Piin nib T’uf Jehovah Rorad e “Dariy Ban’en Nrayog ni nge Mulegrad”

1. Uw rogon ni dag be’ ni ma un ko sagreng ndabi tal ko re gosgos ney?

MARY DECKER e tabab ni nge un ko sagreng u nap’an ni kab fel’ yangaren me mang be’ nib gilbuguwan. Ma nap’an e duw ni 1984, ma ke mang be’ nrib chag mab machreg ko mil, ma boor e girdi’ ni ur lemnaged nra yag e gol ngak u nap’an e Olympic. Machane, bay ban’en ni ke buch rok. Nap’an fare sagreng ni 3,000 meter, me chafin ayrow be’ ni ku be un ko fare sagreng nge dol’. Ere, de yag ni nge mu’nag fare sagreng, machane de tal. Ma de gaman reb e duw nga tomuren, miki un nga reb e sagreng ni taareb e mile n’umngin, ma ir e som’on ko ppin ni ke gel ko re sagreng ney.

2. Mang sagreng e be un e piin Kristiano ngay, ma uw rogon ni ngar rin’ed e re n’ey?

² Piin Kristiano e bod ni yad be un nga reb e sagreng ni nge yag e yafas ni manemus ngorad. Ma susun dab da paged boch ban’en ni nge magawonnagdad ko re sagreng ney. Re sagreng ney ni gad be un ngay e gathi ba sagreng nib ngoch yang e gin ni ngan mil riy ma ra be’ ma be mil ni ke mus payngin ya nge taw ko gin ni ngan mus riy. Maku de taareb rogon ngak be’ ni be mil nib sagaal ni be chamag ni demtrug e ngiyal’ nrayog ni nge tal. Ya re sagreng ney e taareb rogon nga reb e marasong. Be’ ni be un nga reb e marasong e ba t’uf ni nge nang rogon ni nge athamgil u nap’an ni be mil, ya nge yag ni nge mu’nag fare sagreng. Ma aram e n’en ni be weliy apostal Paul ngak e Kristiano nu Korinth ni gaar: “Ri gimed manang ni yira tay reb e sagreng ko mil ma urngin fapi girdi’ nra milgad e ri taab bagayad e rayog puluwon ngak. Ere mmilgad ni aram rogon nge yog puluwon ngomed.”​—1 Kor. 9:24.

3. Mini’ e rayog rok ni nge fek puluwon fare sagreng ko yafas ni manemus?

³ Be yog e Bible ngodad ni ngad uned ko re sagreng ney. (Mu beeg e 1 Korinth 9:25-27.) Ma puluwon e re sagreng ney e yafas ni manemus. Ma n’en nib thil ko re sagreng ney e piin nra un ngay e rayog ni nge yag puluwon ngorad ni faan yad ra athamgil nga mada’ ko tomur. (Matt. 24:13) Rayog ni ngan taleg be’ ko re sagreng ney ni faanra dabi fol ko pi motochiyel riy, ara reb e ra tal u m’on ni nge mu’nag fare sagreng. Maku reb riy e kemus ni re sagreng ney e bay puluwon ni yafas ni manemus.

4. Mang fan nib mo’maw’ ni ngad uned ko fare sagreng ni puluwon e yafas ni manemus?

⁴ Ra ngad uned ko re sagreng ney ni puluwon e yafas ni manemus, ma gathi ban’en nib mom. Ya Jesus e rayog rok ni nge mu’nag e re sagreng ney, ma gadad e rib mo’maw’ ngodad. Aram fan ni yog James ni “gadad gubin ni ba ga’ ni gadad ma oloboch.” (Jas. 3:2) Ma oloboch rodad fa oloboch rok yugu boch e girdi’ e rayog ni nge meewargad, fa reb e k’aringdad ni ngad talgad. Ma nap’an nra buch ban’en rodad ni aram rogon, ma ba t’uf ni ngad ninged a ayuw ku be’, ya nge yag ni ngad ululgad ko e re sagreng ney. Ma susun dab da gingad ngay ni boor yay nrayog ni ngad olobochgad.​—1 Ki. 8:46.

