Ffel’ u Wan’um Rogon ni Ma Ayuwegem Jehovah?

1, 2. Uw rogon nib thil rogon ni ma yaliydad Jehovah nga rogon ni yima yaliydad ko camera ni yima tay u kantin?

U BOOR e nam e yima tay e camera u lan e kantin ya nge yag ni ngan guy e girdi’ ni yad be chuway’ nge piin ni yad be guy rogon ni ngar iringed boch ban’en. Ma re n’ey e rayog e nge ayuweg e en ni ir e fen fare kantin ni nge guy e piin ni yad be moro’ro’. Ere, ke mo’maw’ ko pi girdi’ nem ni ngar iringed ban’en.

² Machane, bochan ni ke gubin yang u fayleng ni yibe fanay e miti ney e camera riy, ma gathi be puguran e re n’ey ngodad rarogon Jehovah ni ir e Chitamangidad ni gadad ba t’uf rok? Be yog e Bible ni be guy Jehovah e n’en ni yibe rin’ u “gubin yang.” (Prov. 15:3) Machane gur, re n’ey e be yip’ fan ni gubin ngiyal’ ni be fal’eg Jehovah i yaliy e pi n’en ni gad be rin’? Gur, ma fal’eg i yaliydad Jehovah ya bochan ni baadag ni nge gechignagdad u nap’an ni kad olobochgad? (Jer. 16:17; Heb. 4:13) Danga’. Ya ma fal’eg i yaliydad ni bochan ni gad ba t’uf rok maku ba ga’ fadad u wan’.​—1 Pet. 3:12.

3. Mang lal e kanawo’ ni ma lemnagdad Got riy?

³ Mang e n’en nra ayuwegdad ni nge fel’ u wan’dad rogon ni ma yaliydad Got ni bochan ni gadad ba t’uf rok? Gad ra weliy rogon ni ma rin’ e re n’ey. Bin (1) ma ginangdad u m’on ni ngad rin’ed ban’en nib kireb, (2) ma yal’uwegdad u nap’an ni kad olobochgad, (3) ma pow’iydad u daken e pi kenggin e motochiyel rok u Bible, (4) ma ayuwegdad u nap’an ni kad mada’naged e pi magawon, (5) ma tow’athnagdad ni bochan e kad rin’ed e tin nib fel’.

MA GINANGDAD GOT

4. Mang fan ni yog Got ngak Kain ni ‘ke par e denen ni bod ba gamanman ni maloboch ni be sonnag ni nge gel ngak’?

⁴ Som’on e ngad weliyed rogon ni ma ginangdad Got u m’on ni ngad rin’ed ban’en nib kireb. (1 Kron. 28:9) Faanra nge fel’ u wan’dad rogon ni ma yaliydad Jehovah, ma gad ra guy e n’en ni rin’ Jehovah u nap’an ni “puwan’” Kain, ya de fel’ e maligach ni pi’. (Mu beeg e Genesis 4:3-7.) Ki fonownag Jehovah Kain ni nge “ngongliy e tin nib fel’.” Faanra dabi rin’ ni aram rogon ma ‘ke par e denen ni bod ba gamanman ni maloboch ni be sonnag ni nge gel ngak.’ I yog Got ngak ni gaar: “Thingar mu gel ngak.” Baadag Got ni nge fol Kain ko fare fonow me yag ni nge ‘fel’ u wan’.’ Faanra motoyil Kain ko fare fonow ni pi’ Got ngak, ma rayog ni ngki fel’ e tha’ u thilrow.

5. Mang boch e kanawo’ ni ma ginangdad Jehovah riy ni bochan rarogodad ndawor da flontgad?

⁵ Uw rogodad e ngiyal’ ney? Jehovah e ma guy gubin ban’en ni bay u gum’ircha’dad, ere dabiyog ni ngad mithaged ban’en rok. Gadad ba t’uf rok ma baadag ni ngad rin’ed e tin nib mat’aw ban’en, ma der ma towasariydad. Ma fanay e Thin rok u Bible ni nge ginangdad u nap’an ni kad mel’eged ban’en nde puluw. Ni uw rogon? Nap’an ni gad ra beeg e Bible, mab ga’ ni gad ma pirieg reb e thin riy nra ayuwegdad ni ngad gelgad ko pi meewar rodad, ngu nap’an ni gad ra beeg e pi babyor rodad ko ulung maku rayog ni nge ayuwegdad ko pi magawon rodad. Nap’an e pi muulung rodad, ma gad gubin ni yima fonownagdad u ngal’an nib puluw!

