Girdi’ Rok Got E Thingara Adaged Ni Ngaun Gol

“Mang e be ning Jehovah ngom ya ngam rin’ e tin nib yal’uw ma ngam t’ufeg ni nga un gol ma ga par ni ga manang e tin rayog rom u rogon ni gimew be yan Got u taabang?”​—MIKAH 6:8, NW.

1, 2. (a) Mang fan ni sunun ni dabda gingad ngay ni bay u laninyan’ Jehovah ni girdi’ rok e yad ra dag ni yad ba gol? (b) Mang e pi deer ni murung’agen e gol e ba’ fan ni ngad tedan’dad ngay?

JEHOVAH e ir e Got nib gol. (Roma 2:4; 11:22) Sana fa wu’ ni som’mon e mabgol, ni Adam nge Efa, e ri ura piningew e magar nga feni gol Got! U lan fare milay’ nu Eden, e ba liyegrow e tin kan sunmiy ni yibe guy nrayog ni micheg feni gol Got ngak e girdi’, ni rayog ni ngar falfalan’ ngay. Me i par Got ni be ulul ko gol ngak urngin e girdi’, ni mus ngak e piin ni dar ma pining e magar ngak ma yad ba kireb.

² Bochan ni girdi’ e kan ngongliy u yaan Got, me ere bay gelngirad ni ngar daged ko yafas rorad e pi felngin Got. (Genesis 1:26) Dab ni gin ngay, ni be athapeg Jehovah ni ngada daged e gol. Ni bod e n’en ni yog ko Mikah 6:8 ni, girdi’ rok Got e thingara “adaged ni nguur golgad.” Machane be mang e gol? Uw rogon nib peth nga boch e pi felngin Got? Bochan ni girdi’ e rayog rorad ni ngar daged e gol, ma mang fan ni fayleng e bangi n’en ni kari kireb ko maangach ma ke mo’maw’ ni ngan kadan’ riy? Mang fan ni gadad e piin Kristiano e thingarda athamgilgad ni ngad daged e gol nrogon ni gad ma ngongol ngak boch e girdi’?

Be Mang e Gol?

3. Uw rogon ni ngam weliy fan e gol?

³ Gol e yima dag ko ngan pasig i lemnag e tin nib fel’ ngak girdi’. Yima dag ko ayuw nge nga u nog e thin ni yima yog nib fel’. Rogon ni ngan dag e gol e ku be yip’ fan ni ngan dag e fel’ ngak e girdi’ ma dabi rin’ ban’en ni ra kirebnigey. Be’ nib gol e ba fel’ ngak e girdi’, ba sumunguy, ma ba ta runguyey. Ba’ woken ni ri baadag ni nge pi’ boch ban’en ngak e girdi’ ma ri ma lemnagrad. I fonownag Paul ni apostal e piin ni Kristiano ni gaar: “Aram fan ni runguy, nge gol nge sobut’an’, nge sumunguy, nge gum’an’ e thingar mon’ed nga dakenmed nge mang mad romed.” (Kolose 3:12) Ere gol, e bang ko madan urngin e tin riyul’ e Kristiano ni be yip’ fan ban’en.

4. Uw rogon ni ke pow’iyey Jehovah rogon ni ngan dag e gol ngak e girdi’?

⁴ Jehovah Got e som’mon ni dag e gol. Rogon ni yog Paul, e “nap’an ni dag e gol nge t’ufeg rok e en ma Thapegdad ngak Got, i Got e adag ni ke thapegdad u daken e maluk ni ta’ ngodad ni fekdad ko yafas me biechnag u daken e kan ni thothup.” (Titus 3:4, 5) I ‘maluknag’ Got, ara i biechnag, e piin Kristiano ni kan dugliyrad u daken rachaen Jesus, ni be fanay puluwon e biyul ni maligach rok Kristus ni fan ngorad. Maku kan biechnagrad u daken e kan ni thothup, mi yad mang pifak Got ni bod be’ ni “kefin ni sunumeg”. (2 Korinth 5:17) Maku, gol rok Got nge t’ufeg e dag ngak fare “ulung nib ga’,” ni kar “lukniged e mad rorad kar wechwechniged nga rachaen fare Fak e Saf.”​—Revelation 7:9, 14; 1 John 2:1, 2.