FAANRA KAM DOL’, MA DAB MU TAL KO FARE SAGRENG

5, 6. (a) Mang fan ni ‘dariy ban’en nrayog ni nge muleg’ e piin Kristiano, ma mang e ra ayuweg reb e Kristiano ni nge “sak’iy” u tomuren ni ke dol’? (b) Mang fan ni bay e piin ni darur ‘sak’iygad’ u tomuren ni kar dol’gad?

⁵ N’en ni gad ra rin’ u nap’an ni kad dol’gad e ra m’ug riy ko gad ba miti mang girdi’. Bay boch e girdi’ ni yad ma dol’, machane yad ma gay rogon ni ngar sak’iygad, ya nge yag ni ngar ululgad ko pigpiggad ngak Got. Ma bay e piin ni dubrad ni ngar kalgadngan’rad. Be yog e Proverbs 24:16, (BT) ni gaar: “Demtrug urngin yay nra paraw e girdi’ nib yul’yul’, ma gubin yay ma ku yad ra sak’iy; machane riya’ e ma thang mit e piin kireb.”

⁶ Yugu demtrug ko gad ra dol’ ara kad olobochgad, machane rayog ni ngad gelgad ko magawon rodad. Faanra ra pagan’dad ngak Jehovah, mab m’agan’ ngay ni nge ayuwegdad u nap’an ni kad pirieged e magawon ara kad olobochgad. Ra ayuwegdad ni ngad ‘sak’iygad’, ya bochan ni manang nib t’uf rodad. Machane, piin ni yad ba kireb e dubrad ni ngar ‘sak’iygad.’ Maku dubrad e ayuw ni ma yib rok gelngin Got nib thothup nge girdi’ rok. Be yog e Bible ni ‘dariy ban’en nrayog ni nge muleg’ e piin nib t’uf e motochiyel rok Jehovah rorad. Fan e re n’ey e rayog ni ngad ululgad ko fare sagreng ni bay puluwon ni yafas ni manemus.​—Mu beeg e Psalm 119:165.

7, 8. Uw rogon ni nge par be’ nib fel’ u wan’ Got ni yugu aram rogon ni ke “dol’”?

⁷ Yu ngiyal’ e ma denen be’ ni bochan e meewar rok. Ma rayog ni taa ban’en e be oloboch riy ni boor yay. Machane, Jehovah e ra guy faanem ni ir be’ nib mat’aw ni faanra ra athamgil nge rin’ e tin nib m’agan’ ngay, ni aram e ra dag nriyul’ ni ke kalngan’, me athamgil nge rin’ e tin nib fel’. Rayog ni nge par piyu Israel ni yad ba mat’aw u p’eowchen Got ni faanra kar kalgadngan’rad ko denen rorad. (Isa. 41:9, 10) Rogon ni be tamilangnag e thin ko Proverbs 24:16 e dariy fan e oloboch ni kad rin’ed, ya n’en ni rib ga’ fan u wan’ Jehovah e ngad gayed rogon ni ngad ‘sak’iygad’. (Mu beeg e Isaiah 55:7) Jehovah nge Jesus e ba pagan’row ngodad, ma aram fan ni yow be pi’ e athamgil ngodad ni ngad rin’ed urngin nrayog rodad ya nge yag ni ngad ‘sak’iygad.’​—Ps. 86:5; John 5:19.

⁸ Yugu aram rogon nra dol’ be’ ni be un ko sagreng, ma faanra sak’iy nib papey, ma ka bay e tayim rok ni nge ulul ko fare sagreng. Dad nanged e “re rran nem nge re awa nem” nra mus fare sagreng ni nge yag e yafas ni manemus riy. (Matt. 24:36) Ma faan gad ra athamgil ni nge dab da dol’gad, ma ra mom ni ngad ululgad ko mil ngad mu’naged e re sagreng ney. Ere, uw rogon ni ngad gayed rogon ni nge dab da dol’gad?

PI N’EN NRAYOG NI NGE K’ARINGDAD NI NGAD DOL’GAD

9. Mang lal ban’en e gad ra weliy murung’agen?

⁹ Chiney e ngad weliyed lal ban’en nrayog ni nge k’aringdad ni ngad dol’gad, ni aram e pi n’en ni gad ba meewar riy, nge pi n’en ni ma ar’arnag e dowef rodad, nge pi n’en ni gad ma guy u lan e ulung nde puluw u wan’dad, nge pi togopluw ni ma yib ngodad, nge pi oloboch ni ma rin’ boch e girdi’. Ere, faanra ke buch reb e pi n’ey ngom, ma dab mu pagtalin ni Jehovah e be k’adan’ u puluwom ma dabi pagem.

