Mu Pag E Thin Rok Got Nge Pow’iyem

“Thin rom e ba magal ni be pow’iyeg, me ir e tamilang ko kanawo’ ni gu be yan riy.”​—PSALM 119:105.

1, 2. Mang fan ni oren e girdi’ e der pirieg e bin riyul’ e gapas nge felfelan’?

RAYOG ni ngeb ngan’um ba ngiyal’ ni thingar mu fith be’ ko gin ni ngam sor ngay? Sana kam chuchugur ko gin’en ni ngam man ngay machane de mudugil u wan’um ko pa’ ni ngan e kanawo’ e ngam lek. Ara kam sor nga bang ere ba t’uf ni ngam thilyeg e kanawo’ rom. Ere, gathi ba fel’ ni ngam fol rok be’ ni manang e gin’em? Be’ ni aram rogon e rayog ni ayuwegem ngam taw ko gin ni ngam man ngay.

² Bokum biyu’ e duw ni ke yan, ma oren e girdi’ e yad ma gay rogon ni ngar pow’iyed e yafas rorad ndariy e ayuw ku Got riy. Kar pared rorad, machane girdi’ nde flont e ra m’ay e athap rorad. Dabiyog rorad ni ngar pirieged e bin riyul’ e gapas nge felfelan’. Mang fan ni dabiyog ngorad e bin riyul’ e gapas nge felfelan’? Ke pag 2,500 e duw, ni ke yog fare profet ni Jeremiah ni gaar: “De mil fan ngak e girdi’ ni be yan ni nge pow’iy rogon i wuf ay.” (Jeremiah 10:23, NW) Cha’ ni be guy rogon ni nge wuf ay ndariy be’ nib salap ni nge ayuweg e ra pirieg e kankanan’. Riyul’, ni ba t’uf ko girdi’ ni ngan pow’iyrad!

3. Mang fan ni Jehovah Got e ir e th’abi fel’ rogon ni nge pow’iy e girdi’, ma mang e ke micheg?

³ Jehovah Got ni en th’abi tolang e bay rogon ni nge pow’iyey. Mang fan? Ya ri manang nib fel’ rogon rarogon e girdi’. Rib tamilang u wan’ ko uw rogon ni ke oloboch e girdi’ ma kar maloggad. Ku manang ko mang e ba t’uf ni ngar rin’ed mar sulod ko kanawo’ nib fel’. Maku, Jehovah ni ir en Tasunumiy e gubin ngiyal’ ni manang ko mang e rib fel’ ni ngada rin’ed. (Isaiah 48:17) Arfan, nrayog ni pagan’dad ko n’en ni ke micheg ni bay ko Psalm 32:8 ni gaar: “Bay gu fil ngom e kanawo’ ni ir e ngam man riy; bay gog ngom e tin ni ngam rin’ ma bay gu fonownigem.” Dariy e maruwar riy: ni Jehovah e be pi’ e bin th’abi fel’ e kanawo’. Machane uw rogon nra pow’iydad?

4, 5. Uw rogon nrayog ni nge pow’iydad e thin rok Got?

⁴ I yog fare psalmist u lan e meybil rok ngak Jehovah ni gaar: “Thin rom e ba magal ni be pow’iyeg, me ir e tamilang ko kanawo’ ni gu be yan riy.” (Psalm 119:105) Thin rok Got nge tin ma puguran e yira pirieg u lan e Bible, ma rayog ni ayuwegdad ngad gelgad ko pi n’en ni be magawonnag e kanawo’ rodad. Riyul’, nap’an ni gad ra beeg e Bible ma gad pag nge pow’iydad, ma gad ra thamiy e n’en ni ka nog ko Isaiah 30:21 (NW) ni gaar: “Ma telmed e bayi rung’ag bbugithin u fiti keruumed ni be gaar: ‘Ireray fare kanawo’. Gimed e girdi’, mmarod riy.’”

