Ngam Mang “Sib” Rok Jehovah

1. Mu weliy e n’en nib thil u thilin rogon ni ma lemnag e girdi’ rogon e maruwel ko sib nge rogon ni bay ko Roma 6:22.

YOOREN e girdi’ e yira yog e sib ngak be’ ma ma yib ngan’rad be’ ni yima maruwel ngak ma yima gafgownag. Machane, ba thil e re n’ey ko bin ni ngam mang sib rok Got. Be yog e Thin rok Got nrayog ni nge mel’eg reb e Kristiano ni nge mang sib rok reb e Masta ni ma t’ufegey. Bin riyul’ riy e nap’an ni yog apostal Paul ni piin Kristiano e kar manged “sib rok Got,” ma be yip’ fan ni yad be pigpig ngak ni bochan e ba t’uf rorad. (Rom. 6:22) Ere, uw rogon e mit ney e sib? Uw rogon ni ngad siyeged ndab da manged sib rok Satan nge re fayleng ney? Ma mang boch e tow’ath nra yag ngodad ni faan gad ra mang sib rok Jehovah?

‘BA T’UF FARE MASTA ROG’

2. (a) Mang e ma k’aring reb e sib u Israel kakrom ni nge ulul ko maruwel ni be tay ni ir reb e sib? (b) Faan yira kuruf tel reb e sib kakrom, ma mang e be m’ug riy?

² Gad ra lemnag fare Motochiyel ni pi’ Got ngak piyu Israel, ma gad ra nang e n’en nib t’uf ni nge rin’ be’ mfini yag ni nge mang sib rok Jehovah. Sib nu Israel kakrom e ba ga’ nra yan i taw ko bin medlip e duw ni kar maruwelgad, ma rayog ni ngan pagrad. (Ex. 21:2) Machane, faanra rib t’uf fare masta rok reb e sib, ma ka baadag ni nge ulul ko maruwel ni ma rin’ ni fan ngak fare masta, ma bay ban’en ni ke yog Jehovah nrayog ni ngan rin’ ko fare sib. Fare masta e thingari sak’iynag fare sib nga dow e ren u langan e mab nge kuruf tel. (Ex. 21:5, 6) Rib ga’ fan ni ngan kuruf tel fare sib, ya rogon ko thin ni Hebrew e faan yira weliy murung’agen e fol ma bay rogon nga bbugithin ni be yip’ fan ni ngan rung’ag ban’en nge ngan motoyil. Ere, faan yira kuruf tel fare sib ma aram e be m’ug riy ni baadag fare sib ni ngki ulul nga i maruwel rok fare masta ma be fol rok. Re n’ey e be ayuwegdad ni nge ga’ fan u wan’dad e n’en ni kad rin’ed ni aram e kad ognaged e yafas rodad ngak Jehovah. Re n’ey e ba muun ngay ni ngaud folgad rok ni bochan e ba t’uf rodad.

3. Mang fan ni kad ognaged gadad ngak Got?

³ Nap’an ni kad ognaged gadad ngak Got kad uned ko taufe, ni aram e kad manged boch e Kristiano, ma ke m’ug riy ni kad mu’gad i dugliy u wan’dad ni ngad pigpiggad ngak Jehovah ara ngad manged boch e sib rok. Kad ognaged gadad ngak ni bochan e ba t’uf rodad ma gad baadag ni ngad rin’ed e tin nib m’agan’ ngay. Dariy be’ ni ke towasariydad ni ngad rin’ed e re n’ey. Ki mada’ ko piin fel’ yangaren ni kar uned ko taufe e kar rin’ed e re n’ey ni bochan e yad baadag ni ngar rin’ed, ma gathi bochan e ngar felfelan’naged e gallabthir rorad. Fan ni ma ognag reb e Kristiano ir e bochan nib t’uf Jehovah rok ni ir e Masta rodad ni bay u tharmiy. I yoloy apostal John ni gaar: “Baaray fan ni nge t’uf Got rodad: fan e ngad folgad ko tin ni ke yog ni ngad rin’ed.”​—1 John 5:3.

