“Ngam Mel’eged e Tin ni Ir e Th’abi Ga’ Fan”

1, 2. Mang yiiy u murung’agen e tin tomuren e rran e dabisiy ni i lemnag pi gachalpen Jesus, ma mang fan?

KA FINI yog Jesus ngak pi gachalpen ni yira gothey fare tempel. N’en ni yog e ri k’aring e magafan’ ngak Peter, nge James, nge John, nge Andrew. (Mark 13:1-4) Ere, nap’an ni goo yad Jesus u bang, mi yad fith ngak ni lungurad: “Mang e pow ko ngiyal’ ni ga bay nge ngiyal’ ni ke chugur nga tomuren e re m’ag ney?” (Matt. 24:1-3, NW) Nap’an ni fulweg Jesus e deer rorad me weliy e n’en nra buch u m’on ni yira gothey yu Jerusalem nge pi n’en nra buch u nap’an e tin tomuren e rran ko re fayleng rok Satan ney. I yiiynag Jesus murung’agen boch ban’en nib kireb ni bod e mahl, nge ggan ni be lich i yan, nge kireb ni be garer. Machane, ki yiiynag murung’agen ban’en nib fel’ ni gaar: “Re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.”​—Matt. 24:7-14.

² U m’on ni yog Jesus e re thin ney ma yad be machibnag pi gachalpen fare thin nib fel’ ni murung’agen Gil’ilungun Got. (Luke 8:1; 9:1, 2) Ere, dabisiy ni ke yib ngan’rad e n’en ni yog Jesus ni gaar: “Woldug e ba ga’ ni ba ga’ yang, machane piin girdien e maruwel ni nge kunuy nge tay nga naun e ba lich. Ere mmeybilgad ngak e en ni ir e suwon e woldug ngki pi’ boch girdien e maruwel ngar muruwliyed e re woldug rok nem nge af nga naun.” (Luke 10:2) Yugu aram rogon, ma dabisiy ni ur lemnaged ko: ‘Uw rogon ni gad ra machib u “gubin yang u fayleng” ni nge “urngin e girdi’ me nang”? Ma uw e yira fek chon e maruwel riy?’ Dariy e maruwar riy nri yad ra gin nga rogon nra lebug fare yiiy ni bay ko Matthew 24:14!

3. Mang nib ga’ fan e thin ni yog Jesus ko Luke 21:34 ngodad e ngiyal’ ney? Mang e susun ni ngad fithed gadad riy?

³ Be lebug e yiiy rok Jesus e ngiyal’ ney. Bokum milyon e girdi’ ni yad be machibnag fare thin nib fel’ ni murung’agen Gil’ilungun Got u ga’ngin yang e fayleng. (Isa. 60:22) Machane, ki yog Jesus ni bay boch e girdi’ nra mo’maw’ ni nge m’on fare maruwel ni machib u wan’rad ni bochan e kar mitgad u boch ban’en ma kar pared ni ke ‘magafan’rad.’ (Mu beeg e Luke 21:34.) Ba ga’ fan e thin ni yog Jesus ngodad e ngiyal’ ney ni bochan e bay boch e girdi’ rok Got ndarur m’oneged e tin th’abi ga’ fan ban’en. Ma gagiyel e re n’ey u nap’an ni yad ma mel’eg e maruwel ni ngar uned ngay, ara skul nib tolang, ara chugum ni nge yog ngorad. Ku bay boch i yad ni kaygi pag urngin e tayim ni ma tay ni fan ko gosgos ara pi n’en ni yima chuweg e chalban ngay. Maku boch i yad e darur rin’ed e tin nrayog rorad ni fan ko pigpig ni yad be tay ngak Got ni bochan e pi n’en ni ma magafan’uy ngay ko biney e tamilang. Ere, ngam fithem ni nge lungum: ‘Me gag, gu be m’oneg e pi n’en nib m’agan’ Got ngay u lan e yafas rog, fa?’