⁵ Machane mu lemnag fare Psalm 119:105 ni be weliy l’agruw ban’en nib peth ko Thin rok Got. Bin m’on, be pow’iyey ni bod e magal. Ngiyal’ ni gad ra mada’nag e magawon ko yu rran, ma kenggin e thin nu Bible e dabisiy nra pow’iydad ngad turguyed ban’en nib fel’ rogon nge dab da awgad ko wup ko re fayleng ney. Bin migid, e puguran rok Got e be gal’ e kanawo’ rodad, ma be ayuwegdad ngada mel’eged e tin bay rogon ko athap rodad ni ngada pired ni manemus u Paradis ni ke micheg Got. Bochan ni ba tamilang e kanawo’, ma rayog ni ngada guyed e n’en nra buch​—ko fel’ ara kireb—​ko n’en ni ngan rin’. (Roma 14:21; 1 Timothy 6:9; Revelation 22:12) Ngada guyed nib fel’ rogon ko uw rogon e Thin rok Got ni bay u lan e Bible nrayog ni nge mang magal ko rif rif u aydad me gal’ e kanawo’ rodad.

“Ba Magal ni Be Pow’iyeg”

6. U tan e mang magawon e rayog ni nge mang thin rok Got e magal ko kanawo’ rodad?

⁶ Gubin e rran, ni gadad ma turguy ban’en. Boch ban’en ni gad ma turguy e ba achig, ma yu ngiyal’ e gad ma mada’nag e skeng ko gafarig rodad, nge yul’yul’, ara rogon ni gad ma par u mathilin. Yira mada’nag e skeng ni aram rogon, ma ba t’uf ni “ngada filed rogon ko nangan’ rodad ni nge yog ni nang e tin nib fel’ nge tin nib kireb.” (Hebrews 5:14, NW) Rogon nra yib e tamilangan’ ko Thin rok Got nge ngan nang fan e kenggin e motochiyel, e ba t’uf ni ngad skulnaged e nangan’ rodad ni nge yog ni ngad dugliyed ban’en nra felfelan’nag Jehovah.​—Proverbs 3:21.

7. Mu weliy ba ngiyal’ nrayog ni nge lemnag reb e Kristiano ni nge chag ko piin yad nga maruwel nde taareb e michan’ rorad.

⁷ Mu lemnag e re n’ey. Gur be’ ni kam ilal ga ma guy rogon ni ngam yul’yul’ ngam felfelan’nag gum’irchaen Jehovah fa? (Proverbs 27:11) Faanra arrogon, ma nga nog nib fel’ murung’agem. Mu susunnag ni ke yog boch e girdi’ ni gimed nga maruwel e ticket ngom ni ngam un ngorad i guy e gosgos. Yad ma felan’ ni gimed ma maruwel u taabang ma yad baadag ni ngam chaggad u gathi ngal’an e maruwel. Sana ga ra lemnag ni gathi yad e girdi’ ni kireb. Sana yad ma dag boch e ngongol rorad nib fel’. Mang e ga ra rin’? Gur bay e riya’ riy ni faan ga ra un ngorad fa? Uw rogon nra ayuwegem e Thin rok Got ngam turguy ban’en nib fel’ rogon ko re n’ey?

8. Mang kenggin e motochiyel u Bible nra ayuwegdad ngad weliyed ni bay rogon ni ngan chag ngak e girdi’?

⁸ Mu lemnag in e kenggin e motochiyel nu Bible. Bin som’on nra yib ngan’um e bay ko 1 Korinth 15:33, ni gaar: “Nchag ngak e girdi’ nib kireb me kireb pangiy nib fel’.” Ran fol ko re kenggin e motochiyel ney ma be dag ni susun ngam palog ko piin nde michan’rad ni gubin ngiyal’? Fulweg riy e danga’. Tin riyul’ riy, e dag apostal Paul ni ri ma lemnag “urngin mit e girdi’,” nib muun ngay e piin nde michan’rad. (1 Korinth 9:22) N’en nib ga’ fan ko Kristiano e ba t’uf ni ngan dag ni gad ma lemnag boch e girdi’​—nib muun ngay e piin nde taareb e michan’ rodad. (Roma 10:13-15) Arrogon, uw rogon ni ngad folgad ko fonow ni “ngad ngongliyed e ngongol nib fel’ ngak urngin e girdi’” ni faan gad ra palog ko girdi’ ni ba t’uf ni ngad ayuweged yad?​—Galatia 6:10.