5. Mang fan ni piin ni be pow’iyrad fare kan ni thothup rok Got e ba t’uf ni ngar daged e gol?

⁵ Gol e ku bang ko wom’engin e kan ni thothup rok Got, ara gelngin. I yog Paul ni gaar: “Wom’engin e kan ni thothup e aram e t’ufeg, nge felfalan’, nge gapas, nge guman’, nge gol, nge fel’ ngak e girdi’, nge michan’, nge sumunguy, nge t’ar laniyan’. Dariy e motochiyel nib togopuluw ngay.” (Galatia 5:22, 23, NW) Bochan ni aram rogon, me ere gathi piin ni kan ni thothup rok Got e be pow’iyrad e ba t’uf ni ngar daged e gol ngak yugu boch e girdi’?

Bin nib Riyul’ e Gol e Gathi Me’war

6. Wuin e ra aw ni gol e ba meewar, ma mang fan?

⁶ Boch e girdi’ e ma lemnag e gol ni me’war. Yad ma lemnag ni yu ngiyal’ ma dab kuun sumnguy ku rayog ni ngan gelnag e thin min kirebnag ngongoley ni bochan ni nge guy boch e girdi’ gelngin. Machane, tin riyul riy, rib t’uf gelngiy nib gel ni nge yog ni ngan dag e gol ni riyul’ me yog ni ngan pag i dag e gol ni de riyul’. Bochan ni gol nib riyul’ e bang ko wom’engin e kan ni thothup rok Got, ma aram e gathi lem nib meewar, ma dabi m’ing ko ngongol ni kireb. Maku, gol ni de puluw, e aram e meewar nra k’aring be’ ni nge pag nge rin’ be’ e kireb.

7. (a) Uw rogon e mich riy ni ma pag Eli e kireb? (b) Mang fan ni piin piilal e thingara kol ayuwgad ni dabra olobochgad nrogon ni nguur golgad?

⁷ Mu lemnag Eli ni prist nib tolang nu Israel. De llowan’nag pi fak ni pumoon ni, Hophni nge Phinehas, ni yow e pi prist ko fare tabernacle. Bochan de gaman u wan’row e f’oth rorow u reb e maligach nrogon ni be yog e Motochiyel rok Got, kar rognew ngak reb e tapigpig ni nge ning e ufin ni kakling ngak e en be pi’ e maligach u m’on ni ngan urfeg e mam riy u daken e altar. Pi fak Eli e ku kar kolew fapi ppin ni yad be pipgpig u langan e mab ko fare tabernacle. Yugu aram rogon, ma de chuweg Hophni nge Phinehas ko maruwel rorow, ya kemus ni i puwan’ ngorow nib war. (1 Samuel 2:12-29) Ere arfan ni “ri buchuuw e thin ni ma yib i yog Somol e re ngiyal’ i n’em”! (1 Samuel 3:1) Piin piilal ni Kristiano e thingara kol ayuwgad ni dabra paged e gol ni de puluw nrayog ni nge kirebnag rarogon e ulung ko tirok Got. Gol nib riyul’ e dabi pag e thin nib kireb nge ngongol nib togopuluw ko kenggin e motochiyel rok Got.

8. Uw rogon ni dag Jesus e gol nib riyul’?

⁸ Jesus Kristus ni ir e gadad ma fol rok, e de dag e gol ni de puluw. Ke dag ni rib fel’ rogon ni ma dag e gol nib riyul’. Ni bod ni, ‘kari runguy e girdi’ ya bod ni gowa kan fathiy e yalach rorad ma kan n’agrad ni bod e saf ndariy e en ma gafaliyrad.’ Girdi’ nib yul’yul’ gum’ircharad e dara rusgad ni nguur chuchugurgad ngak Jesus, maku yad ma fek e pi bitir rorad i yib ngak. Mu lemnag e gol nge wurengan’ ni dag u nap’an ni “ulnguy Jesus fapi bitir ngak me tay pa’ nga dakenrad, ni aram e ke yibilayrad.” (Matthew 9:36; Mark 10:13-16) Yugu aram rogon nib gol Jesus, machane ba mudugil laniyan’ ko tin nib mat’aw u owchen e Chitamangin u tharmiy. Ri der ma fek Jesus owchen ko kireb; ya bay gelngin ni pi’ Got ngak ni nge puwan’ ngak e pi tayugang ko teliw ni yad be dake moding. Rogon ni yog ko Matthew 23:13-26, ma boor yay ni sul u daken ni gaar: “Kam gafgowgad, fapi scribes nge farise, ni gimed be dake modingniged gimed!”