KE PUF ROGODAD, MACHANE KA GAD BOGI SIB

4. Faanra ngad manged ‘sib ko tin nib mat’aw,’ ma mang e ba t’uf ni ngad rin’ed?

⁴ Ri gad be pining e magar ngak Jehovah ni bochan e ke bing e kanawo’ ngodad nrayog ni ngad manged boch e sib rok! Bochan ni ke mich fare biyul ni ke pi’ Kristus u wan’dad ma aram fan ni ke yag ni ngad chuwgad u pa’ e denen. Yugu aram rogon ndawor da flontgad, ma ke m’agan’dad ngay ni ngaud folgad rok Jehovah nge Jesus. Ireray e n’en ni tamilangnag Paul u bang fapi babyor nni thagthagnag nga laniyan’ nge yoloy ni gaar: “Ara’ rogon ni ngam lemniged gimed ni kam m’ad rok e denen ma kam fosgad ni gimed ba’ rok Got ni kam taab girdi’gad Kristus Jesus.” Ngemu’, miki fonownigey ni gaar: “Mmudugil ni gimed manang e re bugithin ni baaray: faan gimed ra pi’med nga pa’ be’ ni bod rogon e sib, ni aram e nguum folgad rok faanem, ma aram e kam manged sib rok fare masta ni ir e gimed be fol rok ni demtrug ko denen e kam manged sib rok, ni wenegan ni ma yib e yam’, ara kam manged sib rok e fol, ni wenegan ni ma yib e kan mat’aw ngak Got. Machane ke magar Got! Ya immoy ba ngiyal’ ni um pired ni gimed e sib rok e denen, machane chiney e ri gimed be fol ko tin nib riyul’ ni ir e kan machibnag ngomed. Kam chuwgad u pa’ e denen kam manged sib rok e tin nib mat’aw.” (Rom. 6:11, 16-18) Mu tay fanam i yan riy ni yog Paul ni susun e ngaud ‘folgad ko tin riyul’,’ u polo’ i gum’ircha’dad. Ere, nap’an ni gad ra ognag e yafas rodad ngak Jehovah, ma aram e kad manged ‘sib ko tin nib mat’aw.’

5. Mang e thingar da togopuluwgad ngay, ma mang fan?

⁵ Ra ngad rin’ed e tin ni kad micheged ngak Got, ma bay l’agruw ban’en nthingar da togopuluwgad ngay. Bin som’on e rarogodad ndawor da flontgad. Ku aram e n’en ni i guy Paul rogon ni nge gel ngay. I yog ni gaar: “Lanin’ug e ri ba adag fare motochiyel rok Got. Machane reb e motochiyel nib thil ko biney e gu be guy ni be maruwel u fithik’ i dowag​—reb e motochiyel ni be togopluw ko bin baaram e motochiyel ni ba adag lanin’ug. Ir e ke tiyeg ni gag e kalbus ko tin ni ba adag e denen ni ir e be maruwel u fithik’ i dowag.” (Rom. 7:22, 23) Ku er rogodad ndawor da flontgad. Ere, gubin ngiyal’ ni gad be athamgil ni ngad gelgad ko pi meewar rodad. I yog apostal Peter ni gaar: “Um pired ni gimed bogi ni’ ni kam gilafgad ko kireb, machane gilaf ko kireb ni kam tiyed e dab mmaruwelgad ngay ni ngam upunguyed ban’en nib kireb, machane nguum ngongolgad nrogon e sib rok Got.”​—1 Pet. 2:16.

6, 7. Uw rogon ni ma n’igin Satan ni ngad lemnaged nib fel’ e pi n’en ni bay ko re fayleng ney?

