

1-3. (a) Mang e ma tamilangnag ni bay e ban u gubin yang ko yafas rodad? (b) Mang fan ni dab da gin gad ngay ni bay e ban u fayleng?

“MINI’ e aromed e dawor ni bannag, ma be’ ni ga be ayuweg e ke bannagem?” In e duw faram ma reb e professor ni ma fil e motochiyel ngak e pi lawyer e i fith e re deer ney ngak boch e lawyer. Mang e fulweg riy? Be gaar: “U fithik’ bokum biyu’ e lawyer ni kug deeriy, ke mus ni taareb e lawyer ni dan bannag.” Mang fan? “Ya ka fin tabab fare lawyer ni nge maruwel ko reb e company ni baga’ ma dawori ayuweg be’.” Re thin ney e ma tamilangnag ban’en nib riyul’​—ri boor e ban nge sasalap u fayleng e chiney.

² Boor miti ban ma bay e ban u gubin yang ko yafas rodad. Pi shimbung e ma weliy morngaagen e pi ban ney​—girdien e am e ma lifith l’iginrad ko pi n’en ni kar rin’ed, pi accountant nge pi lawyer ko boch e company e ma ban ko win rok e company rorad, ma sasalap e piin ni ma pi’ e chugum rorad nchuway’ ya ngan chuw’iy e chugum rorad, ma boch e girdi’ e ma bannag e insurance rorad​—ma aray boch e ban ni bay. Maku bay e ban rok e pi yurba’ i teliw. Pi tamachib e ma bannag e girdi’ ko machib ni yugu ban’en ni bod e machib u morngaagen e yaal ni der ma yim’, nge nifiy u infierno, nge Trinitas.​—2 Timothy 4:3, 4.

³ Kada gin gad ngay ni bay e pi ban ney, fa? Danga’. Ya ke weliy e Bible u morngaagen e “tin tomren e rran” ni gaar: “Machane girdi’ nib kireb nge piin ni yad be dake girdien Kristus e bayi gel farad kireb nguur banniged boch e girdi’ ma yibe bannagrad.” (2 Timothy 3:1, 13) Gad e pi Kristiano e thingar da ayuwgad ko pi ban ni ra chafegdad ko machib nriyul’. Bay l’agruw e deer ni yira fith: Mang fan ni boor e ban e ngiyal’ ney, ma uw rogon ni gad ra ayuw ya dab da awgad ko ban?

Mang Fan Ni Bay Boor E Ban E Ngiyal’ Ney?

4. Uw rogon ni be weliy e Bible ko mang fan ni ke yoor e ban u fayleng?

⁴ Ba tamilang e thin ko Bible ni be weliy fan ni ke yoor e ban u fayleng e chiney. I yoloy apostal John ni “tin ni ka bay e girdi’ nu fayleng e ke suweyrad Faanem nib Kireb.” (1 John 5:19) “Faanem nib Kireb” e ir Satan ni Moonyan’. I weliy Jesus u morngaagen faanem ni gaar: “Dariy ba ngiyal’ ni ke yib nga ba’ rok e tin riyul’, ya dariy e tin riyul’ rok. Ya ngiyal’ nra lifith l’ugun riy e aram e be rin’ ban’en nib mecham ngak, ya ir be’ ni ma lifith l’ugun ma ir e chitamangin urngin e malulfith.’” Aram fan ni ma m’ug ko girdi’ nu fayleng laniyan’, nge rarogon, nge pi ban ko pilung rorad, fa?​—John 8:44; 14:30; Efesus 2:1-3.

5. Uw rogon ni ke gelnag Satan e ban rok e chiney ko tin tomren e rran, ma baga’ ni chon mini’ e be guy rogon ni nge bannagrad?

