Mu Felfelan’ ko Yafas ni Bay Madgun Jehovah u Wan’um

“Gimed urngin e girdi’ rok Somol, e ngam pired ni ba’ madgun Somol u wun’med; ya piin ni ba’ madgun u wun’rad e ba’ rorad urngin e tin ni nge yog ngorad.”​—PSALM 34:9.

1, 2. (a) Mang boch e kanawo’ nib thil ni ma lemnag e pi Kristiano ni googsur u murung’agen madgun Got? (b) Mang boch e deer ni gad ra weliy murung’agen e chiney?

PI TAMACHIB ko Kristiano ni googsur e yad ma machibnag murung’agen madgun Got u rogon nde puluw ko Bible maku yad ma machibnag nra gechignag Got e pi tadenen ni dariy n’umngin nap’an u fithik’ e nifiy. Mit ney e machib e de puluw ko n’en ni be yog e Bible u murung’agen Jehovah ni ir e Got ko t’ufeg nge tin nib mat’aw. (Genesis 3:19; Deuteronomy 32:4; Roma 6:23; 1 John 4:8) Yugu boch e tamachib ko Kristendom e ba thil e n’en ni yad ma yog. Darur weliyed ni ngeb madgun Got u wan’uy. Ya n’en ni yad ma rin’ e yad ma machibnag ni yugu demtrug rogon e ngongol ara yafas rok be’ mab fel’ u wan’ Got. Maku gathi aram e n’en ni be fil e Bible.​—Galatia 5:19-21.

² Tin nriyul’ riy e Bible e be pi’ e athamgil nga lanin’dad ni nge yib madgun Got ngodad. (Revelation 14:7) Re machib nem e ma k’aring boch e deer. Mang fan ni baadag ba Got nib ta t’ufegey ni nge yib madgun ngodad? Miti mang marus e baadag Got ni ngad daged ngak? Uw rogon nra yib angin ngodad madgun Got? Gad ra weliy e fulweg ko pi deer ney u nap’an ni gad ra ul’ul i weliy e thin ni bay ko Psalm 34.

Mang Fan ni Ngan Madugdag Ku Got

3. (a) Uw rogon u wan’um fare motochiyel ni ngan rus ngak Got? (b) Mang fan nib felfelan’ e piin ni bay madgun Jehovah u wan’rad?

³ Bochan ni Jehovah ir e Tasunumiy nge Ani Th’abi Pilung u ga’ngin e palpalth’ib, ma bay rogon ni ngan rus ngak. (1 Peter 2:17) Machane, ireray e marus ni gathi bochan ba got ni dariy e runguy rok. Ireray e marus ni bay e tay fan riy nbochan e tin ni gad manang u murung’agen Jehovah. Maku ireray e marus ni nge dab da kirebnaged laniyan’. Madgun Got e ban’en nib ga’ fan, ma dar ma k’aring e kireban’. Jehovah, “ni ir fare Got nib felfelan’,” e baadag ni nge felfelan’ urngin e girdi’ ko yafas. (1 Timothy 1:11, NW) Machane, ra ngad rin’ed ni aray rogon, ma thingar da folgad ko tin ni baadag Got ni ngad rin’ed. Ma boch e yad be lemnag ni re n’ey e be yip’ fan ni ngar thilyeged rarogon e yafas rorad. Piin ni yad ma thilyeg e tin nib t’uf ni ngar thilyeged u ra rogorad e kar guyed nib riyul’ fapi thin ni yog fare psalmist ni David ni gaar: “Mpagan’um ngak Somol, ma ga pirieg feni manigil! Ba felan’ e cha’ ni be naf nga tan pa’ Somol! Gimed urngin e girdi’ rok Somol, e ngam pired ni ba’ madgun Somol u wun’med; ya piin ni ba’ madgun u wun’rad e ba’ rorad urngin e tin ni nge yog ngorad.” (Psalm 34:8, 9) Bochan nib fel’ thilrad Got, ma urngin e piin ni yad be rus ngak Jehovah e dariy ban’en rorad ni de ga’ fan.

