Mu Ayuweg “Fare T’ufeg Ni Immoy Rom Ko Som’on”

“Mu ayuweg e n’en ni ba’ rom.”​—REV. 3:11.

1, 2. Uw rogon e lem rom ko ngiyal’ ni mich u wan’um ni n’en ni ga be fil ni murung’agen Jehovah e ba riyul’?

KA GA manang, rogon e som’on nim fil murung’agen e tow’ath rib fel’ ni ma ognag Jehovah ngak e girdi’ ni ma fol? Faanra um moy u reb e teliw kafram, ma uw rogon lanin’um u nap’an nni weliy ngom ko thin nu Bible e tin nib m’agan’ Got ngay ara pi n’en ni um fil ni immoy nib mo’maw’ ni ngan nang fan e kan tamilangnag? Sana kam nang ni kan bannagem. Machane chiney e uw fanam felfelan’ ni kan tamilangnagem! Faanra chuguliyem e gallabthir ni Kristiano, ma ka ga manang rogon e lem rom ko ngiyal’ ni mich u wan’um ni n’en ni kam fil u murung’agen Jehovah e ba riyul’ ma kam lemnag ni ngam fol riy fa?​—Rom. 12:2.

² Boor pi walagem u lan e ulung ko Kristiano ni yad ra yog ngom ni kar felfelan’gad, ma kar chugurgad ku Jehovah ma yad be pining e magar ngak ni ke fekrad. (John 6:44) Felfelan’ rorad e ke k’aringrad ni ngar uned ko pigpig rok e Kristiano. Kar suggad ko felfelan’ ni kar adaged ni nga rogned rogon e lem rorad ngak urngin e girdi’. Kam pirieg ban’en ni aram rogon fa?

3. Mang e n’en ni ke buch ko ulung nu Efesus ko ngiyal’ ni pi’ Jesus e thin nge yan ngorad?

³ Nap’an ni be non Jesus ko ulung ko Kristiano nu Efesus ko bin som’on e chibog, me weliy fare thin ni “fannag t’uf rom ko som’on.” Piyu Efesus e boor fel’ngirad, machane fare t’ufeg ni ur daged ngak Jehovah e ke war. Arfan ni yog Jesus ngorad ni gaar: “Gu manang e tin ni kam rin’; gu manang gelngin e maruwel ni kam tay nge rogon e gum’an’ ni kam tay. Gu manang ndabiyog ni ngam k’adan’um rok e girdi’ nib kireb, ma kam skengnag e piin ni be lungurad e yad e apostal machane gathi yad, ma kam pirieg ni yad be lifith l’ugunrad. Gab gum’an’, ma ke yoor e gafgow ni keb ngom kam gafgow riy ni bochag, ma dawor mpagem. Machane baaray e n’en ndabug rom: da kug t’uf rom e chiney ni bod fanag t’uf rom ko som’on.”​—Rev. 2:2-4.

4. Mang fan ni thin rok Jesus ni yan ngak piyu Efesus e kab puluw ko ngiyal’ ney?

⁴ Fonow rok Jesus ngak piyu Efesus, nge ku tin baaram e ulung ni non ngorad u lan e babyor ni Revelation e ba m’ag ko pi n’en nni guy ni buch ba ngiyal’ u fithik’ e Kristiano ni kan dugliyrad ni ka nap’an e duw 1914 i yib. (Rev. 1:10) Ke mada’ ko chiney maku rayog ni kura mul rok boch e Kristiano “fare t’ufeg ni immoy [rorad] ko som’on” ni fan ngak Jehovah nge fan ko tin riyul’ ko Kristiano. Ngada lemnaged e re n’em, ma gad fal’eg i guy ko uw rogon ni aram e ngam lemnag rogon e n’en ni buch rom, me yog nim par nib baud lanin’um me gelnag e t’ufeg nge fare pasig nib ngom ko som’on ni fan ngak Got nge tin riyul’.

Mang e Micheg e Tin Riyul’ Ngom?

5, 6. (a) Mang e n’en nra reb e Kristiano ma nge micheg nga laniyan’? (b) Mang e micheg ngom ni Pi Mich rok Jehovah e yad be fil e tin riyul’ ko girdi’? (c) Mang e ra ayuweg be’ nge beechnag bayay e t’ufeg rok ni immoy ko som’on?

