Gelngiy Ni Ke Gel Ni Bochan E T’ufeg

“Kan ni Thothup ni ke pi’ Got ngodad e dar ma ngongliydad ni ngad rusgad; machane Kan ni Thothup e ma pi’ gelngidad, ma ma fal’egdad nge t’uf Got rodad nge girdi’, ma ma pi’ gelngidad nge yog nda t’ared lanin’dad.”​—2 TIMOTHY 1:7.

1, 2. (a) T’ufeg e rayog ni nge k’aring be’ nge rin’ e mang? (b) Mang fan ni yugub pag rogon feni der rus Jesus?

BA WU’ i mabgol ni kafin ra mabgolgow e u ra lithgow u maday nib chugur nga ba mach ni bay u l’ay u ngekngin yu Australia. Yow be n’en ni ngar fargow nga lang me yib ba ayang nib ga’ nib wechwech ni nge k’ad fare pin. Me thuruy fare pumoon fare pin rok me digey ir ngak fare ayang nge k’ad. Nap’an e gum’eyag me yog fare pin ni gaar: “Ke pi’ e yafas rok ni fan ngog.”

² Arrogon, t’ufeg e rayog ni nge k’aring e girdi’ ni nge dag ni der rus. I gaar Jesus Kristus: “Rogon nib th’abi t’uf rok be’ e pi tafager rok e nge pi’ e pogofan rok ni fan ngorad.” (John 15:13) Ba lich ko 24 e awa u tomuren ni yog Jesus e re bugithin ney, me pi’ e yafas rok, ni gathi ke mus ni fan ngak taabe’, ya fan ngak gubin e girdi’. (Matthew 20:28) Maku reb, e yugu de ognag Jesus e yafas rok ni yugu ba tomgin. Manang u m’on riy ni yira moningnag min gafgownag, min turguy e gechig rok nde puluw ko motochiyel, min li’ nge yim’ u daken baley i gek’iy. Ki yog ngak pi gachalpen e n’en nra buch ni gaar: “Mu sapgad, gadad be yan nga Jerusalem ni ir e bay ni pi’ e en ni Fak e Girdi’ riy ngak e pi tolang ko prist, nge pi tamachib ko Motochiyel, ni yad e bay ra pufthinniged ngar turguyed ngan li’ ngem’, nge mu’ mi yad pi’ nga pa’ e piin ni gathi yad piyu Israel. Ma bay ur moningniged, ma yad be thuw nga daken, ma yad be toy ko dimow, nge mu’ mi yad li’ ngem’.”​—Mark 10:33, 34.

3. Mang fan ni par Jesus nrib mudugil e lem rok?

³ Mang e k’aring Jesus nge pag rogon feni der rus? Michan’ nge madgun Got e ba ga’ ni ir e k’aring. (Hebrews 5:7; 12:2) Machane, u fithik’ urngin e pi n’ey, ma lem nib mudugil ni i tay Jesus e sum ko t’ufeg rok ngak Got nge girdi’. (1 John 3:16) Faan gad ra maruweliy e mit ney e t’ufeg nge chag ko michan’ nge madgun Got ni bay rodad, ma aram e rayog ni ngad daged nib mudugil e lem rodad ni bod rogon Kristus. (Efesus 5:2) Uw rogon nrayog ni nge yog ngodad e mit ney e t’ufeg? Ba t’uf ni ngad nanged e gin ni ma Sum riy.

“T’ufeg e Yib rok Got”

4. Mang fan nrayog ni nga nog ni Sum e t’ufeg rok Jehovah?

⁴ Jehovah ir e t’ufeg ma ir e Sum e t’ufeg rok. I yoloy Apostal John ni gaar: “Pi tafager rog ni gimed ba t’uf rog, nge bagadad me t’uf rok bagadad, ya rogon ni nge t’uf Got rodad nge girdi’ e yib rok Got ngodad. En nib t’uf Got rok nge girdi’ e ir be’ ni fak Got, ma manang Got. En nde t’uf Got rok nge girdi’ e be’ nde nang Got ni bochan e Got e ba t’uf e girdi’ rok.” (1 John 4:7, 8) Ere, t’ufeg ni bod rogon e t’ufeg ni ma dag Got, e rayog ni nge sum rok be’ ni ke mus nu nap’an nra chugur ngak Jehovah u daken e tamilangan’ ko thin rok me fol ko n’en ni ke fil ko fare tamilangan’ u fithik’ e yul’yul’.​—Filippi 1:9; James 4:8; 1 John 5:3.

