Yibe Rin’ e Tin nib M’agan’ Got Ngay?

“Ngan rin’ e tin nib m’agan’um ngay, u roy u but’, ni bod rogon u tharmiy.”​—Matthew 6:10.

JULIO nge Christina e ur yaliyew u fithik’ e marus nge tamdag nib gel aningeg i fakrow nra yikgad ngar m’ad. Immoy e karro rorad nib tal meb ba karro ni be yan be’ nib chingnag riy nge bi chafin ngay, nge pil me gabul e daramram riy. Bin lal e bitir rorow, ni Marcos, e yog nni ayuweg ko fare nifiy nib gel, machane re daramram nem e ke urfeg downgin i yan, ke tagan’ ni daki sul yaan nga rogon. Ke mereb e duw rok. Chitamangin e kari kireban’ ni rib gel. Me fal’ laniyan’ nge laniyan’ e tabinaw rok ko fare thin ni gaar: “Thingarda nanged, ni ireray e n’en nib m’agan’ Got ngay, ni de mutrug ko fel’ fa kireb.”

Nap’an ni ra buch ban’en nib elmirin ni bod e biney, ma boor e girdi’ ni aram e n’en ni yad ma rin’. Bayi n’en me l’ungurad, ‘Faanra Got e ba th’abi gel gelngin ma ma lemnagdad,’ ma n’en ni ke buch e sana ra fel’ ngodad u bang, ni ‘yugu aram rogon nib mo’maw’, ni ngan nang fan.’ Ba fel’ u wan’um fa?

Fare lem ni demtrug e n’en ma buch, ko fel’ fa kireb, ma be dag ni aram e n’en nib m’agan’ Got ngay e baga’ ni fek ko fapi thin rok Jesus ni ke yog ko fare Meybil ku Somol, ni kan sul u daken i er ngalang. N’en nib m’agan’ Got ngay e kan rin’ u tharmiy, fa dangay? Yira meybil ‘Ni ngan rin’ e tin nib m’agan’ ngay u but’,’ ma gathi ke fel’ u wan’dad ni tin be buch u roy u but’ e aram e n’en nib m’agan’ Got ngay?

Boor e girdi’ ni gathi ri ma puluw ere n’ey u wan’. Ya rogon ni kar nanged fan, e be dag ni Got ni derma lemnag e lem ko girdi’ ni sunmiy. ‘Uw rogon ma ba Got nib ta t’ufegey e baadag ban’en ni rib gel e marus riy ni ngeb ko girdi’ ni dawori bucheg ban’en?’ yad ra fith ni lungunrad. ‘Faanra gomanga ba’ ban’en ni baadag Got, ni ngad filed ma gur be mang e re n’enem?’ Sana aram rogon ni ga be lemnag.

Ragon e re n’ey, ma faani walagen Jesus, ni reb i gachalpen ni James, e yoloy ni gaar: “Nap’an ni ra yib e skeng, ma dariy be’ ni nge gaar: ‘Be skengnageg Got.’ Ya tin nib kireb e dabiyog ni ngan skengnag ngak Got maku dabiyog ni ir e nge skengnag be’ ngay.” (James 1:13, New World Translation) Got e gathi ir e yib e kireb rok. Ba tamilang, ni arfan, ni gathi urngin ban’en ni be buch u fayleng e chiney e aram e n’en nib m’agan’ Got ngay. Fare Bible e ki yog e n’en nib m’agan’ e girdi’ ngay, nge n’en nib m’agan’ e pi nam ngay, nga ki mada’ ko n’en nib m’agan’ fare moonyan’ ngay. (John 1:13; 2 Timothy 2:26; 1 Peter 4:3) Ke fel’ u wan’um ni n’en ni ke buch ko tabinaw rok Julio nge Christina e dabiyog nib n’en nib m’agan’ ba Matam nu tharmiy ni ma t’ufegey ngay?

Ere, mang e n’en ni be yip’ Jesus fan ni faani fil ngak pi gachalpen ni ngar meybilgad ni nge lungurad: ‘Ngan rin’ e tin nib m’agan’um ngay’? Kemus ni ba wenig ngak Got ni ngeb ni nge rin’ ban’en nib thil, fa be fil Jesus ngodad ni ngad yibiliyed ban’en ni kab gel feni ga’ fan ma kab gel e fel’ riy, ni ban’en ni ra thil ma urngin e girdi’ ni aram e n’en ni yad be athapeg? Nga kuda fal’eged i skengnag ko mang e ra yog e Bible.

[Picture Credit Lines on page 3]

Car: Dominique Faget-STF/AFP/Getty Images; child: FAO photo/B. Imevbore