Fas ko Yam’ ni Tay Jesus e Ra Yagnag e Yafas Ngak e Girdi’!

FAS ko yam’ ni tay Jesus e gathi kemus ni ban’en ni buch kakrom ni gathi rib ga’ fan ngodad e ngiyal’ ney. I weliy Paul feni ga’ fan e re n’ey u nap’an ni yoloy ni gaar: “Ka ni faseg Kristus ko yam’, ni ir e tin som’on u fithik’ e piin ni kar m’ad ni kan fasegrad ko yam’ ni bod e tin som’on wom’engin e woldug. Ni bod rogon ni yam’ e yib ni bochan taabe’, e aram rogon ni fos ko yam’ e yib ni bochan taabe’. Rogon ni ma yim’ urngin e girdi’ ni bochan Adam, e aram rogon ni gubin e girdi’ ni bay ni faseg ko yam’ ni bochan Kristus.”​—1 Korinth 15:20-22, NW.

Jesus e kan faseg ko yam’ u nap’an e Nisan 16, ko duw ni 33, ireram e rofen ko gubin e duw ni ma fek piyu Jew e tin som’on wom’engin e woldug rorad ni grain nga altar ko tempel u Jerusalem ni fan ngak Jehovah. Ke yog Paul ni Jesus e bod rogon e bin som’on wom’engin e woldug, ma re n’em e be yip’ fan ni ku bay boch e girdi’ ni yira fasegrad ko yam’.

Bin migid miki weliy Paul murung’agen e n’en nra buch ni bochan e fas ko yam’ ni tay Jesus. Ya yog ni gaar: “Ni bod rogon ni yam’ e yib ni bochan taareb e girdi’, e aram rogon ni fos ko yam’ e yib ni bochan taareb e girdi’.” Bochan e denen ni ke af ngodad rok Adam ma aram e gadad gubin ni gad ra yim’. Machane, bochan ni ke pi’ Jesus e yafas rok nib flont ma aram e ke bing e kanawo’ ngak e girdi’ ni ngan fasegrad ko yam’ ma aram e dab kur manged sib ko denen nge yam’. Ba tamilang ni weliy Paul fare thin ni bay ko Roma 6:23 ni gaar: “Denen e ma pi’ puluwoy ni yam’; machane tow’ath rok Got ngodad ndariy puluwon e yafos ndariy n’umngin nap’an nra pi’ u daken e taab girdi’ ni kad tiyed e Somol rodad i Jesus Kristus.”

Jesus e ke weliy fan fare yam’ nge fas ko yam’ ni tay ni fan ngodad. Yog ni gaar: “Thingar nsuweg e en i fak e girdi’ nga lang, ni fan e nge urngin e girdi’ ni michan’rad ngak e nge yog e yafos ndariy n’umngin nap’an ngorad. Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.”​—John 3:14-16.

Mu susunnag e yafas ni manemus ndakuriy e amith, nge gafgow, ara kireban’ riy! (Revelation 21:3, 4) Rib fel’ e re athap ney! I yog be’ nib llowan’ ni gaar: “Pi teliw ni bay e pi yam’ riy e rayog ni nge puguran ngak be’ feni rib ngoch nap’an e yafas rok, ma fas ko yam’ e be micheg ni dabki n’uw nap’an ma dakuriy e yam’.” Arrogon, fas ko yam’ ni tay Jesus e be yip’ fan e yafas!