⁵ Urngin e girdi’ ni ma ognag ir ngak Jehovah e som’on ma nge “micheg” nga laniyan’ e “tin nib m’agan’ Got ngay ni tin nib fel’, nib fel’ u wan’.” (Rom. 12:1, 2) Bayang riy, e ba muun ngay ni ngan fil e tin riyul’ nu Bible. N’en ni micheg ngan’ be’ ni Pi Mich rok Jehovah e yad be fil ko girdi’ e tin riyul’ e rayog ni nge thil ko n’en ni micheg ngan’ boch e girdi’. Boch e girdi’ e ma yib ngan’rad ni thil e lem rorad u nap’an nra beeged fithingan Got u Bible ara ngiyal’ nra nanged e tin riyul’ u rarogon e yam’. (Ps. 83:18; Ekl. 9:5, 10) N’en ni ke fel’ u wan’ boch e girdi’ e t’ufeg ni bay ko tirok Jehovah e girdi’. (John 13:34, 35) Maku boch e girdi’ e fan fare n’en ni dab ni mang bang ko fayleng. Kar nanged ni tin riyul’ e Kristiano e dab ra uned ko ngongolen e am ara mahl ko pi nam.​—Isa. 2:4; John 6:15; 17:14-16.

⁶ Boor e girdi’, ni fan e pi n’ey nge ku boch ban’en e k’aring e t’ufeg rorad ngak Got ko som’on. Mu par ngam lemnag e n’en ni micheg e tin riyul’ nga lanin’um. Gur be’ nib thil rarogom nge ngongolem, ere tapgin ni ke t’uf Jehovah rom ma ke mich u wan’um e pi n’en ni ke micheg e rayog ni thil ngak boch e girdi’. Ba ga’ ni bod, ni pi n’en ni fan me thil e lem rom e ka aram rogon ngom e chiney ni bod rogon ko som’on nim fil e pi n’em. Tin riyul’ e dawori thil. Arfan ni ga ra sul ngam lemnag e pi n’em nge tafinay riy ma rayog ni ki beechnag e t’ufeg rom ko som’on ni fan ko tin riyul’.​—Mu beeg e Psalm 119:151, 152; 143:5.

Mu Gelnag e T’ufeg Rom ko Som’on

7. Mang fan nib t’uf ni ngada gelnaged e t’ufeg ni immoy rodad ko som’on ni fan ko tin riyul’, ma uw rogon ni ngad rin’ed?

⁷ Sana boor ban’en ni thil ko yafas rom u nap’an nim ognagem ngak Jehovah. T’ufeg rom ko tin riyul’ e rib ga’ fan, machane ra i n’uw nap’an i yan, ma ra t’uf rom reb e t’ufeg nib gel ni nge yog nim mada’nag boch e magawon nra skengnag e michan’ rom. Machane, ke ayuwegnem Jehovah. (1 Kor. 10:13) Arfan, ni pi n’en ni um mada’nag ko pi duw nem e ri kub t’uf rom. Ke ayuwegem ni ngam gelnag fare t’ufeg nib ngom ko som’on, ma ke mang reb e kanawo’ nrayog riy ni ngam micheg ngom e tin nib m’agan’ Got ngay ni tin nib fel’, mab fel’ u wan’.​—Josh. 23:14; Ps. 34:8.

8. Uw rogon ni yog Jehovah ngak Moses ko ir mini’, ma uw rogon ni nang yu Israel Got nib fel’ rogon?

⁸ Ra nog rogon, ma ngan lemnag e gin ni pirieg yu Israel ni ke taw rarogorad ngay u nap’an ni yog Jehovah e n’en ni ke m’agan’ ngay ni nge chuwegrad ko sib u Egypt. I yog Got ko ir mini’ ngak Moses, ni gaar: “I gag e en ni gag.” (Ex. 3:7, 8, 13, 14) Fan e re n’ey, e be yog Jehovah ndemtrug ban’en ma ra rin’ ni fan ni nge chuweg e girdi’ rok ko sib. Tin ni migid ni buch nge rogon nib t’uf, e guy yu Israel Jehovah ni dag bochi rarogon ni bod ni​—Gubin ma Rayog Rok, ba Tapuf Oloboch, Tagagiyeg, ma Ma Chuwegey ko Gafgow, Be’ nib Cheg ko Mahl, ba Tapi’ e Tin nib T’uf.​—Ex. 12:12; 13:21; 14:24-31; 16:4; Neh. 9:9-15.

9, 10. Mang rarogon e miti n’en nrayog ni ayuweg be’ nge nang Got, ma mang fan nib fel’ ni nguun lemnag e pi n’em?