6, 7. (a) Mang e be micheg nriyul’ ni ma lemnag Got rarogon e pi tapigpig rok ni be’ nge be’? (b) Uw rogon nrayog ni nge fel’ rogom ko pi ayuw ni ma pi’ Jehovah ngom?

⁶ Urngin e pi fonow ney e be micheg ni gadad ba t’uf rok Jehovah, ma be lemnag rarogodad ni be’ nge be’. Riyul’ ni ke yan bokum miriay e duw ni bay e Bible nrayog ni ngan beeg, maku bay boch e babyor ni ke fal’eg e ulung rok Got ni nge beeg bokum milyon e girdi’, ma bay e fonow ni yima pi’ u nap’an e pi muulung ni fan ko girdi’ u lan e ulung. Machane ma fanay Jehovah e pi n’ey ya nge ayuwegem ngam fol ko Thin rok ma ga yal’uweg e lem rom. Rayog ni nga nog nriyul’ ni be lemnag Jehovah rarogom.

⁷ Som’on, ma thingar da nanged nriyul’ ni ma lemnag Got rarogodad ya faanra aram rogon ma rayog ni nge yib angin e pi fonow ni ma pi’ ngodad. Maku thingar da folgad ko Thin rok ma gad chuweg e pi n’en ni dabun Got u lanin’dad. (Mu beeg e Isaiah 55:6, 7.) Faanra ngad folgad ko pi fonow rok Got ma rayog ni ngad siyeged boor e magawon. Faanra dab da folgad, ma mang ayuw e ra pi’ Jehovah ngodad?

CHITAMANGIDAD NI MA RUNGUYDAD E MA YAL’UWEGDAD

8, 9. Uw rogon ni ma m’ug e t’ufeg rok Jehovah ngodad ko pi fonow ni ma pi’ u daken e pi tapigpig rok? Mu weliy.

⁸ Nap’an nra yal’uwegdad Jehovah, ma gad ra nang ni be lemnag rarogodad. (Mu beeg e Hebrews 12:5, 6.) Riyul’, ndariy bagadad ni baadag ni ngan fonownag ara ngan yal’uweg. (Heb. 12:11) Machane, ngam lemnag ko mang e thingari lemnag faen ni be fonownagdad. Thingari nang ko mang e n’en nib kireb ni gadad be rin’ nrayog ni nge magawonnag e tha’ u thildad Jehovah, ma ngki lemnag e tafinay rodad. Maku ba t’uf ni nge tay e tayim, me athamgil ni nge fonownagdad u daken boch e thin nu Bible nra ayuwegdad ngad rin’ed e tin nib m’agan’ Got ngay. Ngad folgad ko re fonow ney ya bochan ni Jehovah e ir e ke Yib rok.

⁹ Gad ra weliy rogon nra m’ug feni gadad ba t’uf rok Got u daken e fonow ni be pi’ reb e walag ngak be’ nib t’uf e ayuw rok. Bod ni immoy reb e walag nnap’an ndawori un ko tin riyul’ ma ke mecham ngak ni ma yaliy yaan e puwlag, machane ke yag rok ni nge pag e binem e ngongol. Munmun, me chuw’iy reb e cell phone, ma aram miki fanay u reb e kanawo’ ni nge yaliy yaan e puwlag bayay. (Jas. 1:14, 15) Me yan i reb e rran me pi’ fare cell phone rok ngak reb e piilal ya nge guy boch e address riy, ma aram me guy fare piilal boch ban’en riy nib kireb. Re n’em ni buch e gowa ba tow’ath ngak e re walag nem, ya kan fonownag ma aram ma ke yag ni nge pag e binem e ngongol. Gad ma felfelan’ nrayog ni nge guy e Chitamangidad nu tharmiy e n’en ni gad ma rin’ nib mith, ma ma yal’uwegdad u m’on ni nge kireb e tha’ u thildad Got.

