Mu Pagan’um Ngak Jehovah, Ma Dab Mu Rus

“Mu pagan’um ngak Somol! Nge michan’um ngak, dabi mulan’um. Mu pagan’um ngak Somol!”​—PSALM 27:14.

1. Uw feni ga’ fan e athap, ma uw rogon ni kan fanay e re thin ney u lan e Bible?

BIN nriyul’ e athap e bod mmagal nib ga’ ramaen. Ma ayuwegdad ni ngad sapgad nga m’on u fithik’ e pi gafgow ni ma yib ngodad mad mada’naged e pi n’en ni bay nga m’on ni dab da rusgad ma gad ba felfelan’. Kemus ni Jehovah e rayog ni nge micheg ngodad e bin nriyul’ e athap, ni ma pi’ ni bay u lan e Thin rok ni ke thagthagnag. (2 Timothy 3:16) Tin nriyul’ riy, ma fare thin ni “athap,” “kan athapeg,” nge “yibe athapeg” e ke m’ug ni 160 yay u lan e Bible ma be sor fan ko n’en ni yibe nameg nib fel’ nge n’en ni bay ko re n’em ni yibe nameg.a Mit ney e athap e ka ba ga’ fan nga ban’en ni ka nim’ ni bochan, ni dabiyog ni nge yog ngak be’.

2. Mang e n’en ni rin’ e athap ko yafas rok Jesus?

² I sap Jesus nga m’on me pagan’ ngak Jehovah, u nap’an ni ke mada’nag e skeng nge boch ban’en nib mo’maw’. ‘Bochan e felfelan’ ni be sonnag ma daki tafinaynag e tamra’ nra tay ko yam’ ni nge tay u daken fa ley i gek’iy, me ere chiney e ke par nga but’ u ba’ ni mat’aw rok Got u tagil’ Got.’ (Hebrews 12:2) Bochan ni yiluy e changar rok ko fare n’en ni nge tamilangnag feni tolang Jehovah me thothupnag Fithingan, ma de pag Jesus ni nge daki fol ku Got, nyugu demtrug e n’en nra buch rok.

3. Mang e ma rin’ e athap ko yafas ko pi tapigpig rok Got?

³ I weliy David ni Pilung e tha’ u thilin e athap nge dabin rus, ni gaar: “Mu pagan’um ngak Somol! Nge michan’um ngak, dabi mulan’um. Mu pagan’um ngak Somol!” (Psalm 27:14) Faanra gad ba adag ni ngad pared nib gel, ma thingar dab da paged ni nge taathath e athap rodad machane thingar uda ted u lanin’dad ngu gum’irchadad. Faan gad ra rin’ ni aray rogon ma ra ayuwegdad ni ngad boded Jesus ngad daged ni darud rusgad ma gad ba pasig u nap’an ni gad be rin’ fare maruwel ni ke tay chilen ngak pi gachalpen ni ngar rin’ed. (Matthew 24:14; 28:19, 20) Arrogon, be dag e Bible ni ba ga’ fan e athap nge michan’ nge t’ufeg, ma ereray boch e pi fel’ngin ni ma dag e pi tapigpig rok Jehovah.​—1 Korinth 13:13.

Ke “Ilal e L’agan’” Rom?

4. Mang e n’en ni be athapeg e pi Kristiano ni kan dugliyrad nge fare “yugu boch e saf” boch nga m’on?

⁴ Girdi’ rok Got e bay ban’en nib manigil ni fan ngorad boch nga m’on. Pi Kristiano ni Kan Dugliyrad e ri yad be son ni ngar pigpiggad Jesus u taabang u tharmiy, ma fare “yugu boch e saf” e yad be athapeg ni ngar “pired ni gathi yad e sib rok e wod, mi yad un ko flaab [u fayleng] rok pi fak Got.” (John 10:16; Roma 8:19-21; Filippi 3:20) Re “flaab” nem e ba muun ngay e denen ni yira n’ag fan nge pi wenegan nib kireb. Arrogon, Jehovah​—ni Ir e En ni Ke pi’ “urngin e tin nib fel’ nge urngin e tow’ath nrib manigil”—​e ma pi’ e tin nth’abi fel’ e tow’ath ko piin ni yad ba yul’yul’ ngak.​—James 1:17; Isaiah 25:8.