⁶ Bin migid e thingar da togopuluwgad ko re fayleng ney ni be gagiyegnag e pi kan nib kireb. Satan ni ir e en ni be gagiyegnag e re fayleng ney e be guy rogon ni nge dab kud yul’yul’gad ngak Jehovah nge Jesus. Ma guy rogon ni ngad manged sib rok, ni aram e ma waliydad ni ngad manged bang ko re fayleng rok ney. (Mu beeg e Efesus 6:11, 12.) Reb e kanawo’ ni ma rin’ Satan e re n’ey riy e aram e ma guy rogon ni ngad lemnaged nib fel’ e pi n’en ni bay ko re fayleng ney. Machane, ke fonownagdad apostal John ni gaar: “Faanra t’uf romed e tin ni bay u fayleng, ma aram e de t’uf e en ni Chitamangiy romed. Gubin ban’en nib mil fan ngaray nga fayleng​—ni aram e tin nib tagan ban’en ni yima ar’arnag, ni tin nra guy e girdi’ ma yad ba adag ni nge yog ngorad, nge urngin ban’en ni bay u roy u fayleng nri ma uf e girdi’ ngay​—dariy reb e pi n’ey ni yib rok e en ni Chitamangiy; ya urngin me yib rok e fayleng.”​—1 John 2:15, 16.

⁷ Girdi’ nu fayleng e yad baadag ni nge yoor ban’en rorad, ma ma guy Satan rogon ni nge lemnag e girdi’ ni faanra yoor e salpiy rorad ma aram e rayog ni ngar felfelan’gad. Ke yoor e kantin ni gagang’. Ma pi n’en ni yima dag yaan nge fel’ngin u TV nge yu ken e babyor e ba ga’ ni yima dag riy ni n’en th’abi ga’ fan e aram e nge yoor e chugum rok be’ me rin’ boch ban’en ni nge felfelan’ ngay. Bod ni, yungi n’en ni yima yarmiy e chur ni ma tay e girdi’ riy e yad ma ognag boch ban’en nrayog ni nge ayuweg be’ ni nge chur nga reb e nam ni nge guy boch ban’en, mab ga’ ni pi chur ney e yima chagil riy ko girdi’ ni yad ma lem ni bod e girdi’ nu fayleng. Arrogon, gubin yang ni yibe yog riy ngodad ni ngad thilyeged e par rodad nge m’ag ko par ko girdi’ nu fayleng.

8, 9. Mang ban’en nrib gel e kireb riy, ma mang fan?

⁸ I fonownigey Peter u nap’an ni be weliy murung’agen boch e girdi’ u lan e ulung ni Kristiano u nap’an e bin som’on e chibog ni ke af e lem nu fayleng ngorad ni gaar: “Rogon e felfelan’ ni yad ma tay e ngar ngongliyed u lan e tamilang e tin ni ir e be ar’arnag e dowef rorad nge tin ni ir e yad be yim’ ni bochan; ya yad ma girngiy e tamra’ nge ngachal nib kireb i yib ngomed ko ngiyal’ ni yad ma yib ra uned riy ngomed ko muulung nge abich, ma yad be felfelan’ ko pi ngongol ni yad be rin’ ni ir e yad be bannag e girdi’ ngay! Yad ma yog e thin nib ufanthin nge thin ko balyang, ma yad be maruwel nga ngongolen e darngal ni be ar’arnag e dowef rorad ni fan e nge aw ko wup rorad e piin ni ka fini chuw u fithik’ e girdi’ ni ke oloboch. Be lungurad e gadad e girdi’ e ba puf rogodad ni ngad rin’ed e tin ni gadad ba adag, machane yad e kar pired ni kar manged sib ko ngongol ni ma kirebnigey ni ke mecham ngorad​—ya demtrug ban’en nra gel ngak be’ ma aram e ke par faanem ni ke mang sib rok fare n’em.”​—2 Pet. 2:13, 18, 19.

⁹ Ra guy be’ rogon ni nge yag ngak e “tin nra guy e girdi’ ma yad ba adag ni nge yog ngorad” ma dabiyog ni nge par nib puf rogon. Ya n’en nra buch rok e ra par ni ke mang sib rok Satan ni Moonyan’. (1 John 5:19) Rib gel e kireb riy ni ngan mang sib ko chugum nge flaab ya ra mo’maw’ ni ngan pithigey riy.

