Dab Mu Rus ya Ra Ayuwegem Jehovah!

1, 2. Mang boch e magawon ni ma mada’nag e piin ni ka ranod nga reb e nam ko maruwel u nap’an ni yad ra sul nga taferad? (Mu guy e sasing ni bay u tabolngin e re article ney.)

I YOG be’ ni ka nog Eduardoa ngak ni gaar: “Nap’an ni ug moy u yugu reb e nam, mab fel’ e maruwel rog, ma kub tolang puluwog riy. Machane, nap’an ni gu tababgad e Pi Mich Rok Jehovah ko fol Bible, mug nang ni bay reb e maruwel ni kab ga’ fan nib milfan ngog. Re maruwel nem e aram e gathi kemus ni nggu pi’ e tin nib t’uf ko tabinaw rog ni fan ko par rorad, ya ngkug pi’ e tin nib t’uf rorad ni fan ko tirok Got ban’en. Ere, n’en ni gu rin’ e gu sul nga tafenag.”​—Efe. 6:4.

² Manang Eduardo ni faanra sul ko tabinaw rok, ma ra felfelan’nag Jehovah. Machane, n’en ni nge rin’ e gathi ban’en nib mom ni bochan e thingari guy rogon ni nge fel’ bayay e tha’ u thilrow e ppin rok nge bitir rorow, ni bod rogon e n’en ni buch rok Marilyn ni faan kad weliyed murung’agen ko fa binem e article ni ke yan. Maku reb e, thingari guy rogon ni nge yognag e salpiy nib gaman urngin nrayog ni nge pi’ e tin nib t’uf ko tabinaw rok. Ere, uw rogon ni nge rin’ e re n’ey? Rayog ni nge ayuwegrad e girdi’ u lan e ulung, fa?

NGE FEL’ BAYAY E THA’ U THILRAD CHON E TABINAW RORAD NGE GOT

3. Mang e ma buch ko bitir ni faanra der par e gallabthir rorad u toobrad?

³ I yog Eduardo ni gaar: “Gu manang nda gu tiyan’ug ngak pi fakag ko ngiyal’ nib t’uf ni nggu pow’iyrad mug t’ufegrad. Da ug moy rorad ni nggu beeg e thin nu Bible ngorad, ma gamad meybil u taabang, mug gumuchmuch ngorad, ara gu fafelgad u taabang.” (Deut. 6:7) Anna ni ir e ba ilal ko ppin u fak e yog ni gaar: “Da i pagan’ug ni bochan e de moy e chitamag u tabinaw. Ere, nap’an ni sul, ma kemus ni yaan, nge laman e ka gamad manang. Machane, de mecham ngog ni nggu gumuchmuchgow.”

4. Mang fan nib mo’maw’ rok reb e matam ni nge rin’ e maruwel rok ni ir lolugen e tabinaw u nap’an nde moy ko tabinaw rok?

⁴ Faanra n’uw nap’an ni par reb e matam nib palog ko tabinaw rok, ma ra mo’maw’ ngak ni nge rin’ e maruwel rok ni ir lolugen e tabinaw. I yog Ruby ni leengin Eduardo ni gaar: “Thingar gu rin’ e maruwel ko Nina’ nge Papa’. Ma ke mecham ngog ni nggu dugliy e n’en ni nge rin’ e tabinaw romow. Ere, nap’an ni sul Eduardo nga tabinaw, ma thingar gu fil rogon ni nggu fol rok ni ir lolugeg. Ke mada’ ko chiney, ma ka bay yu ngiyal’ nthingar gu puguran ngog ni bay e pumoon rog u roy.” (Efe. 5:22, 23) I yog Eduardo ni gaar: “Ke mecham ko bitir romow ni ngar fithew e chitiningrow u m’on ni ngar rin’ew ban’en. Kug nangew nib t’uf ni nggu dagew ngorow ni gubin ban’en ni gamow be dugliy e gamow be dugliy u taabang, maku reb e thingar kug fil rogon ni nggu yarmiy gubin ban’en u lan e tabinaw rog nrogon ni ma rin’ e piin Kristiano.”