⁵ Ke gelnag Satan e maruwel rok e chiney ni aray e ngiyal’ ko tomur. Kan tharbog u tharmiy nga fayleng. Manang ni ke ngoch nap’an ma “kari dumumuw.” Ma ba adag ni nge un boor e girdi’ ngak ko mogothgoth ere “be bannag e girdi’ nu fayleng ni polo’.” (Revelation 12:9, 12) Gathi fin munmun ma ma ban Satan. Danga’, ya gubin ngiyal’ e be bannag e girdi’ nu fayleng.a Ma fanay gubin miti ban ni bay ko pi talin e cham rok​−nib muun ngay e sasalap nge makath−​ya nge par lanin’rad u fithik’ e lumor ma nge dab ra uned ngak Got. (2 Korinth 4:4) Cha’ ney e ba salap ko ban ma baga’ ni be guy rogon ni nge “longuy” e piin ni yad be liyor ngak Got u “fithik’ i lanin’rad ngu fithik’ e riyul’.” (John 4:24; 1 Peter 5:8) Dab mu pag talin ni gowa be yog Satan ni gaar: “Rayog rog ni nggu pingeg yugu demutrug be’ ni nge dabki liyor ngak Got.” (Job 1:9-12) Ngada weliyed morngaagen boch e “pi ban” rok Satan nge rogon ni ngada ayuwgad riy.​—Efesus 6:11.

Mu Ayuw Rok E Piin Ni Kar Thaygad Ko Machib Ma Yad Be Togopuluw Ngay

6, 7. (a) Mang e ma yog e piin ni kar thaygad ko machib ma yad be togopuluw ngay? (b) Uw rogon ni be tamilangnag e Bible ko mang e ba adag e piin ni kar thaygad ko machib ma yad be togopuluw ngay?

⁶ Kab kakrom ma ke fanay Satan e piin ni kar thaygad ko machib ma yad be togopuluw ngay. (Matthew 13:36-39) Pi tatogopuluw ney e yad ma yog ni yad be meybil ngak Jehovah mab mich e Bible u wan’rad, machane yad ma pi’ keru’rad ko ulung rok Got u fayleng. Bochi yad e kar sulod ko boch e machib rok “Babylon Nib Gilbuguwan” ni ir e be yip’ fan e pi yurba’ i teliw ni yugu ban’en u fayleng iyan. (Revelation 17:5; 2 Peter 2:19-22) Rib gel e thin rok e piin ni kar yoloyed e Bible ni yad be tamilangnag laniyan’ nge ngongol rok e pi tatogopuluw ney.

⁷ Mang u wan’ e piin ni kar thaygad ko machib ma kar togopuluwgad ngay? Baga’ ni de fel’ u wan’rad ni ngar n’aged e machib nib mich u wan’rad faram. Ya yad ba adag ni nge un yugu boch e girdi’ ngorad ko togopuluw. Gathi kar lemnaged ni ngar gayed yugu boch e girdi’ ni ngar manged pi gachalparad, ya ba adag e pi tatogopuluw ney ni ngar “pow’iyed e piin ni ke mich Jesus u wun’rad nga bang ngar uned ngorad.” (Acts 20:29, 30) I ginangdad Paul u morngaagen e pi tamachib ney ni yad ba sasalap ni gaar: “Mu guyed rogomed ya ri kolmed be’ ngam manged kalbus rok be’.” (Kolose 2:8) Aram e n’en ni be rin’ e piin ni kar thaygad ko machib ma kar togopuluw ngay, fa? Pi tatogopuluw ney e yad bod e piin nra kol be’ ngar chuweged ko chon e tabinaw rok, ya pi tatogopuluw ney e ra guy rogon ni ngar koled girdien e ulung ngar chuwgad riy.

8. Mang boch e kanawo’ ni ma fayleng e piin ni kar togopuluwgad ko machib ni ngar bannaged e girdi’?

⁸ Mang boch e kanawo’ ni ma fanay e pi tatogopuluw ney ni ngar pingeged e girdi’? Baga’ ni yad ra guy rogon ni ngar olobochiyed e machib, ma yad ra weliy bang e machib nriyul’ mi yad mithag bang, ma yu ngiyal’ e ba tamilang e ban rorad. Manang Jesus ni ra taw nga ba ngiyal’ ma ra gafgow pi gachalpen ni bochan e piin ni “ra tunguy urngin mit e thin nib kireb nib togopuluw ngorad.” (Matthew 5:11, Today’s English Version) Pi tatogopuluw ney e ra tunguy e thin ni bochan e yad be guy rogon ni ngar bannaged yugu boch e girdi’. I weliy apostal Peter morngaagen e pi tatogopuluw ni yad ra machibnag e “machib ni yad e sum rorad” ma yad be wereg e “ban” ma yad be “tunguy fan e babyor nib thothup ngar weliyed.” (2 Peter 2:3, 13; 3:16) Ba gafgow ya ke yog rorad ni ngar “kirebnaged rogon nib mich Kristus u wan’ boch e girdi’.”​—2 Timothy 2:18.