Gol nge Boch e Pi Felngin Got

9. Uw rogon ma gol e ba peth ko gum’an’ nge fel’ ngak e girdi’?

⁹ Gol e ba peth ko fapi felngin ni kan ni thothup rok Got e ke sunmeg. Kan ta’ nga thilin e “gum’an’” nge “fel’ ngak e girdi’.” Tin riyul riy, e be’ ni be maruweliy e gol e be dag e re felngin ney u daken e gum’an’. Ba gum’an’ ni mus ngak e piin ni de gol. Gol e ba peth ko fel’ ngak e girdi’ ya bochan baga’ ni yima dag e ayuw ni fan ku boch e girdi’ riy. Yu ngiyal’, fare thin ni Greek ni kan fanay u lan e Bible ni fan ko “gol” e kan thiliyeg ni “fel’ ngak e girdi’.” Rogon nni dag e re felngin ney u fithik’ e piin Kristiano kakrom e kari gin e piin gathi yad piyu Jew ngay ma arfan ni rogon ni yog Tertullian, ni piin kar folgad rok Jesus e yad e ‘girdi’ nib gol e ir felngin nrib gagiyel u fithik’rad.’

10. Uw rogon nib peth e gol nge t’ufeg?

¹⁰ Bay e peth u thilin gol nge t’ufeg. Murung’agen e pi gachalpen, e yog Jesus ni gaar: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:35) Murung’agen e re t’ufeg ney, e yog Paul ni gaar: “T’ufeg e ba gum’an’ mab gol.” (1 Korinth 13:4, NW) Gol e ku ba peth ko t’ufeg ko fare bugithin ni “t’ufeg nib yul’yul’,” ni baga’ ni yima fanay u lan e Bible. Ireray e gol ni sum ko t’ufeg nib yul’yul’. Fare bugithin ni Hebrew ni kan thiliyeg ni “t’ufeg nib yul’yul’” e gathi kemus ni runguy e ba muun ngay. Ireray e gol ni kan puthuy ko ban’en nge mada’ ko ngiyal’ ni ra lebug e n’en ni yibe nameg riy. Gol rok Jehovah ara t’ufeg nib yul’yul’, e kan dag u boor e kanawo’. Ni bod ni, rayog ni ngan guy e re n’em u nap’an ni yibe ayuweg e yafas ko girdi’ ngu nap’an ni yira yororiy.​—Psalm 6:4; 40:11; 143:12.

11. Mang e ke micheg e t’ufeg nib riyul’ rok Got ngodad?

¹¹ Gol rok Jehovah e ra k’aring e girdi’ ngar chuchugurgad ngak. (Jeremiah 31:3) Nap’an ni ra t’uf e ayuw ko pi tapigpig rok Got, ma yad manang ni ra dag e t’ufeg nib yul’yul’ ngorad. Dabi pag ni dabi ayuwegrad. Arfan, ni rayog ni ngar meybilgad u fithik’ e pagan’, ni bod e n’en ni rin’ fare psalmist me yog ni gaar: “I gag, e be pagan’ug ko t’ufeg rom nib yul’yul’; mpag nge felfelan’ gum’irchaeg ko ayuw rom.” (Psalm 13:5, NW) Bochan ni t’ufeg rok Got e ba yul’yul’, ma arfan ni pi tapigpig rok e rayog ni ngara pagedan’dad ngak ni polo’. Kan micheg ni gaar: “Dabi digey Jehovah e girdi’ rok, maku dabi digey e tirok ban’en.”​—Psalm 94:14, NW.

Mang Fan ni Girdi’ nu Fayleng e Ri Dariy e Runguy Rorad?

