Gur, Bay Be’ ni Ma Lemnageg, fa Dariy?

Ka a yib e magawon ngom ba ngiyal’ ma ga lemnag ni dariy be’ ni be lemnagem fa ra ayuwegem? Ma yugu ra yimanang e magawon rom, machane dariy be’ ni be un i lemnag.

BAY yu ngiyal’ nra yib e magawon ngodad ma bod ni gad bay u bang ni be cham e yoko’ riy nder tal. Ma bayi n’en ma gad lemnag ni kaygi gel e magawon ni keb ngodad ndabkiyog rodad. Ba ga’ ni aram e n’en ni gad ma lemnag ni faanra ke buch ban’en nib kireb rodad ma ke magey u lanin’dad, fa kad mochuchgad, fa kad m’argad ndab kud golgad, fa reb e magawon ni bod rogon e tiney. Sana gad ra lemnag ndariy be’ nra ayuwegdad ma dakuriy e athap rodad nga bang. Machane, gur, ka bay be’ nga bang nri ma lemnagdad?

Ma Lemnagdad fare “Got ni ma fal’eg lanin’uy”

Be yog e Bible ni Got e “ir e Chitamangiy nrib tarunguy e girdi’, ni ir faanem i Got ni [“ma fal’eg lanin’uy,” NW].” (2 Korinth 1:3) Manang Jehovah Got ni bay yu ngiyal’ nib t’uf ni ngan fal’eg lanin’dad. Ba pag e raay yay ni ke fanay e Bible fare bugithin ni “fal’eg lanin’uy”. Ere kad nanged ni gathi kemus ni manang Got e magawon ni ma yib ngodad ya ku baadag ni nge fal’eg lanin’dad. Yugu aram rogon ni gad be lemnag ndariy be’ ni be guy, fa manang, fa be lemnag e magawon rodad, machane Jehovah e ma lemnag.

Be yog e Bible ni ma lemnag Jehovah e girdi’ rok ni be’ nge be’. Be gaar: “I Somol e be guy urngin ban’en ni yibe rin’ u gubin yang, ndemtrug ko tin nib fel’ ara tin nib kireb e gadad be rin’ machane be par ni ke yip’ owchen ngodad.” (Proverbs 15:3) Ma Job 34:21, BT e be gaar: “Ma yaliy urngin e gachgach ko girdi’.” Gubin e mithmith rodad ni ma guy Got ma manang rarogodad ma ma rin’ e tin ni manang nra fel’ rogodad riy. Ireray e n’en ni micheg Hanani ni profet ngak Asa ni Pilung. I gaar: “I Somol e ma fal’eg i yaliy e re fayleng ney ni ga’ngin, ni nge pi’ gelngin e piin yad ba yul’yul’ ngak u gum’ircharad.”​—2 Kronicles 16:7, 9, BT.

Ku bay reb i fan ni ma fal’eg i yaliydad Jehovah. I yog Jesus ni gaar: “Dariy be’ nrayog ni nge yib ngog ni faanra gathi en ni Chitamangiy e pow’iy nge yib ngog, ni ir e ke l’ugeg ku gub.” (John 6:44) Ri ma lemnagdad Jehovah, ere arfan ni ma fal’eg i yaliy gum’irchadad ya nge guy ko rriyul’ ni gad baadag ni ngad nanged murung’agen fa danga’. Ma faanra ke guy ni gad baadag, me ayuwegdad ni bod rogon ni ayuweg reb e ppin u Dominican Republic. Re ppin nem e kan tay nga aspital ni ngan sey ni bochan e ke cancer. I wenig ngak Got ni nge ayuweg nge pirieg e baan riyul’ e teliw. De n’uw nap’an me yib e pumoon rok ni ke fek ba ke babyor ni fithingan e Mang e Ba T’uf ni Ngad Rin’ed ku Got?a Re ke babyor nem e ke pi’ e Pi Mich Rok Jehovah ngak e rorran nem ni kakadbul u nap’an ni ka ranod nga tabinaw rorow. Ere fek fare pin fa ke babyor nge beeg ma aram me nang ni ke fulweg Got taban e meybil rok. Me m’agan’ ngay ni nge fil e Pi Mich Rok Jehovah e Bible ngak, ma de gaman nel’ e pul nga tomren me ognag e yafas rok ku Got me un ko taufe.