9, 10. (a) Uw rogon nrayog ni ngada ayuwgad ni nge dab da awgad ko pi ban rok e piin ni kar thaygad ko machib? (b) Mang fan ni nge dabi wagey lanin’dad ni faanra kan yal’uweg e machib rodad u morngaagen e pin n’en nib m’agan’ Got ngay?

⁹ Uw rogon nrayog ni ngada ayuwgad rok e ban rok e piin ni kar thaygad ko machib kar togopuluwgad ngay? Rayog ni ngada ayuwgad ni faan gad ra fol ko Thin Rok Got ni gaar: “Ri gu be wenignag ngomed, pi walageg, ni ngam ayuweged gimed rok e piin ni yad ma wereg e girdi’ ma yad ma kirebnag e mich rok e girdi’, ma yad ma togopuluw ko machib ni ke yog ngomed; ere mu tiyed gimed u urel rorad.” (Roma 16:17) Rayog ni “ngada tiyed gadad u urel rorad” ni ngada paloggad ko thin rorad, ni aram e dab da nonad ngorad, ara dab da bieged e babyor rorad ara dab da bieged e thin rorad u lan e Internet. Mang fan ni dab da yodorgad? Ya bin somm’on e aram e n’en ni yog e Thin Rok Got ni dab da rin’ed, ma ke pagan’dad ngak Jehovah ni ra pow’iydad u kanawo’ nra fel’ rogodad riy.​—Isaiah 48:17, 18.

¹⁰ Bin migid e ke t’uf rodad fare ulung ni ke fil e machib nriyul’ ngodad nib thil ko machib rok Babylon nib Gilbuguwan. Maku gad manang ni dawor da nanged urngin ban’en ni ke m’agan’ Got ngay; ma ka be tamilang iyan e machib rodad. Pi Kristiano ni yad ba yul’yul’ e ke fel’ u wan’rad ni ngar sonnaged Jehovah ni nge tamilangnag e machib. (Proverbs 4:18) Ma dab da paged fare ulung ni be fanay Jehovah ma ke falan’ ngay, ya gad be guy e mich riy ni be flaabnag Jehovah e re ulung nem.​—Acts 6:7; 1 Korinth 3:6.

Mu Ayuw Ni Nge Dab Mu Bannagem

11. Mang fan ni piin ni dar flontgad e yad ma bannaged yad?

¹¹ Bay ban’en ni ma rin’ e girdi’ ni dar flontgad​−ni aram e be’ e nge bannag ir−ma ra fanay Satan e re n’en ney ni nge kirebnag e girdi’. Be gaar Jeremiah 17:9: “Dariy ban’en ni kab sasalap nga ba gumerchaey ” Ma be gaar James: “Machane pi n’en ni ma waliy e girdi’ ko denen e ma yib ngak e en ni pag ir ko n’en nib kireb ni be ar’arnag nge waliy faanem nge aw ko wup.” (James 1:14) Faan manga ke ar’arnag gumercha’dad e denen ma ra wawliydad ko kireb ma ra m’ug ni gowa dariy e kireb ko re denen nem. Ra bannagdad gumercha’dad, ma faanra pag be’ ir ko denen ma wenegan e denen e yam’.​—Roma 8:6.