⁹ Rarogom e ba thil ngak piyu Israel kakrom. Yugu aram rogon, ma dabisiy ni bay boch ban’en ni kam pateg ni ke micheg ngom e n’en baadag Got rom, ni ke gelnag e michan’ rom. Sana ke micheg Jehovah ni ir e Tapi’ e Tin nib T’uf, ma Ma Fal’eg Lanin’uy ara ba Sensey. (Mu beeg e Isaiah 30:20b, 21.) Ara sana kam pirieg e fulweg nib tamilang u reb e meybil. Rayog ni kam pirieg e magawon me yib reb e walag ni Kristiano nge pi’ e ayuw ngom. Ara ga be fil e Bible mag pateg reb e thin nu Bible nib puluw ko n’en ni ga be lemnag.

¹⁰ Faanra ngam fal’eg i weliy e pi n’en ni ke buch nem ngak boch e girdi’, ma bay boch ndabi fel’ u wan’rad. Ya yira lemnag, ma pi n’em e gathi bogi maang’ang. Machane ga be guy ni bogi n’en nrib ga’ fan. Arrogon, Jehovah e ke micheg nra mang e n’en rib t’uf ni nge mang ni fan ngom. Mu lemnag e pi duw ni ke yan ni kam nang e tin riyul’. Rayog nib ngan’um yu ngiyal’ ni gathi taab yay ni kam thamiy rom e ayuw rok Jehovah u nap’an e yafas rom, fa? Faanra arrogon, ma ga ra lemnag e pi n’em nge rogon e n’en ni rin’ ngom ma rayog ni pug lanin’um ko t’ufeg ngak Jehovah ni immoy rom ko ngiyal’ nem. Mu tay u wan’um e pi n’em ni i buch. Ma um fal’eg i lemnag. Ya aram e mich riy ni be lemnagem Jehovah ma dariy be’ nrayog ni nge talegnem ni nge dab ki mich u wan’um e re n’em.

Mu Fal’eg i Guy Rarogom

11, 12. Faanra ke war e michan’ rok reb e Kristiano, ma mang tapgin, ma mange fonow ni pi’ Jesus?

¹¹ Faanra dakumur thamiy e t’ufeg rom ngak Got nge tin nriyul’ ni bod rogon ni um rin’ ko som’on, ma re n’ey e gathi bochan e bay ban’en ni ke thil rok Got. Jehovah der ma thil. (Mal. 3:6; Jas. 1:17) Immoy ni be lemnagem ko ngiyal’ nem ma kabe lemnagem e chiney ni ka bod ko som’on. Ere uw rogon nfaanra bay ban’en ni gomanga ke thil ko tha’ u thilmew Jehovah? Gur, rayog nim lemnag ni bochan e ke gel e mochuch ngom make tomalnigem e magafan’? Sana kafram e um meybil nib gel, mu um fil e Bible nib elmerin mab ga’ ni gama fal’eg i lemnag fan. Gathi um moy ni gab pasig ko machib ma gama un ko muulung ni gubin ngiyal’ ma gathi ka aram rogon e chiney?​—2 Kor. 13:5.

¹² Rayog ni nge dab mu nang e pi n’em nib mom ni ma buch, machane faan gara nang, ma mang e n’en ni ke k’aring? Gur pi n’en ni mat’awum ni gabe lemnag, ni bod e ngam yognag e tin nib t’uf ni fan ko tabinaw rom fa ngam ayuweg e m’ar rom ara boch ban’en ni aram rogon e ke achig i lemnag rom fare rran rok Jehovah nib machreg ni be chugur? I yog Jesus ngak e pi apostal rok ni gaar: “Mu ayuwgad, ma dab mpaged gimed nguum pired ni ba ga’ ni mur ni ke pag rogon nge muun rrum e gimed be maruweliy, nge pi n’en ni ma magafan’uy ngay ko biney e tamilang, ya richey mi gimed da’da’ ko re Rran nem ni ke taw ngomed. Ya ra taw ngak urngin e girdi’ nu fayleng ni bod rogon ba wup ni pangthal. Um pired ni kam fal’eged rogomed ma gimed be meybil ni gubin ngiyal’ nge yib gelngimed nge yog ni mmarod u fithik’ urngin e pi n’ey ni bayi m’ug ndabi buch ban’en romed.”​—Luke 21:34-36.