4. (a) Mang e yibilay Paul u murung’agen e pi Kristiano u Filippi? Mang fan nib t’uf e re meybil ney? (b) Mang e gad ra weliy ko re article ney nge bin migid? Uw rogon nra ayuwegdad e gal article ney?

⁴ Pi Kristiano ni ur moyed ko bin som’on e chibog e thingar ra gayed rogon ni ngar m’oneged u wan’rad e pigpig ni yad be tay ngak Got. Aram fan ni yibilay apostal Paul piyu Filippi ni ngar “mel’eged e tin ni ir e th’abi ga’ fan.” (Mu beeg e Filippi 1:9-11.a) Boor e Kristiano ni yad bod apostal Paul ni ur ‘machibnaged e thin rok Got ngak e girdi’ ndakurir tuntungad ma dakurir tamdaggad.’ (Fil. 1:12-14) Ku er rogodad e ngiyal’ ney ni boor i gadad e be machibnag e Thin rok Got nder rus. Yugu aram rogon, mab fel’ ni ngad weliyed ko re article ney rogon ni be fanay Jehovah e ulung rok e ngiyal’ ney ni nge lebguy fare yiiy ni bay ko Matthew 24:14. Re n’ey e rayog ni nge pi’ e athamgil nga lanin’dad ni ngad pasiggad ko machib. Ere, mang e be rin’ Jehovah, ma uw rogon nra pi’ e re n’ey e athamgil nga lanin’dad nge chon e tabinaw rodad? Bin migid e article e gad ra weliy riy e n’en nra ayuwegdad ni ngad athamgilgad ko pigpig ni gad be tay ngak Got nge n’en nra ayuwegdad ni ngad folgad u rogon ni be pow’iydad e ulung rok Jehovah.

ULUNG ROK JEHOVAH U THARMIY

5, 6. (a) Mang fan ni pilyeg Jehovah e changar rok boch e tapigpig rok ngar guyed e pi n’en ni be buch u tharmiy? (b) Mang e guy Ezekiel u nap’an nni pilyeg e changar rok?

⁵ Boor ban’en ni ke dugliy Jehovah ndab ni tay nga Bible. Bod rogon ndariy murung’agen e man’ey ko girdi’ ara palpalth’ib u lan e Bible. Machane, ke pi’ Jehovah boch ban’en nib t’uf rodad nra ayuwegdad ni ngad nanged e pi n’en nib m’agan’ ngay ma gad fol rok. (2 Tim. 3:16, 17) Gad ba felfelan’ ngay ni ke lemnag ni nge weliy ngodad murung’agen e ulung rok u tharmiy. Maku gad ra felfelan’ ni ngad beeged murung’agen e re n’ey ko fare babyor rok Isaiah, nge Ezekiel, nge Daniel, nge fare babyor ni Revelation! (Isa. 6:1-4; Ezek. 1:4-14, 22-24; Dan. 7:9-14; Rev. 4:1-11) Ere, mang fan ni ke pagdad Jehovah ni ngad nanged murung’agen boch ban’en ni be buch u tharmiy?

⁶ Baadag Jehovah ni ngad nanged ni gad bang u reb e ulung ni bay u ga’ngin yang e palpalth’ib. Ulung rok Jehovah u tharmiy e be maruwel nib gel ni nge rin’ e pi n’en nib m’agan’ ngay. Bod nni pilyeg e changar rok Ezekiel nge guy yaan ba karrow nib ga’ ni ma girngiy e os ni be yip’ fan e re ulung nem. Re karrow nem e be yan nrib papey ma rayog ni nge thilyeg e gin ni be sor ngay nib tomgin. (Ezek. 1:15-21) Ki guy Ezekiel e En ni Be Yannag e re karrow nem ni ma girngiy e os. I yog ni gaar: “Rogon ramaen ni be gal ni gu be guy e bod ramaen e bronze ni bay u mit e nifiy, ni be gal ramaen ni ba ga’.” Miki ulul ngay ni gaar: “Aram rogon ramaen Somol ni be galgal ni m’ug ngog.” (Ezek. 1:25-28) Dabisiy ni kari ngat Ezekiel ko n’en ni ke guy. Ke guy ni Jehovah e ir e be gagiyegnag e ulung rok ma be fanay gelngin nib thothup ni nge pow’iy. Fare karrow ni ma girngiy e os ni be mithmith ni faan nni pilyeg changar rok Ezekiel nge guy, e be fanathinnag rogon ni ma maruwel e ulung rok Jehovah u tharmiy!

