Reb e Machib ni Ke Garer

“Gu lik’aynag ni ka non’eg nga fithik’ e nifiy ndabi math biid mu gu od ni gu be tolul. Ma ri gu ma gay rogon ni dab gu denen.”​—Arline.

BA MICH u wan’um ni nifiy ndabi math biid e bang ni kan tay ni fan ko piin tadenen? Boor e girdi’ ni ma lem ni arrogon. Nap’an e duw ni 2005, ma reb e llowan’ ko fare Skul nib tolang ni ka nog e St. Andrews ngay u Scotland e pirieg ni taab guruy u dalip guruy ko tayugang’ ko teliw nu Scotland e ba mich u wan’rad ni piin ni kar paged Got e ra “par laniyan’rad u fithik’ e mochuch u fithik’ e nifiy ndabi math biid.” Ma boch i yad e ba mich u wan’rad ni piin ni yad bay u fithik’ e nifiy ndabi math biid e ra i amith dowrad.

Boor e nam, ni ke garer fare machib ko nifiy ndabi math biid riy. U Meriken ko duw ni 2007 ma 70 pasent ko girdi’ riy e ba mich u wan’rad e re machib nem. Mus nga yu yang u fayleng ni gathi rib ga’ fan e teliw u wan’rad, ma kub mich u wan’rad. Duw ni 2004 min fith boch e girdi’ u Canada min pirieg ni 42 pasent ko girdi’ riy e kub mich u wan’rad e binem e machib. Ma yu Great Britain e 32 pasent ko girdi’ riy e kub mich u wan’rad ni aram rogon.

N’en ni Ma Fil e Tayugang’ ko Teliw

Boor e tayugang’ ko teliw e kar talgad i fil ngak e girdi’ murung’agen e nifiy ndabi math biid ni bangi n’en ni riyul’ ni yima gafgownagey riy. Ya n’en ni yad be rin’ e kar mon’ognaged ban’en nib chugur fan ko n’en ni yog e Katakismo ko Katolic, nni ngongliy ko duw 1994. I gaar, “Bin ga’ e gechig u fithik’ e nifiy ndab math biid e ngan chuw rok Got ni manemus.”

Machane, michan’ ko fare nifiy ndabi math biid e ka ba’. Piin ni yad be mon’ognag e re machib ney e yad be yog ni machib nu Bible. R. Albert Mohler, president ko Southern Baptist Theological Seminary, e yog ni gaar: “Ban’en nib riyul’ ni bay u Bible.”

Mang nib Ga’ Fan e N’en nib Mich u Wan’um?

Faanra nifiy ndabi math biid e riyul’ ni bangi ban’en ni tagil’ e gafgow, ma thingar mu tamdag ngay. Machane, faanra re machib ney e de riyul’, ma pi tayugang’ ko pi teliw ni yad be fil ko girdi’ e re machib ney e yad be yoornag laniyan’ e girdi’ mar k’aringed e marus ndariy fan ngak e piin ni be mich u wan’rad e pi thin rorad nem, ma yad be thibthibnag Got.

Mang e n’en ni be yog e Thin rok Got u murung’agen e re n’ey? Bin migid e thin e ra fanay e Bible ko Katolic nge Protestant nge pi’ e fulweg u dalip e deer: (1) Mange ra buch rok be’ ni ke yim’? (2) Mange yog Jesus u murung’agen fare machib ko nifiy ndabi math biid? (3) Faan ga ra fil e tin riyul’ u murung’agen e nifiy ndabi math biid ma uw rogon ni nge ayuwegem?