FAAN GAD RA FOL KO PI KENGGIN E MOTOCHIYEL U BIBLE MA RA YIB ANGIN NGODAD

10, 11. (a) Mang boch e kanawo’ nrayog ni nge pow’iyem Got riy? (b) Mu weliy e n’en ni buch rok reb e tabinaw u nap’an nra folgad u rogon ni ke pow’iyrad Jehovah?

¹⁰ I yon’ fare psalmist reb e tang ngak Jehovah ni gaar: “Ga be pow’iyeg ko fonow ni ga be tay ngog.” (Ps. 73:24) Gubin ngiyal’ nib t’uf ni ngan pow’iydad ma rayog ni ‘ngad lemnaged’ Jehovah u daken e Thin rok ya ngad nanged e n’en nib m’agan’ ngay. Faan gad ra fol ko pi kenggin e motochiyel u Bible ma gathi kemus nra yib angin ngodad, ya ku rayog ni nge ayuwegdad ko tin nib t’uf ko par rodad.​—Prov. 3:6.

¹¹ Rogon ni ayuweg Jehovah boch e walag e be m’ug ko n’en ni buch rok be’ nib ta milay’ nge bpin rok nge chon e tabinaw rorow ni yad ma par u Masbate ni bangi binaw ni bay u Philippines ni yad ma pi’ puluwon. Yow ma un e ppin rok ko regular pioneer maku yow ma ayuweg pi fakrow. Bay reb e rran ni pi’ faen ni ir e tafen fagi binaw bangi babyor, ni be yog ngorow ni ngar chuwgow ko fagi binaw. Mang fan e re n’em ni rin’? Ya ke yog boch e girdi’ ni bay boch ban’en ni ke rin’ fare tabinaw ni be m’ug ndariy e yul’yul’ riy. Yugu aram rogon ni be magafan’ fare walag ko gin ni ngar pared chon e tabinaw rok riy, machane yog ni gaar: “Ra pi’ Jehovah e tin nib t’uf rodad ni yugu demtrug e n’en nra buch.” Pagan’ ni ke dag e re walag nem e ke yib angin. Boch e rran nga tomuren me nang fare tabinaw ndab kun chuwegrad ko fagi binaw. Mang e buch? Faen ni tafen fagi binaw e ke guy ni be fol fare tabinaw ni yad e Pi Mich Rok Jehovah ko pi kenggin e motochiyel u Bible ni yugu aram rogon ni kan t’ar e thin nga dakenrad ma yad be ngongol u fithik’ e tayfan nge gapas. Re n’ey ni kar rin’ed e rib fel’ u wan’ faen ni tafen fagi binaw ma aram me pagrad ni ngar pared miki pi’ bang e binaw ni ngkur milay’naged. (Mu beeg e 1 Peter 2:12.) Arrogon, ma pow’iydad Jehovah u daken e Thin rok, ya nge yag nda gum’an’gad ko pi magawon ni gad ma mada’nag u reb e rran nge reb.

REB E FAGER NI MA AYUWEGDAD NGAD ATHAMGILGAD U FITHIK’ E PI MAGAWON

12, 13. Mang boch e magawon nra mada’nag boch e girdi’ mar lemnaged ko be guy Got e gafgow ni yad be tay, fa?

¹² Machane, yu ngiyal’ e bay boch e magawon nib n’uw nap’an ni ma par. Sana bay ba mit e m’ar ni gad be athamgil u fithik’, ara togopuluw ni ma yib ko girdi’ u lan e tabinaw rodad, ara gubin ngiyal’ ni yibe gafgownagdad. Ma yu ngiyal’ e rayog ni nge sum e magawon u thilin e pi walag u lan e ulung.

¹³ Bod nrayog ni nge kireban’um ya bochan ni ke yog reb e walag boch ban’en ni dabum. Sana ra lungum, ‘Re n’ey e susun ni dabi buch u lan e ulung rok Got!’ Machane fare walag ni ke non ngom ni aram rogon e kun pi’ boch e maruwel ngak u lan e ulung, maku bay e walag u lan e ulung ni ku yad ma tayfan. Sana ga ra lemnag ko ‘Mang fan ni be buch e re n’ey? Gur, der guy Jehovah e n’en ni be buch? Ma dariy ban’en nra rin’ ngay?’​—Ps. 13:1, 2; Hab. 1:2, 3.