5, 6. Mang e ayuweg pi gachalpen Jesus kakrom ni nge yog ngorad e t’ufeg ni bod rogon ni i dag Kristus?

⁵ U lan e bin tomur e meybil rok ni yad fa 11 i gachalpen, me dag Jesus e n’en nib peth ko nge ga’ e t’ufeg nge ngan nang Got, ni gaar: “Kug weliy murung’agem ngorad kar nanged gur, ma bay kug rin’ i yan ni ara’ rogon, ni bochan e rogon ni gub t’uf rom ngki yog ngorad, me yog ni gu par u fithik’rad.” (John 17:26) I ayuweg Jesus pi gachalpen ni ngar maruweliyed e t’ufeg ni bay u thilrow e Chitamangin, mi i dag u daken e thin rok ngu daken fan fithingan Got ni i weliy​—pi fel’ngin Got nrib manigil. Ere, arfan ni yog Jesus ni: “Cha’ ni ke guyeg e ke guy e en ni Chitamangiy.”​—John 14:9, 10; 17:8.

⁶ T’ufeg ni bod rogon ni i dag Kristus e reb i wom’engin e kan ni thothup rok Got. (Galatia 5:22) Nap’an ni puog nga daken e tin kakrom e Kristiano fare kan ni thothup ni kan micheg ko Pentekost ko 33 C.E., ma gathi kemus ni yib ngan’rad urngin e pi n’en ni fil Jesus ngorad machane kur nanged nib fel’ rogon fan fapi thin u lan e Bible. Re tamilangan’ ney nib toar e ir e ke gelnag e t’ufeg rorad ngak Got. (John 14:26; 15:26) Mang angin? Kar machibnaged fare thin nib fel’ u fithik’ e pasig, ni mus ko ngiyal’ ni bay e yafas rorad u thatharen e riya’.​—Acts 5:28, 29.

Lem nib Mudugil nge T’ufeg u Daken e Ngongol

7. Mang e n’en nthingari k’adan’ Paul nge Barnabas riy u nap’an ni ur milekaggow u taabang ni yow be machib?

⁷ I yoloy Paul ni apostal ni gaar: ‘Ya Kan ni Thothup ni ke pi’ Got ngodad e dar ma ngongliydad ni ngad rusgad; machane ma pi’ gelngidad, ma ma fal’egdad nge t’uf Got rodad nge girdi’, ma ma pi’ gelngidad nge yog nda t’ared lanin’dad.’ (2 Timothy 1:7) N’en ni weliy Paul e ban’en ni ke buch rok. A mu lemnag e n’en ni buch rorow Barnabas u nap’an ni yow be milekag u lan e pi binaw i yan ni yow be machib. Boor e binaw nra machibgow riy, nib muun ngay yu Antioch, Ikonium, nge Lystra. Bay boch e girdi’ ni mich u wan’rad e machib u lan e pi binaw nem, machane boch i yad e i togopuluw nib gel. (Acts 13:2, 14, 45, 50; 14:1, 5) Mus nga be’ nib moon nib gel e damumuw rok u Lystra e malangnag Paul, me digey ni ke lemnag ni ke yim’! “Machane faani muulung e piin ni ke mich Jesus u wun’rad ngak, me sak’iy nge sul nga lan fare binaw. Me reb e rran riy mi yow yan Barnabas nga Derbe.”​—Acts 14:6, 19, 20.