5. Uw rogon ni nge “ilal e l’agan’” rodad?

⁵ Susun uw feni ngari ga’ fan u lan e yafas rodad fare athap ko Kristiano? Kad beeged u Roma 15:13 ni: “I Got ni ir e ma pi’ e l’agan’ e nge suguymed ko felfelan’ nge gapas u daken e michan’ romed ngak, nge yog ni i ilal e l’agan’ romed ngak u gelngin fare Kan ni Thothup.” Arrogon, rayog ni ngan taareb rogonnag e athap ko ramaen e yal’ ni kakadbul, ni ke sugnag e yafas ku be’ ko gapas, felfelan’, me yibnag fan e yafas me ayuwegdad ni nge dab uda rusgad. Dab da paged talin ni ra “ilal e l’agan’” rodad u nap’an nra mich u wan’dad e Thin Rok Got me yib e kan ni thothup rok ngodad. Be yog e Roma 15:4 ni gaar: “Ya urngin ban’en nni yoloy nga lan e babyor nib thothup e ni yoloy ni nge fonownagdad, ni bochan e nge yog e l’agan’ ngodad u fithik’ e gum’an’ nge athamgil laniyan’ ni be pi’ e thin ko babyor nib thothup ngodad.” Ere mu fithem: ‘Gu ma tay e athap rog nib fos ma gag reb e ta fol Bible nib fel’, ma gu ma beeg e Bible ni gubin e rran? Gu ma meybil ni gubin ngiyal’ ni nge yib e kan ni thothup rok Got ngog?’​—Luke 11:13.

6. Faanra nge par e athap rodad nib tamilang, ma mang e n’en ni thingar da ayuwgad riy?

⁶ En ni susun ni ngad folwokgad rok, i Jesus, e i yib gelngin e Thin Rok Got ngak. Faan gad ra lemnag Jesus nib fel’ rogon, ma gad ra siyeg ni nge ‘dabi mulan’dad ngad paged gadad.’ (Hebrews 12:3) Ba puluw ni faanra ke taathath fare athap u lanin’dad ngu gum’irchadad ni ke pi’ Got ngodad ara da yiluyed owchedad nga yugu boch ban’en​—sana bod rogon e chugum ara da nameged yugu boch ban’en—​ma ra munmun ma gad malmal ko tirok Got, me war gelngidad ni ngad pared ni ba fel’ e gafarig rodad. Faan gad ra ngongol ni aray rogon, ma rayog ni ngad “kirebniged rogon nib mich Kristus u [wan’dad].” (1 Timothy 1:19) Machane n’en nib thil riy e, bin nriyul’ e athap e ma gelnag e michan’ rodad.

Athap​—Baga’ Fan ko Michan’ Rodad

7. Mang kanawo’ e ba ga’ fan riy e athap ko michan’?

⁷ I yog e Bible ni gaar: “Ra nge michan’dad ma aram e ke pagan’dad ko pi n’en ni ir e ke l’agan’dad ngay, ma ke michan’dad ko pi n’en ndarid guyed nga owchedad.” (Hebrews 11:1) Ere, athap e gathi de ga’ fan, ya ereray bang ko michan’ nrib ga’ fan. Am lemnag Abraham. Faanra nge sap e girdi’ ngay, ma ir nge leengin, ni aram Sarah, e ke pag nap’an ni ngar fakayew e bitir u nap’an ni micheg Jehovah ni yow ra gargeleg be’ ni ra pi’ Got mat’awun’. (Genesis 17:15-17) Mang e n’en ni rin’ Abraham? “Ngiyal’ ni yan i m’ug nsusun e dakuriy rogon ni nge l’agan’ Abraham ko tin ni yog Got ngak, e aram e par Abraham ni kab mich Got u wan’ ma be l’agan’ ko tin ni ke yog Got ngak, ma aram me yog ni mang ‘chitamangin boor e nam’.” (Roma 4:18) Arrogon, athap ni pi’ Got ngak Abraham e gelnag e michan’ rok ni ra pi’ ngak pi fak reb e def nib fel’ rogon. Angin ni yib riy e, michan’ rok e tamilangnag me gelnag e athap rok. Maku de rus Abraham nge Sarah ni ngar digeyew e tabinaw rorow nge girdi’ rorow ngar parew u lan e tento u yugu reb e nam!