12. Mang boch e kanawo’ ni rayog ni ngada bannaged gadad?

¹² Rib mom ni ngada awgad ko wup ni nge be’ e nge bannag ir. Ba sasalap gumerchaey ma ra tawey nga ban’en ni bochan e kireb ni ke ngongliy. (1 Samuel 15:13-15, 20, 21) Gumercha’dad e ba sasalap ma ra gay kanawoen ni nge tawey nga ban’en ni bochan e kireb ni kada ngongliyed. Aram e n’en ni ra rin’ ko fafel ni gad be tay. Boch e fafel e ba fel’ ma yira falfalan’ ngay. Machane baga’ ni fafel ni bay ko fayleng−ni aram e kachido nge television nge Internet ko computer​−e ba kireb ara ba puwlag. Ma rib mom ni ngada lemnaged ni rayog ni ngada yaliyed e pi kireb nem ma dariy ban’en ni ra buch rodad. Boch e girdi’ e ra lemnag ni lungurad, “Nangan’ rog e be yog ngog ni dariy e kireb riy, ere dariy e magawon riy, fa?” Girdi’ ni ra lem ni aray rogon e yad be bannagrad.​—James 1:22.

13, 14. (a) Morngaagen mini’ u lan e Bible e be dag ni dabiyog ni ngada folgad ko nangan’ rodad u gubin ngiyal’? (b) Uw rogon ni ngada ayuwgad ni nge dab da bannaged gadad?

¹³ Uw rogon ni ngada ayuwgad ni nge dab da bannaged gadad? Somm’on ma thingar da nanged ni gathi gubin ngiyal’ ni rayog ni ngada pagedan’dad ko nangan’ rodad. Amu lemnag e pi n’en ni rin’ apostal Paul. U m’on ni ke mang be’ ni Kristiano ma i gafgownag pi gachalpen Kristus. (Acts 9:1, 2) Ngiyal’ i n’em e de yog e nangan’ rok ngak ni ba kireb e pi n’en ni ke rin’. Machane ba tamilang ni ke oloboch e nangan’ rok. Be gaar Paul: “Machane me runguyeg Got, ya de mich Kristus u wun’ug e ngiyal’ nem, ni aram e dagur nang e n’en ni gu be rin’.” (1 Timothy 1:13) Ere faanra nangan’ rok be’ e ra pag ir ni nge un nga miti fafel e gathi be yip’ fan ni ba fel’ e re miti fafel nem. Ba nangan’ ni be fol ko Thin Rok Got e ra pow’iy be’ u kanawoen e mat’aw.

¹⁴ Ba aray boch ban’en ni ngam lemnag ya nge dab mu bannagem. Ngam fl’eg i yaliyem u fithik’ e meybil. (Psalm 26:2; 2 Korinth 13:5) Ga ra fl’eg i yaliyem u fithik’ e yul’yul’ ma rayog ni nge tamilang u wan’um boch ban’en ni thingar mu thilyeg ko ngongol rom ara lem rom. Mu motoyil ko thin rok yugu boch e girdi’. (James 1:19) Be ni ra fl’eg i yaliy ir e dabi guy urngin ban’en, ere ba fel’ ni nge motoyil ko thin rok be’ ni Kristiano ni ba ilal. Faanra kam pirieg ni kam turguy ban’en ara kam ngongol u reb e kanawo’ ni de fel’ u owchen be’ ni Kristiano ni ke n’uw nap’an ko machib, amu fithem, “Rayog ni nge aw ni be bannageg gumerchaeg ma dawori puluw e nangan’ rog, fa?” Ngam bieg e Bible nge pi babyor ni ma weliy fan e Bible ni gubin ngiyal’. (Psalm 1:2) Ga ra rin’ ma ra ayuwegem ni nge puluw lanin’um nge ko pi motochiyel rok Got.

Mu Ayuw Ko Pi Ban Rok Satan

15, 16. (a) Mang boch e ban ni ma fanay Satan ni nge bannagdad? (b) Uw rogon nrayog ni ngada ayuwgad ko pi ban nem?

¹⁵ Boor mit e ban ni ma fanay Satan ni nge bannagdad. Ma guy rogon ni ngada lemnaged ni gad ra falfalan’ ni bochan e ke yoor e chugum rodad, machane bin riyul’ riy e boor e magawon rok be’ ni boor e chugum rok. (Ecclesiastes 5:10-12) Ba adag Satan ni ngada lemnaged ni nge dabi m’ay e re m’ag nib kireb ney ni yugu aram rogon ni ba tamilang e mich riy ni gad be par ko “tin tomren e rran.” (2 Timothy 3:1-5) Be wereg Satan e thin ni dariy e kireb riy ni ngan un ko ngongol ko darngal ni yugu aram rogon ni kari gafgow e piin ni ke yib wenegan e ngongol rorad ngorad. (Galatia 6:7) Uw rogon ni nge siy ni ngada awgad ko pi ban nem?