REB E MARUWEL NI YIRA FELFELAN’ NGAY

10, 11. Mini’ e piin ni be nameg Satan e ngiyal’ ney, ma uw rogon nrayog ni nge magawonnagrad e skul nib tolang?

¹⁰ Satan e ma nameg e piin ndawori yoor ban’en ni kar nanged ni bod rogon e n’en ni rin’ u Eden kakrom. Ngiyal’ ney e ba ga’ ni ma nameg ni nge bannag e piin fel’ yangaren. Dabun Satan ni nge ognag be’ ir ni nge pigpig ngak Jehovah ni kub muun e piin fel’ yangaren ngay. Baadag ni nge dab ki yul’yul’ e piin ni kar ognaged yad ngak Jehovah ni ngar pigpiggad ngak.

¹¹ Ere, chiney e ngad sulod ngad weliyed murung’agen fare sib ni ke m’agan’ ngay ni ngan kuruf tel. Re n’ey ni yira rin’ ngak e ba amith, machane aram e n’en nra mang pow riy ni ke dugliy ni nge par ko fare masta ngki ulul ko maruwel ni be rin’. Sana ba mo’maw’ rok reb e fel’ yangaren ni nge dugliy ni nge rin’ boch ban’en nib thil ko pi n’en ni be rin’ e pi taab yangar rok. Maku ma guy Satan rogon ni nge lemnag e girdi’ ni faanra yag reb e maruwel nib fel’ ngorad ko re fayleng ney, ma yad ra felfelan’. Machane, piin Kristiano e susun ndab ra paged talin ni tirok Got ban’en e aram e n’en nra yagnag e bin riyul’ e felfelan’ ngorad. I yog Jesus ni gaar: “Nge felan’ e piin ni kar pirieged u lanin’rad ni kar gafgowgad ndabisiy ni nge yog Got ngorad.” (Matt. 5:3) Pi Kristiano e kar ognaged yad ngak Got ni ngar rin’ed e tin nib m’agan’ ngay, ma gathi Satan. Yad ra beeg e pi motochiyel rok Jehovah ma ma yib e felfelan’ riy ngorad, maku aram rogon ni yad ma fal’eg i lemnag ni rran nge nep’. (Mu beeg e Psalm 1:1-3.) Machane, boor e skul nib tolang e ngiyal’ ney e nap’an nra un be’ ngay me lich e tayim nrayog ni nge fal’eg i lemnag e thin rok Jehovah me rin’ e tin nib t’uf ni fan ko tirok Got ban’en.

12. Mang boch ban’en nrayog ni nge mel’eg e piin fel’ yangaren e ngiyal’ ney?

¹² Faanra tin nu fayleng ban’en e ir e masta rok reb e Kristiano, ma ra mo’maw’ e par rok. U lan e gin som’on e babyor ni yoloy Paul ngak piyu Korinth e yog riy ni gaar: “I taw e thin rok Got ngom me gur reb e sib fa?” Miki ulul ngay ni gaar: “Dabi magafan’um ngay; machane faanra mu guy ni ke bung rogom ni nge dab kum mang reb e sib ni aram e gur e ke mil fam ngom, ma ga rin’.” (1 Kor. 7:21) Ere, rayog ni nge dugliy be’ ni nge dabki mang reb e sib. Boor e nam e ngiyal’ ney ni bay ko motochiyel riy nthingari un e bitir nga skul ni bay n’umngin nap’an. Ma nap’an nra mu’nag e thal ni baaram e skul nthingari un ngay ma aram e rayog ni nge dugliy ko ngki ulul fa danga’. Ra mo’maw’ rok be’ ni nge pigpig ngak Jehovah u polo’ e tayim rok ni faanra un ko skul nib tolang ni bochan e nge yag reb e maruwel nib fel’ ngak.​—Mu beeg e 1 Korinth 7:23.

SKUL NIB TOLANG ARA BIN TH’ABI FEL’ E SKUL?