8. Uw rogon ma lem nib mudugil ni dag Paul nge Barnabas e dag e t’ufeg nib gel rorow ngak e girdi’?

⁸ I k’aring e re n’ey Paul nge Barnabas ngar talgow ko machib fa? Danga’! Tomuren ni kar pingegew boch e girdi’ kar “manged pi gachalpen Jesus” ma aram “mi yow sul nga Lystra nga ranow u rom nga Ikonium, mi yow yan u Ikonium nga Antiok.” Mang fan? Ya nge yog nra piew e athamgil nga laniyan’ e piin ni ka yad beech ni nge gel e michan’ rorad. I gaar Paul nge Barnabas: “Thingar danod u fithik’ boor e gafgow ma gadad yan ko gin nsuwon Got.” Rib tamilang ni lem rorow nib mudugil e yib ko t’ufeg rorow nib gel ko pi “saf” rok Kristus. (Acts 14:21-23; John 21:15-17) Tomuren ni kar mel’egew e piin piilal u lan e tin ni ka fin sunumeg e ulung, me meybil fagali walag mar “piew yad ngak Somol u fithik’ e meybil, ni fare Somol ni ir e ke pagan’rad ngak.”

9. Mang e n’en ni rin’ e piin piilal nu Efesus ni bochan e t’ufeg ni dag Paul ngorad?

⁹ Paul e be’ ni ma dag e t’ufeg ma dar ma rus ma arfan ni boor e Kristiano nra daged e t’ufeg ngak. Am lemnag e n’en ni buch u reb e muulung ni tay Paul nge piin piilal nu Efesus, ni aram e gin’en ni par riy ni dalip e duw ma boor e togopuluw ni i yib ngak u rom. (Acts 20:17-31) Tomuren ni pi’ e athamgil nga lanin’rad ni ngar gafaliyed e pi saf rok Got ni kan pag gafalngin ngorad, me ragbug Paul nga but’ nge un ngorad ko meybil. Ngemu’, ma “yad gubin ni yad be yor ma yad gumuchmuch ngak Paul ma yad be faray owchen ni yad be fingichiy. Ya kari kireban’rad ko pi thin ni baaram ni ke yog ndab ku ra mada’gad bayay.” Rib gel e t’ufeg ko pi walag ney ngak Paul! Tin riyul’ riy e, nap’an ni taw ko ngiyal’ ni nga ranod, ma ‘mo’maw’ ni ngar digeyed yad,’ nbochan e dabun fapi piilal ni nga ranod.​—Acts 20:36–21:1.

10. Uw rogon ni ke dag e Pi Mich ko ngiyal’ ney e t’ufeg nib gel?

¹⁰ Ngiyal’ ney, ma piin ma lekag e ulung, nge piin piilal ko ulung, nge ku boch e girdi’ e ri yad ba t’uf ko girdi’ u lan e ulung ni bochan e darur rusgad ni ngar ayuweged e pi saf rok Jehovah. Ni bod nu lan e pi nam ni ke wagey ni bochan e mahl u thilin e girdi’ ara kan taleg e machib riy, ma piin ni yad ma lekag e ulung nge piin leengirad e yad ma tay e yafas rorad u thatharen e riya’ ni fan e ngar mada’naged e pi ulung i yan. Taareb rogon, ma boor e Pi Mich ni kar gafgowgad u pa’ e piin ni ma gagiyeg ni dariy e runguy rorad nge girdi’ rorad ni bochan e darur yognaged e piin ni taareb e michan’ rorad ara roged e gin ni yad ma fek boch e babyor riy ni ma ayuweg e michan’ rorad. Bokum biyu’ i yad e kan gafgownagrad, ma ku yibe li’rad ni bochan e darur talgad i machibnag fare thin nib fel’ ara ra talgad i chag ngak e piin ni taareb e michan’ rorad u nap’an e pi muulung ko Kristiano. (Acts 5:28, 29; Hebrews 10:24, 25) Manga yugu da folwokgad ko michan’ nge t’ufeg ko pi walag ney ni pumoon nge piin ni darur rusgad!​—1 Thessalonika 1:6.

