Ngiyal’ ni Yira Rin’ e Tin nib M’agan’ Got Ngay u But’

NAP’AN ni i fil Jesus ngak pi gachalpen ni ngan yibilay ni, “Ngan rin’ e tin nib m’agan’um ngay, ni bod u tharmiy, maku arrogon u but’,” ma i non ni be’ ni ki i par u tharmiy rok e Chitamangiy. (Matthew 6:10; John 1:18; 3:13; 8:42) Ngiyal’ ni immoy Jesus u m’on ni mang girdi’, ma i par ko fa ngiyal’ nem ni urngin ban’en ni i buch u tharmiy ngo but’ e ba puluw ko tin nib m’agan’ Got ngay. Yu ngiyal’ nem e yu ngiyal’ ko falfalan’ ko tin ke mu’ i ngongliy ma ke gaman u wan’ urngin.​—Proverbs 8:27-31.

Tin som’mon ni sunmiy Got e boch e kan, ni pi engel rok ni ba gel gelngirad. Ra bagayad ma rayog ni nge mel’eg e tin nib m’agan’ ngay fa? Arrogon, ma nap’an nsunmiy e fayleng, ma piin “pi fak Got ney e ur tolulgad nga lang u fithik’ e falfalan’.”​—Job 38:7.

Tomren ni kan sunmiy e fayleng, me fal’eg Got rogon ni nge yog e par riy ngemu’ fini sunmiy e bin som’mon e pumoon nge ppin. Mang e ba m’agan’ Got ngay ni fan ko gal ni som’mon e gallabthir rodad nge pi fakrow? Rogon ko Genesis 1:28 (NW) e: “Tow’athnagrow Got me gaar ngorow: ‘Mu diyengow nge yoor pi fakmew, nge wer e piin owchemew nga gubin yang u fayleng ngar pared riy mi yad suwey, mar suweyed e nig u maday nge tin ma chachangeg ban’en u lan e lang nge urngin e tin nib fas ban’en ni ma mithmith u daken e fayleng.’”

Re ngiyal’ ney e ba ngiyal’ ni un rin’ e tin nib m’agan’ Got ngay u l’agruw yang nu tharmiy ngo but’. Machane meb i sum reb e magawon ko tin nib m’agan’ Got ngay ni da un i finey. I yibnag e kireban’ nib gel nib n’uw nap’an ni ra k’aring nge dabki tamilang u wan’uy e tin nib m’agan’ Got ngay ni fan ko girdi’. Bochan e re n’ey ma gadad gubin ni keb e re magawon ney ngodad. Be mang e re magawon nem?

Tin nib M’agan’ Got Ngay u Ba Ngiyal’ ko Togopuluw

Reb fapi engel nib gel e guy e ngiyal’ ni rayog ni magawonnag e tin nib m’agan’ Got ngay ni fan ko girdi’, n’en ni lemnag e goo ir e nge yib felngin ngak. Sana i lemnag ni faanra yog rok ni guy rogon nge motoyil e gal ni som’mon e girdi’ ngak ko bin ni ngan motoyil ku Got, ma rayog ni nge pag Got reb e gagiyeg ni nge tagenging ngak. Ba puluw, ni cha’ nem ni be tagenging e taaboch mini pining Satan ngak, ni fan e, “Be’ ni ma togopuluw.”​—Job 1:6.

I yib Satan i m’ug ngak fare pin, ni ir e lem rok. Me i ta’ ir ngak ni nge digey e tin nib m’agan’ Got ngay nge par ni ke puf rogon, ni gaar: “Ri dab mmow. . . . Gimew ra bod Got, ngam nangew e tin nib fel’ nge tin nib kireb.” (Genesis 3:1-5) Ma rogon u wan’ fare pin, e re n’ey e ra pi’ e puf rogon ngak, me adag fare n’en ni keb i m’ug ni gowa ba kanawo’ nib fel’ ko yafas. Me taaboch, me pingegan’ figirngin nge un ngak.​—Genesis 3:6.

Gathi aray e n’en nib m’agan’ Got ngay ni fan ngorow. Ma ra yib angin ni rib kireb. Ke mu’ Got i yog ngorow ni binem e kanawo’ e ra fekrow i yan ko yam’. (Genesis 3:3) Kub chag ngay, ni da kur flontgow, ma bochan ndakur flont nge yam’ e ke af i yan ngak pi fakrow. (Roma 5:12) Dabiyog rok Satan ni nge taleg angin e pi n’ey.

Pi n’ey ni ke sum e ke pug boch e deer nib t’uf ni ngan fulweg: Rayog ko girdi’ “ni nge bod Got, nge nang e tin nib fel’ nge tin nib kireb,” ni bod ni ke yog Satan? Ni aram e, faan yira pi’ e tayim ngodad nib gaman, ma rayog ni gadad rodad e ngada dugliyed e tin nib mat’aw nge tin nib kireb, nge tin ni ra yib angin nib fel’ nge tin ni ra kirebnagdad ko urngin ban’en ko yafas? Ba t’uf ni ngan fol ku Got nib polo’, ya kanawo’ rok ko gagiyeg e ba th’abi fel’? Uw rogon ni ga ra fulweg e pi deer ney?