13. Mang e miti skul nra yib angin ko pi tapigpig rok Jehovah?

¹³ I fonownag Paul e pi Kristiano nu Kolose ni gaar: “Mu guyed rogomed ya ri kolmed be’ ngam manged kalbus rok ni be’ ni be maruwel ko gonop rok e girdi’ nge sabanban ndariy rogon nga bayang, ni yib ko machib ni sum rok e girdi’ ni yibe fil ngak reb e mfen nge reb, ma ki yib ko pi kan ni yad be gagiyeg u lan e gin’en ni ba’ urngin ban’en nu lan e lang riy nib muun e fayleng ngay, ma gathi Kristus e yib rok.” (Kol. 2:8) Boor e sensey u boch e skul e ngiyal’ ney ni yad ma fil ko bitir murung’agen e “gonop rok e girdi’ nge sabanban ndariy rogon nga bayang.” Pi skul nib tolang e ba ga’ ni ireray e pi n’en ni yad ma fil ko bitir, ere bayi chuw reb e bitir ko pi skul ney ma dariy e salap rok nrayog ni nge maruwel ngay ni fan ko pi n’en ni ma mada’nag u reb e rran ngu reb. Machane, pi tapigpig rok Jehovah e yad ma mel’eg reb e skul nra ayuwegrad ya nge yag boch e salap ngorad nrayog ni ngar maruwelgad ngay ni fan ko pigpig ni yad be tay ngak Got mar pared ni ke lich pa’ u puluwrad. Rib ga’ fan u wan’rad e fonow ni pi’ Paul ngak Timothy ni gaar: “Liyor ni yima tay ngak Got e ri ra fel’ rogon be’ riy nfaanra ke fel’ u wan’ e tin ni ba’ rok. Ere faanra bay e ggan rodad nge mad ni nga don’ed, ma susun e ke gaman e tin ni nge yog ngodad.” (1 Tim. 6:6, 8) Tin riyul’ e Kristiano e yad ma nameg ni nge yag bang e babyor ngorad ni “be yog murung’agrad ni yad ba fel’” ni aram e yad ma athamgil ni ngar uned ko machib u rogon nrayog rorad, ma darur nameged e degree u boch e skul nib tolang nge liw nib tolang u tabon e maruwel.​—Mu beeg e 2 Korinth 3:1-3.

14. Uw rogon u wan’ Paul e tow’ath rok ni ir e sib rok Got nge Kristus nrogon ni bay ko Filippi 3:8?

¹⁴ Am lemnag e n’en ni rin’ apostal Paul. Gamaliel nreb e sensey ko Pi Motochiyel rok e Pi Jew e ir e skulnag. Pi n’en ni fil Paul e taareb tolngin ko pi n’en ni yima fil ko tin th’abi tolang e skul e ngiyal’ ney. Machane, mang e yog u nap’an ni taareb rogonnag e tow’ath ni ke yag ngak ni ke mang sib rok Got nge Kristus? I yoloy ni gaar: “Urngin ban’en ma kug matheeg ngay ni kari yan i aw ni lus ni bochan e bin ni ka ba ga’ fan e nggu nang Kristus Jesus ni ir e Somol rog.” Miki ulul ngay ni gaar: “Bochan Kristus ma aram fan ni kug n’ag urngin ban’en; ya kug finey ni goo chubung, ni fan e nge yog Kristus ngog.” (Fil. 3:8) Re n’ey e ra ayuweg e pi Kristiano ni fel’ yangaren nge gallabthir rorad ni ngar dugliyed boch ban’en u murung’agen e skul u fithik’ e gonop. (Mu guy e sasing.)

NGE YIB ANGIN E BIN TH’ABI FEL’ E SKUL NGOM

15, 16. Mang e pi n’en ni yima fil u lan e ulung rok Jehovah, ma mang fan?

