Bin Ngan e Teliw e Thingar Mu Mel’eg?
‘TELIW nib thilthil e kemus ni yu pa’ i kanawo’ nib thilthil ni be yan nga taab ban’en. Ma bin riyul’, e ri taareb e Got ni bay, fa gathi arrogon?’ Re thin nem e boor e girdi’ ni yad ma lemnag ni yugu aram rogon nib ga’ fan ni ngam un nga barba’ e teliw, ma gathi rib ga’ fan ko ba ni ngan e teliw e ra mel’eg be’ ni nge un ngay.
Som’mon ni yira lemnag, ma re thin ney e ba dake ba puluw, ya riyul’ ni taareb e Got ni bay, nib Th’abi Gel. (Isaiah 44:6; John 17:3; 1 Korinth 8:5, 6) Machane, dabiyog ni dabda sapgad ko pin’en nib thil riy nib gagiyel—ni mus ni ki mada’ ko der taareban’—e yuraba’ i teliw ni yad be yog ni yad be pigpig ko bin riyul’ e Got. Rib ga’ e thil ko ngongol rorad, michan’ rorad, nge n’en ni yad ma fil, nge n’en nib t’uf ni ngar rin’ed. Rib gel e thil riy ya ra boch e girdi’ ni yad nga barba’ e teliw ara reb e ulung ma ba mo’maw’ ni ngar nanged fan ara ra adaged e n’en ni be fil baraba’ ara nge mich u wan’rad.
Maku reb, e yog Jesus ni gaar: “Yi Got e Kan, ma piin ni ngar meybilgad ngak e thingara meybilgad ngak u daken e ayuw ko kan ni thothup ngu fithik’ e tin riyul’.” (John 4:24) Gur liyor ngak Got u fithik’ e yul’yul’ e rayog ni boor ban’en ni dar taareban’uy ngay u murung’agen ko mini’ Got, ma mang e pi n’en nib m’agan’ ngay, nge rogon ni nguun liyor ngak? Gur ba puluw ni nge mich u wan’uy ni de ga’ fan rok Got ni Th’abi Gel Gelngin ko uw rogon ni ngad liyorgad ngak?
Tin Riyul’ e Kristiano ko Bin Som’mon e Chibog nge Chiney
Kristiano ko bin som’mon e chibog e yu ngiyal’ ma der ma taareb e lem rorad u murung’agen boch ban’en. Ni bod rogon, i non apostal Paul ngak piyu Korinth, ni gaar: “Gimed pi walageg, ba’ boch e girdi’ ni girdien e tabinaw rok Kloe ni ka rogned ngog nib tamilang ni gimed be maluag thin ni baara’ rogon: ra bigimed ma be yog ban’en nib thil. Be’ e ke gaar, ‘I gag e gub muun ngak Paul’; ma be’ e ke gaar, ‘I gag e gub muun ngak Apollos,’ ma be’ e ke gaar, ‘I gag e gub muun ngak Peter,’ ma be’ e ke gaar, ‘I gag e gub muun ngak Kristus.’”—1 Korinth 1:11, 12.
Sap Paul ko pi n’eney nib thilthil ni yugu de ga’ fan? Nge ra be’ mi i lek e birok e kanawo’ u rogon min thap ku Got? Ri danga’! I ginangey Paul ni gaar: “Gu be wenig ngomed, pi walageg, ni Jesus Kristus ni ir e Somol rodad e ke pi’ mat’awug ni be lungug: nge taareban’med ni gimed gubin ko tin ni gimed be weliy, ma aram dabiyog ni ngam yoor raba’gad; mi gimed par ni gimed ba taareb ma taab pa’ lanin’med ma taab ban’en e gimed be nameg.”—1 Korinth 1:10.
Riyul’, ni ra nge taareb e michan’ ma dabiyog ni ngan rin’ ko towasar. Kemus ni rayog ni faanra nge be’ mange fal’eg i gaweg murung’agen boch ban’en ngan pirieg min adag taa ban’en. Arfan, ni nge be’ mi i fil e Thin rok Got ni ir rok ma lem ni riyul’ ni yi baadag ni ngan rin’ e tin kan fil e aray e pi n’en ngan rin’ ni rib ga’ fan min falfalan’ ko re miti taareban’ ni ba aram ni be yog Paul. Rayog nni pirieg e binem e taareban’? Bod ni kad guyed ko som’mon, Got e gubin ngiyal’ ni ma rin’ ban’en ko girdi’ rok ni reb e ulung. Rayog ni ngan poy e re ulung nem e chiney fa?
