Maruwel u Taabang e Ma Ayuweg e Tabinaw nge Mon’og ko Tirok Got Ban’en

TABINAW ni yad baadag ni nge t’uf Jehovah rorad, mar liyorgad ngak e thingar ra ayuweged yad. Nap’an ni sunmiy Jehovah e gal nsom’on e girdi’, me tamilangnag feni ga’ fan ni ngaur maruwelgow u taabang. Efa e ngar maruwelgow Adam u taabang ni ir e nga i “ayuweg.” (Gen. 2:18) Piin mabgol e ngaur maruwelgad u taabang ngaur ayuweged yad. (Ekl. 4:9-12) Maku arrogon e gallabthir nge bitir.

Fol Bible ni Tabinaw

Barry nge Heidi e lal e bitir rorow. Kar piriegew ni fol Bible ni yad ma tay e tabinaw rorad u taabang e ke ayuwegrad ni ngar mon’oggad ko tirok Got ban’en. I gaar Barry: “Nap’an e fol Bible u tabinaw romad, ma gu ma pi’ ngak e bitir boch ban’en ni ngar rin’ed. Ba ga’ ni gu ma yog ngorad ni ngar fal’eged rogorad ni ngar weliyed boch ban’en ni bay ko Awake! Ku gamad ma fal’eg rogomad ni fan ko machib u taabang ya nge yog nni yan ko machib ma manang pi fakmow e n’en ni nga rogned.” Ki gaar Heidi: “Gamad urngin ni kug yoloyed nga but’ boch ban’en ni nggu nameged ni fan ko pigpig ni gamad be tay ngak Jehovah, ma bayi n’en ma gamad sul nga daken ni ngan guy rogon e mon’og ni be tay be’ nge be’.” Ke pirieg e re wu’ i mabgol ney ni faan yad ra tay boch e nep’ ndab ra guyed e T.V. ma aram e rayog ni nge bagayad me fil e babyor rok.

Pi Muulung

Mike nge Denise e aningeg e bitir rorow. Uw rogon ni ke yib angin e maruwel ni yad ma tay u taabang? I gaar Mike: “Yu ngiyal’ e gamad ra lemnag ni nggu warod ko muulung nib papey, ma dabiyog. Machane, kug pirieged ni maruwel u taabang e ke ayuwegmad.” I gaar Denise: “Nap’an ni be ilal pi fakmow ma ra bagayad ma bay e maruwel ni ma rin’. Kim nreb e ppin ni fakmow e ma pi’ e ayuw ko lum me fal’eg rogon e tebel.” Ma Michael nreb e pagel rorow e gaar: “L’agruw Fen e Maruwel nnep’ e bay e muulung u tabinaw romad. Ere gamad ma klinnag e gin ni yima muulung riy, ma gamad yarmiy e chiya.” Matthew ni ku reb e pagel ni fak Mike nge Denise e ki gaar: “Ma guy papa’ rogon ni nge yib nga tabinaw nib papey ko re nep’ ni bay e muulung, ya nge ayuwegmad ni nggu fal’eged rogomad.” Mang angin ni ke yib riy?

Rib Ga’ Angin ni Ke Yib

I gaar Mike: “Nap’an e duw ni 1987, mu gu tababgow Denise ko pioneer. Ngiyal’ nem ma ka bay dalip e bitir romow ni ma par u tabinaw. L’agruw i yad e kar unew ko pioneer, ma gal ni ka bay e kar unew ko dimow naun u Bethel. Ban’en ni ki felfelan’ e tabinaw romad ngay, e ke yog ni nggu ayuweged 40 e girdi’ kar uned ko taufe. Ma kug warod ko dimow naun nga boch e nam.”

Riyul’ ni faanra i maruwel e tabinaw u taabang ma ra yib angin. Rayog nim lemnaged e tabinaw rom boch e kanawo’ nrayog nim maruwelgad riy u taabang, fa? Riyul’ ni faanra um maruwelgad e tabinaw rom u taabang, ma rayog ni ngam mon’oggad ko tirok Got ban’en.

[Picture on page 10]

Ra un yan u yaan e n’en ni nga nog u nap’an e machib ma aram e rayog ni ngan mon’og