Machib Nde Riyul’—5: Maria e Chitiningin Got

Uw e sum e re machib ney riy? “I garer fare machib ni ngan meybil ngak Maria u nap’an ni . . . yoor e girdi’ ni ma liyor nga boch e got ni googsur nra manged Kristiano . . . Pi girdi’ nem [nra manged Kristiano] e ke yan bokum biyu’ e duw ni ke sum e machib rorad ni bay rogon ko meybil ni yad ma tay ngak Maria.”​—The New Encyclopædia Britannica (1988), Volume 16, pages 326 and 327.

Mang e be yog e Bible? “Bay mu diyen ngam gargelnag bochi pagel, ma ngam tunguy fithingan ni Jesus. Ma bayi mang be’ nib tolang ma bay nog ni ir Fak Got ni Th’abi Tolang . . . Erera’ fan nre tir nem nib thothup e bay ni pining ni Fak Got.”​—Luke 1:31-35.

Re thin nu Bible ney e be tamilangnag ni Maria e chitiningin “Fak Got,” ma gathi chitiningin Got. Be yog e Bible ndabi taw Got nga lan e tharmiy, ere, gur rayog ni nge taw nga yin Maria? (1 Kings 8:27) Dariy ba ngiyal’ ni yog Maria ban’en ni aram rogon, ya fare machib ni Trinitas e aram e re machib ni ke sum e biney e machib riy. Nap’an e duw ni 431 ma aram me yog e Ulung nu Efesus ni ngan pining Maria ni “Chitiningin Got,” ma aram e ngiyal’ nni tabab ni ngaun liyor ngak. Re mach nu Efesus nem nni tay e re muulung nem riy e yad ba tabanethin ni bochan e liyor ni yad ma tay ngak fare got ko par ko pumoon nge ppin ni Artemis fithingan.

Ere boor ban’en ni yima rin’ ko liyor ni yima tay ngak Artemis ni yima yog ni “mul u tharmiy nga but’,” nni chagiy ko liyor ni un tay ngak Maria. (Acts 19:35) Me munmun ma aram miki un e teliw ni Kristiano ko meybil nga yaan Maria nge ku boch e girdi’.

Kum guy e pi thin nu Bible ni baaray: Matthew 13:53-56; Mark 3:31-35; Luke 11:27, 28

BIN RIYUL’ E:

Maria e chitiningin Fak Got, ma gathi chitiningin Got. Fare machib ni Trinitas e aram e gin ni sum fare machib riy ni ngaun liyor ngak Maria ni yima yog ni Chitiningin Got