13. Mange n’en ni taarebrogonnag James ko Thin rok Got?

¹³ James ni ma yoloy e pi n’en ni kan thagthagnag nga Bible e i ta’ ir ngak e piin ni yad nib michan’rad ni ngar yul’yul’gad ngar yaliyed yad nga fithik’ e tamilang ko thin rok Got. Yoloy James ni gaar: “Dab mbanniged gimed ni ke mus ni nguum motoyilgad ko thin rok; ya ngam maruwelgad ngay. Ya en nra motoyil ko thin rok Got ma dabi maruwel ngay e bod be’ ni changar nga lan mit e thirek nge guy rogon yaan. Me yaliy ir nge mu’ me yan, ma ka chingiyal’ nem me pag talin rogon yaan. Machane en nra fal’eg i yaliy ir nga fithik’ fare motochiyel nrib yal’uw ni ir e ma pithig e girdi’ ko kireb, me tiyan’ ngay ma gathi ke mus ni motoyil ngay me pag talin, ya be maruwel ngay cha’nem ni aram rogon e Got e ra ayuweg ko tin ni be rin’.”​—Jas. 1:22-25.

14, 15. (a) Uw rogon nra ayuwegem e Bible nge mon’og rarogom ko tirok Got? (b) Mang e pi deer nsusun e ngam fal’eg i lemnag?

¹⁴ Be’ e ra fanay e thirek nge nang ni ke fel’ yaan u mit e girdi’. Ni bod rogon, nfaanra guy be’ ni neck tie rok e de fel’ rogon, me fal’eg rogon. Ma faanra guy be’ nib ppin lolugen nib wagagey, me fal’eg rogon. Ere ku taareb rogon, ni thin nu Bible e ra ayuwegdad ngad fal’eged i guy rarogodad. Nap’an ni gadra taarebrogonnagdad ko n’en nibe yog e Bible nthingar da boded, ma aram e gad be fanay ni bod bangi thirek. Machane, mang angin ni ngan sap nga thirek nfaanra dabda fal’eged e n’en ni kad guyed nde fel’ rogon? Gad ba llowan’ ni faan gadra maruweliy e n’en ni kad guyed ko “motochiyel nib yal’uw” rok Got, “ma gad mang e piin ni be maruwel ngay.” Arfan ni cha’ nra naab ngay ni t’ufeg rok ngak Got nge tin nriyul’ e ke war e rib fel’ ni nge fith ir ko pi deer ni baaray: Mang mochuch e gube pirieg, ma mange gube rin’ ngay? Mange ug rin’ ngay kafram? Gur bay ban’en ni ke thil? Faan gara fal’eg i yaliyem meb i m’ug boch ban’en nde fel’ rogon, ma ri dab mu fek owchem riy. Faanra ba t’uf ni ngam fal’eg rogon boch ban’en ma dab kum pag, thingar mu rin’ nib papey.​—Heb. 12:12, 13.

¹⁵ Re n’em ni ngan fal’eg i lemnag e ku rayog ni ayuwegem ngam ta’ boch ban’en nib fel’ ni ngam nameg ni fan ko mon’og ko tirok Got. Apostal Paul e pi’ e fonow ni kan yiiynag ngak Timothy ni yow nga maruwel ni fan e nge mon’ognag e machib rok. I tay Paul ir ngak e re pagel nem ni gaar: “Um rin’ e pi n’ey ma ga tiyan’um ngay, nge yog ni guy e girdi’ ni gubin ni ga be mon’og i yan.” Ku er rogodad nra fel’ rogodad ni faan gadra tiyan’dad ko tamilang ko thin rok Got ma rayog ni ngad mon’oggad.​—1 Tim. 4:15.

16. Mang e riya’ e thingar mu tay u wan’um u nap’an ni gabe fal’eg i yaliyem nga fithik’ e tamilang nu Bible?

¹⁶ Nap’an ni gara yul’yul’ i fal’eg i yaliy rarogom mab mudugil nra m’ug boch ban’en ni kam meewar riy. Re n’em e rayog ni k’aring be’ nge mulan’, machane ri dab mu pag e re n’em nge buch rom. Ya n’en nrogon, e fan ni ngan fal’eg i yaliy rarogoy e ngan guy e gin nib t’uf ni ngan yal’uweg riy. Satan e ba mudugil ni baadag be’ nib Kristiano ni nge lemnag ndakuriy fel’ngin ni bochan e de flont. Tin riyul’ riy, e ka nog ni ke dabuy Got urngin e n’en ni yibe rin’ ko pigpig ngak. (Job 15:15, 16; 22:3) Reb e ban e ram ni i tay Jesus ir ngay nga i yog nde riyul’, ya Got e ma lemnag nib ga’ fadad ni be’ nge be’. (Mu beeg e Matthew 10:29-31.) Gara nang ndam flont ma susun e ngari k’aringem ngam sobut’an’nigem ngam dugliy ni ngam mon’og ko tin nib fel’ u daken e ayuw rok Jehovah. (2 Kor. 12:7-10) Faanra m’ar ara pilibthir e aram tapgin ni bay boch ban’en ndabkiyog rom ma n’en nrayog ni ngam rin’ e ngam tay ni ngam nameg e tin nrayog rom, ma dab mu tal ara mu pag e t’ufeg rom nge meewar.

