Gur, Rayog ni Nge Pagan’um ko Teliw u Murung’agen e Salpiy?

Immoy be’ nib ppin ni Estellea fithingan ni boor e bitir rok, ma gubin e ngiyal’ ni ma yan nga galesiya rok. I yog ni gaar: “Gu weliy ngak reb e tayugang’ ko teliw rog ni gu baadag ni nggu nang murung’agen e thin ko Bible.” Machane, de m’agan’ ngay ni nge ayuweg fare pin ni nge fil e thin nu Bible. Me tomur riy, ma daki un Estelle ko fare galesiya. Miki ulul ngay nge gaar: “Pi tayugang’ ko fare galesiya e ra yoloyed e babyor ni yad be yog ni faanra dabiyog ni nggu un ngaram, ma rayog ni kemus ni nggu pi’ e salpiy ngorad. Rogon e lem rog e, ‘De ga’ fan u wan’rad ko ra gu un ko galesiya rorad, fa, ya kemus ni yad baadag ni nggu pi’ e salpiy ngorad.’”

Angelina ni be’ nib m’ing ko teliw rok, e yog ni gaar: “Galesiya rog e bay e piin ni yad ma fek bochi chew i yan ko girdi’ ni dalip yay u nap’an e ngiyal’ ni yibe misa, ma yad ma lemnag ni thingar ni tay e salpiy nga lan fachi chew. Ma gubin e ngiyal’ ni yad ma man salpiy. Ere, rogon ni gu lemnag e ‘Dariy gelngin Got rorad.’”

Mang e ma rin’ e piyu raba’ i teliw ko binaw rom ni nge yag e salpiy ngorad? Gur, ireray e n’en ni be fil e Bible?

MANG E BE FIL E BIBLE?

Jesus ni ir e en ni tababnag e teliw ni Kristiano e yog ni gaar: “Ke yog ngomed nda mpied puluwon, ere mpied ndab ni pi’ puluwon ngomed.” (Matthew 10:8) Kenggin e machib nu Bible e dabiyog ni ngan tay puluwon, ma thingar ni weliy ngak e piin ni yad baadag ni ngar motoyilgad ngay ndariy puluwon.

Uw rogon ni yag rok e pi Kristiano kakrom ni ngar pied puluwon e tin nib t’uf ko ulung?

“Ra be’ ma nge pi’ ban’en nrogon ni ir e ke dugliy u laniyan’, ndabi kireban’ ngay ni ke pi’ fa reb e finey ni ban’en nthingari rin’; yi Got e ba t’uf rok e en ni ma pi’ ban’en u fithik’ e felfelan’.” (2 Korinth 9:7) I yog apostal Paul ni gaar: “Ug maruwelgad ni rran nge nep’ ni bochan e nge siy gu magawonniged gimed ko n’en ni ngan gafaliymad riy ko ngiyal’ ni baaram ni ug machibniged ngomed e Thin Nib Fel’.” (1 Thessalonika 2:9) I ngongliy Paul e tento ni nge pi’ nchuw’ay, ya nge yag ni nge chuw’iy e tin nib t’uf rok u nap’an ni be machib.​—Acts 18:2, 3.

MANG E MA RIN’ E PI MICH ROK JEHOVAH?

Pi Mich Rok Jehovah e yad ma muulung u boch e naun ni ka nog e Kingdom Hall ngay. Pi naun ney e taareb rogon ko yugu boch e naun. Uw rogon ni be yag ni ngan pi’ puluwon e tin nib t’uf riy? Dariy ba ngiyal’ ni yima fek e chew i yan ko girdi’ ni ngar ted e salpiy ngay ara ra pied e envelope ko girdi’ ni ngar ted e salpiy ngay. Machane, piin ni yad ba felfelan’ ko muulung ni kar uned ngay e rayog ni ngar ted e salpiy nga langgin fare contribution box ni bay u Kingdom Hall.

Dariy e maruwar riy nib t’uf e salpiy, ya nge yag ni ngan ngongliy e re babyor ney, ma kun pi’ nge yan nga yu yang u fayleng. Machane, dariy ba ngiyal’ ni ga ra guy ni yibe fol chuway’ ko babyor ara yibe ning e salpiy ya nge yag ni ngan ngongliy e pi babyor ney. Ya n’en nib ga’ fan e ngan tamilangnag e tin riyul’ u Bible.

Uw rogon ni ga be lemnag: Rogon ni yibe yarmiy e pi n’ey e ba puluw ko thin rok Jesus nge n’en ni i rin’ e pi Kristiano kakrom, fa?