7. Uw rogon nrayog ni nge pagan’dad ko n’en ni guy Daniel u nap’an nni pilyeg e changar rok?

⁷ Kun pilyeg e changar rok Daniel ngki guy ban’en nrayog ni nge pagan’dad ngay. I guy “Faanem ni kab kakrom” ni be yip’ fan Jehovah ni ke par nga daken ba chiya ni bay e tayapyap riy. (Dan. 7:9) Baadag Jehovah ni nge guy Daniel e ulung Rok ni be maruwel ni be rin’ e tin nib m’agan’ ngay. Tomuren e biney miki guy Daniel “be’ ni bod yaan ba girdi’” ni aram Jesus ni kan pi’ mat’awun ni nge gagiyegnag e ulung rok Jehovah u fayleng. Gathi kemus ni in e duw e kan pi’ mat’awun Jesus ni nge gagiyeg riy, ya “mat’awun ko gagiyeg ni nge tay e bay i par ndariy n’umngin nap’an, ma gagiyeg rok e dabi mus.” (Dan. 7:13, 14) Pi n’ey nni pilyeg e changar rok Daniel nge guy e ra k’aringdad ni nge pagan’dad ngak Jehovah, miki ayuwegdad ni ngad nanged fan e pi n’en ni be rin’. Ma bochan ni Jehovah e ir e ke pi’ mat’awun Jesus ni nge gagiyeg, ma aram fan nrayog ni nge pagan’dad ko Gagiyeg nra tay.

8. Uw rogon u wan’ Ezekiel nge Isaiah e pi n’en nra guyew u rarogon e ulung rok Jehovah? Susun ni nge uw rogon e pi n’ey u wan’dad?

⁸ Susun ni nge uw rogon u wan’dad e pi n’en ni kan guy u rarogon e ulung rok Jehovah? Ba mudugil ni kad ngatgad ko pi n’en ni be rin’ Jehovah ni bod Ezekiel. (Ezek. 1:28) Ku er rogon Isaiah ni kun pilyeg e changar rok ngki guy e pi n’en ni be buch u tharmiy. Nap’an ni ka nog ngak ni nge weliy ko girdi’ murung’agen e pi n’en ni be rin’ Jehovah, me m’agan’ ngay. (Mu beeg e Isaiah 6:5, 8.) Bochan ni i ayuweg Jehovah, me nang ndariy ban’en nrayog ni nge taleg ko maruwel ni i rin’ ni ir reb e profet. Ere, ku er rogodad ni gad baadag ni nge yoor ban’en ni ngad rin’ed ni fan ko ulung rok Jehovah ni bod rogon Isaiah. Ma ri gad ba felfelan’ ngay ni kad nanged ni gad bang u ba ulung nri be tiyan’ nga i rin’ e tin nib m’agan’ Jehovah ngay!

ULUNG ROK JEHOVAH U FAYLENG

9, 10. Mang fan nib t’uf ni bay e ulung rok Jehovah u fayleng?

⁹ Ke fanay Jehovah Fak ni nge sunmiy reb e ulung u fayleng ni ngar maruwelgow e ulung rok u tharmiy u taabang. Rib ga’ fan e re ulung ney ya nge yag ni nge lebguy fare thin ni kan yiiynag ko Matthew 24:14. Mang fan? Am lemnag dalip i fan ni bay.

