Ban’en ni Yibe Ning Ni Polo’ E Fayleng

AM LEMNAG bokum miriay e milyon, i yan ko bilyon, e girdi’, ni yad be ning taa ban’en. Yad be ning ngak e en nth’abi tolang u palpalth’ib ni nge pi’ e n’en ni yad be ning. Machane, ri buchuuw i yad e manang ko mange re n’em ni yad be ning. Gur, riyul’ nra buch ban’en ni aram rogon? Rogon riy, e be buch ni gubin e rran. Mange be ning e pi girdi’ ney? Fare Gil’ilungun Got ni nge yib!

Kan susunnag, ni bay gonap’an 37,000 raba’ e teliw ni yad ma yog ni yad e Kristiano ni kar ted ni Jesus Kristus e Tayog e Thin rorad. Ba pag l’agruw e bilyon girdien e yurba’ i teliw nem. Ri boor i yad e ma meybil nima fek fare meybil ni Chitamangimad ara Meybil Rok Somol. Ga manang ere meybil ney, fa? I fil Jesus ngak pi gachalpen ni nguur meybilgad ni aray rogon: “Chitamangimad ni ga bay u tharmiy, ngan mathangelwolnag fithingam. Me yib gil’ilungum ngomad. Min rin’ e tin nib m’agan’um ngay u fayleng, ni bod rogon u, tharmiy.”​—Matthew 6:9, 10, New World Translation.

Ke yan boch e chibog e chiney ni piin nima fek ere meybil nem, e yugu yad ma sul u daken u lan e galesiya rorad. Maku ke mit ngorad ni yad ma sul u daken u tabinaw rorad ara be’ nge be’, ko ngiyal’ nib fel’ nge ngiyal’ ni bay e magawon. Yad ma yog e pi thin nem u fithik’ e yul’yul’ ni kar tedan’rad ngay. Ma boch e ke mit ngak nima un ngay nder lemnag fan. Gothon e ulung ni Kristendom e gathi kemus ni goo yad e yad be athapeg ma yad be yibilay ni ngeb Gil’ilungun Got.

Taareb Rogon ko N’en ni Ma Ning e Teliw ni Gathi Kristiano

Reb e meybil ko yam’ ni goo yimanang ko teliw rok piyu Jew u nap’an nra yim’ be’ nib chugur ngorad e Kaddish. Yugu aram rogon nib achig e n’en nima rin’ ko yam’ ara kireban’, ma ba ga’ ni yima yog u nap’an e kireban’ ko yam’. Fare meybil e be man nibe gaar: “Manga yigi sunmiy [Got] Gil’ilungun nga lan e yafas rom . . .  nib gur.” Ku reb e meybil u reb e naun ntagil’ e liyor kakrom e be yog e athap ko Gil’ilungun fare Messiah ni yib ko tabinaw rok David.

Boch e piin ni gathi Kristiano e kar pirieged ni fare n’en ni murung’agen Gil’ilungun Got e ba manigil. Rogon ni yog fare The Times of India, e be’ nib gilbuguwan ko bin 19 e chibog nib ga’ ko teliw nu India ni baadag ni nge fal’eg thilin e Hindu, nge Muslim, nge michan’ ko Kristiano e gaar: “Bin nriyul’ u gil’ilungun Got e rayog ni nge riyul’ ni faanra nge peth e ngal nge ngek nga taabang.” Ma fare ga’ ko skul ko Islam u Strathfield, Australia, e dawori n’uw nap’an nike yol nga ba shimbung ni gaar: “Bod rogon urngin e Muslim, ba mich u wan’ug [nra] sul Jesus Kristus nge fal’eg e bin nriyul’ e Gil’ilungun Got.”

Dariy e maruwar riy, ni piin nibe athapeg ma be ning fare Gil’ilungun Got e ke pag bokum e bilyon oren u gubin. Machane mu lemnag ban’en nriyul’ nra buch.

Sana ga manang ni gamad e Pi Mich Rok Jehovah, e gamad ma fal’eg e pi babyor ney, ma gamad be yan u mit e tabinaw i yan ko gin ni ga be par riy ni gamad be weliy ko girdi’ murung’agen e Bible. Nap’an e re babyor ney, ma gamad be rin’ ere maruwel ney u fayleng iyan u lan 236 e nam nike pag 400 mit e thin. Kenggin e machib romad e Gil’ilungun Got. Fithingan ere ke babyor ney e Fare Wulyang Ntagil’ E Damit Ni Be Weliy Morngaagen Gil’ilungun Jehovah. Gamad ma fith e girdi’ ko yad ma ning ere Gil’ilungun nem ko meybil rorad fa. Ma boor i yad e ka rogned ni yad ma rin’. Ma, faan yira fith ko mange re Gil’ilungun nem, ma boor i yad e ma gaar, “Dagnang,” ara fulweg rorad e de tamilang ma de mudugil.

Mang fan ni boor e girdi’ nima ning Gil’ilungun Got ndar nanged fan? Bochan ni Gil’ilungun Got e ban’en ni gathi rib tamilang, fa? Danga’. Ya Gil’ilungun Got e rib tamilang ni be yog e Bible. Maku murung’agen fare Gil’ilungun Got ni be yog e Bible e rayog ni yibnag e bin nriyul’ e athap ngom ko ngiyal’ ney ni ke yoor e magawon. Bin migid e article e gadra guy riy rogon nibe fal’eg i weliy e Bible ere athap nem.