Dariy Be’ Nrayog ni Nge Mang Sib rok L’agruw i Masta

1-3. (a) Mang boch e magawon ni bay rogon ko salpiy ni ma mada’nag boch e tabinaw e ngiyal’ ney, ma uw rogon ni ke gay boch i yad rogon ni ngar pithiged e pi magawon ney? (Mu guy e sasing ni bay u tabolngin e re article ney.) (b) Mang boch e deer ni ma sum u murung’agen rogon ni ngan chuguliy e bitir?

I YOG Marilyn ni gaar: “Gubin e rran nra sul James, ni pumoon rog ko maruwel nga tabinaw, ma kari aw parwon ni bochan e rib gel e maruwel ni ke tay, machane rib achig puluwon, ma de gaman ni nggu chuw’iyed urngin ban’en ngay nib t’uf ko tabinaw romad. Gu baadag ni nggu ayuweg, ya nge yag ni gu chuw’iyew boch ban’en nib fel’ ni bay rok boch e bitir u skul ni nge fanay Jimmy ni bochi pagel ni fakmow.”a Ku baadag Marilyn ni nge ayuweg e girdi’ u tabinaw rok miki yagnag e salpiy ni fan ko tabinaw rok boch nga m’on. Boor e fager rok ni ka ranod nga boch e nam ko maruwel ni bochan e nge yoor e salpiy rorad. Machane, nap’an ni lemnag Marilyn e re n’ey, me maruwaran’ ko mang e nge rin’. Mang fan?

² Ra nge lemnag Marilyn e n’en nra buch ko tabinaw rok u nap’an nra yan ko maruwel nga yugu reb e nam, ma ma k’aring e magafan’ nib gel ngak. Yugu aram rogon ma ke lemnag boch e girdi’ ni ka ranod nga yugu boch e nam ni ngar magow maruwelgad, ma ke ulul e tabinaw rorad ni ngar pigpiggad ngak Jehovah. Machane, ke lemnag rogon nrayog ni nge chuguliy Jimmy u nap’an ni be par u yugu reb e nam. Gur, rayog ni nge chuguliy fak nib fel’ rogon ko Internet, ara nge ‘llowan’nag nrogon, me fonownag’ nrogon ni ma fonownigey Jehovah?​—Efe. 6:4.

³ Ere, ke fith Marilyn laniyan’ boch e girdi’. Pumoon rok e dabun ni nge yan, machane me yog ngak ni faanra baadag ni nge yan ma dabi taleg. Miki yog e piin piilal nge boch e walag u lan e ulung ngak ndabi yan. Machane bay boch e walag nib pin u lan e ulung nni rogned ngak nib fel’ ni nge yan. I lungurad, “Faanra ba t’uf rom e tabinaw rom, ma ga ra yan. Ka rayog ni ngam ulul ko pigpig ni ga be tay ngak Jehovah.” Yugu aram rogon ni i maruwaran’, machane me yan. I fingichiy James nge Jimmy me micheg ngorow ni gaar: “Dabi n’uw nap’an ni nggu wan.”

N’EN NIB MILFAN KO TABINAW NGE PI KENGGIN E MOTOCHIYEL NU BIBLE

4. Mang fan ni boor e girdi’ ni yad ma pag e nam rorad nga ranod ra pared nga yugu boch e nam, machane mini’ e ba ga’ ni ma ayuweg e bitir rorad?