5. Mang e ke rin’ reb e matam ni nge fal’eg e tha’ u thilrad chon e tabinaw rok u nap’an ni sul, ma mang angin ni ke yib riy?

⁵ Ke dugliy Eduardo u wan’ ni nge athamgil ni nge fal’eg e tha’ u thilrad chon e tabinaw rok miki ayuwegrad ni nge fel’ e tha’ u thilrad Jehovah. “Gu be nameg ni nggu fil e tin riyul’ ngak pi fakag u daken e thin nge ngongol rog, ma gathi kemus ni nggog nib t’uf Jehovah rog ya ngki m’ug ko ngongol rog.” (1 John 3:18) Ere, gur ke tow’athnag Jehovah Eduardo ko athamgil ni ke tay? I yog Anna ni gaar: “Rib ga’ angin ni kug guy e chitamag ni be athamgil ni nge mang reb e matam nib fel’ me chugur e tha’ u thilmad. Kug felfelan’gad u nap’an ni kug guyed ni ke athamgil ni nge yag boch e maruwel ngak u lan e ulung. Be guy e fayleng rogon ni nge palognagmad rok Jehovah. Machane, kug guyew e gallabthir romow ni yow be guy rogon ni ngar tewan’row ko tin riyul’, ere ku aram rogon e n’en ni kug rin’ew. Ke micheg Papa’ ngomow ndab ki digeymow bayay, ma aram rogon ni rin’. Faan gomanga ki digeymow, ma dabisiy nda gu moy ko ulung rok Jehovah e chiney.”

NGE NANG BE’ E N’EN NIB MILFAN NGAK

6. Mang e ke fil boch e gallabthir u reb e binaw ni un mahl riy?

⁶ Pi n’en ni ke buch rok e Pi Mich Rok Jehovah u nap’an reb e mahl nni tay u Balkans e be dag ni yugu aram rogon nib mo’maw’ e par rorad e ngiyal’ nem, machane ka be par pi fakrad ni yad ba felfelan’. Mang fan? Bochan ni tin baaram e gallabthir ndabkiyog ni ngar sulod ko gin ni yad ma maruwel riy e ra pared u tabinaw, mar filed e thin nu Bible ko bitir rorad, mi yad fafel u taabang, mi yad sabethin u taabang. Mang e gad ra fil ko re n’ey? N’en nib t’uf ko bitir e nge par e gallabthir u toobrad ma gathi salpiy, ara tow’ath. Arrogon, ra fel’ rogon e bitir ni faanra i tiyan’ e gallabthir rorad ngorad ma yad be skulnagrad, ni bod rogon ni be yog Thin rok Got.​—Prov. 22:6.

7, 8. (a) Mang e rayog ni nge gin e gallabthir ngay u nap’an ni yad ra sul nga taferad? (b) Uw rogon nrayog ni nge fal’eg e gallabthir e tha’ u thilrad pi fakrad?

⁷ Ba gel e kireban’ riy ya bay boch e gallabthir nnap’an ni yad ra sul nga taferad mi yad gin ko n’en ni ke buch ko bitir rorad. Sana rayog ni nge dag fapi bitir ko ngongol rorad ndariy fan u wan’rad ni ke sul fare gallabthir nga tabinaw ara dakir pagan’rad ngak. Ere sana rayog ni nge gaar fare gallabthir, “Aray urngin ban’en ni kug rin’ ni fan ngom, ma damur dag ni ga be pining e magar ngog?” Machane, bin riyul’ riy e sana aram rogon e ngongol ko fapi bitir ni bochan e ke n’uw nap’an ndar par e gallabthir rorad u toobrad. Ere, uw rogon ni nge pithig e gallabthir e biney e magawon?

⁸ Som’on e nga mog ngak Jehovah ni nge ayuwegem ni ngam nang rogon laniyan’ chon e tabinaw rom, mag dag ngorad ni ga be lemnagrad. Ma nap’an ni ga be non ngorad, ma kub t’uf ni nga mog me m’agan’um ngay ni ngam un i pithig fare magawon. Ere, sana rayog ni ngam wenig ngorad. Faanra guy e en mabgol rom nge bitir romew ni ga be athamgil ni ngam fal’eg e tha’ u thilmed bayay, ma yad ra nang ni gab yul’yul’ ko n’en ni ga be rin’. Faan ga ra gum’an’igem mag athamgil, ma sana ra tabab chon e tabinaw rom ni ngar t’ufeged gur mi yad tayfam bayay.