¹⁶ Mu fil ban’en ko pi n’en ni rin’ e girdi’ u lan e Bible. Bay u lan e Bible morngaagen e girdi’ ni kar awgad ko pi ban rok Satan. Boch e pi girdi’ ney e ke t’uf rorad e chugum, ara kar paged talin e ngiyal’ ni yad be par riy, ara kar uned ko ngongol ko darngal−ma yad gubin e kar gafgowgad ni bochan wenegan e ngongol rorad. (Matthew 19:16-22; 24:36-42; Luke 16:14; 1 Korinth 10:8-11) Mu fil ban’en ko ngongol rok e girdi’ ko ngiyal’ ney. Ke gafgow ya yu ngiyal’ ma boch e Kristiano e dakur pasiggad, ara yad be lemnag ni ke thumur e flaab ni bochan e yad be pigpig ku Got. Yad ma tal ko machib ni ngar leked e falfalan’’. Machane pi girdi’ ney e “yad ba yoyowol” ya ra taw nga nap’an ma yad ra pirieg wenegan e ngongol nib kireb rorad. (Psalm 73:18, 19) Ra gonop be’ ni faanra fil ban’en ko oloboch rok yugu boch e girdi’.​—Proverbs 22:3.

17. Mang fan ni ma wereg Satan fare ban ni der ma t’ufegdad Jehovah ara dariy fadad u wan’?

¹⁷ Ka bay yugu reb e ban ni ma fanay Satan​−aram fare ban ni der ma t’ufegdad Jehovah ara dariy fadad u wan’. Ke fil Satan rarogon e girdi’ u lan bokum biyu’ e duw. Ere manang ni gad ra meewar ni faanra mulan’dad. (Proverbs 24:10) Ere ma wereg fare ban ni dariy fadad u p’eowchen Got. Faanra ke gel Satan ngodad ma ngada lemnaged ni de t’ufegdad Jehovah ma rayog ni ngada paged e machib. (2 Korinth 4:9) Ma aram e n’en ni ba adag Satan ni ir e Th’abi Sasalap! Ere uw rogon ni ngada ayuwgad ko re ban rok Satan nem?

18. Uw rogon ni ma micheg e Bible ni ri gad ba t’uf rok Jehovah?

¹⁸ Ngari mit nga gumerchaem e n’en ni yog e Bible u morngaagen fene gad ba t’uf rok Got. Bay boch e thin u lan e Thin Rok Got ni ma micheg ni ma guydad Jehovah ma nge bagadad e gad ba t’uf rok. Gowa ma chaariy e luw u owchem “nga lan e melor rok” ni be yip’ fan ni ma guy e gafgow ni ga be tay ma dabi pag talin e meyor ni kam tay ni ga be athamgil ni nguum par ni gab yul’yul’. (Psalm 56:8) Manang e ngiyal’ ni “ke mulan’um” ma ke chugur ngom ko ngiyal’ nem. (Psalm 34:18) Manang urngin ban’en u morngaagem, ma “mus nga piyen lolugem ni ke m’ay i theeg.” (Matthew 10:29-31) Ma bin ni baga’ fan e “ke pi’ Fak ni kari maagirag rog” ni bocham. (John 3:16; Galatia 2:20) Yu ngiyal’ e ra mo’maw’ ni nge mich u wan’um ni pi thin ko Bible nem e fan ngom. Machane thingari mich u wan’dad ni ba riyul’ e thin rok Jehovah. Ba adag ni nge mich u wan’dad ni gad ba t’uf rok ni gathi ke mus ni ma t’ufegdad ni gad ba ulung i girdi’ ya ku ma t’ufegdad ni be’ nge be’.

19, 20. (a) Mang fan ni baga’ fan ni nge tamilang e ban rok Satan u wan’dad ma ngada togopuluwgad ko ban rok ni der ma t’ufegdad Jehovah? (b) Uw rogon ni ke ayuweg reb e piilal ni ma lekag e ulung yugu boch e girdi’ ni ke mulan’rad?