8. Uw rogon ma k’adan’ u fithik’ e yul’yul’ e ma gelnag e athap?

⁸ I tay Abraham nib gel e athap rok ma aram me par nib yul’yul’ ngak Jehovah, ni yugu aram rogon nib mo’maw’ ngak. (Genesis 22:2, 12) Taareb rogon, faan gad ra par nib yul’yul’ mad k’adedan’dad ko maruwel ni gad be rin’ ni fan ngak Jehovah, ma rayog ni nge mich u wan’dad ni ra yib labgen ngodad. I yoloy Paul ni “k’adan’” e ma “fal’egdad u wan’ Got,” ni ir e ma yibnag e athap, ma “re l’agan’ ney e dabi m’ing lanin’dad riy.” (Roma 5:4, 5) Ireray fan ni ki yoloy Paul ni gaar: “N’en ni kug m’ad ni bochan e mang e yigi bigimed me par ni be athamgil nge yan i taw ko tomur, nge yog ni yib i m’ug nib riyul’ e pi n’en ni ir e be l’agan’med ngay.” (Hebrews 6:11) Sap ni aram rogon, nib ga’ nga daken e tha’ u thildad Jehovah, e rayog ni nge ayuwegdad ni ngad mada’naged boch ban’en nib mo’maw’ ni dab da rusgad, ma bay e felfelan’ rodad.

“L’agan’ e Nge Ta’med ni Gimed Ba Felfelan’”

9. Mang e rayog ni nguud rin’ed ni gubin ngiyal’ ni ra ayuwegdad ni ngad pared ni “l’agan’ e nge ta’dad ni gadad ba felfelan’”?

⁹ Dariy ban’en ni ma ognag e fayleng nrayog ni ngan taareb rogonnag ko athap rodad ni ke pi’ Got. I yog e Psalm 37:34 ni gaar: “Mpar ni Somol e ke l’agan’um ngak mu um fol ko tin ni ke yog; me pi gelngim ni ngam tafanay e binaw, ma bay mu guy e piin nib kireb ni kan tulufrad kar chuwgad u daken e binaw.” Arrogon, bay fan ni “l’agan’ e nge ta’dad ni gadad ba felfelan’.” (Roma 12:12) Machane, rogon me yog nda rin’ed ni aray rogon e, thingar ud lemnaged e athap rodad ni gubin ngiyal’. Ga ma sap ni gubin ngiyal’ ko fare athap ni ke pi’ Got ngom? Rayog ni ngam guyem ni ga bay u Paradis, ni gab pasig ni bochan e ba fel’ fithik’ i dowam, ma der magafan’um, ma ke liyegem e girdi’ nib t’uf rom, ma ga be un i rin’ e maruwel nib ga’ fan fa? Ga ma fal’eg i lemnag e pi sasing ni yaan e Paradis ni bay u lan e pi babyor rodad? Re yaan ney e rayog i taareb rogonnag nga ba winda nib fel’ rogon e sap riy ni bochan e yima klinnag ni gubin ngiyal’. Ma faan gad ra pag ni dab da klinnaged fa gi therek, ma ra munmun me el e but’ ngay ma dabkiyog ni ngad sapgad riy nib fel’ rogon. Ma aram e ra sor owchedad nga yugu boch ban’en. Mange siy da paged nge buch ni aram rogon!

10. Mang fan ni faan gad ra sap ko fare tow’ath ma ra m’ug nib m’ag rogon ko tha’ u thildad Jehovah?

¹⁰ Arrogon, bin nth’abi ga’ fan ni gad be pigpig ku Jehovah e bochan e t’ufeg rodad ngak. (Mark 12:30) Machane, susun ni ngad sapgad ko fare athap u fithik’ e pasig. Tin nriyul’ riy, e be athapeg Jehovah ni ngad rin’ed ni aram rogon! Be gaar e Hebrews 11:6: “Dariy be’ nra fel’ u wan’ Got ni faanra de mich Got u wan’. Ya en nra yib ngak Got e thingari mich u wan’ ni ba’ Got ma ra tow’athnag e piin ni yad be gayiy Got.” Mang fan ni baadag Jehovah ni ngad sapgad ngak ni ir e En ni Ra Tow’athnagdad? Ya faan gad ra rin’ ni aram rogon, ma gad be dag nri gad manang e Chitamangidad ni bay u tharmiy nib fel’ rogon. Ri ma pi’ ban’en, ma rib t’uf pi fak rok. Am lemnag rogon feni ra kireban’dad me mulan’dad ni faanra dariy e “gabul nge langlath rodad nge athap.”​—Jeremiah 29:11.