Dab Mu Paged e T’ufeg Romed nge War

11. Mang boch e kanawo’ ni ma cham Satan riy ngak e pi tapigpig rok Jehovah, ma mang e ba t’uf ni ngar rin’ed?

¹¹ Nap’an ni kan tharbog Satan nga fayleng, ma kari mudugil u wan’ ni nge dag e damumuw rok ngak e pi tapigpig rok Jehovah ni bochan e yad “be fol ko pi motochiyel rok Got ma yad ba yul’yul’ ko fare thin nib riyul’ ni yib i yog Jesus ngan nang.” (Revelation 12:9, 17) Reb e kanawo’ ni ma fanay Moonyan’ ni nge bannag e girdi’ e aram e togopuluw. Machane, ba ga’ nib thil e n’en ni ma buch ni bochan e ma chugurnag e girdi’ rok Got nga taabang u daken e t’ufeg ko Kristiano ma ma k’aring boor i yad ni nga kur pasiggad boch. Ku reb e kanawo’ ni ma fanay Satan ni nge bannag e girdi’ riy e aram e lem nib denen ko girdi’. Ra ngan gel ko re ban ney ma ba t’uf yugu reb e lem nib mudugil ni bochan e biney e cham e bay ko lem, ni aram e ba togopuluw ko boch e ar’ar nib kireb u lan gum’irchadad nib ‘sasalap mab kireb’.​—Jeremiah 17:9; James 1:14, 15.

12. Uw rogon ni ma fanay Satan e “lem nu roy u fayleng” ni nge warnag e t’ufeg rodad ngak Got?

¹² U fithik’ urngin e pi talin e cham rok Satan e bay reb e talin e cham nib gel​—“lem nu roy u fayleng,” ni aram e ngongol ni yima rin’, nib togopuluw ko kan ni thothup rok Got. (1 Korinth 2:12) Lem ko re fayleng ney e be gelnag e chogow ko girdi’​—“tin nra guy e girdi’ ma yad ba adag ni nge yog ngorad.” (1 John 2:16; 1 Timothy 6:9, 10) Yugu aram rogon nde kireb e chugum nge salpiy, machane faanra gel e t’ufeg rodad ko pi n’ey ko t’ufeg rodad ngak Got, ma aram e ke gel Satan. ‘Gelngin’ e lem nu roy u fayleng e ma m’ug ko dowef ni tadenen, ma ba sabanban, ma dar tal, ni bod rogon e nifeng, ni gubin yang ma bay riy. Dab mu digey nge af ngom e lem nu roy u fayleng!​—Efesus 2:2, 3; Proverbs 4:23.

13. Uw rogon ni yira skengnag e lem rodad nib mudugil u rogon e ngongol ni gad ma dag?

¹³ Ra ngad siyeged e lem nib kireb u roy u fayleng, ma, ba t’uf ni ngad pared nib mudugil e lem rodad. Ni bod ni, ba t’uf e lem nib mudugil ni ngan yan ngan chuw ko yungi n’en ni yima yan ngay ko meyal kachido ara ngan taleg e computer ara TV u nap’an ni ke m’ug boch e yaan riy nib puwlag ara ba kireb. Ba t’uf e lem nib mudugil ni ngan gel ko pi towasar nib kireb ko pi tafager min tal i chag ko piin nib kireb pangirad. Maku ba t’uf e lem nib mudugil ni ngan fol ko pi motochiyel rok Got nge pi kenggin e motochiyel u lan e Bible ni yugu aram rogon ni yima moningnagdad riy, ni yugu demtrug ko piin gadad nga skul, ara tabon e maruwel, ara piin buguli yoror rodad, ara girdi’ rodad.​—1 Korinth 15:33; 1 John 5:19.

14. Mang e susun ni ngad rin’ed ni faanra ke af ngodad e lem nu roy u fayleng?

¹⁴ Uw feni rib ga’ fan, ni ngad gelnaged e t’ufeg rodad ngak Got nge pi walagdad ni pumoon nge ppin! Mu tay e tayim ni ngam fal’eg i yaliy e pi n’en ni ga be nameg nge kanawoen e yafas rom ngam guy ko ke af ngom e lem nu roy u fayleng fa. Faanra ke af ngom​—ni yugu demtrug ko buchuuw—​ma ngam meybil ngak Jehovah ni nge ayuwegem ngam chuweg. Dabi siyeg Jehovah e n’en ni ga be ning ngak u fithik’ e yul’yul’. (Psalm 51:17) Maku, kan ni thothup rok e kab gel ko fayleng ndabi chugur.​—1 John 4:4.

Lem nib Mudugil u Nap’an ni Ke Yib e Skeng Ngodad

15, 16. Uw rogon nrayog ni nge ayuwegdad e t’ufeg ni bod rogon ni dag Kristus ni ngad gelgad ko pi skeng? Mu weliy reb.