‘NGE AYUWEG BE’ GIRDIEN E TABINAW ROK’

9. Mang fan nsusun e dab da guyed rogon ni nge yoor ban’en rodad ni bochan e gad be guy rogon ni ngad ‘ayuweged girdien e tabinaw rodad’?

⁹ I yog apostal Paul ni faanra dabiyog ko piin pilibthir ni Kristiano ni ngar yognaged e tin nib t’uf ko par rorad, ma susun ni pi fakrad nge pi fak pi fakrad e ngar ‘fulweged taban e magar rok e matam nge matin rorad nge matam nge matin rok e gallabthir rorad.’ Machane, i yog Paul ngak e piin Kristiano ni kemus ni ggan, nge mad, nge naun e ir e ba t’uf rorad ma nge fel’ u wan’rad e tin ni bay rorad ban’en. Susun ndab ud pared ma gad be guy rogon ni nge mon’og boch e par rodad ara ngad yognaged e salpiy ni boor ya gad be lemnag nra ayuwegdad boch nga m’on. (Mu beeg e 1 Timothy 5:4, 8; 6:6-10.) Faanra nge ‘ayuweg reb e Kristiano girdien e tabinaw rok’ ma de t’uf ni nge yag boor e flaab ko re fayleng ney ngak, ya gad manang nre fayleng ney e dab ki n’uw nap’an me chuw. (1 John 2:15-17) Susun ndab da paged “chogowen e fel’ rogon” ara “pi n’en ni ma magafan’ e girdi’ ngay ko biney e tamilang” ni nge k’aring chon e tabinaw rodad ni nge mul e “bin riyul’ e yafos” u pa’rad, ni aram e yafas u lan e bin nib beech e fayleng rok Got!​—Mark 4:19; Luke 21:34-36; 1 Tim. 6:19.

10. Mang fan ni gad ba gonop ni faan gad ra guy rogon ni ngad siyeged e malfith ni boor?

¹⁰ Manang Jehovah nib t’uf buchuuw e salpiy rodad. Machane, dabiyog ni nge ayuwegdad e salpiy me yororiydad ni bod rogon e gonop rok Got. (Luke 12:15) Boor yay nder ma lemnag e girdi’ urngin e salpiy ni yad ra n’ag ni faan yad ra chuw nga ranod ra pared nga yugu reb e nam. Bin riyul’ riy e boor e magawon nrayog ni nge sum riy. Boor e girdi’ ni kar paged e nam rorad ka ranod nga yugu reb e nam e nap’an ni yad ra sul ko nam rorad ma boor e malfith rorad. Ere, n’en ni ma buch e dabiyog ni ngar pigpiggad ngak Got nib fel’ rogon ya thingar ra maruwelgad ni ngar thanged e malfith rorad. (Mu beeg e Proverbs 22:7.) Ere, kab fel’ ni ngar guyed rogon ndabi aw e malfith nga puluwrad ko som’on.

11. Faanra yarmiy reb e tabinaw rogon e salpiy ni yad be maruwel ngay, ma uw rogon nra ayuwegrad?

¹¹ Ke nang Eduardo ni faanra nge par ni nge ayuweg chon e tabinaw rok, ma susun ni nge kol ayuw u rogon ni be fanay e salpiy rok. Kar yarmiyew e ppin rok e salpiy rorow ni be yan u rogon e pi n’en nrib t’uf ko tabinaw rorow. Dabkiyog ni ngar chuw’iyew boor ban’en ni bod rogon kafram. Machane, gubin e girdi’ u lan e tabinaw rorow ni kar folgad ko n’en ni kar dugliyew ma dakur n’aged e salpiy nga boch ban’en nde ga’ fan.b I yog Eduardo ni gaar: “Kug chuweg e bitir romow ko bin baaram e skul ni ur unew ngay ni yima pi’ puluwon, ma kug wan gu tayrow nga reb e skul ko am nib fel’.” Kar meybilgad chon e tabinaw rok ya nge yag ni pirieg reb e maruwel ndabi magawonnagrad ko tirok Got ban’en. Ere, uw rogon ni ke fulweg Jehovah taban e meybil rorad?