4. Mang e n’en ni micheg David nge Jesus?

⁴ Am tay fanam i yan riy ni tay fan David e pi girdi’ rok me piningrad ni “piin nib thothup” ya re thin nem e ba m’ag ko re ngiyal’ i n’em. Yad bang ko nam rok Got nib thothup. Kur ted e yafas rorad nga thatharen e riya’ ni fan e ngar leked David. Yugu aram rogon ni yad be mil rok Saul ni Pilung, ma ba mudugil u wan’ David ni ra ul’ul Jehovah i pi’ e tin nib t’uf rorad ngorad. I yoloy David ni gaar: “Mus ngak e pi layon ni m’ay garad nge yib e bilig ngorad, machane piin ni yad be fol rok Somol e dariy ban’en nib fel’ ni go manga dariy rorad.” (Psalm 34:10) Taareb rogon e n’en ni micheg Jesus ngak pi gachalpen.​—Matthew 6:33.

5. (a) Miti mang girdi’ e piin nra manged gachalpen Jesus? (b) Mang fonow ni pi’ Jesus u murung’agen e marus?

⁵ Boor e piin ni ur motoyilgad ngak Jesus ni yad e piin nib sobut’ u Jew ma yad ba gafgow. Ere “taganan’ ngorad, ya kar pired ni ke magafan’rad ndar nanged e n’en ni ngar rin’ed, ya yad bod e saf nde moy rorad e en ni ma gafaliyrad.” (Matthew 9:36) Rayog rorad ni yad bogi girdi’ nib sobut’ mab gafgow ni ngar leked Jesus? Ra ngar rin’ed e re n’ey, ma ba t’uf ni ngar maruweliyed ni nge yib madgun Jehovah ngorad, ma gathi girdi’. I gaar Jesus: “Dab mu tamdaggad ngak e piin ni yad ra li’ e dowef ngem’, ma nga tomren e dabkiyog ni ngar ngongliyed ban’en ngay ni kab gel e gafgow riy. Nggu dag ngomed e cha’ ni ir e ngam tamdaggad ngak: mu tamdaggad ngak Got nra li’ e dowef nge yim’, ma bay gelngin nge mat’awun nra yin’ faanem nga fithik’ e nifiy. Ere gu be yog ngomed, ni ngam tamdaggad ngak! Gathi yira pi’ nchuway’ lal fa nochi arche’ ni sparrow fithingan ma ke mus ni l’agruw e salpiy nrow puluwon? Machane dariy taa bagayad ni ke pag Got talin. Mus nga piyan lolugmed ni ke m’ay i theeg. Ere dab mu rusgad, ya ka ba ga’ famed ngak boor fa nochi arche’ ni sparrow fithingan!”​—Luke 12:4-7.

6. (a) Mang thin rok Jesus ni ke gelnag e pi Kristiano? (b) Mang fan ni Jesus e ir e ke dag e bin nth’abi fel’ e kanawo’ u rogon ni ngan dag madgun Got?

⁶ Nap’an nra towasariy e pi toogor rok e piin ni bay madgun Jehovah rorad ni ngar talgad ko pigpig ngak Got, ma sana ra yib ngan’rad e fonow rok Jesus ni: “En nra weliy u fithik’ girdi’ ni ir reb i girdieg e aram rogon e n’en nra rin’ e en ni Fak e girdi’ ngak u p’eowchen e pi engel rok Got. Machane en nra weliy u fithik’ e girdi’ ni gathi ir reb i girdieg, e aram rogon e en ni Fak e Girdi’ nra weliy u p’eowchen e pi engel rok Got ni faanem e gathi reb i girdien.” (Luke 12:8, 9) Pi thin nem e ke pi’ e athamgil nga laniyan’ e piin Kristiano, ni baga’ ko yungi n’en ni kan taleg e machib riy. Piin ni aray rogon e yad be ul’ul i pining e sorok ngak Jehovah u fithik’ e gonop u nap’an e pi muulung ko Kristiano nge nap’an e machib ni yad ma tay. (Acts 5:29) Jesus e ir e dag e bin nth’abi fel’ e kanawo’ u rogon ni ngan dag “madgun Got.” (Hebrews 5:7, NW) I weliy e thin ko profet u murung’agen u m’on riy ni gaar: “Fare Kan ni Thothup rok Somol e ba’ rok ni bay i pi’ e gonop ngak, . . . mi i felan’ ko pigpig ni be tay ni fan ngak.” (Isaiah 11:2, 3) Ere Jesus e bay rogon ni nge fil ngodad pi fel’ngin nra yib ni faanra ngan par ni bay madgun Got u wan’uy.