10, 11. Mang boch ban’en nib meewar David riy?

¹⁰ Pi n’en ni gad ba meewar riy e bod e pi malang nib wer u daken e kanawo’. Ma rogon e yafas rok David ni Pilung nge apostal Peter e ra tamilangnag l’agruw i ban’en ni gad ba meewar riy. Ya David e gathi gubin ngiyal’ ni ma gum’an’nag ir. Ma yu ngiyal’ e ma rus Peter ko n’en nra lemnag e girdi’ u murung’agen.

¹¹ Gathi gubin ngiyal’ ni yag rok David ni Pilung ni nge gum’an’nag ir. Ma bochan e meewar rok, ma aram e n’en ni ke k’aring ni nge denen ni aram e kar parew Bath-sheba. Ma boch nga tomuren ma ke chugur ni nge li’ David Nabal u nap’an ni yog Nabal boch e thin nib kireb ngak. Ere, yugu aram rogon ni ke rin’ David boch ban’en ni de lemnag, machane de tal i gay rogon ni nge fel’ u wan’ Jehovah. Ma bochan e ayuw ni pi’ boch e girdi’ ngak, ma yag rok ni nge “sak’iy” u tomuren ni ke oloboch.​—1 Sam. 25:5-13, 32, 33; 2 Sam.12:1-13.

12. Yugu aram rogon ni ke oloboch Peter, ma uw rogon ni gay rogon ni nge ulul ko fare sagreng?

¹² I rus Peter ko pi n’en ni ma lemnag e girdi’ u murung’agen. I par nib yul’yul’ ngak Jesus nge Jehovah, machane tomur riy me rin’ boch ban’en nde puluw ni bochan ni be rus. Ni bod ni dalip yay ni yog ni de nang Jesus. (Luke 22:54-62) Maku bay ba ngiyal’ ni i ngongol ngak e piin Kristiano ni gowa bay boch i yad nib ga’ farad ngak boch i yad. Ere, ba kireb rogon ni lemnag Peter boch ban’en, ma rayog ni nge af e re lem ney ngak yugu boch e girdi’ u lan e ulung. Ere, rib gel e fonow ni pi’ Paul ngak Peter. (Gal. 2:11-14) Ere, ke puwan’ Peter ni bochan ni kan fonownag ni aram rogon me lemnag ni nge tal ko fare sagreng, fa? Danga’. Ya i fal’eg i lemnag e n’en ni yog Paul ngak, me thilyeg rogon e lem rok, me ulul ko fare sagreng.

13. Mang fan ni m’ar e rayog ni nge k’aringdad ni ngad dol’gad?

¹³ Rayog ni nge magawon rogon e yafas rodad ni bochan e m’ar. Ma bochan e re n’ey, ma bay boch e girdi’ ni kar talgad ni dakur ululgad ko fare sagreng. Ni bod rogon reb e walag nib ppin u Sapan ni yib e m’ar ngak nib gel u tomuren 17 e duw ni ke un ko taufe. Ma ke pag e m’ar rok ni nge k’aring ni nge meewar e michan’ rok, ma aram me meewar ko tirok Got ban’en. Munmun, me yib l’agruw e piin piilal ni ngar piew e athamgil ngak. Ma nap’an ni un bayay ko muulung ma pi walag e kar pininged e magar ngak, ma aram me tabab ni nge yor. Ere, chiney e ke sul walagdad ni be ulul ko fare sagreng.

14, 15. Mang e thingar da rin’ed u nap’an nra ar’arnag e dowef rodad boch ban’en nde puluw? Mu weliy.

¹⁴ Boor e girdi’ ni kar dol’gad ni bochan e pi n’en ni ma ar’arnag e dowef rorad. Ere, nap’an nra waliydad e ar’ar rodad, ma thingar da rin’ed e tin nrayog rodad ni nge par e lem nge ngongol rodad nib beech, nra aw nib puluw ko pi motochiyel rok Got. Aram fan ni yog Jesus ni faanra be waliydad owchedad ara pa’dad, ma susun ni ngad ‘th’abed ngad n’aged.’ Ma thingar da chuweged gubin e lem nib kireb nge ngongol ni nge k’aringdad ni ngad talgad ko fare sagreng.​—Mu beeg e Matthew 5:29, 30.