Boor e thin nrib manigil ni gad ra pirieg ko fare babyor ni Psalm, ni bod e thin ni yog David ni Pilung u rogon ni ma ayuweg Jehovah e pi tapigpig rok u fithik’ e t’ufeg. U Psalm 56:8, BT e bay riy e thin ni wenignag David ni Pilung ngak Got ni gaar: “Kam yoloy gubin gaf i luag ni ke map’. Dariy u babyor rom ni ka mu yoloy?” Manang David ni gathi kemus ni ke guy Jehovah e gafgow ni keb ngak ya ku manang e gafgow ni ke tay laniyan’. Manang Jehovah e amith ni ke tay laniyan’ David maku manang fan ni ke yor. Ere riyul’ ni ma ayuweg Jehovah e piin ni yad baadag ni ngar rin’ed e tin nib m’agan’ ngay ma “yad ba yul’yul’ ngak u gum’ircharad.”

Ku reb e thin nu Bible ni be weliy rogon ni ma lemnagdad Got e bay ko bin 23 e Psalm. Yil’ ni som’on e thin riy e ke taarebrogonnag Got nga reb e tachugol saf ni ma t’ufeg e saf rok. Be gaar: “I Somol e be gafaliyeg ni bod be’ ni be gafaliy ba ran’ i saf; dakuriy ban’en nga bayang ni nge yog ngog.” Piin ma gafaliy e saf ko pi nam ni bay ko ngek u fayleng e yad ma ayuweg e saf rorad nib fel’ rogon maku yad ma tunguy fithingrad. Gubin e rran ni yad ma pining e saf rorad nge yib ngorad mar thithiyed pa’rad u dowrad ni yad ba gay bang ni ke maad’ad. Ma faanra bay, mar tafalayniged. Ma faanra ke m’ar reb fapi saf, mar guyed rogon ni nge unum e falay ya nge dabi yim’. Ere ku aram rogon ni ma ayuweg Jehovah e piin ni yad ma fol rok.

Meybil nge Athap ko Fas ko Yam’ e Mich Riy ni Ma Lemnagdad Got

Pi thin nu psalm ney e gathi ka yugu ni yoloy ni ngaud beeged. Ya be tamilangnag rogon ni i weliy e pi tapigpig rok Got lanin’rad ngak kakrom u nap’an ni ke t’uf e ayuw rorad ngu nap’an ni yad be og e magar ngak ko fonow nib fel’ nge tow’ath ni ma pi’ ngorad. I m’ug ko thin rorad nib mich u wan’rad ni ma lemnagrad Got. Ere, ra ud fal’eged i lemnag e pi thin ney ma ra ayuwegdad ni ngki pagan’dad ngak Got. Meybil ni gad ma tay e aram reb e mich riy ni ma lemnagdad Got.

Machane, bay yu ngiyal’ nra yib e magawon nib gel ngodad ma da kud nanged rogon ni ngad meybilgad ku Got. Ere, gur dabiyog nra nang Jehovah e magawon rodad ni bochan e da kud nanged rogon ni ngad weliyed ngak? Gad ra pirieg e fulweg riy ko Roma 8:26 ni gaar: “Ku er rogon [“gelngin Got nib thothup,” NW] ni ma yib i ayuwegdad ko meewar rodad. Ya ra dad nanged e yu bugithin ni nga dogned nge yog nda meybilgad nrogon, ma [“gelngin Got nib thothup,” NW] e ir e ma weliy ngak Got e n’en ni gadad be wenignag nrogon ndabiyog i weliy ko thin.” Re thin nu Bible ney e be dag ngodad ni n’en ni gad be thamiy e rayog nib taareb rogon ko pi tapigpig rok Got kakrom ni ur meybilgad u fithik’ e michan’, ere ku ra motoyil Jehovah ngodad.​—1 John 5:14.

Fare athap ko fas ko yam’ e ku aram reb e mich riy ni ma lemnag Got e girdi’ ni gubin. I yog Jesus Kristus ni gaar: “Ba’ ba ngiyal’ ni be yib ni bayi taw ngay ma gubin e yam’ ni  bay u lan e low ni bayi rung’ag laman [Jesus], mi yad yib u lan e low rorad nga wuru’.” (John 5:28, 29) Fare bugithin ni Greek ni kan fanay u roy e gathi ka yugu ni pilyeg ni ‘malangen e yam’,’ ya ka nog ni ‘low ko yam’.’ Ere be dag u roy ndabi pag Got talin gubin ban’en u rarogon e piin ni kar m’ad.