¹⁰ Som’on e yog Jesus nra machib pi gachalpen nge yan i mada’ ko “yungi n’en ni yan i mus e fayleng ngay.” (Acts 1:8) Bin migid e, piin ni yad ra rin’ e re maruwel ney e ra t’uf ni ngan pi’ e fonow nu Bible ngorad, mu kun pi’ e athamgil nga lanin’rad. (John 21:15-17) Bin dalip e, ra i t’uf ni ngaur muulunggad nga taabang ni ngar liyorgad ngak Jehovah mi yad fil rogon ni ngaur machibgad. (Heb. 10:24, 25) Ere, faanra nge fel’ rogon e maruwel ni nge rin’ pi gachalpen Jesus, mab t’uf ni ngan yarmiy.

11. Uw rogon ni ngad ayuweged e ulung rok Jehovah?

¹¹ Uw rogon ni ngad ayuweged e ulung rok Jehovah? Reb e kanawo’ e aram e nga i pagan’dad ko pi walag ni pumoon ni kan tayrad ni ngaur yarmiyed fare maruwel ni machib. Be pagan’ Jehovah nge Jesus ko pi walag ney, ere susun ni ngki er rogodad. Rayog ni nge fanay e pi walag ney e tayim rorad nge gelngirad ni ngar guyed rogon ni ngar pithiged e pi magawon ni bay u roy u fayleng. Machane, gathi aram e n’en ni yad be rin’. Ere, ngad guyed e n’en ni be rin’ e ulung rok Jehovah u fayleng ni kab kakrom i yib.

YAD MA M’ONEG E “TIN NI IR E TH’ABI GA’ FAN”

12, 13. Uw rogon ni ma rin’ e piin piilal e maruwel rorad? Mang fan ni be pi’ e re n’ey e athamgil nga lanin’um?

¹² Piin piilal ko pi ulung u fayleng i yan e kan tayrad ni ngar yarmiyed mi yad pow’iy fare maruwel ni machib ni yima tay ko pi nam ni yad ma par riy. U m’on ni ngar dugliyed ban’en ma yad ma yaliy e fonow u Bible. Ere, thin nu Bible e ‘bod ba magal ni be pow’iyrad, me ir e tamilang ko kanawo’ ni yad be yan riy.’ Ku yad ma meybil ni nge pow’iyrad Jehovah.​—Ps. 119:105; Matt. 7:7, 8.

¹³ Pi piilal ni yad ma yarmiy fare “maruwel ko machib” e ngiyal’ ney e yad ma m’oneg e re maruwel ney ni bod ni i rin’ e pi piilal ko bin som’on e chibog. (Acts 6:4) Ri yad ma felfelan’ ni yad be guy ni be mon’og e machib ni yibe tay ko nam rorad nge pi nam u fayleng i yan. (Acts 21:19, 20) Gathi yugu yad be par ma yad be ngongliy boor e motochiyel nge yaram ni ngan fol riy. Ya yad ma fol ko thin nu Bible nge rogon ni ma pow’iyrad gelngin Got nib thothup u nap’an ni yad be yarmiy boch ban’en nib t’uf ni fan ko fare maruwel ni machib. (Mu beeg e Acts 15:28.) Bochan e pi n’ey ni be rin’ e pi walag ney, ma aram fan nrayog ni nge folwok e ulung rorad.​—Efe. 4:11, 12.

14, 15. (a) Mang boch ban’en ni yibe rin’ ni nge ayuwegdad ngad machibgad u ga’ngin yang e fayleng? (b) Uw rogon u wan’um e ayuw ni ga be pi’ ni fan ko fare maruwel ni machib?

¹⁴ Boor e walag ni yad ma maruwel ni gubin e rran ni yad be ngongliy e pi babyor rodad, ma yad be yarmiy e pi muulung nge pi convention ni gad ma tay. Bod ni, bokum biyu’ e walag e kar ognaged yad ni ngar pilyeged yu ken e babyor nga boor ko 600 mit e thin. Angin ni ke yib riy e boor e girdi’ ni ke yag ni ngar filed “murung’agen e pi n’en nib sorok Got ni ke ngongliy.” (Acts 2:7-11) Ku boor e walag ni pumoon nge ppin ni kab fel’ yangarrad ni yad ma maruwel nib gel ko pi masin ni yima ngongliy e babyor riy. Nap’an nra m’ay e pi babyor ney min pi’ nge yan ko pi ulung u boch e binaw nib palog.