¹⁵ I yog reb e walag ni pumoon ni chuguliy ko tin riyul’ ni ke n’uw nap’an ni ma par ni be lemnag rogon ni ngar parew reb e pumoon. I yog ni ma magawon laniyan’ u nap’an ni bay u fithik’ e girdi’. Ma nap’an ni ke gaman 20 e duw rok ma ma un ko machib u polo’ e tayim rok, ma ke mang reb e ministerial servant ko ulung. Ma tomuren, me rin’ ban’en nrib gel e oloboch riy, min fonownag me ayuweg e piin piilal. I meybil, ma be fil e Bible, me gay rogon ni nge ayuweg boch e girdi’. Ma ireray e pi n’en ni ayuweg ni nge ulul ko fare sagreng. Ke n’uw nap’an ni ke buch ban’en rok ni aram rogon, machane i yog ni gaar: “Bay yu ngiyal’ ni gu ma lemnag e pi nem, machane da gur ma pag ni nge gel ngog. Ma kug fil ni dabi pag Jehovah ni ngan waliyem nib pag rogon. Ere, be pagan’ug ngak ni manang e n’en nrayog rog.” Re walag ney e dabun ni nge pag ban’en ni nge taleg ni dabki un ko fare sagreng. Ya manang ni ba ga’ fan ni nge athamgiliy e tin rayog rok ni nge yag e yafas ngak u lan e bin beech e m’ag. Ere, i yog ni gaar: “Chiney i yan nga m’on ma gu ra athamgil ni nggu cham ko pi ar’ar rog.”

16, 17. (a) Mang e ke yag ni nge ayuweg reb e walag nib pumoon ni ke lemnag ni kan rin’ boch ban’en ngak nde puluw? (b) Mang e thingar da lemnaged u murung’agen e ulung, ya nge dab da dol’gad?

¹⁶ Rayog ni ngad paged gadad ni ngad dol’gad ni bochan e pi n’en ni gad ma guy u lan e ulung nde puluw u wan’dad. Reb e walag ni immoy nreb e piilal nu France e lemnag nde puluw rogon ni kan ngongol ngak. Ma bochan e re n’ey ma ke kireb laniyan’, ma aram me tal ndaki un ko pi muulung, me tal ko machib. Ma bay l’agruw e piilal ni ranow ni ngar guyew, mar motoyilgow u fithik’ e tayfan u nap’an ni weliy ngorow e n’en ni ke buch. Mar piew e athamgil ngak ni nge pagan’ ngak Jehovah, ma kur puguran ngak ni n’en th’abi ga’ fan e nge rin’ e n’en nib m’agan’ Got ngay. Ere, ke fol ko fonow rorow me yag ni nge ulul ko fare sagreng.

¹⁷ Rib ga’ fan ni ngad nanged ni Got e ke mel’eg Jesus Kristus ni ir lolugen e ulung, ma dabi magafan’dad ko n’en nra rin’ e girdi’ ndawora flontgad. Lan owchen Jesus e bod e “daramram u ba nifiy.” Ya manang fan e pi n’en ni ma buch u lang e ulung nib fel’ rogon ngodad. (Rev. 1:13-16) Ni bod ni gad ra lemnag ni bay boch ban’en ni kan rin’ u lan e ulung nde puluw u wan’dad, machane bin riyul’ riy e dad nanged ko mang e ke buch fa mang fan ni ke buch. Ma yal’uweg Jesus e pi magawon u lan e ulung u ngal’an nib puluw mab fel’ rogon. Ere, thingar dab da paged ban’en ni ke rin’ reb e Kristiano ni nge talegdad ko fare sagreng.