9. Mang fonow nu Bible nra ayuwegdad ngad pared nib thabthabel u rogon e tha’ u thildad e piin ni gad nga maruwel?

⁹ Machane, bay ban’en nib tamilang nib thil ko fel’ u thilmew be’ u tabon e tamaruwel ko bin nguun chag ngak. Aray e gin ni ke l’ag reb i kenggin e motochiyel u Bible ngay. I ginang apostal Paul e pi Kristiano ni gaar: “Dab mu guyed rogon ni ngam pachgad ngak e piin nde mich Got u wan’rad nguum maruwelgad u taabang nib taareb lanin’med, ya dabiyog.” (2 Korinth 6:14) Mang fan fare bugithin ni “dab mu pachgad ngak”? Mingiyal’ ma tha’ u thilmew be’ ni gimew nga maruwel e de fel’? Thin rok Got, ni fare Bible, e rayog ni nge pow’iyem ko biney e magawon.

10. (a) Uw rogon ni mel’eg Jesus e piin nge chag ngorad? (b) Mang boch e deer nra ayuweg be’ u rogon nra mel’eg e piin nge chag ngorad?

¹⁰ Mu lemnag e ngongol rok Jesus, ni ka nap’an ni sum e girdi’ ma ri yad ba t’uf rok. (Proverbs 8:31) Nap’an ni immoy u fayleng, ma rib fel’ e tha’ u thilrad pi gachalpen. (John 13:1) Ki “t’ufeg” fare moon ni de puluw rogon e ayuw ni i pi’ e tayugang’ ko teliw ngak. (Mark 10:17-22) Machane i dag Jesus rogon ni mel’eg e piin ni nge chag ngorad. De chag ko girdi’ ni gathi ri yad baadag ni ngar rin’ed e tin ni m’agan’ e Chitamangin ngay. Ba’ ba ngiyal’ ni gaar Jesus: “Gimed e pi tafager rog, ni faan gimed ra rin’ e tin ni kug ning chilen ngomed.” (John 15:14) Riyul’, rayog ni fel’ thilmew be’ ni gimew nga maruwel. Machane, am fithem: ‘Baadag e cha’ ney ni nge rin’ e tin ke ning Jesus chilen? Baadag e cha’ ney ni nge fil murung’agen Jehovah, ni faanem ni be pow’iydad Jesus ni ngan liyor ngak? Ngongol ko cha’ ney taareb rogon ko ngongol rog ni gag e Kristiano fa?’ (Matthew 4:10) Nap’an ni ga ra non ngak e piin ni gimed nga maruwel ni ga be fanay kenggin e motochiyel nu Bible, ma rayog ni gagiyel e fulweg ko pi deer ney.

11. Mu weliy boch e kanawo’ nrayog ni nge pow’iydad e thin rok Got riy.

¹¹ Boor e kanawo’ ni bay ni Thin rok Got e rayog ni bod ba magal ko kanawo’ rodad. Bod ni, reb e Kristiano ndariy e maruwel rok ma kan ognag reb e maruwel ngak ni rib gur. Machane, boor e tayim nib t’uf riy, ma faanra ra un ko fare maruwel, ma dabkiyog ni nge un nga boch e muulung ko Kristiano ma dabkiyog ni nge rin’ boch e maruwel ni bay rogon ko bin riyul’ e liyor. (Psalm 37:25) Sana reb e Kristiano e kan wawliy ni nge guy boch e gosgos nib tamilang nib togopuluw nga kenggin e motochiyel nu Bible. (Efesus 4:17-19) Maku reb e ba papey nra damumuw ko oloboch ni ma rin’ boch e walag. (Kolose 3:13) U fithik’ urngin e pi n’ey, ma ngada paged e Thin rok Got nge pow’iy e kanawo’ rodad. Riyul’, ni faan gad ra fol ko kenggin e motochiyel nu Bible ma ra fel’ rogodad ko ngiyal’ ni gad ra mada’nag e magawon ko yafos. Thin rok Got e “ma fil e tin nib riyul’ e thin ngodad, ma be yal’uweg e tin be oloboch e girdi’ riy, ma be fulweg e girdi’ ko ngongol nib fel’, ma be fonownag e girdi’ u rogon e ngongol ni ngar pired riy ni ir e mmat’aw u mit Got.”​—2 Timothy 3:16.