7. (a) Uw rogon ni ra un e Pi Kristiano nga reb e pong ni taareb rogon ko bin ni ta’ David? (b) Uw rogon nrayog ni nge folwok e piin gallabthir ko n’en ni i rin’ David?

⁷ Urngin e piin ni yad be fol ko kanawo’ ni dag Jesus ma yad be fol ko pi machib ni be fil e yad be un nga reb e pong ni taareb rogon ko fa bin ni ta’ David ni gaar: “Mired e pi tafager rog ni gimed bbitir ngog, ngam telmed ngog, mu gu fil ngomed rogon ni nguum pired ni ba’ madgun Somol u wun’med.” (Psalm 34:11) Ba m’ag ku David ni nge pining fapi girdi’ ni yad be un ngak ni “pi fakag ni pumoon” ni bochan e yad ma sap ngak ni ir e baga’ rorad. I ayuweg David e piin ni i un ngak ni ngar mudugdaggad ngak Got ya nge yog nra taabanggad mar pared ni yad ba fel’ u wan’ Got. Ireray ban’en nib fel’ ni nge folwok e piin gallabthir ni Kristiano riy! Ke pi’ Jehovah mat’awrad ni ngar ‘chuguliyed pi fakrad mi yad llowan’nagrad nrogon, mi yad fonownagrad nrogon girdien Kristus.’ (Efesus 6:4) Rayog ni nge ayuweg e piin gallabthir pi fakrad ni ngar felfelan’gad ko yafas rorad ni bay madgun Jehovah u wan’rad ni faan yad ra weliy murung’agen e tirok Got ban’en ngorad mi yad fol Bible u taabang ni gubin e rran.​—Deuteronomy 6:6, 7.

Rogon ni Ngan Dag ni Bay Madgun Got u Wan’uy

8, 9. (a) Mang fan ni rib fel’ e par ni bay madgun Got u wan’uy? (b) Mang e ba muun ngay ni ngad gagiyegnaged bolowthdad?

⁸ Rogon ni kad weliyed faram, ma madgun Jehovah e dar ma taydad ni dab kud felfelan’gad. I fith David ni gaar: “Mogned, gimed ba adag ni ngam felfelan’gad ko biney e tamilang? Mogned, gimed ba adag ni ngam pired ko biney e tamilang nib n’uw nap’an ma gimed ba felfelan’?” (Psalm 34:12) Rib tamilang ni madgun Jehovah e ireray e n’en ni ra ayuwegdad ni ngad pired u fithik’ e felfelan’. Machane, ba mom ni nga dogned ni “Bay madgun Got u wan’ug.” De mom ni ngad micheged ko ngongol rodad. Arfan ni weliy David rogon nrayog ni ngad daged ni bay madgun Got u wan’dad.

⁹ “Faanra gimed ba adag me ere ngam talgad ndab ku u mogned e thin nib kireb, mi gimed tal ndab ku um lifithed l’ugunmed.” (Psalm 34:13) Kan thagthagnag ngak Peter ni apostal ni nge weliy murung’agen e giney e Psalm guruy ni 34 u tomren ni ke fonownag e piin Kristiano ni nge bagayad me i lemnag bagayad. (1 Peter 3:8-12) Ngad ayuweged bolowthdad ni dab ku dogned e thin nib kireb e be yip’ fan ni gad ra siyeg ni dab kud wereged e thin nrayog ni nge kirebnag boch e girdi’. Machane, ngad athamgilgad ni gubin ngiyal’ ni ngad dogned e thin nrayog ni nge pi’ e athamgil nga lanin’uy u nap’an ni gad be non ngak yugu boch e girdi’. Maku, ngad athamgilgad ni dab da rusgad ma dogned e thin nriyul’.​—Efesus 4:25, 29, 31; James 5:16.

10. (a) Mu weliy e n’en ni be yip’ fan ni ngad digeyed e tin nib kireb. (b) Mang e n’en nib muun ngay ni ngan rin’ e tin nib fel’?