Felngin e Chagil nib Mat’aw
Fare psalmist ni David e fith biyay ni gaar: “A Jehovah, mini’ e an ra yib nga lan e tento rom? Mini’ e ra par ko burey rom nib thothup?” Re deer n’em e rra bit nga gum’irchaey. I pi’ David e fulweg ko re deer nem ni gaar: “Cha’ ni ma yan ni dariy kirebun ma ma rin’ e tin nib mat’aw ma ma yog e tin riyul’ ni ba’ u gum’ichaen.” (Psalm 15:1, 2, New World Translation) Yira nang fan e Bible nib fel’ rogon ma ra yog riy ngak be’ ni nge pow rok e raba’ i teliw ni be rin’ e pi n’en ni be yog Got ni ngan rin’. Ma aram e, faanra un chag ko re ulung nem, ma ra yog ku be’ ni nge chag ko girdi’ ni yad ma liyor ku Got u taabang ngo “daken e kan ni thothup ngo fithik’ e tin riyul’.”
Pi Mich rok Jehovah e kar daged ni rayog ni nge yog e taareban’ ko michan’ nge ngongol ni ki mada’ko chiney ni der taareban’uy u fayleng. Bay u fithik’rad boch e girdi’ ni ur moyed ni yad girdien bokum miriay e teliw nib thilthil nge yuraba’ e girdi’. Boch e Pi Mich e ur moyed ni ma maruwar u wan’rad ko bay Got fa yad ma lemnag ni dariy e Got. Maku boch e girdi’ e yu gathi e ri yad ma lemnag nib gel rogon e teliw. Pi n’eney ni teliw nib thilthil, nge yalen, nge llowan’ e keb e girdi’ riy ni chiney e yad be falfalan’ ko taareban’ ko teliw ni danir guy u lan e fayleng e chiney.
Kenggin fare taareban’ e Thin rok Got, ni fare Bible. Riyul’, ni Pi Mich rok Jehovah e yad manang ni dabiyog ni ngar towasariyed nga rogned ngak boch e girdi’ e n’en ngar rin’ed. Machane yad be falfalan’ ni be yog ni ngaura pi’ed e athamgil nga laniyan’ boch e girdi’ ni ngar filed e Bible ni bochan ni nge yog ni ra mel’eged e re mit i liyor nib puluw ko re def nem nib gel. Biney e kanawo’, e ku ra yoor e girdi’ ni rayog boch fapi felngin ko liyor ni yibe ta’ ngak Got u “daken e kan ni thothup ngo fithik’ e tin riyul’.”
Ottmar e ke riyul’nag e biney e lem. Ni chuguliy u ba tabinaw ni ba Katolik u Chiyamen, de n’uw nap’an me pag e yan nga galesiya. I yog ni gaar: “Gubin ngiyal’ ni gu ra un nga galesiya, ma gu ra yib nga wen ma ka ba’ ban’en ni gube thamiy ni dariy rog ni ka bod rogon ko ngiyal’ ni gu wan nga naun.” Machane, ka be par nib michan’ ngak Got. Ma ra mada’gad e Pi Mich rok Jehovah me mich u wan’ ni yad e tin riyul’ e tapigpig rok Got. Me gu’ nib t’uf ni nguun chag ngorad. Ere chiney e ke gaar: “Gu be par ni gub pasig u lan ba ulung ko fayleng ni gaangin, gu be falan’ ko gapas ko lem rog nge gum’irchaeg. Yibe ayuwegeg i yan ni nge yog ngog e tamilangan’ nu Bible nib puluw. Ni aram ban’en ni rib ga’ fan ngog.”
Ba Pong ni Fan Ngak e Piin ni Yad Be Gay
Pi Mich rok Jehovah e yad ma fil e Bible ngak e girdi’ ni dariy puluwon ni nga ra ayuweged i yan ngar nanged fan e tin toar i fan e tin be yog Got ni ngan rin’. Fa binem e duw, ma gonapan, 5,726,509 e piin ma fol Bible ni tataabe’ ara boch e ulung u reb e wik. Re fonow nu Bible ney e ke ayuweg bokum milyon e girdi’ ni nge yog ngorad e def nib gel ni ngar dugliyed e liyor rorad nga daken. Yibe piningem ni ngam fil e tin ba t’uf rok Got ni bod ni kan ta’ nga Bible. Ma aram ma rayog ni ngam dugliy lanin’um.—Efesus 4:13; Filippi 1:9; 1 Timothy 6:20; 2 Peter 3:18.
Faanra ga baadag ni ngam falan’nag Got, ma baga’ fan ni ngam un ko teliw—machane gathi yugu demtrug e raba’ i teliw. Bat’uf rom ni ngam mel’eg e teliw ni ga be puluwnag ko tamilangan’ nu Bible nib puluw, ma gathi nga daken e n’en ni dabiyog i micheg ara n’en ni kam rungaag ni ke yog be’ ngom ni ke yog e Bible. (Proverbs 16:25) Mu fil e tin ba t’uf ni fan ko bin riyul’ e teliw. Ma ga taarebnag ko tin nib mich u wan’um. Ma aram rogon ni ngam mel’eg.—Deuteronomy 30:19.