11. Uw rogon ni ayuweg Moses fare athap ni ke pi’ Got ngak ni nge mel’eg ban’en u fithik’ e gonop?

¹¹ Be’ ni ku i par ni ke yiluy e sap rok ko fare athap ni ke pi’ Got ngak me dag ngodad e kanawo’ ni ngad folwokgad riy e Moses. Bochan ni “ir e fak be’ ni ppin ni fak Farao,” ma bay gelngin Moses, ma ba gilbuguwan, maku bay boor ban’en rok u Egypt nrayog ni nge fanay. Ra lek e pi n’ey, fa ra pigpig ku Jehovah? I mel’eg Moses e bin ntomur ko gali n’ey nde rus. Mang fan? Bochan e “i par ni ke yip’ owchen ko tin ni ka ba’ nga m’on ni bayi pi’ Got ni puluwoy.” (Hebrews 11:24-26) Arrogon, gathi dariy fan u wan’ Moses fare athap ni ke tay Jehovah ni fan ngak.

12. Mang fan ni athap ko Kristiano e bod e urwach?

¹² Ke taarebnag Paul ni apostal e athap rodad ko urwach. Fare urwach rodad ni be yip’ fan ban’en e ma ayuweg gelngin e lem rodad, ma ma ayuwegdad ni ngad mel’eged ban’en u fithik’ e gonop, mad pared ni gad ba yul’yul’. (1 Thessalonika 5:8) Bay rom fare urwach ni be yip’ fan ban’en ni gubin ngiyal’? Faanra arrogon, ma dab mu tay e athap rom ko “pi n’en ni ma fel’ rogoy riy ko biney e tamilang, machane ngak Got ni ir e ba gol ni be pi’ urngin ban’en ngodad ni be fel’ rogodad riy.” Arrogon, faanra ngad siyeged e tin ni baga’ ni yima fanay ni aram e ngad siyeged e tin ni yima nameg ni bay e siin riy ma ba t’uf ni dab da rusgad, machane baga’ angin ni ra yib ngodad ni bochan! Tin nriyul’ riy e, mang fan ni ngad adaged ban’en ni ka buchuuw ko “bin riyul’ e yafos,” ni be sonnag e piin nib t’uf Jehovah rorad ma kar ted e athap rorad ngak?​—1 Timothy 6:17, 19.

“Ri Dab Gu Pagem”

13. Mang e n’en ni be micheg Jehovah ngak e pi tapigpig rok nib yul’yul’?

¹³ Girdi’ ni ma tay e athap rok ko tin ni bay ko biney e m’ag e thingari lemnag e tin ni bayi yib ngorad ko gabul nge langlath nib fel’ rogon e ngiyal’ ney ni be gel i yan ko fayleng “e bin nsom’on e amith ni ma yib ngak be’ ni nge gargel.” (Matthew 24:8) Machane piin ni yad ma tay e athap rorad nga daken Jehovah e dariy e marus rorad ni aray rogon. Yad ra ul’ul ngar ‘pared nib pagan’rad ndariy rogon ni ngar rusgad.’ (Proverbs 1:33) Bochan ni n’en ni yad be athapeg e gathi bay ko biney e m’ag, ma yad ma fol ko fonow rok Paul ni gaar: “Dabi m’on e salpiy u lanin’med, ma ngam pired ni nge fel’ u wan’med e tin ni ba’ romed ban’en. Ya ke yog Got ni ke gaar, ‘Ri dab gu pagem; ma ri dab gu n’igem.’”​—Hebrews 13:5.