¹⁰ “Mpied keru’med ko kireb ngam rin’ed e tin nib fel’ me t’uf romed e gapas mi gimed athamgiliy nge yog ngomed.” (Psalm 34:14) Gad ma siyeg e pi n’en ni ma fanenikay Got ni bod rogon e ngongol ndarngal, moro’ro’, pig, cham, muun rrum nib pag rogon, nge fanay e falay ni kireb. Ku gad ma siyeg boch e fafel ni yaan e tin nib kireb. (Efesus 5:10-12) Ya n’en ni gad ma rin’ e gad ma fanay ga’ngin e tayim rodad ni ngad rin’ed e tin nib fel’. Bin nth’abi fel’ e n’en ni rayog ni ngad rin’ed e aram e ngad uned i machibnag murung’agen fare Gil’ilungun u gubin e rran ma gad yognag boch e pi gachalpen, ma ku gad ayuweg boch e girdi’ nge yog e yafas ngorad. (Matthew 24:14; 28:19, 20) Ngan rin’ e tin nib fel’ e kub muun ngay ni ngan fal’eg rogoy min un ko pi muulung ko Kristiano, ngan pi’ e ayuw ko fare maruwel ni yibe rin’ u ga’ngin yang e fayleng, ngan ayuweg e Kingdom Hall rodad, nge ngan lemnag rogon ni ngan ayuweg boch e Kristiano ni ke t’uf ban’en rorad.

11. (a) Uw rogon ni fol David ko n’en ni be weliy u murung’agen e gapas? (b) Mang e rayog ni mu rin’ ngam ‘yognag e gapas’ nga lan e ulung?

¹¹ Ki dag David e bin nth’abi fel’ e kanawo’ u rogon ni nge yib e gapas. L’agruw yay ni mab e kanawo’ ngak ni nge li’ Saul. Gali tayim nem e siyeg ni nge cham ma boch nga tomuren me non u fithik’ e tay fan ngak fare pilung, ni be athapeg ni goo mang e yib e gapas. (1 Samuel 24:8-11; 26:17-20) Mang e rayog ni ngan rin’ u nap’an nra buch ban’en nrayog ni nge kirebnag e gapas u lan e ulung e ngiyal’ ney? Thingari ‘t’uf rodad e gapas ma gadad athamgiliy nge yog ngodad.’ Ere, faanra ke sum e magawon u thildad reb e walag, ma ngad folgad ko fonow rok Jesus ni gaar: “Ma ga yan ni ka chingiyal’ nem ngam fal’eg thilmew walagem.” Ngemu’ ma aram e rayog ni ngad ul’ulgad ngad rin’ed yugu boch ban’en ko pigpig ni riyul’.​—Matthew 5:23, 24; Efesus 4:26.

Madgun Got e Ma Yibnag Boor e Tow’ath

12, 13. (a) Mang angin nib fel’ ni ma yib ngak e piin ni bay madgun Got u wun’rad e ngiyal’ ney? (b) Mang tow’ath nth’abi fel’ e ra yog ngak e pi tapigpig nib yul’yul’ ndab ki n’uw nap’an?

¹² “I Somol e ma matanagiy e piin ni yad mmat’aw, ma ma motoyil ngorad ko tin ni yad ma wenignag ngak.” (Psalm 34:15) Fare thin u murung’agen e n’en ni rin’ Got ni fan ngak David e be micheg nriyul’ e pi thin nem. Ngiyal’ ney e gad ma thamiy e felfelan’ nge gapas laniyan’ ni bochan e gad manang ni be matanagiydad Jehovah. Ba mudugil u wan’dad nra pi’ e tin nib t’uf rodad, mus nga nap’an e ngiyal’ ni gad be mochuch nib gel. Gad manang ni dabki n’uw nap’an ma urngin e pi tapigpig nib riyul’ e yad ra guy e cham ni yira tay Gog nu Magog nge fare “Rran rok Somol.” (Joel 2:11, 31; Ezekiel 38:14-18, 21-23) Demtrug e miti magawon ni gad ra mada’nag, ma ra m’ag fare thin rok David ngodad ni faani gaar: “Piin nib mat’aw e yad ra non ngak Somol me motoyil Somol ko tin ni yad be yog; me chuwegrad u fithik’ urngin e gafgow ni ke yib ngorad.”​—Psalm 34:17.