⁴ Dabun Jehovah ni nge yim’ e pi tapigpig rok ko bilig. Ma kab kafram i yib ni bayi n’en me chuw be’ ko nam rok nge yan i par nga reb e nam ni bochan e nge dab ki gafgow. (Ps. 37:25; Prov. 30:8) Kakrom e l’og Jakob pi fak ni pumoon ni nga ranod nga Egypt ni ngar chuw’iyed e ggan ni bochan e ke yib e uyungol ko gin ni yad ma par riy.b (Gen. 42:1, 2) Ngiyal’ ney e yooren e piin ni yad ma pag taferad nga ranod ra pared nga yugu boch e nam e gathi bochan nder gaman e ggan ni ngar ked. Ya bochan ni boor i yad e boor e malfith rok ndakir yag ni nge thang. Ma boch i yad e baadag ni nge thil rogon e par ko tabinaw rok nge fel’ boch. Ma bochan ni yad ma par u boch e nam nib gafgow ko salpiy, ma aram fan ni yad ma chuw nga ranod nga wuru’ e nam rorad ko gin nib mom ni ngar yognaged e salpiy riy. Pi girdi’ ney e ba ga’ ni bay ranod, mi yad digey e bitir rorad ni nge chuguliy e en mabgol rorad, ara reb i walagrad nib ilal, ara gallabthir rorad, ara reb e girdi’ rorad, ara fager rorad. Yugu aram rogon ni boor i yad e dabun ni nge digey e en mabgol rok ara bitir rok, machane yad ma lemnag ni kemus e kanawo’ nrayog ni ngar pithiged e biney e magawon riy.

5, 6. (a) Mang e ke fil Jesus u murung’agen e felfelan’ nge pagan’? (b) Mang e yog Jesus ngak pi gachalpen ni ngar yibilayed u murung’agen boch ban’en ni fan ko par rorad? (c) Uw rogon ni ma tow’athnagdad Jehovah?

⁵ Boor e girdi’ ni yad ba gafgow u nap’an Jesus, ma sana ur lemnaged nra gel e felfelan’ nge pagan’ rorad ni faanra yoor boch e salpiy rorad. (Mark 14:7) Machane, baadag Jesus ni nge pagan’ e girdi’ nga yugu ban’en. Baadag ni nge pagan’rad ko Cha’ nra flaabnagey ndariy n’umngin nap’an, ni aram Jehovah. Nap’an fare Welthin rok Jesus u Daken e Burey, me weliy nder ma yib e bin riyul’ e felfelan’ nge pagan’ ko chugum ara athamgil ni gad ma tay, ya ma yib ko tha’ u thildad e Chitamangidad ni bay u tharmiy.

⁶ Ku de fil Jesus ko fare kenggin e meybil rok ni ngad yibilayed ni nge yoor e salpiy rodad, ya ke fil ngodad ni ngad yibilayed e tin nib t’uf rodad u reb e rran ngu reb. Aram fan ni yog ni ngad yibilayed ni nge lungudad, “Mpi’ ngomad e daba’ e ggan ni nge yog ngomad.” Ki yog ko piin ni ur motoyilgad ngak ni gaar: “Dab mu ulunguyed e flaab u roy u fayleng . . . Machane ngam ulunguyed e flaab romed u tharmiy.” (Matt. 6:9, 11, 19, 20) Rayog ni nge pagan’dad nra tow’athnagdad Jehovah ni bod rogon ni ke micheg. Tow’ath rodad nra pi’ Got e gathi kemus ni ngad fel’gad u wan’, ya ku ra pi’ e tin nib t’uf rodad. Ere, kemus nrogon ni nge yag e bin riyul’ e felfelan’ nge pagan’ ngodad e ngad taga’gad ko Chitamangidad ni bay u tharmiy ma gathi salpiy.​—Mu beeg e Matthew 6:24, 25, 31-34.

7. (a) Mini’ e ke tay Jehovah nib milfan ngak ni nge chuguliy e bitir? (b) Mang nib ga’ fan ni nge l’agruw e gallabthir mi yow chuguliy fakrow u taabang?