18. Uw rogon ni ngad pared ni gad ba yul’yul’ u fithik’ e pi togopuluw nra yib ngodad?

¹⁸ Ku bay l’agruw ban’en nrayog ni nge k’aringdad ni ngad dol’gad ni aram e pi togopluw ni ma yib ngodad nge pi oloboch ni ma rin’ boch e girdi’ u lan e ulung. U lan fare chep ni weliy Jesus ni murung’agen be’ ni ma yung e awoch e tamilangnag riy, ni bay boch e girdi’ ni yad ra dol’ ni bochan e “gafgow fa togopluw”, ya yad e girdi’ rok Got. Girdien e tabinaw rodad ara buguliyoror rodad ara pi am e rayog ni ngar gafgownaged gadad ni bochan ni gad bay ko tin riyul’. Ma faanra ke war e michan’ rok be’, mab mom nra dol’ ya ‘de rich nga fithik’ i laniyan’.’ (Matt. 13:21) Machane, faanra kad dugliyed u wan’dad ni ngad pared ni gad ba chugur ngak Jehovah, ma ra ayuwegdad fare thin riyul’ ni murung’agen Gil’ilungun ni nge gel e michan’ rodad. Ere, nap’an ni ga ra mada’nag e magawon, ma rib ga’ fan ni ngam fal’eg i lemnag e “tin ndariy thibngin”. (Mu beeg e Filippi 4:6-9.) Ra pi’ Jehovah gelngidad ni ngad pared ni gad ba yul’yul’ u fithik’ e pi magawon rodad, ya nge yag ni ngad pared ni gad be un ko fare sagreng.

19. Uw rogon ma dab da paged e ngongol rok yugu boch e girdi’ ni nge k’aringdad ni ngad dol’gad?

¹⁹ Bay boch i gadad ni ke tal ko pigpig ngak Jehovah ni bochan e oloboch ni ke rin’ boch e girdi’. Fa reb e ke dol’ ni bochan e ke magawon e nangan’ rok ko n’en ni ke rin’ yugu boch e girdi’. (1 Kor. 8:12, 13) Ere, faanra ke yog ara ke rin’ be’ ban’en nra kirebnag lanin’dad, ma gad ra pag e re n’ey ni nge k’aringdad ni ngad digeyed e tin riyul’, fa? I yog e Bible ni dab da turguyed e kireb nga daken be’, ma ngad n’aged fan e kireb ni ke rin’ be ngodad, ni yugu aram rogon ni bay fan ni nge kireban’dad ngay. (Luke 6:37) Ere, nap’an nra kireban’um ni bochan e ngongol rok be’ mag fithem: ‘Gur, gathi gu be turguy e kireb nga daken be’ ni bochan ni gu baadag ni ngan rin’ boch ban’en nrogon nib m’agan’ug ngay? Ere, fel’ ni nggu digey e tin riyul’ ni bochan e oloboch ni ke rin’ e pi walageg, fa?’ T’ufeg rodad ngak Jehovah e ra ayuwegdad ni nge dab da paged e ngongol rok yugu boch e girdi’ ni nge talegdad ndab da mu’naged fare sagreng.

MIL U FITHIK’ E ATHAMGIL MAG GAY ROGON NI DAB MU DOL’

20, 21. Mang e ga ra rin’ u nap’an ni ga be un ko fare sagreng ni puluwon e yafas ni manemus?

²⁰ Ga baadag ni ngam “mil u n’umngin yang ni ngan mil riy?” (2 Tim. 4:7, 8) Faanra arrogon, mag fil e Bible rom nge pi babyor rodad, mag fal’eg i gay boch ban’en, mag fal’eg i lemnag e pi n’en ni kam beeg. Ya faan ga ra rin’ ni aram rogon, ma ga ra nang e pi n’en nrayog ni nge k’aringem ngam dol’. Mu ning e ayuw rok gelngin Jehovah nib thothup ni nge gel nigem. Ma dab mu pagtalin ni yugu aram rogon ni ga ra dol’, ma rayog ni ngam sak’iy bayay ngam mu’nag fare sagreng. Maku rayog ni ngad filed ban’en ko pi oloboch rodad nra ayuwegdad ni ngad mon’oggad u rogon ni ngad milgad ko fare sagreng.

²¹ Be tamilangnag e Bible ni thingar da uned ko fare sagreng ngad tawgad nga tungun ni faan gad baadag ni nge yag puluwon ngodad ni yafas ni manemus. Ya nap’an ni gad ra mil ma ra ayuwegdad Jehovah ni nge ‘dabi buch ban’en rodad.’ (Ps. 119:165) Ma ra ulul i ayuwegdad e ngiyal’ ney me pi’ e tow’ath ngodad ni manemus, ni faan gad ra mu’nag fare sagreng.​—Jas. 1:12.