¹⁵ Boch e magawon ni ba t’uf ni nge cham e pi tapigpig rok Jehovah ngay e muun ngay wenegan ni dan flont ma yima pilibthir, ni baga’ ni ma yib wenegan ni m’ar, marwoth, kireban’, nge ku boch e magawon. (Roma 8:22) T’ufeg ni bod rogon e t’ufeg ni dag Jesus e rayog ni nge ayuwegdad ni ngad gelgad ko pi skeng ney. Am lemnag e n’en ni buch ku Namangolwa, nchuguliy u lan reb e tabinaw u Zambia ni girdi’ riy e yad e Kristiano. Nap’an ni gaman l’agruw e duw rok, ma aram me par ni ke marwoth. I yog ni gaar: “Ba papey ni gu ma kirkireb, ya gu ma lemnag ni ra gin e girdi’ nga rogon yaag. Machane pi walageg u lan e ulung e ra ayuweged gag ni nge thil rogon e lem rog u gubin ban’en. Angin ni yib riy, e da ku ug kirkireb, ma aram e nap’an ni yib e tayim riy nib fel’ ma aram mug un ko taufe.”

¹⁶ Yugu aram rogon ni ma par Namangolwa u lan e wheelchair, ma baga’ ni gubin ngiyal’ ni ma yan nga pa’ nge mitibugun u nap’an ni ra yan nga bang ni ba yan’ e kanawo’ riy. Machane, ma machib ni ir reb e pioneer ni ayuw ni baga’ ni l’agruw e pul ni yu duw. Ba’ reb e ppin ni yor u nap’an ni machibnag Namangolwa. Mang fan? Bochan ni bit nga laniyan’ e michan’ nge lem nib mudugil rok e re walag ney nib ppin. Lal ko piin ni ma fil Namangolwa e Bible ngorad e kan taufenagrad, ma reb e ma pigpig ni ir reb e piilal u lan e ulung, ma ireray angin ni ke pi’ Jehovah ngak. Miki ul’ul ngay nge gaar: “Yugu baga’ ni ma amith eg nib gel, machane da gur ma digey e re n’em nge talegeg.” Re walag ney ni ppin e ir reb u fithik’ boor e Pi Mich u ga’ngin yang e fayleng ni bay e magawon ko dowef rorad machane ba gel e pasig rorad ni bochan e t’ufeg rorad ngak Got nge piin nib migid ngorad. Rib ga’ fan e pi girdi’ ney u p’eowchen Jehovah!​—Haggai 2:7.

17, 18. Mang e ma ayuweg boch e girdi’ ni ngar gelgad ko m’ar nge boch e skeng? Mu weliy boch ni bay ko ulung rom.

¹⁷ M’ar ni ma par nib n’uw nap’an e rayog ni nge warnag lanin’dad, ma ku ma k’aring e kireban’ ngodad. I yog reb e piilal u lan e ulung ni gaar: “U lan e bin ni gu ma un ngay e muulung ko fol babyor ma reb e walag riy ni ppin e ba m’ar ko suga ma ku ba kireb e buoy rok, ma reb e bay e cancer rok, ma l’agruw e bay e m’ar ko ul’ul rorow nrib ubchiya’, ma reb e ku bay l’agruw mit e m’ar rok ni ka nog e lupus nge fibromyalgia ngay. Ma meewar lanin’rad yu ngiyal’. Machane, yad ma tal ko muulung ni kemus ni faanra rib gel e m’ar rorad ara faanra ka nin’rad nga aspital. Yad gubin ni yad ma un ko machib ni gubin ngiyal’. Ra guyrad ma ma yib ngan’ug Paul, ni faani gaar: ‘Ngiyal’ ni gub meewar, e aram e ngiyal’ ni gub gel.’ Ri gu baadag e t’ufeg nge lem nib mudugil ni yad ma dag. Sana rayog ni bochan rarogon downgirad ma aram e ke ayuwegrad ni ngar yaliyed e yafas rorad nib fel’ rogon nge tin ni ir e baga’ fan.”​—2 Korinth 12:10.