12, 13. Mang boch ban’en ni rin’ reb e matam ya nge yag ni pi’ e tin nib t’uf ko tabinaw rok, ma uw rogon ni ke tow’athnag Jehovah ko n’en ni ke dugliy ni aram e nge thilyeg rogon e par ko tabinaw rok?

¹² I yog Eduardo ni gaar: “Nap’an e gal nsom’on e duw ni kug sul ko tabinaw rog, ma de gaman e salpiy ni ug yognag nrayog ni nggu feked e tin nib t’uf ko tabinaw romad ngay. Kug tababgad i fek e salpiy romad ni kug kunuyed u bank, ma kari aw parwog ko maruwel. Machane, rayog ni nggu uned ko gubin e muulung ma gamad yan ko machib u taabang.” I dugliy Eduardo ndab ki lemnag ni nge un nga boch e maruwel nra palognag ko tabinaw rok. I yog ni gaar: “N’en ni kug rin’ e kug fil rogon ni nggu rin’ boor mit e maruwel ya nge tal ba mit ma bay ba mit nrayog ni nggu rin’.”

¹³ Immoy e malfith rok Eduardo ni i thang ni buchuuw ma buchuuw, ere ba ga’ e n’en ni i mun ko re malfith rok nem. Machane, ke m’agan’ ngay ni nge rin’ e re n’ey ya nge yag nra ululgad chon e tabinaw rok ko pigpig ni yad be tay ngak Jehovah. I yog ni gaar: “Ba lich ko 10 e pasent u puluwog ko maruwel ni ug un ngay ko bin baaram e nam ni ug moy riy e gu be yognag ko tin baaray e maruwel ni gu be un ngay e chiney. ‘Gathi kaygi meewar Jehovah ndabiyog ni nge ayuwegmad.’ Bin riyul’ riy e kug dugliyed ni nggu uned ko pioneer. Ma de n’uw nap’an nga tomuren, me fel’ rogon e maruwel ko gin ni gamad ma par riy, ma aram me mom ngog ni nggu yognag e tin nib t’uf ko tabinaw rog.”​—Isa. 59:1.

ROGON NI NGAN ATHAMGIL U FITHIK’ E TOWASAR NI MA TAY CHON E TABINAW

14, 15. Mang e rayog ni nge rin’ chon e tabinaw ni faanra baadag e girdi’ rorad ni ngar m’oneged e chugum nge salpiy ko pigpig ni yad be tay ngak Got, ma mang angin nra yib riy ni faan yad ra rin’ e tin nib fel’?

¹⁴ Bay boch e girdi’ ni yad ma lemnag nthingar ra pied e salpiy nge boch e tow’ath ko girdi’ rorad nge pi tafager rorad. I weliy Eduardo ni gaar: “Re n’ey e ka bang ko yalen romad, maku gamad baadag ni gamad ma pi’ e pi n’em.” Machane ki yog ni gaar: “Bay e gin ni nge mus riy. Kug weliy ko girdi’ rog u fithik’ e sumunguy ni gu ra pi’ e tin nrayog rog, machane thingar gguy rogon ndabi magawonnag rogon ni gu be pi’ e tin nib t’uf ko tabinaw rog ni fan ko par rorad nge tirok Got ban’en.”

¹⁵ Rayog ni nge damumuw e girdi’ ko tabinaw rok be’ ni bochan e ke sul facha’ ko nam rok ara ke siyeg ni nge chuw ko tabinaw rok ni nge yan nga reb e nam ko maruwel. Rayog ni nga rogned ndar t’ufgad rok ara kemus ni yigoo ir e be lemnag ir ya yad be lemnag ni ir e ba milfan ngak ni nge pi’ e tin nib t’uf rorad. (Prov. 19:6, 7) I yog Anna ni fak Eduardo ni gaar: “Faan gamad ra dugliy ni nggu pigpiggad ngak Jehovah ko bin ni nggu manged sib ko chugum nge salpiy, ma dabisiy nra munmun me nang girdien e tabinaw romad feni ga’ fan e pigpig ni gamad be tay. Machane, uw rogon mi yad nang ni faanra gubin ngiyal’ ma gamad be rin’ ara gamad be pi’ e tin ni yad be ning?”​—Mu taarebrogonnag ko 1 Peter 3:1, 2.