Am lemnag, ra nge faseg Got be’ ko yam’ ma thingari nang gubin ban’en u rarogon faanem nib muun rogon yaan ngay nge lem rok! (Mark 10:27) Machane, yugu ra ke yan bokum biyu’ e duw ma dabi pag Got talin faanem. (Job 14:13-15; Luke 20:38) Ere bokum bilyon e piin ni kar m’ad ni ka yad bay u laniyan’ Jehovah. Ma be dag e re n’ey nri ma lemnagdad!

Ma Tow’athnagdad Jehovah

Mang e thingar da rin’ed ya nge yog ni i lemnagdad Got ma be ayuwegdad? Bin th’abi ga’ fan e thingari pagan’dad ngak, mu ud folgad rok, me michan’dad ngak. I weliy Paul e n’en nib taareb ko nge fel’ u wan’uy e ayuw ni ma yib rok Got nge michan’ rodad ngak ni gaar: “Dariy be’ nra fel’ u wan’ Got ni faanra de mich Got u wan’. Ya en nra yib ngak Got e thingari mich u wan’ ni ba’ Got ma ra tow’athnag e piin ni yad be gayiy.”​—Hebrews 11:6.

Mu tay fanam i yan riy ni bay l’agruw ban’en nib l’ag ko michan’ ngak Got. Bin som’on e, thingari ‘mich u wan’dad ni ba’’ Got ma ir e Pilung rodad Nth’abi Tolang ni ngad pigpiggad ngak u fithik’ e yul’yul’. Ma bin migid e, thingari mich u wan’dad ni ma “tow’athnag e piin ni yad be gayiy.” Ku thingari mich u wan’dad ni ma lemnag Got rarogon e piin ni yad baadag ni ngar rin’ed e tin nib m’agan’ ngay ma ma tow’athnagrad. Ra um fil e Thin rok Got mu um chag ko piin ni yad ma fol rok ma aram e rayog ni nge yog e mit ney e michan’ ngom nra tow’athnigem Got riy.

Boor e girdi’ ni yad ma lemnag nder ma lemnagdad Got. Machane rogon ni kad filed u Bible e ri ma lemnag Got e piin nib michan’rad ngak maku ma ayuwegrad. Dabi mulan’dad ni yugu aram rogon ni boor e magawon rodad e ngiyal’ ney, ya ma lemnagdad Jehovah. Reb riy e baadag Got ni ngad sapgad ngak ni nge ayuwegdad. I yog e en ni yoloy e psalm ni gaar: “Mu pi’ e gilab rom ngak Somol, ma bayi n’ufegem; dariy e ngiyal’ nra pag e piin yul’yul’ ngar meewargad.”​—Psalm 55:22, BT.

[Footnote]

[Box/​Picture on page 9]

Boch e Thin u Bible ni Be Micheg ni Ma Lemnagem Got

“I Somol e ma fal’eg i yaliy e re fayleng ney ni ga’ngin, ni nge pi’ gelngin e piin yad ba yul’yul’ ngak u gum’ircharad.”​—2 KRONICLES 16:9, BT

“Kam yoloy gubin gaf i luag ni ke map’. Dariy u babyor rom ni ka mu yoloy?”​—PSALM 56:8, BT

“I Somol e be gafaliyeg ni bod be’ ni be gafaliy ba ran’ i saf; dakuriy ban’en nga bayang ni nge yog ngog.”​—PSALM 23:1

“Bochan e ga be fulweg taban e meybil. Urngin e girdi’ e ngar bad ngom.”​—PSALM 65:2, BT

“Bay mu pong, mu gu fulweg, ma bay gu fel’ u wun’um, i gag e en ni mu sunmiyeg.”​—JOB 14:15, BT

“Dariy be’ nra fel’ u wan’ Got ni faanra de mich Got u wan’. Ya en nra yib ngak Got e thingari mich u wan’ ni ba’ Got ma ra tow’athnag e piin ni yad be gayiy Got.”​—HEBREWS 11:6

“Mu pi e gilab rom ngak Somol, ma bayi n’ufegem; dariy e ngiyal’ nra pag e piin yul’yul’ ngar meewargad.”​—PSALM 55:22, BT