14. Mang fan ni ma pag Got e pi walag ni ngar fonownaged gadad?

¹⁴ Jehovah e boor ban’en ni manang ngodad, ma dabisiy nib ga’ fan ni nge pag boch ban’en ni nge buch. Ni bod nra bay e magawon u thilmew be’, ma sana ga ra lemnag ni cha’nem e ba kireb, machane Got e ba thil. N’en ni ke yog fare walag ngom ni ke kirebnag lanin’um e sana ba fonow nib t’uf ni ngam fal’eg i lemnag. I weliy Brother Karl Klein ni ir reb i chongin fare Ulung ni Ma Pow’iyey e n’en ni buch rok u nap’an ni fonownag Brother J. F. Rutherford. Boch nga tomuren me fingichiy Brother Rutherford Brother Klein u fithik’ e felfelan’, mab mo’maw’ rok Brother Klein ni nge fulweg lungun. Ke nang Brother Rutherford nde m’agan’ Brother Klein ni kan fonownag, me yog ngak ni nge kol ayuw rok Moonyan’. I yoloy Brother Klein ni gaar: “Faan gad ra damumuw ngak reb e walag ni bochan ni ke yog boch ban’en ni nge yal’uwegdad, ma gad be bing e kanawo’ ngak Moonyan’.”a

15. Mang e thingar da lemnaged u nap’an ni kad mada’naged boch e magawon?

¹⁵ Yu ngiyal’ e dabkiyog ni ngad k’adedan’dad ya magawon ni gad be yan u fithik’ e der chuw. Uw rogon ni ngad gum’an’gad? Mu susunnag ni ga be yan u karrow u daken ba pa’ i kanawo’ ni boor e karrow ni be yan riy nib sagaal. Rayog ni ngam gum’an’nagem ngam son nge mada’ ko ngiyal’ nra mithmith fapi karrow. Machane, dabkiyog ni ngam son, ma ga lemnag ni ngam man u ba pa’ e kanawo’ ni yugu ba thil. Ma nap’an ni ga ra yan ko fare pa’ i kanawo’ mag oloboch, ma nap’an ni ga ra taw ko gin ni ga be nameg ma kam sagaal. Faan gomanga mu k’adan’um ngam son, ma dabisiy ni ga ra taw ko gin ni ga be nameg ndawor mu sagaal. Rayog ni ngan taarebrogonnag e re n’ey ko magawon ni gad ma mada’nag. Maku faanra ud gum’an’gad ma gad fol ko pi kenggin e motochiyel u Bible, ma ra ayuwegdad Jehovah ngad athamgilgad u fithik’ e pi magawon rodad.

16. Mang reb i fan ni bay yu ngiyal’ nra pagdad Jehovah ni ngad athamgilgad u fithik’ e pi magawon rodad?

¹⁶ Ba’ yu ngiyal’ nder ma chuweg Jehovah e pi magawon rodad, ya nge yag ni ngad nanged rogon ni ngad gelgad ngay. (Mu beeg e 1 Peter 5:6-10.) Dab da lemnaged ni Got e ir e be k’aring e pi magawon. (Jas. 1:13) Ya “Moonyan’ ni ir e toogor romed,” e ir e be k’aring yooren e pi magawon. Machane, rayog rok Got ni nge dabi chuweg e pi magawon rodad ya nge yag ni nge gel e michan’ rodad. Ma guy e gafgow ni gadad be tay, ma bochan ni be ‘lemnag rarogodad,’ ma ‘dabi’ pagdad ni ngad gafgowgad nib n’uw nap’an. Ga ma felfelan’ ko ayuw ni be pi’ Jehovah ngom u nap’an ni kam mada’nag boch e magawon, mab pagan’um ngak nra ayuwegem ni ngam athamgil u fithik’ e pi magawon?​—2 Kor. 4:7-9.

BA TOW’ATH NI YIB ROK JEHOVAH

17. Mini’ e ma fal’eg Jehovah i yaliy gum’irchaen, ma mang fan?

¹⁷ Ma fal’eg Got i yaliy gum’irchaen urngin e girdi’, ya nge guy ko mini’ e piin nriyul’ nib t’uf Got rorad. I yog Hanani ni profet ngak Asa ni Pilung ni gaar: “I Somol e ma fal’eg i yaliy e re fayleng ney ni ga’ngin, ni nge pi’ gelngin e piin yad ba yul’yul’ ngak u gum’ircha’rad.” (2 Kron. 16:9, BT) Ra pi’ Jehovah ‘gelngim,’ ma re n’ey e be yip’ fan nra ayuwegem maku ra tow’athnagem.

