Thingar Mu Un nga Barba’ e Teliw Fa?

‘DE T’UF ni ngar gu un nga barba’ e teliw ara ngagu wan nga ugu un ko muulung ni gubin ngiyal’ ni bochan ni nge mich Got u wan’ug!’ Boor e girdi’ ni ma lemnag ni aram rogon ni gathi ngari un nga barba’ e teliw ara reb e ulung ko teliw. Riyul’, ya bochi yad e yad ma yog ni yad ma thamiy ni kar chuchugurgad ku Got u nap’an ni yad ba’ u wen ni yad ba falan’ ko pi n’en ba’ u wen i yan ko bin ngaur uned ko ngongolen e teliw. Chiney, e ke ga’ ni yibe lemnag ni ngan mang nga barba’ e teliw ara reb e ulung e gathi kab ban’en ni kab t’uf ni fan ko michan’ ngak Got.

Machane, boch e girdi’, e riyul’ nib thil rogon ni yad be lemnag. Yad be yog nib t’uf ma baga’ fan ko yafas ni ngan un ko teliw, mu uni un ko muulung e rib ga’fan, ni faanra nge fel’ be’ u wan’ Got. Bochan nib thilthil ni yibe lemnag ma aram e fare deer ko ba t’uf ni ngan un ko teliw fa danga’ e ban’en ni rriyul’ ni ban’en ni baga’ fan ngak be’ nge be’ gathi kemus nib ga’fan ngak e piin ni yad be fil murung’agen e teliw. Demtrug rogon, ma bochan ba muun ngay e tha’ u thildad Got, me ere gathi ba puluw ni ngada nanged ko uw rogon e lem rok Got ko re n’em? Ere, mang, e rayog ni ngada filed ko Thin rok, ni fare Bible, u rogon e re n’ey?

Rogon e N’en ni I Rin’ Got ko Girdi’ Kakrom

Ke chugur i 4,400 e duw ni ke yan, meb e ran nib tomgin ma ba gel e gafgow riy nge tharey e fayleng ni polo’. Ban’en ni aram rogon e ba mo’maw’ ni ngan pagtalin, ma girdi’ u ga’ngin e fayleng e bay e yat riy rorad ko som’mon ko chep rorad. Yugu aram rogon nib thilthil rogon, ma pi yat ney e boor ban’en riy nib taareb, ni ba muun ngay fare n’en ni rin’ in e girdi’ nge boch e gamanman e ra magaygad nib fas.

Gur piin ra magaygad ko fare ran ni tharey e fayleng e kemus ni bochan e ba fel’ e wol rorad ni ke yog ni ngar thaygad ko magothgoth? N’en ni ba’ ko Bible e be dag ni gathi aray rogon. N’en nib fel’ ni ngan lemnag e, Got e de yog ngak be’ nge be’ murung’agen fare Ran ni bay yib. Ya rogon riy, e i yog ngak Noah, ni aram e ir e ginang e piin ni yad ba’ e ngiyal’ nem ko fare Ran nib ga’ ni yib.​—Genesis 6:13-16.

Ra ngam fas ma ra yan u rogon ni gur bang ko re ulung ney ni yad ba chuchugur ma nge m’agan’um ngay ni ngam adag e fonow rok Got ni kan pi’ ngak Noah. Ki mada’ko gamanman u lan fare arke e ra magaygad ni dar m’ad ko fare Ran ni bochan ni yad bang ko re ulung ney. Rib tamilang rogon e pi n’en nnog ngak Noah ni nge rin’ ni nge fel’ rogon e yaram ni nge ta’ nge ayuweg ni dabi math mit e gamanman.​—Genesis 6:17–7:8.

Bokum miriay e duw nga tomuren, ma piin ni yib rok Noah ni yib rok fak ni pumoon ni Shem e ra manged kalbus u Egypt. Machane, n’en nib m’agan’ Got ngay e nge chuwegrad u rom nge fekrad i yib ko fare nam ni ke micheg ngak e chitamangirad i Abraham. Ku biyay, re n’ey e ku da nog ngak e girdi’ ni be’ nge be’ ya som’mon mi nog ngak e piin kan mel’eg ni nge mang mit e thin rorad ni​—Moses nge walagen ni pumoon ni, Aaron. (Exodus 3:7-10; 4:27-31) Tomuren ni kan pag e tin som’mon e sib ni ba ulung u Egypt, min pi’ e Motochiyel rok Got ngorad ko Burey nu Sinai mini fal’eg rogorad ngar manged nam nu Israel.​—Exodus 19:1-6.

I yog ni un ayuweg yu Israel ni tataabe’ ni kemus ni bochan ni yad ba chagil nga ba ulung ni sunmiy Got mu ur folgad ko fonow ko piin ni mit e thin ko re ulung ney ni kan dugliyrad. Ma kuni pithig rogon piyu Egypt ni be’ nge be’ ni ngar chaggad ko re ulung ney nib gagiyel nib fel’ u wan’ Got. Nap’an ni chuw yu Israel u Egypt, me un e pi cha’ ney ngorad, ma aram e kar ted yad ko gin ni ra i yog riy ngorad e taw’ath rok Got.​—Exodus 12:37, 38.

Ma aram e, bin som’mon e chibog, me tababnag Jesus e maruwel rok ni machib, me ulunguy e girdi’ nga taabang ni ngar manged pi gachalpen. N’en ma rin’ ngorad e ma rin’ ni yad ba ulung, machane ku ma lemnag be’ nge be’ u fithik’ e t’ufeg ni rogon nib t’uf rorad. I yog Jesus ngak fa 11 i apostal nib yul’yul’, ni gaar: “Urngin e gafgow ni yib ngog ma mpired rog nda mpaged gag; e re rogon ni ke pi’ e Chitamag mat’awug ngog ni ngug gagiyeg, e aram e n’en ni bay gu rin’ ngomed.” (Luke 22:28, 29) Me n’uw boch nap’an, me yib e kan ni thothup nga daken pi gachalpen u nap’an ni yad ba’ u taabang ni yad ba ulung.​—Acts 2:1-4.

Pi ngongol ney e ke dag nib tamilang ni kakrom e gubin ngiyal’ ma ma rin’ Got ban’en ko girdi’ rok ni ba ulung nib yaram. Fa in ni girdi’ ni i rin’ Got ban’en ngorad ni bagayad nge bagayad e​—Noah, nge Abraham, nge Moses, nge ku boch e girdi’ e—​yad, e riyul’, ni i fanayrad Got ni nge non ngak ba ulung ni yad ma par nib fel’ thilrad. Dariy rogon ni nge mich u wan’uy ni tin be rin’ Got ko pi tapigpig rok e chiney e ba thil rogon. Riyul’, ni re n’eney e ku ra yibnag reb e deer ni gaar: Yira un nga reb e ulung ko teliw ni yugu demtrug mab fel’ fa? Gad ra lemnag e re deer ney nib ga’ fan ko bin migid e article.

[Picture on page 4]

Got e ke n’uw nap’an ni ma rin’ ban’en ko girdi’ rok ni ba ulung