¹³ Uw feni rib gel e felfelan’ riy u nap’an ni gad ra guy ni ke gagiyelnag Jehovah fithingan nrib tolang e ngiyal’ nem! Rra sug gum’irchadad ko tay fan, ma piin tatogopuluw e yad ra mada’nag e magothgoth u fithik’ e tamra’. “Machane ma togopluw ngak e piin ni yad be rin’ e tin nib kireb, ma yad ra yim’ me gagiyegnag nge dab kun lemnagrad.” (Psalm 34:16) Ireray reb e tow’ath nrib fel’ ni aram e ngan chuwegdad u fithik’ e gafgow mad thapgad nga lan fare fayleng rok Got nib fel’ mab beech!

Pi N’en ni Ke Micheg Jehovah ni Ma Ayuwegdad ni Ngad K’adedan’dad

14. Mang e ra ayuwegdad ngad k’adedan’dad ni yugu aram rogon ni gad be gafgow?

¹⁴ Ba t’uf e k’adan’ ni faanra ngad ul’ulgad ko fol ni gad be tay ngak Jehovah u lan e re fayleng ney nib kireb. Madgun Got e rayog ni nge ayuwegdad ngad maruweliyed ni ngad folgad. Bochan e tayim ni ke mo’maw’ ni gad be par riy e ngiyal’ ney, ma boch e pi tapigpig rok Jehovah e yad ma mada’nag boch e magawon nrib mo’maw’ ni ma yibnag e kireban’ ngorad me mulan’rad. Machane, rayog ni ngari mich u wan’rad ni faan yad ra taga’ ngak Jehovah, ma ra ayuwegrad ni ngar k’adedan’rad u fithik’ e gafgow. Ma fal’eg lanin’uy fapi thin rok David ni faani gaar: “I Somol e ba chugur ngak e piin ni ke mulan’rad; ma piin ni ke math e liyeb ngorad e ma chuwegrad u fithik’ e tin ni ke yib ngorad ni kar gafgowgad riy.” (Psalm 34:18) I yog David e thin nra pi’ e athamgil nga lanin’uy ni gaar: “En nib mat’aw e boor e gafgow ni ma yib ngak, machane i Somol e ma chuweg u fithik’ ni gubin.” (Psalm 34:19) Yugu demtrug urngin e gafgow nra yib ngodad ma bay gelngin Jehovah ni nge chuwegdad u fithik’.

15, 16. (a) Mang gafgow e yib i nang David murung’agen u tomuren ni yoloy e Psalm ni 34? (b) Mang e ra ayuwegdad ngad gelgad ko pi skeng ni ma yib ngodad?

¹⁵ De n’uw nap’an nga tomuren ni kan yoloy e Psalm ni 34, me rung’ag David e gafgow ni ke yib ngak e girdi’ nu Nob u nap’an ni li’ Saul boor i yad nib muun ngay boch e prist. Rib gel e kireban’ ni tay u nap’an ni nang ni bochan e yan ni tay nga Nob e ir e k’aring Saul ni nge cham ko re binaw nem! (1 Samuel 22:13, 18-21) Dariy e maruwar riy ni sap David ku Jehovah ni nge pi’ e ayuw ngak, ma rib mudugil ni ke felfelan’ ko fare athap ko fas ko yam’ ni fan ngak e ‘piin nib mat’aw.’​—Acts 24:15.

¹⁶ Ngiyal’ ney e ku ma gel lanin’dad ni bochan fare athap ko fas ko yam’. Gad manang ndariy ban’en nra rin’ e pi toogor rodad ngodad nra par ndariy n’umngin nap’an. (Matthew 10:28) I dag David nriyul’ e re n’ey u wan’ u daken e thin ni yog ni gaar: “I Somol e be ayuweg be par ndariy ban’en nra buch [rok,] ma dariy taareb e yil u dow nra nt’ar.” (Psalm 34:20) I riyul’ e re thin nem u nap’an Jesus. Yugu aram rogon nni li’ Jesus, machane dariy reb e yil rok “nt’ar.” (John 19:36) Be micheg e Psalm 34:20 ngodad ni yugu demtrug e skeng nra mada’nag e pi Kristiano ni kan dugliyrad nge fare “yugu boch e saf”, ma dabi aw angin ngorad ndariy n’umngin nap’an. Dabin t’ar e yil rorad ni be yip’ fan ban’en.​—John 10:16.

