Gur, Rayog ni Nge Pagan’um ko Teliw u Rogon Ngongolen e Mahl?

Alberto e be’ ni ke un ko salthaw ni ke chugur ni nge gaman 10 e duw. I yog ni gaar: “Nap’an nra pi’ fare padrey e meybil romad ni be yog ni ‘bay Got romed’, ma tafinay rog e, ‘gu be yan ni nggu thang e fan ko girdi’, machane rogon e thin ko Bible e, “dab ni thang e fan ku be’.”’”

Ray e be’ ni un ko Navy u nap’an e bin L’agruw e Mahl u fayleng. Ma bay ba ngiyal’ ni fith reb e padrey ni gaar: “Ga ma yib nga daken e barkow ni ngam yibilay e pi salthaw riy, ma ngkum pi’ e meybil rorad ni ngar gelgad ko mahl. Gathi ireram e n’en ni ku be rin’ e pi toogor rodad?” Me weliy fare padrey ni dabiyog ni ngan nang fan rogon e maruwel ni ma rin’ Somol.

Faanra der puluw e lem rom ko re n’ey, ma gathi yigoo gur e arrogon e lem rom.

MANG E BE FIL E BIBLE?

I yog Jesus ni bin th’abi ga fan e motochiyel rok Got e “thingari t’uf rom e en ni ir e mmigid ngom ni gowe gur.” (Mark 12:31) Ere gur, i yog Jesus ni bay e miti girdi’ ni ir e ngan dag e t’ufeg ngorad ni bochan e gin ni yad ma par riy ara nam ni yad be’ riy? Danga’. I yog ngak pi gachalpen ni gaar: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:34, 35) Bochan e t’ufeg u thilrad, ma ireram rogon ni yira poyrad. Ba m’agan’rad ngay ni ngar m’ad ni fan ngak pi walagrad, ko bin ni ngar thanged e fan rok e girdi’.

Pi Kristiano kakrom e ra folgad ko thin rok Jesus. Rogon e thin ni bay ko fare babyor ni The Encyclopedia of Religion e be yog ni gaar: “Pi tayugang’ ko teliw, nib muun Tertullian nge Origen ngay e rognew ni piin Kristiano e dabiyog ni ngar thanged e fan ko girdi’, ma ireram reb i kenggin e motochiyel ni talegrad ni nge dab ra manged boch e salthaw nu Roma.”

MANG E MA RIN E PI MICH ROK JEHOVAH?

Pi Mich Rok Jehovah e yad bay u ga’ngin yang e fayleng. Machane, yad ma athamgil nrogon rayog rorad ni ngar daged fare pow ko tin riyul’ e Kristiano ni aram e t’ufeg.

Ni bod nnap’an e duw ni 1994, ma immoy e magawon ko fare binaw nu Rwanda u thilin e ganong ko Hutu nge Tutsi, ma Pi Mich Rok Jehovah e dar uned ko cham. Pi Mich ko gal ganong nem e ur ayuweged yad, ni yu ngiyal’ e be yip’ fan ni yad ra tay e yafas rorad nga thatharen e riya’. Nap’an ni kan kol l’agruw i walag ni pumoon ko fare ganong ko Hutu ni yow be ayuweg e walag ko fare ganong ko Tutsi, me yog fare Interahamwe militia ni gaar, “Thingar ni thang e fan romew ni bochan ni kam ayuwegew e girdi’ ko Tutsi.” Me tomur riy min thang e fan ko fa gal walag ni yow bay ko fare ganong ko Hutu.​—John 15:13.

Uw rogon u wan’um: Be fol e Pi Mich Rok Jehovah ko thin rok Jesus ni be tay chilen ngodad ni ngad t’ufeged e girdi’?