14. Mang fan ni de t’uf ni nge magafan’ e piin Kristiano nge pag rogon ko tin nib t’uf rorad ni bod rogon e chugum?

¹⁴ “Ri dab gu pagem; ma ri dab gu n’igem”​—pi thin ney e be dag ni ri ma lemnagdad Got. I micheg Jesus ngodad ni ma lemnagdad Jehovah, ni gaar: “Ere ngam m’oneged u wan’med e gagiyeg rok Got nge tin nib m’agan’ ngay ni ngam rin’ed, ma aram me pi’ urngin e pi n’ey [tin nib ga’ fan ko yafas] ngomed. Ere dabi magafan’med nga rogomed gabul; ya ba gaman e tin nra magafan’uy ngay ni ba’ riy.” (Matthew 6:33, 34) Manang Jehovah nib mo’maw’ ni ngad pasiggad ko Gil’ilungun ma ku da rin’ed e tin nrayog rodad ni ngad gamaneged e tin nib t’uf rodad. Ere nge pagan’dad ko n’en ni baadag ni aram e nge pi’ e tin nib t’uf rodad.​—Matthew 6:25-32; 11:28-30.

15. Uw rogon ni ma par e piin Kristiano nib ‘fel’ lan owcherad’?

¹⁵ Gad ma dag ni be pagan’dad ngak Jehovah ni faanra gad ma tay nib ‘fel’ lan owchedad.’ (Matthew 6:22, 23) Lan owchey nib fel’ e ba yul’yul’, mab dar ko chogow nge ngongol nib siin. Ngan par nib fel’ lan owchey e dar yip’ fan ni ngan mel’eg ni ngan par ni yib gafgow ara ngad digeyed e n’en nib mil fan ngodad ni fan ko tin nib t’uf ko par rodad ni gad e Kristiano. Machane, be yip’ fan ni ngad “t’ared lanin’dad” ma gad tay nib m’on u wan’dad e pigpig rodad ku Jehovah.​—2 Timothy 1:7.

16. Mang fan nib t’uf ni bay e michan’ ma ngan par ni dabin rus ni faanra nge par lan owchedad nib fel’?

¹⁶ Ra ngan par nib fel’ lan owchey mab t’uf ni bay e michan’ rodad ma dab da rusgad. Ni bod ni, faanra fa en nib ga’ u tabon e maruwel e ra yog ngom ni ngam maruwel ni gubin ngiyal’ u nap’an ni bay e pi muulung ko Kristiano, ma ga ra par ni dab mu rus ni ngam fol ko tin nib m’on u wan’um ko tirok Got ban’en, fa? Faanra be maruwaran’ be’ ni ra lebguy Jehovah e tin ni Ke Micheg ni aram e nge ayuweg e pi tapigpig Rok, ma aram e ra ul’ul Satan i gelnag e tomal nga laniyan’ ma aram e ra tal faanem i un ko muulung. Arrogon, faanra de gel e michan’ rodad ma aram e rayog ni ngad paged Satan ni nge gagiyegnagdad ma gathi Jehovah, ra mel’eg e tin ni ir e nge m’on u wan’dad. Uw feni rib gel e gafgow nra k’aring e re n’ey!​—2 Korinth 13:5.

“Mpar ni Somol e Ke L’agan’um Ngak”

17. Uw rogon ni yibe tow’athnag e piin ni ma pagan’rad ngak Jehovah?

¹⁷ Thin nu Bible e ma dag ni gubin ngiyal’ ni piin ni yad ma par ni ke l’agan’rad ma ke pagan’rad ngak Jehovah e dabi aw nib m’ay farad. (Proverbs 3:5, 6; Jeremiah 17:7) Riyul, ma yungiyal’ ma thingari fel’ u wan’rad e tin bay rorad ni de yoor, machane yad ma lemnag e tiney ni ireray boch ban’en nib achig ni faanra ngan taareb rogonnag ko pi flaab ni bay ni fan ngorad boch nga m’on. Yad ma dag ni yad be ‘par ni Somol e ke l’agan’rad ngak’ ma ke mudugil u wan’rad ni ra pi’ ngorad e tin nib t’uf rorad. (Psalm 37:4, 34) Arfan ni, riyul’ ni mus ko chiney ma yad ba felfelan’. “Tin ni ma athapeg e piin nib mat’aw e ma k’aring e felfelan’, machane athap ko piin nib kireb e ra m’ay nga bayang.”​—Proverbs 10:28.

18, 19. (a) Mang e n’en ni be micheg Jehovah ngodad u fithik’ e t’ufeg? (b) Uw rogon ni gad ma tay Jehovah ‘nrib chugur ngodad’?