NGAN DAG NIB MICH GOT U WAN’UY

16. (a) Uw rogon nrayog ni nge ‘bannag be’ ir’? (Jas. 1:22) (b) Uw rogon nra dugliy be’ ban’en ma ra tow’athnag Jehovah?

¹⁶ Reb e walag nib pin ni digey e tabinaw rok nge yan nga reb e nam ko maruwel e yog ko piin piilal ni gaar: “Boor ban’en ni kug paged fan ni bochan e nge yag ni gub e ngaray. Mus ko pumoon rog ni ki tal ndaki mang reb e piilal. Ere, gu be athapeg nra tow’athnagmad Jehovah ko n’en ni kug dugliyed.” Faanra ba mich Jehovah u wan’dad, ma gad ma dugliy e n’en ni ngad rin’ed nib puluw nga rogon nib m’agan’ ngay, ma ra tow’athnagdad. Dabi tow’athnagdad Jehovah ni faanra kad dugliyed ban’en nde m’agan’ ngay, maku de m’agan’ ngay ni ngad paged boch e maruwel ni kan pi’ ngodad u lan e ulung ni bochan boch ban’en nde ga’ fan.​—Mu beeg e Hebrews 11:6; 1 John 5:13-15.

17. Mang fan ni ngad ninged e ayuw ngak Jehovah u m’on ni ngad dugliyed ban’en, ma uw rogon nrayog ni ngad rin’ed e re n’ey?

¹⁷ U m’on ni ngam dugliy ban’en ma ga ning e ayuw ngak Jehovah. Gathi nga fin mmu’ i dugliy e n’en ni ngam rin’ mfin mmeybil ngak Jehovah. Mu meybil ngam ning gelngin nib thothup, nge gonop rok, mu ku mog ngak ni nge pow’iyem. (2 Tim. 1:7) Mu fithem ni nge lungum: ‘Mang e gu ra pag fan ya nge yag ni gu pigpig ngak Jehovah, ni ki mada’ ko ngiyal’ ni kug mada’nag e togopuluw?’ Ba m’agan’um ngay ni ngam fol rok ni mus ni faanra thingar mu thilyeg boch ban’en u rogon e par rom? (Luke 14:33) Mu ning e ayuw ko piin piilal ma ga fol ko fonow ni yad ra pi’ ngom nib puluw ko Bible, ma ga dag nib mich Jehovah u wan’um mab pagan’um ngak nra ayuwegem ni ngam fol ko fonow rok. Dabiyog ni nge dugliy e piin piilal e n’en ni ngam rin’, machane rayog ni ngar ayuweged gur ni ngam mel’eg boch ban’en nra ayuwegem ni ngam par ni gab felfelan’.​—2 Kor. 1:24.

18. Mini’ e ba milfan ngak ni nge pi’ e tin nib t’uf ko tabinaw, machane uw rogon nrayog ni nge pi’ yugu boch e girdi’ e ayuw?

¹⁸ Bay “gilban” e piin lolugen e tabinaw ni ke tay Jehovah ni ngar feked. Ere, susun ni ngad yibilayed yad ma gad pining e magar ngak e pi arorad ni be ayuweg e tabinaw rok u rogon nrayog rok ma der digeyrad ni nge lek e maruwel nga bang ni ki mada’ ko ngiyal’ ni be towasariyrad boch e girdi’. Ku rayog ni ngad daged e bin riyul’ e t’ufeg ni ma dag e piin Kristiano mu ud runguyed yad ko ngiyal’ ni ke buch boch ban’en nib tomgin ni bod rogon e yoko’, ara durru’, nge ku boch ban’en, ara nap’an ni ke m’ar be’ u lan e tabinaw rorad. (Gal. 6:2, 5; 1 Pet. 3:8) Gur, rayog ni ngam pi’ buchuuw e salpiy ngorad ni faanra ke buch boch ban’en ni aray rogon ara mu ayuwegrad ni ngar pirieged reb e maruwel ni ngar uned ngay? Faan ga ra rin’ ni aray rogon, ma rayog ni ngam ayuweg e re walag ney ni nge dab ki lemnag ni nge digey e tabinaw rok nge yan i gay e maruwel nga yugu reb e nam.​—Prov. 3:27, 28; 1 John 3:17.