12. Wuin ma uw rogon ni tabab e gagiyeg ni ma magawonnigey?

¹² Fulweg ko re deer ney e ba peth ko n’en ni buch u milay’ nu Eden. De n’uw nap’an nga tomren ni tabab chepin e girdi’, ma reb e engel e ke mang be’ nib siin ma ba tolngan’ e ke tabab ni nge lemnag ni nge gagiyegnag e fayleng. Bochan e i nameg ni nge mang en tagagiyegnag “e re fayleng ney,” ni ri be magawonnag e girdi’. (John 12:31) Ma kan nang ni ir Satan ni fare Moonyan’, ni pilungen e togopuluw ku Got nge girdi’. (John 8:44; Revelation 12:9) Tin ni i lemnag u fithik’ e lem nib siin ni nge tababnag e gagiyeg nib tagengin ko gagiyeg rok Jehovah u fithik’ e gol e kan nang de n’uw nap’an u tomren ni kan sunmiy Efa. Arfan, ni gagiyeg nib kireb e ke tabab u nap’an ni mel’eg Adam fare kanawo’ nib dar ko gagiyeg rok Got, ni be siyeg e gol Rok Got ni polo’. (Genesis 3:1-6) Gathi riyul’ ni yow e kar gagiyegnigew yow, ya ke par Adam nge Efa u tan gelngin fare Moonyan’ nib siin mab tolngan’, kar parew u tan e gagiyeg rok.

13-15. (a) Mang boch ban’en ni buch nbochan ni dan fol ko gagiyeg rok Jehovah nib mat’aw? (b) Mang fan ni re fayleng ney e ke mang tagil’ e maangach?

¹³ Ngada lemnaged e n’en ni buch nbochan e n’en ni kar rin’ew. Kan chuweg Adam nge Efa u bochi yang u fayleng ni aram fare paradis. Ke thil e par rorow ni som’mon e kar parew ko gin boor e yasay riy nge wom’engin e gek’iy nra ayuweg e dowef rorow min tayrow nga wuru’ fare milay’ nu Eden nib mo’maw’ e par riy. Ke yog Got ngak Adam ni gaar: “Kam fol rok leengim kam koy wom’engin fare ke gek’iy ni gog ngom ni dab mu koy. Ere bochan e tin ni kam rin’ ma aram e nge kireb e but’. Ma n’umngin nap’an e yafos rom ni bay um maruweliy e but’ nib gel nge yog ni pi’ e ggan ngom nib gaman, ma bayi tugul e pan ni ba’ rachngalen nge pan nib kireb ni bocham, ma bay um koy e woldug nu mapan.” Thin ni yog murung’agen e but’ e be yip’ fan ni rogon ni ngan fal’eg e milay’ e rib mo’maw’. Thin ni ka nog u murung’agen e but’, ni nge tugul e pan riy ni bay rachangalen nge pan nib kireb e kari gafgownag e piin ni owchen Adam ma arfan ni chitamangin Noah, i Lamech, e ke yog murung’agen e ‘amith u pa’rad nbochan e but’ ni ke bucheg Jehovah waathan.’​—Genesis 3:17-19; 5:29.

¹⁴ Maku ke thiliyeg Adam nge Efa e par nib gapas ke mang par nib gafgow. I yog Got ngak Efa ni gaar: “Bay gu yoornag e gafgow rom ko ngiyal’ ni kam diyen, mu gu gelnag e amith ngom ko ngiyal’ ni ngam gargel; machane bay um par ni ka ga be yim’ ni bochan e pumoon rom, ma bayi par ni ir e suwon gur.” Tomur riy, ma Cain, ni fak Adam nge Efa ni bin nganni, e ke dag e ngongol ni ri dariy e runguy me li’ Abel ni walagen ngem’.​—Genesis 3:16; 4:8.

¹⁵ “Fare fayleng ni polo’ e be par u tan gelngin faanem nib kireb,” ireray e n’en ni yog John ni apostal. (1 John 5:19) Ni bod e en be gagiyegnag, ma fare fayleng e chiney e be dag e ngongol nib kireb nib muun ngay e ngongol nib siin nge tolngan’. Arfan ni kari sug ko ngongol ni maangach nge dariy e runguy! Machane dabi par ni aram rogon u gubin ngiyal’. Ra gagiyegnag Jehovah nge mudugil ni gol nge wurengan’, e ra gagiyel u tan gil’ilungun ma gathi ngongol ni maangach nge dariy e runguy.