⁷ Ra ‘ngad m’oneged u wan’dad e tin nib m’agan’ Got ngay’ ma kub muun ngay ni ngad lemnaged e pi n’en nib milfan ngodad u lan e tabinaw nrogon ni ma lemnag Jehovah. Bod ni bay reb i kenggin e motochiyel ko fare Motochiyel rok Moses ni fan ngak e piin Kristiano ni aram e: Ba t’uf ni nge skulnag e piin gallabthir pi fakrad ko tirok Got ban’en. (Mu beeg e Deuteronomy 6:6, 7.) Ke pi’ Got e biney e maruwel ko gallabthir, ma gathi tutuw nge titaw, ara yugu be’. I yog Solomon ni Pilung ni gaar: “Fakag, mu telim ko tin ni be machibnag e chitamam ngom, ma ga uthum e lim ko tin ni be yog e chitinam.” (Prov. 1:8) Be yip’ Jehovah fan nthingari chuguliy l’agruw e gallabthir pi fakrow u taabang, mi yow pow’iyrad mar skulnagew yad u taabang. (Prov. 31:10, 27, 28) Yooren ban’en ni ma fil e piin bitir ko gallabthir rorad, nib ga’ ni pi n’en ni bay rogon ko tirok Got ban’en, e yad ma fil u nap’an ni yad ma rung’ag ko gallabthir rorad ni yad be weliy murung’agen Jehovah ni gubin e rran, nge rogon ni yad ma guy ko ngongol rorad.

BOCH BAN’EN NI MA BUCH NDAN LEMNAG

8, 9. (a) Mang boch ban’en ni ma buch ni faanra der par chon e tabinaw u taabang? (b) Faanra der par e gallabthir nge bitir u taabang, ma uw rogon nrayog ni nge magawonnag e tabinaw?

⁸ Boor e girdi’ ni kar lemnaged ni ngar paged e tabinaw rorad nga ranod ra maruwelgad nga yugu reb e nam e yad ma guy rogon ni ngar nanged e pi magawon nra sum riy, machane yooren i yad e der ma lemnag nra magawonnag e re n’ey e tabinaw rorad. (Prov. 22:3) Nap’an ni yigi chuw Marilyn, me tabab ni nge kireban’ nib gel ni bochan e ke tawrengnag e tabinaw rok. Maku aram rogon e n’en ni buch ko pumoon rok nge fachi pagel ni fakrow. Yug ra i par Jimmy ma be gaar, “Mang fan ni kam man?” I lemnag Marilyn nra sul u lan in e pul, machane faani par u rom nge yoor e duw, me nang ni bay ban’en ni ke thil ko tabinaw rok. I nang ndaki chugur e tha’ u thilrow Jimmy. I yog ni gaar: “Da kug t’uf rok.”

⁹ Faanra der par e gallabthir nge bitir u taabang, ma rayog ni nge magawonnag rogon ni ngaur daged boch e fel’ngin nib fel’ nge rogon ni yad ma lemnag e tin nib fel’ nge tin nib kireb ban’en.c Ra kab bitir fapi bitir ma ke n’uw nap’an ni ke palog e gallabthir rorad, ma boor e magawon nrayog ni nga i mada’nag fapi bitir. I yog Marilyn ngak Jimmy ni ke pag fan boch ban’en ni fan ngak. Machane, rogon u wan’ Jimmy e bod ni kan n’ag. Som’on e i damumuw ngak e chitiningin ni ke yan. Ma faani munmun, ma nap’an nra sul Marilyn ni nge guy e tabinaw rok, ma ma damumuw Jimmy ngak. I lemnag Jimmy ndakuriy rogon ni nge t’ufeg e chitiningin me fol rok. Mab ga’ ni aray rogon e n’en ni ma buch ko bitir nder par e gallabthir rorad u toobrad.​—Mu beeg e Proverbs 29:15.

10. (a) Mang e rayog ni nge buch ko bitir ni faanra kemus ni nga i pi’ e gallabthir boch e tow’ath ngak ma der tay e tayim ni fan ngak ara i par u tooben? (b) Mang e dabiyog ni nge rin’ reb e gallabthir nge fak ni faanra be guy fare gallabthir rogon ni nge chuguliy fare tir machane der par u tooben?