“Ba Magal ko Kanawo’ Rog”

12. Uw rogon ni ma tamilangnag e Thin rok Got e kanawo’ rodad?

¹² Psalm 119:105 e yog ni Thin rok Got e rayog ni tamilangnag e kanawo’ rodad, ma ra gal’ e kanawo’ nga m’on. Gad manang ko mang e ra buch ko gabul nge langlath, ya Bible e be weliy fan rarogon e magawon ko fayleng nge mang e bayi buch. Arrogon, gad manang ni gad be par ko “tin tomren e rran” ko re m’ag ni kireb ney. (2 Timothy 3:1-5) Yira nang ko mang e bay nga m’on ma ra ayuwegdad ko uw rogon ni nguuda pared e chiney. Ke yoloy apostal Peter ni gaar: “Faanra urngin ban’en ma bay ni kirebnag ni ara’ rogon, me ere mit i mang girdi’ e susun e ngam boded? Pangimed e nge par nib thothup ma kam pied gimed nga pa’ Got, ma gimed be sonnag e chirofen nem, ni ir e Rran rok Got!”​—2 Peter 3:11, 12.

13. Uw rogon ni be m’ug ko lem rodad nge par rodad ni yibe gurnag e machib ko ngiyal’ ney?

¹³ Lem rodad nge rogon e par rodad e nge m’ug nib mich u wan’dad ni “re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay.” (1 John 2:17) Ra ngan fol ko fonow nu Bible ma ra ayuwegdad ngad turguyed ban’en u fithik’ e gonop ni fan ko pi n’en ni gad be nameg. Ni bod ni, yog Jesus: “Ere ngam m’oneged u wan’med e gagiyeg rok Got nge tin nib m’agan’ ngay ni ngam rin’ed, ma aram me pi’ urngin e pi n’ey ngomed.” (Matthew 6:33) Gad ba felfelan’ ya kada guyed boor e fel’ yangaren ni ke mich u wan’rad e thin rok Jesus kar yoornaged e tayim rorad ko machib! Ma boch​—ni ba muun ngay boch e tabinaw—​ni kar ognaged yad ni nga ranod nga reb e nam ni ba t’uf e ayuw ko pi tamachib ko fare Gil’ilungun riy.

14. Uw rogon ni ke ga’nag reb e tabinaw ni Kristiano e machib ni ur ted?

¹⁴ Mu lemnag reb e tabinaw ni yad aningeg i Kristiano ni kar chuwgad u Meriken ka ranod ra pired nga Dominican Republic ni ngar maruwelgad u reb e ulung ni re binaw nem e 50,000 e girdi’ riy. Re ulung ney e bay 130 e tamachib ko Gil’ilungun riy. Machane, nap’an e April 12, 2006, ma 1,300 e girdi’ ni un ko Puguran ko yam’ ni tay Kristus! Woldug u rom e “ke el ni ke taw nga nap’an ni ngan t’ar” ma tomuren lal e pul, ma fare matam, nge matin, nge fare pagel, nge fare rugod e kar filed e Bible ngak 30 e girdi’. (John 4:35) Ke weliy fare Matam ni gaar: “Fare ulung e bay 30 e walag ni pumoon nge ppin riy ni kar bad ngaray ni ngar pied e ayuw. Gonap’an 20 e yib u Meriken, ma tin ni ka bay e yib u Bahamas, ngu Canada, ngu Italy, ngu New Zealand, nge Spain. Kar bad ya ri yad baadag ni ngar uned ko machib ma bochan e re n’em ma ke gelnag e pi walag u rom.”