¹⁹ Nge tamilang e pi ban rok Satan u wan’um ma ga togopuluw ngay. Faanra ke tamilang u wan’um ni be bannagem be’ ma rayog ni ngam ayuw rok ya nge dab mu aw ko ban rok. Ere faanra ke tamilang u wan’um ni ba adag Satan ni nge mich u wan’um ni de t’ufegem Jehovah ma re tamilangan’ nem e ra ayuwegem. Be’ ni Kristiano e ke bieg e thin u lan e Watchtower ni be weliy morngaagen e pi ban rok Satan me gaar: “Da gur nang ni be guy Satan rogon ni nge maruweliy lanin’ug ya nge mulan’ug. Chiney e ke tamilang u wan’ug ni aray e n’en ni be rin’, ere rayog ni nggu togopuluw ngay ma nge dabi mulan’ug.”

²⁰ Amu lemnag e thin rok reb e piilal ni Kristiano ni ma lekag e pi ulung u reb e nam u South America. Nap’an ni ra machibnag e piin ni ke mich u wan’rad ni ke mulan’rad e ra fithrad, “Ke mich e Trinitas u wan’um, fa?” Ra fulweg faanem ni ke mulan’ ni gaar, “Ri danga’.” Ya manang ni aram reb e ban rok Satan. Ma ra fith fare piilal ni gaar, “Ke mich u wan’um ni bay e infierno, fa?” Ma aram e ra fulweg, “Ri danga’.” Me weliy fare piilal ni ka bay yugu reb e ban rok Satan ni gathi ri ba tamilang. Me dag fare thin u lan fare ke babyor ni Draw Close to Jehovahb ko page 249 ko paragraph 21 ni be tamilangnag fare ban ni de t’ufegdad Jehovah. Be yog fare piilal ni bay angin e ayuw ni aray rogon ni be ayuweg e piin ni ke mulan’rad ni nge tamilang e ban rok Satan ma ngar togopuluwgad ngay.

Mu Ayuw Ko Ban

21, 22. Mang fan ni ke tamilang e pi ban rok Satan, ma mang e ke mudugil u wan’dad ni ngada rin’ed?

²¹ Gad manang ni ra yoor e pi ban nge pi sasalap rok Satan ko tin tomren e rran ney. Ke magar Jehovah ya ke tamilangnag ngodad e pi ban rok Satan. Fare Bible nge pi babyor ni ma weliy fan e Bible ni ke fl’eg fare “tapigpig nib yul’yul’ mab gonop” e ma tamilangnag e pi ngongol nib kireb rok Moonyan’. (Matthew 24:45) Kan ginangdad ere rayog ni ngada fl’eged rogodad riy.​—2 Corinthians 2:11.

²² Ere ngada ayuwgad ko thin rok e piin ni kar thaygad ko machib ma yad be togopuluw ngay. Ma ngada athamgilgad ni nge dab da bannaged gadad. Ma nge tamilang u wan’dad e pi ban rok Satan ma ngada togopuluwgad ngay. Gad ra rin’ ma rayog ni ngada ayuweged e thin nib fel’ u thildad “fare Got ko tin riyul’” ni ri ma fanenikay e ban.​—Psalm 31:5; Proverbs 3:32.

[Footnotes]

Ka Ga Manang?

• Mang fan ni ke yoor e ban u fayleng e chiney?

• Uw rogon ni ngada ayuwgad ni nge dabi bannagdad e piin ni kar thaygad ko machib ma yad be togopuluw ngay?

• Uw rogon ni ngada ayuwgad ni nge dab da bannaged gadad?

• Uw rogon ni ngada ayuwgad ko pi ban rok Satan?

[Picture on page 12]

Dab mu bannagem ko fafel ni ga ra un ngay

[Pictures on page 13]

Mu ayuw ni nge dab mu bannagem, mu fl’eg i yaliwem u fithik’ e meybil, mu motoyil ngak yugu boch e girdi’, ma ga fil e Thin Rok Got u gubin ngiyal’