¹⁰ Bayi n’en me pi’ Marilyn e salpiy nge boch e tow’ath ngak Jimmy ni bochan e be guy rogon ni nge fal’eg e tha’ u thilrow. Machane, munmun me nang ni n’en ni be rin’ e be palognag e tha’ u thilrow fak, ma be k’aring fak ni nge m’oneg e chugum ko tirok Got ban’en nge tha’ u thilrad chon e tabinaw rok. (Prov. 22:6) Bayi n’en me gaar Jimmy ngak, “Dab mu sul. Kemus ni ngaum pi’ boch e tow’ath ngog.” Bochan e re n’ey ma aram me nang Marilyn ndabiyog ni nge chuguliy fak ni faanra kemus ni nga i yoloy e babyor nge yan ngak, ara i callnag u telefon, ara ur nonow ko internet. I yog ni gaar, “Dabiyog ni ngam gamuchmuchgow e bitir rom ara mu faray owchen u m’on ni nge mol u nap’an ni gimew be non ko Internet.”

11. (a) Faanra ra bagayow fa wu’ i mabgol ma be par u bang ni bochan e maruwel ni yow ma un ngay, ma uw rogon nrayog ni nge magawonnag e mabgol rorow? (b) Uw rogon ni ke nang reb e walag nib pin nib t’uf ni nge sul ko tabinaw rok?

¹¹ Ki magawon e tha’ u thilin Marilyn nge Jehovah nge thilrow James ni pumoon rok. Kemus ni taareb e rran u reb e wik ni ma chag ko girdi’ u lan e ulung me un ko machib, ma yu ngiyal’ e dariy, maku reb e ku ma guy e en nib ga’ ko maruwel rok rogon ni ngar parew. Bochan nde moy e pumoon rok u tooben ni ngar weliyew e magawon rorow u taabang, ma aram mu ur weliyew e magawon rorow ngak boch e girdi’ me munmun me chugur ni ngar unew ko ngongol ndarngal. Ke nang Marilyn ni yugu aram rogon ndar unew e pumoon rok ngak be’ ni gathi mabgol rorow, ma dabiyog ni ngar folgow ko n’en ni be yog e Bible ni aram e susun ni nge be’ me pi’ e tin nib t’uf ko dowef nge laniyan’ e en mabgol rok, ni bochan e darur parew u taabang. Dabiyog ni nga yigi yib ban’en ngan’row mi yow rin’ u taabang ni ka chingiyal’ nem, ara ra sapgow ngorow mi yow siminmin, ara ra mathgow ngorow, ara ra gumuchmuchgow, ara ra weliyew murung’agen e “adag” rorow ngorow, ara nge bagayow me “pi’ ir” ngak bagayow. (Tng. 1:2, BT; 1 Kor. 7:3, 5) Maku reb e, dabkiyag ni ngar pigpiggad e bitir rorow ngak Jehovah u taabang. I yog Marilyn ni gaar, “Nap’an ni gu fil u nap’an reb e convention nrib ga’ fan ni nga i tay chon e tabinaw e fol Bible ni tabinaw ni bochan e ra ayuwegrad ni ngar mageygad ni yad ba fas u nap’an fare rran rok Jehovah, ma aram mug nang nib t’uf ni nggu sul nga tafenag. Thingar gu tabab i fal’eg e tha’ u thilmad chon e tabinaw rog nge tha’ u thilmow Jehovah.”