15. Mang boch e tow’ath ni ke yib ngom nbochan ni kam mon’eg Gil’ilungun ko yafas rom?

¹⁵ Arrogon, boor e girdi’ ndabiyog ni nga ranod nga boch e nam ni ba t’uf e ayuw riy. Machane piin nrayog rorad​—ara piin nrayog ni ngar pithiged puluwrad ngar uned ko re maruwel ney—​e ba mudugil nrayog boch e tow’ath ngorad ni bochan ni yad be un ko machib ni aray rogon. Demtrug e gin ga ra machib riy, ma ga ra par ni gab felfelan’ ni ga be pigpig ku Jehovah u polo’ i gelngim. Faan gimed ra mon’eg Gil’ilungun ko yafas romed, ma ke micheg Jehovah “nra bing mban e tharmiy nge puog nga dakenmed e pi n’en nib fel’ nge pag e fol riy.”​—Malaki 3:10.

Fel’ Rogon ko Fonow rok Jehovah

16. Uw rogon nra fel’ rogodad ni gad ra pag e thin rok Got nge pow’iydad?

¹⁶ Kad guyed ni thin rok Jehovah be pow’iydad u l’agruw e kanawo’. Ir e magal ko kanawo’ rodad, ma ma ayuwegdad nga u darod ko kanawo’ nib fel’ ma ma pow’iydad ko ngiyal’ ni ngad turguyed ban’en. Ma gal’ e kanawo’ rodad, nge yog ni ngada guyed nib tamilang ko mang e bay nga m’on. Re n’em, e ra ayuwegdad ni ngan fol ko fonow rok Peter ni gaar: “Mu fal’eged rogon lanin’med ni ngam ngongolgad. Mi gimed tiyan’med ngarim l’agedan’med ko tow’ath ni yira pi’ ngomed ko ngiyal’ nra yib i m’ug Jesus Kristus.”​—1 Peter 1:13.

17. Uw rogon nra ayuwegdad e fol Bible ni ngada folgad ko fonow rok Got?

¹⁷ Dariy e maruwar riy ni ma pi’ Jehovah e fonow. Deer, e Ga ra fol riy fa? Ra ngan nang fan e fonow ni ke pi’ Jehovah, ma nguum beeg bang ko Bible u gubin e rran. Ma ga fal’eg i lemnag e n’en ni kam beeg, ngam guy rogon ngam nang fan e n’en nib m’agan’ Jehovah ngay, ma ga lemnag rogon e n’en ni kam beeg ni ngam fol riy. (1 Timothy 4:15) Ngemu’ ma ga fanay “gelngim i weliy fan ban’en” ko ngiyal’ ni ngam turguy ban’en.​—Roma 12:1, NW.

18. Nap’an ni gad ra pag e Thin rok Got ni nge pow’iydad, ma mang tow’ath e rayog ngodad?

¹⁸ Faanra ngada paged, fare kenggin e motochiyel ni kad pirieged ko Thin rok Got nge tamilangnagdad ma ra pow’iydad ko ngiyal’ nib t’uf ni ngad turguyed e gin ngad sor gad ngay. Rayog ni nge pagan’dad ko Thin rok Jehovah ni kan yoloy “ma ra pi’ e gonop ko piin ndariy rorad.” (Psalm 19:7) Nap’an ni gad ra pag e Bible nge pow’iydad, ma ra beech e nangan’ rodad nge fel’ rogon nbochan ni gad ma felfelan’nag Jehovah. (1 Timothy 1:18, 19) Faanra gad ra pag e Thin rok Got ni nge pow’iydad u gubin e rran, ma ra tow’athnagdad Jehovah ko yafos ni manemus.​—John 17:3.

Ka Ga Manang?

• Mang fan ni ri ba ga’ fan ni ngan pag Jehovah ni nge pow’iydad?

• Uw rogon ni nge mang thin rok Got e magal ko kanawo’ rodad?

• Uw rogon ni nge gal’ e thin rok Got e kanawo’ rodad?

• Uw rogon nra ayuwegdad e fol Bible ni ngad folgad ko fonow rok Got?

[Picture on page 15]

Wuin e de fel’ ni ngan chag ko cha’ nde taareb e michan’ rodad?

[Picture on page 16]

Piin ni yad ba pach Jesus e yad ma rin’ e tin nib m’agan’ Jehovah ngay

[Pictures on page 17]

Be m’ug ko yafos rodad ni gad be mon’eg fare Gil’ilungun fa?