DAB MU PAGTALIN NRA AYUWEGEM JEHOVAH!

19, 20. Mang fan nrayog ni nge pagan’ e piin Kristiano nra ayuwegrad Jehovah?

¹⁹ Be yog e Bible ngodad ni gaar: “Dabi m’on e salpiy u lanin’med, ma ngam pired ni nge fel’ u wan’med e tin ni ba’ romed ban’en. Ya ke yog Got ni ke gaar, ‘Ri dab gu pagem; ma ri dab gu n’igem.’ Ere dab kud tamdaggad ma nge lungudad, ‘I Somol e ir e be ayuwegeg, ere dab gu tamdag! Mang e rayog ni nge rin’ e girdi’ ngog?’” (Heb. 13:5, 6) Uw rogon ni ngad folgad ko re thin ney?

²⁰ Reb e piilal ni ma par u reb e nam nib gafgow e yog ni gaar: “Ba ga’ ni ma weliy e girdi’ murung’agen e Pi Mich Rok Jehovah ni yad ma par ni yad ba felfelan’. Kar guyed nib ga’ nib fel’ rogon e munmad ni ma tay e Pi Mich Rok Jehovah ni ki mada’ ko piin nib gafgow, ma ku bay e tin nib t’uf rorad.” Ba puluw e re thin ney ko n’en ni micheg Jesus ngak e piin ni kar m’oneged Gil’ilungun Got u wan’rad. (Matt. 6:28-30, 33) Ri gab t’uf rok Jehovah ni ir e Chitamangidad ni bay u tharmiy, ma baadag ni nge rin’ e tin nib fel’ ni fan ngomed pi fakam. Jehovah e “ma fal’eg i yaliy e re fayleng ney ni ga’ngin, ni nge pi’ gelngin e piin yad ba yul’yul’ ngak u gum’ircha’rad.” (2 Kron. 16:9, BT) Ke pi’ e fonow ni fan ko tabinaw nge rogon ni ngad yognaged e tin nib t’uf rodad. Faan gad ra fol ko pi fonow ney, ma aram e gad be dag nib t’uf Jehovah rodad ma be pagan’dad ngak. “Ya baaray fan ni nge t’uf Got rodad: fan e ngad folgad ko tin ni ke yog ni ngad rin’ed. Ma tin ni ke yog ni ngad rin’ed e gathi rib mo’maw’.”​—1 John 5:3.

21, 22. Mang fan ni kam dugliy ni nge pagan’um ngak Jehovah?

²¹ I yog Eduardo ni gaar: “Gu manang ndabkiyog ni nggu thilyeg e pi n’en ni ke buch u nap’an nda gu moy u tooben e ppin nge bitir rog. Machane da gur ma par ngaug lemnag e tin ke thumur ban’en ni kug kalngan’ug riy. Boor e girdi’ ni ug maruwelgad u taabang e ba fel’ rogorad, machane, dar felfelan’gad. Boor e magawon u lan e tabinaw rorad. Machane, tabinaw rog e ba felfelan’! Maku reb e kug gin nga rogon ni be m’oneg boch e walag ko nam rog e tirok Got ban’en u wan’rad ni yugu aram rogon ni yad ba gafgow. Gamad be guy nib riyul’ e n’en ni micheg Jesus.”​—Mu beeg e Matthew 6:33.

²² Dab mu rus! Mu dugliy ni ngam fol rok Jehovah me pagan’um ngak. Faanra ba t’uf Jehovah rom, nge en mabgol rom, nge bitir rom, ma rayog ni ngam rin’ e maruwel rom nib fel’ rogon ni gur lolugen e tabinaw rom. Angin nra yib riy e ga ra guy ni Jehovah e ir e ‘be ayuwegem.’