Boor Ban’en ni Ngan Pining e Magar ni Bochan

17, 18. Mang fel’ngin nra yib ni ngan gelnag e t’ufeg ni immoy ko som’on?

¹⁷ Pi n’en nib ga’ fel’ngin nra yib ni faan gara ulul i ubung fare def ko t’ufeg ni immoy rom ko som’on. Rayog ni nge ilal e tamilangan’ rom u murung’agen Got nge felfelan’ rom ni bochan e be pow’iyem u fithik’ e t’ufeg. (Mu beeg e Proverbs 2:1-9; 3:5, 6.) “Fol ni gu be tay [ko motochiyel rok Jehovah] e be yib puluwon ngog,” aray rogon ni yog fare psalmist. “Tin ni i yog ni murung’agen Somol e ba riyul’ ma ma pi’ e gonop ngak e piin ndariy rorad.” Maku reb, e “ba felan’ e piin ndarur rin’ed e kireb ni piin ni yad be yan u tan e motochiyel rok Jehovah.”​—Ps. 19:7, 11; 119:1, NW.

¹⁸ Ba mudugil nra puluw u wan’um ni boor ban’en ni bay nib fel’ ni ngam felfelan’ ngay. Kam nang fan e n’en ni bay u tan e pi n’en ni be buch u fayleng. Ma be yib fel’ngin e ayuw rok Got ngom nge rogon ni be tiyan’ Got ngak e girdi’ rok e chiney. Maku dariy e maruwar riy ni kam felfelan’ ni ke girngiyem Jehovah ko ulung rok nu fayleng ma ke pi’ mat’awum kam mang reb e Pi Mich rok. Mu theeg e pi tow’ath rom! Faanra ngam yoloy nga but’, ma sana bangi babyor nib n’uw. Ra um rin’ e re n’em ma dariy e maruwar riy nra ayuwegem ngam fol ko fare fonow ni gaar: “Mu ayuweg e n’en ni bay rom.”​—Rev. 3:11.

19. Mang e n’en nib ga’ fan ni nge par nib fel’fel’ rogom ko tirok Got ban’en ni kub chag ko ngam tiyan’um ko tha’ u thilmew Got?

¹⁹ Ngaum tiyan’um nga rarogon ni ke ilal e michan’ rom ni ka aram nap’an i yib e kemus ere n’en nra ayuwegem ngam ayuweg e n’en ni bay rom. Re ke babyor ney e ke sul i sul u daken boch ban’en nib ga’ fan ni ngar ni fal’eg i tiyan’uy ngay min par nib fel’fel’ rogoy ko tirok Got ban’en. U fithik’ e pi n’em e ba muun e meybil ngay, nge ngan un ko muulung ma yibe un ko tin ni yibe rin’ riy, ma ngan pasig ko machib ni yibe tay. Pi n’ey e ra ayuwegem ngam ulul i beechnag mag baudeg lanin’um mag gelnag e t’ufeg rom ni immoy ko som’on.​—Efe. 5:10; 1 Pet. 3:15; Jude 20, 21.

Uw Rogon ni Ga Ra Fulweg?

• Uw rogon ma fan nib t’uf Jehovah rom e rayog ni nge mang ban’en nra i pi’ e athamgil nga lanin’um e chiney?

• Ga ra lemnag e pi n’en ni i buch rom ko pi duw ni ke yan ma mang e rayog ni micheg ngom?

• Mang fan ni ngar mu fal’eg i lemnag rarogon e t’ufeg rom ngak Got?

[Picture on page 23]

Mang e mu rung’ag u murung’agen e tin riyul’ mag adag me mich u wan’um?

[Picture on page 25]

Ga be guy boch ban’en u rarogom nib t’uf ni ngan yal’uweg?