18. Mang fan nrayog ni nge pagan’dad nra tow’athnagdad Jehovah u nap’an ni kad rin’ed e tin nib fel’? (Mu guy e sasing ni bay u tabolngin e re article ney.)

¹⁸ Baadag Got ni ngad ‘guyed rogon ngad rin’ed e tin nib mat’aw,’ me “t’uf rodad e tin nib fel’,” ya nge yag nda ‘rin’ed e tin nib fel’,’ me yag ni ‘runguydad.’ (Amos 5:14, 15; 1 Pet. 3:11, 12) Ma matanagiy Jehovah e piin nib mat’aw, ma ma tow’athnagrad. (Ps. 34:15) Gad ra guy e n’en ni rin’ Shifrah nge Puah ni l’agruw e ppin ni Hebrew ni yow ma ayuweg e ppin u nap’an e gargel. Nap’an ni immoy piyu Israel u Egypt ni yad e sib me tay Farao chilen ngorow nnap’an yira gargeleg e bitir nib pumoon mi yow li’ nge yim’, machane bochan ni bay madgun Jehovah u wan’row ma aram e dar liew fapi bitir. Ba tamilang ni ke ayuwegrow e nangan’ rorow ni ngar ayuwegew e yafas rok fapi bitir nib pumoon. Ke guy Jehovah e tin nib fel’ ni ke rin’ Shifrah nge Puah me munmun me tow’athnagrow me pi’ e bitir ni owcherow. (Ex. 1:15-17, 20, 21) Yu ngiyal’ e gad ma lemnag ndariy be’ ni be guy e pi n’en nib fel’ ni gad ma rin’, machane Jehovah e ma guy urngin ban’en nib fel’ ni gad ma rin’, ma ra tow’athnagdad.​—Matt. 6:4, 6; 1 Tim. 5:25; Heb. 6:10.

19. Uw rogon ni ke nang reb e walag nib pin ni ke guy Jehovah e tin nib fel’ ni ke rin’?

¹⁹ Ke guy Jehovah e maruwel nib gel ni ke tay reb e walag nib pin ni ma par u Austria. Re walag ney e be’ ko fare binaw nu Hungary. Kan pi’ e address rok be’ ngak ni ku ma thin nu Hungary ni nge yan i guy u nap’an e machib. Me yan i guy facha’, machane de moy u tabinaw rok. Boor yay ni i sul ko fare tabinaw, ma yu ngiyal’ ni manang ni bay be’ ko fare tabinaw, machane dariy be’ ni non ngak. Ma aram me tay e babyor, miki yoloy e babyor ni fan ngak fa cha’, miki yoloy e gin nrayog ni ngan callnag ngay. U tomuren reb nge baley e duw ma aram mfin ni non be’ nib pin ni ir e tafen fare tabinaw ngak. Re pin nem e be’ nib gol me non ngak fare walag nib pin ni gaar: “Wenig ngom, moy nga naun. Kug beeg gubin e babyor ni kam pi’, ma ug sonnagem.” Re pin nem e i un ko fare tafalay ni ka nog e chemotherapy ngay, ma ngiyal’ nem e dabun ni nge non ngak e girdi’ ni yad be yan nga tabinaw rok. Ke tabab fare pin ni nge fil e Bible. Arrogon, ke tow’athnag Got fare walag nib pin ko maruwel ni i tay.

20. Uw rogon u wan’um rogon ni ma ayuwegem Jehovah?

²⁰ Gubin ban’en ni ga ma rin’ ma ma guy Jehovah, ma ra munmun ma ra tow’athnagem. Dab da lemnaged ni be gay Got rogon ni nge guy thibngidad ara nge tay nga laniyan’ urngin e oloboch rodad. Machane, gad ma chugur ngak Got ya bochan ni gad manang ni ma runguydad, ma riyul’ ni baadag ni nge ayuwegdad me tow’athnagdad ko tin nib fel’ ni kad rin’ed.