U Tan Gil’ilungun Got Ma Ra Gagiyel e Gol

16. Mang fan ni gol e ir pow ko gagiyeg rok Got u daken Kristus Jesus, ma mang e thingarda rin’ed nbochan e re n’ey?

¹⁶ Jehovah nge faen kan dugliy ni nge mang Pilung ko Gil’ilungun, ni Kristus Jesus, e kar ningew chilen ngak e girdi’ rorow ni ngan nangrad nibochan ni yad ba gol. (Mikah 6:8) I dag Jesus Kristus ngodad e n’en ni rayog ni ngad guyed nib m’on ni ra dag ko uw rogon ma fare am ni ke pag e Chitamangin fan ngak e yira nang nbochan e gol. (Hebrews 1:3) Rayog ni ngan nang e re n’ey ko thin rok Jesus ni be tamilangnag u wan’ e pi tayugang ko teliw ni googsur, ni yad be pi’ ngak e girdi’ e n’en nib tomal ma be gafgownagrad. Me yog ni gaar: “Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed. Mfeked e mat’ rog ngam tiyed nga pomed, mi gimed folwok rog, ya gub munguy ma gub sobut’an’; mi gimed pirieg e toffan. Ya re mat’ ni gu ra pi’ ngomed e mmom, ma tomalngin e re n’en ni gu ra tay nga pomed e bbaud.” (Matthew 11:28-30) Ri boor e pi tayugang ko fayleng, ni aram e pi tayugang ko teliw ara yugu reb, e yad be chachalbannag e girdi’ nbochan e motochiyel nib tomal ma dar ma pining e magar ngorad. Machane, tin baadag Jesus ni nge rin’ e pi gachalpen e ra gamaneg e n’en nib t’uf rorad ma rayog rorad. Reb e mat’ eram ni ri ma baudeg lanin’uy ma kub gol! Dan k’aringdad ni ngada boded ir nrogon ni ma gol ngak yug boch e girdi’?​—John 13:15.

17, 18. Mang fan ni rayog ni ngad pagan’dad ni piin ni ra un ngak Kristus ko gagiyeg u tharmiy nge piin ni owchen u roy u fayleng e yad ra dag e gol?

¹⁷ Thin ni yog Jesus ngak e pi apostal rok e be tamilangnag ko uw rogon nib thil Gil’ilungun Got ko gagiyeg rok e girdi’. Yog e Bible ni gaar: “Me maluag thin pi gachalpen Jesus ko mini’ e arorad [pi gachalpen] ni ir e ngar tiyed nib tolang u fithik’rad. Me gaar Jesus ngorad, “Pi pilung nu roy u fayleng e baga’ lungurad u puluwon e girdi’ rorad, ma piin ni yad ma gagiyegnag e girdi’ e yima yog ni yad e tafager rok e girdi’’. Machane gimed e gathi ara’ rogon ni ngam pired; ya en ni ir e th’abi tolang e fithik’med e thingari par ni bod rogon e en th’abi bitir u fithik’med, ma cha’ ni ir nge yog e thin romed e thingari par ni bodrogon e en tapigpig. I mini’ e baga’, en ni ke par nga but’ ni nge abich fa en ni be fek’ e ggan ngi i pi’ ngak? Mmudugil ni faanem ni ir e ke par nga but’. Machane gag e tapigpig ni gu bay u fithik’med.’”​—Luke 22:24-27.

¹⁸ Girdi’ ni tagagiyeg e yad be athamgil ni ngar ga’gad ni aram e yad be rin’ ko “gagiyegnag e girdi’ ni bod e sib” nge yad be gay e liw nib tolang ni faan gowa pi liw nem e ra fal’eg rad ngar fel’gad ko piin yad be gagiyegnagrad. Machane ke yog Jesus ni tolang ni riyul’ e ma yib ko pigpig ni yima ta’ ngak boch e girdi’​—ni dabni tal ni ngaun athamgil ni nguun pigpig ngak boch e girdi’ u fithik’ e pasig. Urngin e piin ni ra un ngak Kristus ko gagiyeg u tharmiy ara piin nra mang owchen u roy u fayleng e thingara athamgilgad ngar folgad ko n’en ma rin’ ni aram e sobutan’ nge gol.

19, 20. (a) Uw rogon ni dag Jesus feni ga’ e gol rok Jehovah? (b) Uw rogon ni ngad folwokgad rok Jehovah rogon ni nguun gol?