¹⁵ Uw rogon e yungi n’en ni bay boch e skul nib tolang riy? Girdi’ ko yungi n’em e ba ga’ nib puf rogorad nrayog ni ngar togopuluwgad mi yad dag ni kar damumuwgad ko am nge boch e girdi’ ni yad ma yog e thin. (Efe. 2:2) Machane, ulung rok Jehovah e ba thil ya ma fil e tin th’abi fel’ ban’en ko girdi’ u fithik’ e gapas, ma ireray e n’en ni yima rin’ u lan e ulung ni Kristiano. Gad gubin ni ma yib angin fare Theocratic Ministry Skul ngodad ni yima tay u gubin e wik. Maku bay boch e skul ni kan ngongliy rogon ni fan ko pi walag ni pumoon ndawor ra uned ko mabgol ni yad be pioneer (Skul ni Fan ko Pi Walag ni Pumoon ni Yad Ba Muchugbil) nge skul ni fan ko piin mabgol ni yad be pioneer (Skul ni Fan ko Piin Mabgol ni Kristiano). Mit ney e skul e ma ayuwegdad ni ngad folgad rok Jehovah ni ir e Masta rodad ni bay u tharmiy.

¹⁶ Boor ban’en nrayog ni ngad pirieged ko pi Watch Tower Publications Index ara Watchtower Library ni bay ko CD-ROM. Bin th’abi ga’ i fan ni yima skulnagdad ko thin nu Bible e bochan ni nge yag nda liyorgad ngak Jehovah. Re skul ney e gad ma fil riy rogon ni ngad ayuweged e girdi’ ni ngar manged e pi tafager rok Got. (2 Kor. 5:20) Piin ni gad ma skulnagrad e ku rayog ni ngar skulnaged boch e girdi’.​—2 Tim. 2:2.

TOW’ATH NI YIRA PI’ NGAK FARE SIB

17. Mang boch e tow’ath nra yag ngodad ni faan gad ra mel’eg e bin th’abi fel’ e skul?

¹⁷ U lan fare fanathin rok Jesus ni murung’agen fapi salpiy e weliy riy ni yog fare masta ngak fagali sib nib fel’ e n’en ni kar rin’ew ma aram me piningrow ni ngar unew ngak ko felfelan’, mi ki pi’ boch e maruwel ngorow. (Mu beeg e Matthew 25:21, 23.) Gad ra mel’eg e bin th’abi fel’ e skul ma gad ra felfelan’ me yag boor e tow’ath ngodad. Am lemnag e n’en ni buch rok Michael. Bochan nrib fel’ lolugen u skul me pining boch e sensey rok nga reb e muulung ni ngar weliyed murung’agen boch e skul nib tolang nrayog ni nge un ngay. Machane, kar gingad ngay ya ke yog Michael ngorad ni baadag ni nge fek reb e class u skul nra ayuweg ni nge rin’ boch ban’en nra yag buchuuw e salpiy riy ngak ni nge ayuweg ko machib u polo’ e tayim ni be un ngay. Ere gur, ke lemnag nde fel’ e n’en ni ke dugliy? I yog ni gaar: “Tamilangan’ ni kug fil u lan e Bible ni ka nap’an ni gu un ko pioneer ke mada’ ko chiney ni kug mang reb e piilal e ban’en nrib ga’ fan. Pi tow’ath ni ke yag ngog e dabiyog i taarebnag ko salpiy nra yag ngog ni faan gomanga gu nameg e skul nib tolang. Kar gu felfelan’ ni kug dugliy ndab gu un ko skul nib tolang.”

18. Mang fan ni ngad mel’eged e bin th’abi fel’ e skul?

¹⁸ Bin th’abi fel’ e skul e gad ma fil riy e tin nib m’agan’ Got ngay ma ra ayuwegdad ni ngad manged boch e sib rok Jehovah. Ra ayuwegdad ni nge l’agan’dad ko ngiyal’ ni gad ra ‘par ni gathi gad e sib rok e wod’ me tomur riy ma gad “un ko flaab rok pi fak Got.” (Rom. 8:21) Bin th’abi ga’ fan e gad ra fil riy rogon ni ngad daged nriyul’ nib t’uf Jehovah rodad ni ir e Masta rodad ni bay u tharmiy.​—Ex. 21:5.