¹⁵ Ku boor e walag ko gin ni gad be par riy ni yad be rin’ boch e maruwel ni nge ayuwegdad ni ngad tedan’dad i machibnag fare thin nib fel’. Bod ni, bokum biyu’ e walag e kar ognaged yad ni ngar toyed boch e Kingdom Hall nge boch e naun ni yima tay e pi Assembly riy. Maku boch e walag e kar ognaged yad ni ngar ayuweged e piin ni kar gafgowgad ni bochan e yoko’, ara durru’, ara ku boch ban’en ni yima gafgow riy. Maku boch e walag e yad ma yarmiy e pi assembly nge convention ni gad ma tay, ma boch i yad e ma yarmiy boch e skul ni yima tay ni yibe fil e thin nu Bible riy. Mang fan ni yibe rin’ e pi maruwel ney? Yibe rin’ ya nge ayuwegdad ko machib ni gad be tay, ma gad mon’og ko tin riyul’, miki ayuweg boch e girdi’ ni ngar manged boch e tapigpig rok Jehovah. Ulung rok Jehovah u fayleng e riyul’ ni be m’oneg e tin ni ir e th’abi ga’ fan!

MU FOLWOK KO ULUNG ROK JEHOVAH

16. Mang boch ban’en nrayog ni ngam gay murung’agen ni ngam weliyed chon e tabinaw rom u nap’an e fol Bible ni tabinaw ara ngam fil ko ngiyal’ ni ga be fil e Bible ni goo gur?

¹⁶ Bay yu ngiyal’ ni gad ma lemnag e pi n’en ni be rin’ e ulung rok Jehovah, fa? Rayog ni ngam gayed chon e tabinaw rom boch ban’en u murung’agen e re n’ey u nap’an e fol Bible ni tabinaw, maku rayog ni ngam rin’ ko ngiyal’ ni ga be fil e Bible ni goo gur mag fal’eg i lemnag. Bod nib fel’ ni ngan fil murung’agen fapi n’en ni guy Isaiah, nge Ezekiel, nge Daniel, nge John u nap’an nni pilyeg e changar rorad. Fare ke babyor ni Jehovah’s Witnesses​—Proclaimers of God’s Kingdom nge yu ken e babyor rodad nge boch e DVD e boor ban’en riy nib manigil nrayog ni ngad filed u murung’agen e ulung rok Got.

17, 18. (a) Uw rogon ni ke ayuwegem e re article ney? (b) Mang boch e deer ni susun e ngam fithem riy?

¹⁷ Ba fel’ ni ngad fal’eged i lemnag rogon ni be fanay Jehovah e ulung rok ni nge ayuweg fare maruwel ni machib. Ere, ngad m’oneged e tin ni ir e th’abi ga’ fan ni bod ni be rin’ e re ulung ney. Faan gad ra rin’ ni aray rogon, ma gad ra lem ni bod Paul u nap’an ni yol ni gaar: “Got e ke runguydad ke pi’ e re maruwel ney ngodad, aram fan nder mulan’dad.” (2 Kor. 4:1) Ki pi’ e athamgil nga laniyan’ pi walagen ni gaar: “Dabi chalbadad i ngongliy e ngongol nib fel’; ya faanra dab da paged gadad, ma ba’ nap’an ni bayi taw ngay ma gadad t’ar wom’engin.”​—Gal. 6:9.

¹⁸ Gur, bay boch ban’en nib t’uf ni ngam thilyeg ara ngam thilyeged chon e tabinaw rom ya nge yag ni m’on u wun’med e tin ni ir e th’abi ga’ fan? Rayog ni ngam lichnag pa’ nga puluwom ya nge yag nim rin’ boor ban’en ni fan ko fare maruwel ni machib, fa? Bin migid e article e gad ra weliy riy lal ban’en nra ayuwegdad ni ngad folwokgad ko ulung rok Jehovah ma gad par ni gad ba pasig ko pigpig ni gad be tay ngak.