Ri taareb e kanawo’ ni ba’ ni rayog ni ra tiriggil e pi deer ney riy u p’eowchen urngin e tin kan sunmiy ni ba’ e llowan’ rok: Ngan pag e piin ni yad be gay ni ngar pired rorad nge yog ni ra rin’ed nge fel’ rogon. Ma ra ngan li’rad ngar m’ad ma dabi tiriggil fapi magawon nga bang. Ngan pag e girdi’ ngar ululgad i gay rogon ni ngar pired rorad nib gaman nap’an e ra tiriggiliy e pi n’ey ya ra bi gagiyel angin.

Angin e n’en ni ra be’ ma bin ke mel’eg e ke m’ug kafram. Gonapan 1,500 e duw u lan e chep ko girdi’, “e fare fayleng e mogoth u owchen fa bin riyul’ e Got ma fayleng e yib i sugnag e cham.” (Genesis 6:11) Bat’uf ni ngan rin’ ban’en ni papey ni ngan ta’ e fayleng ni nge dabi mogoth. Me maruwel Got ngebnag e ran nge tharey e fayleng me ayuweg fa taa re tabinaw nib mat’aw nge par nib fas​—Noah, ppin rok, nge pi fak ni pumoon, nge pi leengirad. (Genesis 7:1) Gadad gubin e da bad rorad.

Nap’an chepin e girdi’ ma ka aram nap’an, ni Got e be pow’iy e piin ni riyul’ ni yad baadag ni ngar nanged e tin ni m’agan’ ngay. Pi thin ney ni yibe yog e kan yoloy nga lan e Bible. (2 Timothy 3:16) U fithik’ e t’ufeg ma ke pag e girdi’ nib yul’yul’ ni nge yib e tha’ u thilrad, maku yad mang fager rok. (Isaiah 41:8) Uw feni ri gadad be pining e magar ni fan ko re n’ey!

‘Tin nib M’agan’um Ngay e Ngan Rin’​—ni Gubin

N’en ni ke rin’ Got ke taw ko chiney e gathi ke gaman e tin nib m’agan’ ngay ni fan ko girdi’. Fare profet ni Daniel, e fanay e thin ni urngin ma ba tamilang ni gaar: “Ngiyal’ ni bay i gagiyeg e pi pilung nem, e aram e bay i sunmeg Got nu tharmiy reb e gagiyeg ndariy rofen nra mus. . . . Bay i thirif u but’ urngin e pi pilung nem nge gagiyeg ni yad be tay me mang birok e gagiyeg e i par ndariy n’umngin nap’an.” (Daniel 2:44) Re yiiy ney e ke yog u m’on rogon tomuren e re m’ag ney e chiney ni dabiyog ni ngan yal’uweg nge mun liw rok ni fare Gil’ilungun, ara am, rok Got. Re n’ey e ba thin ni rib fel’! Fapi cham nge ngongol ko fel’ ngak ni ke suguy e fayleng e chiney ni kub chag e maangach ngay ni ku re n’em e ku be dag ni ra gothey e fayleng e bay i reb e rran me m’ay nga bang ngan pagtalin.

Mi ngiyal’ e ra buch e pi n’ey? I deeriy pi gachalpen Jesus ni lungurad: “Wuin e ra yib urngin fapi n’en ni ka mog, nge n’en nra yib ni nge dag ni ke taw ko ngiyal’ ni bay mub riy nge ngiyal’ ni tomuren e fayleng?” Rogon bang ko fulweg rok, e gaar Jesus: “Re thin nib fel’ ney ko gil’ilungun e yira machibnag u gubin yang u fayleng ni nge urngin e nam me nang mfini yib e tomur.”​—Matthew 24:3, 14.

Ban’en ni nge nang urngin e girdi’ e re maruwel ko machib ney e chiney e yibe rin’ u ga’ngin yang e fayleng. Fare Gil’ilungun ni yog Jesus ni yira machibnag e ri ireram fare Gil’ilungun ni fil Jesus ngodad ni ngada yibilayed ko fare meybil ni ta’ ni ngan folwok riy ni gaar: “Ngeb gil’ilungum min rin’ e tin nib m’agan’um ngay u tharmiy, maku arrogon u but’.” (Matthew 6:10) Arrogon, re Gil’ilungun nem e aram talin e maruwel ni ra fanay Got ni nge lebuguy e tin nib m’agan’ ngay ni fan ko girdi’ nge fayleng.

Mang fan e re n’em? Ngan pag e Revelation 21:3, 4 nge fulweg ni gaar: “Mu gu rung’ag ba lam ni ba ga’ ni be non u tagil’ Got ni be gaar: ‘Chiney e keb i par tafen Got nga fithik’ e girdi’! Bayi par rorad, ma bay ra manged girdien. Mi Got e bay i par rorad, mi ir e bayi mang Got rorad. Ma bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.’” Ma aram e tin nib m’agan’ Got ngay e bay ni rin’ u but’ ngo tharmiy​—ni polo’.a Gathi ga baadag ni ngam mang bang riy?

[Footnote]