Mang e Athap ko Pi Ga’ Rog ni Kar M’ad Kakrom?
KAFRAM boch e bay ban’en nni tay nga reb e shimbung u Korea ni ka nog e The Chosun Ilbo ngay ni boor e girdi’ ni kar ngatgad ngay. Be gaar e re n’em: “‘Faanem i Shim Cheong ni Be’ Nrib Fel’,’ Ndariy Ban’en u Murung’agen Jesus ni Manang, e Gur, Ke Yan nga Fithik’ e Nifiy?”
Boor e girdi’ ni kar damumuwgad ko re n’ey ni bochan e cha’nem i Shim Cheong e be’ nib pin ni yima yon’ tangin ko yat u Korea ni ir be’ ni pag fan e yafas rok ni nge ayuweg e chitamangin ni be’ nib malmit. Ere, kab kafram i yib ni yima tayfan e re ppin ney. Bin riyul’ riy, e ma tay piyu Korea e cha’nem i Shim Cheong ni ir reb e bitir nib pin nib fel’ ni ngan folwok rok.
Boor e girdi’ ni yad ma lemnag nde mat’aw maku ra k’aring e damumuw ni ngan lemnag ni ngan gechignag be’ ni bod rogon e re ppin ney u fithik’ e nifiy ni bochan e dan taufenag ko Kristiano. Bin riyul’ riy e, yima yog ni cha’ney e immoy u m’on ni nge taw murung’agen Kristus ko re binaw ni baaram ni i par riy.
Ku immoy boch ban’en nni fith ngak reb e tayugang’ ko teliw ko re article nem. Kan fith ngak ko ke yan e piin nra m’ad ndawor ra nanged murung’agen Jesus nga fithik’ e nifiy ndabi math biid fa danga’. Me ere mang e yog? “Dariy be’ ni manang. Kemus ni gad be lemnag ni bay ban’en ni Ke Lemnag Got Nra Rin’ [ni fan ko pi girdi’ ney].”
YIRA RIN’ MA ARAM E KAN THAP
I yog e The New Catholic Encyclopedia ni gaar: “Rib ga’ fan ni nge un be’ ko taufe, ya nge yag e yafas ngak. Rogon ni yog Kristus e dabiyog ni nge thap be’ nga Gil’ilungun Got ni faanra dawor ni gargeleg bayay ko ran nge fare Kan ni Thothup (Jn 3.5).” Bochan e re n’ey, ma aram fan ni ma lemnag boch e girdi’ ni piin ni kar m’ad ndawor ni taufenagrad e ka non’rad nga fithik’ e nifiy ndabi math biid ara yad bay u bang ni yibe gafgownagrad.
Machane, bay boch e girdi’ ni yad ma lemnag nde puluw e re machib ney. Boor e girdi’ ni kar m’ad ndar nanged e thin ni bay u Bible. Ere gur, ba puluw ni ngan gafgownagrad ndariy n’umngin nap’an? Mang e be yog e Bible u murung’agen e re n’ey?
N’EN NI KE MICHEG E BIBLE
Ba tamilang ni be yog e Bible ni ma lemnag Got e piin ndar nanged e thin rok. Be gaar e Acts 17:30: “I Got e ke n’ag fan u wan’ e yu ngiyal’ ni ba aram nde nang e girdi’ murung’agen riy.” Ere, mang e athap ko piin ni kar m’ad ndar nanged murung’agen Got nrogon ni be yog e Bible?
Yira pirieg e fulweg riy ko n’en ni yog Jesus ngak fare moon ni immoy u tooben ko fa ngiyal’ i n’em nni li’ nge yim’. I yog e re moon nem ngak Jesus ni gaar: “Ri ga ra lemnigeg ko ngiyal’ ni ga ra yib ni gur e kam mang pilung!” Ma mang e yog Jesus ngak? I yog ni gaar, “Nggog ngom e daba’ ni, ga ra moy rog u Paradis.”—Luke 23:39-43, NW.