¹⁹ Ngada yaliyed boch e fonow ni i pi’ Jesus u fithik’ e t’ufeg. Be dag feni ga’ e gol rok Jehovah, me yog Jesus ni gaar: “Faanra ke mus ni girdi’ ni gimed ba t’uf rorad e yad bat’uf romed, ma mang ni gimed be finey nra fal’eg Got waathmed riy? Yi mus ngak e piin ni yad ba ta denen ma ba t’uf rorad e piin ni yad ba t’uf rorad? Ma faanra ke mus ni piin ni yad ma rin’ e tin nib fel’ ngomed e ngam rin’ed e tin nib fel’ ngorad, me ere mang ni gimed be finey nra fal’eg Got waathmed riy? Yi mus ngak e piin nib tadenen ma yad ma rin’ ni er rogon! Faanra yib be’ i ning ban’en ngak bigimed ni nge maruwel ngay nge mu’ me fulweg, me pi’ ngak ni bochan e manang nra fulweg faanem ngak’ me ere mang ni gimed be finey nra fal’eg Got waathmed riy? Mus ko piin ntadenen ma yad ma pi’ ban’en ngak e piin ntadenen ni fan e yad manang ni rogon oren e tin nra pied e aram urngin e tin ni bay ni fulweg ngorad! Aram e danga’! Nge t’uf romed e pi toogor romed mi gimed rin’ e tin nib fel’ ngorad; ra ning be’ ban’en ngomed ni nge maruwel ngay mi gimed pi’ ma dab mu lemniged ban’en ni nge pi’ riy ngomed. Ya bay labgen ni baga’ nra fulweg Got ngomed, ma gimed pi fak Got ni ir e Tha’bi Tolang. Yi Got e ba gol ngak e piin ndarir pininged e magar ngak nge piin nib kireb. Ere um runguyed e girdi’, ni bod rogon e Chitamangimed ni ma runguy e girdi’.”​—Luke 6:32-36.

²⁰ Gol ni yib rok Got e de siin. Dariy ban’en ni ngan pi’ ngay ni puluwon maku dariy ban’en ni ngan sulweg ntaban. Jehovah rib gol ya be mateg “ramaen e yal’ rok nga daken e girdi’ nib tagan nge girdi’ nib fel’ ntaareb rogon, ma be pi’ e n’uw ngak e piin ni yad be rin’ e tin nib mat’aw nge piin ni yad be rin’ e tin nib kireb.” (Matthew 5:43-45; Acts 14:16, 17) Gad ra fol rok e Chitamangidad nu tharmiy, e gathi kemus ni dabda kirebnaged e piin ni dar ma pining e magar ya nguud rin’ed e tin nib fel’ ngorad, ni mus ngak e piin ni ma cham ngodad ni yad e toogor. Gad ra dag e gol, ma gad be dag ngak Jehovah nge Jesus ni gad baadag ni ngad pared u tan gil’ilungun Got, ko ngiyal’ ni gol nge ku boch e pi felngin Got e ra par ni bay e tha’ u thilin urngin e girdi’.

Mangfan ni Thingar Uda Daged e Gol?

21, 22. Mang fan ni thingarda daged e t’ufeg?

²¹ Nge dag reb e Kristiano ni riyul’ e gol e rib ga’fan. Ba gagiyel ni fare kan ni thothup e be maruwel u fithik’dad. Maku, nap’an ni gad ra dag e gol nib riyul’, gad be folwok rok Jehovah Got nge Kristus Jesus. Gol e ku ireray e n’en nib t’uf ni nge dag e piin ni ra mang bang ko Gil’ilungun Got. Ere thingarda t’ufeged e gol ma ngad filed rogon ni ngad daged.

²² Mang boch e kanawo’ nrayog ni ngad daged e gol riy u gubin e rran ko yafas rodad? Bin migid e article e ra weliy e re kenggin nem.

Uw Rogon ni Ngam Pi’ e Fulweg?

• Be mang e gol?

• Mang fan ni fayleng e gin ni dariy e runguy riy mab maangach?

• Uw rogon ni gad ra nang ni gol e ra par u tan e gagiyeg rok Got?

• Mang fan ni ngan dag e gol e baga’ fan ko piin ni yad baadag ni ngara pared u tan Gil’ilungun Got?

[Picture on page 7]

Piin ni piilal ni Kristiano e yad be athamgil ni ngar golgad rogon ni ma rin’ ban’en ngak e ulung

[Picture on page 9]

T’ufeg nib yul’yul’ rok Jehovah e dabi pag e pi tapigpig rok ko ngiyal’ nib mo’maw’ e par riy

[Pictures on page 10]

Jehovah rib gol ni ke pag e yal’ be mat nge n’uw ni be aw nga daken urngin e girdi’