17. Mang gafgow e be sonnag e piin ndarur kalgadngan’rad ma yad be togopuluw ngak e girdi’ rok Jehovah?

¹⁷ Piin nib kireb e ba thil e n’en nra yib ngorad. Dabki n’uw nap’an ma yad ra t’ar wom’engin e n’en nib kireb ni kar yunged. “Kireb e ir e bayi thang e pogofan rok e piin ni yad be ngongliy e kireb; piin ni yad be fanenikay e piin nib mat’aw e bay ni gechignagrad.” (Psalm 34:21) Urngin e piin ni yad ma ul’ul ko togopuluw ngak e girdi’ rok Got e yad ra mada’nag e bin nth’abi gel e gafgow. Nap’an nra yib i m’ug Jesus Kristus, ma “bay ra gafgowgad ko gechig ni ngan pi’ ngorad ni aram e gafgow ni ngar tiyed ndariy n’umngin nap’an.”​—2 Thessalonika 1:9.

18. Mang kanawo’ e ke chuw fare “ulung nib ga’” riy ko gafgow, ma mang e ra yib ngorad boch nga m’on?

¹⁸ Pi tang rok David e yib i mus ko pi thin ni baaray nrayog ni nge pagan’uy ngay ni: “I Somol e ra ayuweg e pogofan rok e pi tapigpig rok; ma dabi gechignag e piin ni yad ra yan ngak ni ngar nafgad nga tan pa’.” (Psalm 34:22) Nap’an ni ke chugur ni nge m’ay fare 40 e duw ni ke gagiyeg David ni Pilung me gaar: “[Got] e ke chuwegneg u fithik’ urngin e gafgow ni yib ngog.” (1 Kings 1:29) Bod rogon David, piin ni bay madgun Jehovah rorad e dabki n’uw nap’an ma bay ra sapgad nga tomur u fithik’ e felfelan’ ni bochan e kan chuwegrad u fithik’ wenegan e denen nge gafgow. Daworri’, ma yooren fapi Kristiano ni kan dugliyrad e ke yog ngorad fare tow’ath nu tharmiy. “Fare ulung nib ga’” u gubin e nam e yad be un ngak e tin ni ka bay e pi walagen Jesus yad be pigpig ku Got u fithik e felfelan’. Re n’ey e bochan ni kar maruweliyed e michan’ rorad ni fan nga gelngin rachaen Jesus ni map’ nga but’. Nap’an fare Biyu’ i Duw nra Gagiyeg Kristus, ma ra yib angin fare biyul ngorad, ni aram e kar flontgad.​—Revelation 7:9, 14, 17; 21:3-5.

19. Mang e n’en ni ke mudugil u wan’ fare “ulung nib ga’” ni ngar rin’ed?

¹⁹ Mang fan nra yib gubin e pi tow’ath ney ngak fare “ulung nib ga” ko piin ni yad ma pigpig ngak Got? Bochan e ke mudugil u wan’rad ni ngar ul’ulgad i dag ni bay madgun Jehovah rorad, mi yad pigpig ngak u fithik’ e tay fan. Arrogon, madgun Jehovah e ma yibnag e felfelan’ ko yafas rodad e ngiyal’ ney ma ma ayuwegdad ni nge ‘yog ngodad e yafos ni ir e bin nriyul’ e yafos’​—yafas ni manemus u lan e bin nib beech e fayleng rok Got.​—1 Timothy 6:12, 18, 19; Revelation 15:3, 4.

Ka Ga Manang?

• Mang fan nib ga’ fan ni nge yib madgun Got ngodad, ma mang e be yip’ fan ni nge yib madgun ngodad?

• Mang e n’en nthingari rin’ madgun Got ko ngongol rodad?

• Mang tow’ath e ma yib ko ngan par ni bay madgun Got u wan’uy?

• Mang e pi n’en ni ke micheg Got ni ma ayuwegdad ni ngad k’adedan’dad?

[Picture on page 18]

Piin ni bay Madgun Jehovah rorad e yad ma ngongol u fithik’ e gonop u nap’an ni kan taleg e machib ko gin ni yad ma par riy

[Picture on page 20]

N’en nth’abi fel’ nrayog ni ngad rin’ed ko piin buguli yoror rodad e ngad weliyed ngorad fare thin nib fel’ u murung’agen fare Gil’ilungun