¹⁸ Faanra ga be athamgil u fithik’ e m’ar, ara yugu boch e magawon, “mu um meybil ni gubin ngiyal’” ni ngan ayuwegem ya nge dabi meewar lanin’um. (1 Thessalonika 5:14, 17) Arrogon, rayog ni nge yib e magawon riy nga lanin’uy, machane mu athamgil ni ngam sap ko tin nib fel’ ni bay riy, ma bay rogon ko tirok Got ban’en, ni ba ga’ ni fare athap rodad ni fan ko Gil’ilungun. I gaar reb e walag ni ppin “Machib e ireray reb e falay ngog”. Bochan ni ma machibnag fare thin nib fel’ ngak e girdi’ ma ir e ke ayuweg ni nge par nib fel’ e lem rok.

T’ufeg e Ma Ayuweg e Piin ni Yad Be Ngongliy e Kireb Ngar Sulod ku Jehovah

19, 20. (a) Mang e rayog ni nge ayuweg e piin ni kar awgad ko denen ni nge gel e lem nib mudugil rorad ni ngar sulod ku Jehovah? (b) Mang e yira weliy u lan e bin migid e article?

¹⁹ Boor e piin ni kar meewargad ko tirok Got ban’en ara kar denengad e ba mo’maw’ rorad ni ngar sulod ku Jehovah. Machane ra yib e lem nib mudugil ngorad bayay ni faanra riyul’ ni yad ra kalngan’rad mar gelniged bayay e t’ufeg rorad ngak Got. Am lemnag Mario,a ni ma par u Meriken. I digey e ulung ko Kristiano, me mang be’ nib ta chingaw ma ke mecham ko pi falay nib kireb, mu tomuren 20 e duw, ma aram min nin’ nga kalbus. I yog ni gaar: “Kug tabab ni nggu lemnag bayay e tin ni ka bay nga m’on ko yafas rog mu gu tabab i beeg e Bible bayay. Munmun, ma aram mu gu adag e pi fel’ngin Jehovah, ni ba ga’ ni runguy rok, ni ireram e n’en ni gu ma ning ngak ni gubin ngiyal’ u daken e meybil rog. Tomuren ni pageg u kalbus, ma da kug chag ngak e piin ni ug chag ngorad kafram, ma aram mu gu tabab i un ko pi muulung ko Kristiano, me tomur riy min sulwegeg bayay ko ulung. U fithik’ i dowag, e gu be t’ar riy wom’engin e n’en ni kug yung, machane chiney e bay e athap rog nib manigil. Ri gu be pining e magar ku Jehovah ni bochan e runguy rok nge ku bochan ni ke n’ag fan e kireb rog.”​—Psalm 103:9-13; 130:3, 4; Galatia 6:7, 8.

²⁰ Arrogon, piin ni kar awgad nga boch e magawon ni bod rogon Mario e ba t’uf ni ngar maruwelgad nib gel ni ngar sulod bayay ku Jehovah. Machane t’ufeg rorad nra gel​—ni bochan e fol Bible, meybil nge ngan fal’eg i lemnag e n’en ni kan beeg—​e ra pi’ e lem nib mudugil ngorad. Ki gel Mario ni bochan fare athap ko Gil’ilungun. Arrogon, athap e rayog ni nge mang ban’en nib gel gelngin nra yib angin nga lan e yafas rodad ni faanra ba chag e t’ufeg, michan’, nge madgun Got ngay. U lan e bin migid e article, ma gad ra sap ko re tow’ath ney ni fan ko tirok Got ban’en.

[Footnote]

Rayog ni Ngam Fulweg?

• Uw rogon ni ayuweg e t’ufeg e lem rok Jesus nib mudugil?

• Uw rogon ma t’ufeg rok Paul nge Barnabas ko fapi walag e yibnag e lem nrib mudugil ngorow?

• U daken e mang e ma guy rogon Satan riy ni nge warnag e t’ufeg ko pi Kristiano?

• T’ufeg rodad ku Jehovah e ra yibnag e lem nib mudugil ngodad ni ngad gelgad ko miti mang skeng?

[Picture on page 15]

T’ufeg rok Paul ngak e girdi’ e k’aring ni nge par nib mudugil e lem rok me k’adan’

[Picture on page 16]

Ba t’uf e lem nib mudugil ni ngaun fol ko pi kenggin e motochiyel rok Got

[Picture on page 16]

Namangolwa Sututu