FONOW NIB FEL’ NGE FONOW NIB KIREB

12. Mang fonow u Bible e rayog ni ngan pi’ ngak e piin ni yad be par u bang nib palog ko tabinaw rorad?

¹² Nap’an ni dugliy Marilyn ni nge sul nga tafen, ma boch e girdi’ e ra pied boch e fonow nib fel’ ngak ma boch e danga’. I yog e piin piilal ko re ulung ni baaram ni ma un ngay nib fel’ e n’en ni ke dugliy, ya ke dag nib gel e michan’ rok ma der rus. Machane, boch e girdi’ ni kar digeyed e tabinaw rorad ni bochan e nga ranod e ngaram ni maruwel e rogned ngak nde fel’ e n’en ni ke dugliy. I lungurad ngak, “Dabi n’uw nap’an mu kum sul bayay e ngaray. Uw rogon ni ngam pi’ e tin nib t’uf ko tabinaw rom ni faanra ngam sul e ngaram?” Piin Kristiano e susun ndab u rogned e thin ni aray rogon, ya susun ni ngar “filed e tin nib fel’ ngak e piin nrugod nge yog ni t’uf figirngirad nge pi fakrad rorad, ma . . . ngar ngongliyed e maruwel nib fel’ u tabinaw rorad,” ya “nge dabiyog ni yog be’ nib kireb e thin ni yib rok Got.”​—Mu beeg e Titus 2:3-5.

13, 14. Mang fan nib t’uf ni nge gel e michan’ rodad ni faanra ngad rin’ed boch ban’en nib thil nga rogon ni be lemnag chon e tabinaw rodad? Mu weliy ban’en ni ke buch.

¹³ Boor e girdi’ ni yad ma digey e tabinaw rorad ni nga ranod nga reb e nam ko maruwel e kar ilalgad u boch e nam ni yalen riy e ngaun tay chon e tabinaw ni yad e yad ba m’on u gubin ban’en, mab ga’ ni gallabthir e ir e ngaun m’onegrad u gubin ban’en. Ere, faanra nge fol reb e Kristiano rok Jehovah me pag e tin nib m’agan’ chon e tabinaw rok ngay nde m’agan’ Jehovah ngay, ma thingari gel e michan’ rok.

¹⁴ Am lemnag e n’en ni buch rok Carin. I yog ni gaar: “Nap’an ni gu gargeleg Don, ma gamow bay e pumoon rog u yugu reb e nam ni gamow be maruwel, ma ka fin gu tabab i fil e Bible. Gubin e girdi’ u tabinaw rog nra lemnaged ni bay gu pi’ Don ko gallabthir rog ni ngar chuguliyew nge taw ko ngiyal’ ni ke fel’ rogomow ko salpiy.” Ere, nap’an ni yog Carin ni ir e ra chuguliy Don, ma aram me yog chon e tabinaw rok ni kub muun e pumoon rok ngay ni ir be’ nib malmal, ngemu’ mu kur moningniged. I yog Carin ni gaar, “Ngiyal’ nem e dawori tamilang u wan’ug fan nib kireb ni nggu pi’ Don ko gallabthir rog ni ngar chuguliyew u lan in e duw. Machane, gu manang ni ke pi’ Jehovah e biney e maruwel ngomow ni nggu rin’ew ya gamow e gallabthir rok.” Nap’an ni ki diyen Carin bayay, me yog e pumoon rok ngak ni nge li’ fak u mayel. Ma pumoon rok e gathi ir reb e walag. N’en ni ke rin’ Carin u m’on riy e ke gelnag e michan’ rok, ma aram e n’en ni ki ayuweg ni nge dugliy e n’en nib m’agan’ Jehovah ngay. Chiney e kar felfelan’gad e pumoon rok, nge bitir rorow ni kar pared u taabang. Faan gomanga pi’ Carin bagayow fa gal bitir ara pi’row ni yow l’agruw ni nge chuguliyrow be’, mab thil e n’en nra buch.

15, 16. (a) Mu weliy rogon nni chuguliy be’ ni ka nog Vicky ngak. (b) Mang fan ni dugliy ndabi chuguliy fak ni bod rogon nni chuguliy?

¹⁵ Reb e walag ni Vicky fithingan e ki yog ni gaar: “Immoy in e duw ni chuguliyeg e titaw rog, ma bin baaram e ppin ni walageg nib bitir ngog e ir e i chuguliy e gallabthir rog. Nap’an ni gu sul nggu wan gu par ko gallabthir rog, ma ke thil rogon ni gu ma lemnagrow. Bin baaram e ppin ni walageg e ba mom rok ni nge weliy laniyan’ ngorow, ara nge gumuchmuch ngorow, ara nge chugur e tha’ u thilrad. De chugur e tha’ u thilmad e gallabthir rog, ma ki mada’ ko ngiyal’ ni kug ilal, ma kug ma guy nib mo’maw’ ni nggu weliy lanin’ug ngorow. Ku gognew e re ppin ni walageg nem ko gallabthir romow nnap’an ni yow ra pilibthir ma gamow ra ayuwegew yow. Machane, gag e kemus ni gu ra ayuwegrow ni bochan e gu manang ni ban’en nthingar gu rin’, machane bin baaram e ppin ni walageg e ra ayuwegrow ni bochan e yow ba t’uf rok.