¹⁸ Nap’an nra kol reb e pagal pa’ e chitamangin ngu u ranow u taabang, ma ma thamiy ni dariy ban’en nra buch rok. Taareb rogon ngodad ni gad be yan e Chitamangidad nu tharmiy u taabang. I gaar Jehovah ngak yu Israel, “Dab mu tamdag, ya gu ba’ rom. . . . Bay gu ayuwegem. . . . I gag e Somol ni Got rom; i gag e gu ma pi’ gelngim ma be lungug ngom, ‘Dab mu rus; ya bay gu ayuwegem.’”​—Isaiah 41:10, 13.

¹⁹ Uw feni rib gel’ e t’ufeg ni be dag e re n’em​—Jehovah e be kol pa’ be’! I yoloy David ni gaar: “Ba’ Somol u lanin’ug ni gubin ngiyal’; ba’ nrib chugur ngog, ma dariy ban’en nrayog ni nge rurgeg.” (Psalm 16:8) Uw rogon ni gad ma tay Jehovah ‘nrib chugur ngodad’? L’agruw e kanawo’ ni gad ma rin’ ni aray rogon. Bin som’on, gad ma pag e Thin rok ni nge pow’iydad u gubin yang u lan e yafas rodad; ma bin l’agruw, e gad ma sap ko fare flaab nib gamog ni ke tay Jehovah nga p’eowchedad. I yon’ Asaph tangin ni: “Gubin ngiyal’ ni gu ba’ rom, ni ga be kol paag. Ga be pow’iyeg ko fonow ni ga be tay ngog, ma tomur e bay mu fekeg nga fithik’ e flaab ni aram e kam ta’ fag.” (Psalm 73:23, 24) Bochan ni ke mich u wan’dad ni aram rogon, ma rayog ni ngad mada’naged e gabul nge langlath u fithik’ e pagan’.

“Ke Chugur ni Ngan Chuwegmed u Fithik’ e Gafgow”

20, 21. Mang e n’en ni be sonnag e piin ni ke l’agan’rad ngak Jehovah?

²⁰ Ri be gel e ga’ fan riy ni ngad ted Jehovah nib chugur ngodad, gubin e rran ni be yan. Dabki n’uw nap’an, ma fayleng rok Satan e ra mada’nag fare gafgow ni ba ga’ ndawori buch biid, ni ra tabab ko pi yurba’ i teliw ni googsur ni yira thangrad. (Matthew 24:21) Ra ing e marus e girdi’ ni dariy e michan’ rorad. Machane, nap’an e re ngiyal’ i n’em ni boor e wagey, ma pi tapigpig rok Jehovah ni darur rusgad e yad ra felfelan’ ko athap rorad! I yog Jesus ni: “Faanra tabab i m’ug e pi n’ey, mi gimed sak’iy ngam changargad nga lang, ya aram e ke chugur ni ngan chuwegmed u fithik’ e gafgow.”​—Luke 21:28.

²¹ Ere ngad felfelan’gad ko fare athap ni ke pi’ Got ngodad ma dabi wawliydad fapi n’en ni ma pi’ Satan ni nge magawonnagdad. Ere ngad maruwelgad nib gel nge yog ngodad e michan’, t’ufeg, nge madgun Got. Faan gad ra rin’ ni aray rogon, ma aram e rayog ni ngad pared ni gad be fol rok Jehovah ndemtrug e magawon ni gad ra mada’nag ma gad togopuluw ko fare Moonyan’ ni dab da rusgad. (James 4:7, 8) Arrogon, “Dab mu rusgad, ma manga yigi par gum’irchamed nib gel, gimed e piin ni gimed be sonnag Jehovah.”​—Psalm 31:24, NW.

[Footnote]

Rayog ni Ngam Fulweg?

• Uw rogon ma fare athap rok Jesus e ke ayuweg ni dabi rus?

• Uw rogon ni ba peth e michan’ ko t’ufeg?

• Uw rogon ma athap ni bay e michan’ riy e ra ayuweg reb e Kristiano ni nge dabi rus ni nge tay boch ban’en nib ga’ fan u lan e yafas rok?

• Mang fan ni piin ni yad be ‘par ni Somol e ke l’agan’rad ngak’ e rayog ni ngar sapgad ko gabul nge langlath u fithik’ e pagan’?

[Picture on page 20]

Demtrug yangarem, ma ga be guyem u Paradis?