¹⁶ “Chiney e baadag e nina’ rog ni nggu pi’ fakag ni ppin ngak ni nge chuguliy, ni bod rogon e n’en ni rin’ ngog.” Ki ulul Vicky ngay ni gaar, “Kug siyeg e re n’em u fithik’ e sumunguy. Gamow baadag e pumoon rog ni nggu chuguliyew fakmow ma gamow fil ngak rogon ni nge t’uf Jehovah rok. Ma dabug ni nge kireb e tha’ u thilmow e bitir rog boch nga m’on.” Ke nang Vicky nrogon nrayog ni nge chuguliy fak nib fel’ rogon e thingari gel feni t’uf Jehovah nge pi kenggin e motochiyel rok u wan’ ko t’ufeg rok ko chugum nge chon e tabinaw rok. I yog Jesus ni gaar: “Dariy be’ nrayog ni nge mang sib rok l’agruw i masta,” ni aram e Got nge Salpiy.​—Matt. 6:24; Ex. 23:2.

RAYOG NI NGE AYUWEGDAD JEHOVAH NI NGE “FEL’” GUBIN BAN’EN NI GAD BE MARUWELIY

17, 18. (a) Mang e thingari dugliy e piin Kristiano ni gubin ngiyal’? (b) Mang boch e deer ni gad ra weliy ko bin migid e article?

¹⁷ Ke micheg Jehovah ni ir e Chitamangidad ni bay u tharmiy ni faan gad ra m’oneg e Gagiyeg rok nge tin nib m’agan’ ngay u wan’dad ma ra pi’ e tin nib t’uf rodad. (Matt. 6:33) Ere, piin Kristiano e gubin ngiyal’ nthingar ra dugliyed ban’en. Ke micheg Jehovah ndemtrug e miti magawon ni gad ra mada’nag, ma gubin ngiyal’ nra dag e “kanawo’” ngodad u rogon ni ngad pithiged ni bochan e nge dab da togopuluwgad ko pi kenggin e motochiyel rok. (Mu beeg e 1 Korinth 10:13.) Faanra ud ‘gum’an’niged gadad nguud sonnaged’ Jehovah, mu ud meybilgad ngak ni ngad ninged e gonop nge tamilangan’, me ‘pagan’dad ngak,’ ma gad fol ko pi motochiyel rok nge pi kenggin e motochiyel rok, ma aram e ra ‘ayuwegdad.’ (Ps. 37:5, 7) Ku ra tow’athnagdad ko athamgil ni gad be tay ni ngad pigpiggad ngak ni ir e bin riyul’ e Masta rodad. Faan gad ra m’oneg u lan e yafas rodad, ma ra ayuwegdad ni nge “fel’” gubin ban’en ni gad be maruweliy.​—Mu taarebrogonnag ko Genesis 39:3.

¹⁸ Uw rogon ni ngad pithiged e pi magawon ni ke sum u thildad e en mabgol rodad ara bitir rodad ni bochan e darud pared u taabang? Mang boch ban’en nrayog ni ngad rin’ed ya nge yag nda pied e tin nib t’uf ko tabinaw rodad ndab da chuwgad nga darod nga yugu reb e nam? Ma uw rogon ni ngad pied e athamgil nga laniyan’ boch e girdi’ ni ngar dugliyed e n’en nib fel’ ni ngar rin’ed ko re n’ey? Gad ra weliy e fulweg ko pi deer ney ko bin migid e article.