Gur, be yog Jesus ngak fare moon nra yan nga tharmiy? Danga’. Dawor ni “gargeleg” e re moon nem ko ran nge gelngin Got nib thothup, ma aram ban’en nib t’uf ni nge rin’ e piin ni yad ra un nga Gil’ilungun Got u tharmiy. (John 3:3-6) Ere, fan e n’en ni yog Jesus ko re moon nem e aram e ku yira faseg ko yam’ bayay me un ko par u Paradis. Bochan ni fare moon e ir reb e Jew, ma dabisiy ni manang murung’agen fare Paradis ni immoy u fayleng ni ka nog fare milay’ nu Eden ngay ni faan bay murung’agen ko bin som’on e babyor ko Bible. (Genesis 2:8) Ere, ke micheg Jesus ngak ni yira faseg ko yam’ u nap’an ni ke Paradis e fayleng bayay.
Bin riyul’ riy, e be micheg e Bible ni bay ni “faseg urngin e girdi’ ko yam’, ni tin nib fel’ [“mat’aw,” NW] nge tin nib kireb [“de mat’aw,” NW].” (Acts 24:15) Piin “de mat’aw” e aram e piin nda ur folgad rok Got ni bochan e dar nanged e tin nib m’agan’ Got ngay. Ra faseg Jesus fare moon ni immoy u tooben nde mat’aw ni faan ur nonow, ni kub muun ngay bokum milyon e girdi’ ni kar m’ad ndawor nanged e thin rok Got. Nap’an ni yira fasegrad u Paradis u fayleng, ma aram e ngiyal’ ni yira fil e pi motochiyel rok Got ngorad, min bing e kanawo’ ngorad ni ngar micheged nib t’uf Got rorad mar folgad ko pi motochiyel rok.
NAP’AN NI YIRA FASEG E PIIN NDE MAT’AW
Nap’an ni yira faseg e piin nde mat’aw, ma gur, yira pufthinnagrad ni be yan u rogon e n’en ni ur rin’ed u m’on ni ngar m’ad? Danga’, ya be yog e Roma 6:7 ni gaar: “Faanra yim’ be’ ma ke chuw u fithik’ i gelngin e denen.” Ere, piin nde mat’aw e kar pied puluwon e denen rorad u daken e yam’ ni kar ted. Ma pufthin ni yira tay ngorad e be yan u rogon e n’en ni yad ra rin’ u tomuren ni kan fasegrad ko yam’, ma gathi n’en ni ur rin’ed u m’on ni ngar m’ad. Ere, mang angin nra yib ngorad?
Tomuren ni yira faseg e piin nde mat’aw ko yam’ ma yira pagrad ni ngar filed e pi motochiyel rok Got ni yira tay nga boch e babyor nib beech ni be yip’ fan ban’en. Ma tomur riy min pufthinnagrad “ni be yan u rogon e n’en ni ur ngongliyed,” nre n’ey e be yip’ fan ni ngan guy ko kar folgad ko pi motochiyel rok Got fa danga’. (Revelation 20:12, 13) Yooren e piin nde mat’aw e fin aray e ngiyal’ nra mab e kanawo’ ngorad ni ngar filed mar folgad ko tin nib m’agan’ Got ngay mi yad par u fayleng ndariy n’umngin nap’an.
Boor e girdi’ ni ke ayuwegrad e pi machib u Bible ni ngki mich Got u wan’rad bayay. Bagayad e pi girdi’ ney e ka nog Yeong Sug ngak. Re ppin ney e ni chuguliy nib Katolik. Ma bay boch e girdi’ ko tabinaw rok ni yad e padrey. Ere, yan nga skul ko sibester ni bochan e baadag ni nge mang reb e sibester. Boch nga tomuren me chuw ni bochan e ke dabuy e n’en ni un rin’ u rom. Maku reb e, rib mo’maw’ ni nge mich u wan’ fare machib ni murung’agen e nifiy ndabi math biid, ya ra lemnag ni ngan gafgownag e girdi’ u fithik’ e nifiy ma aram reb e ngongol nde mat’aw ma dariy e t’ufeg riy.
Me yan i reb e rran me dag reb e Pi Mich Rok Jehovah ngak Yeong Sug e pi thin ni baaray u Bible ni gaar: “Arrogon, piin nib fos e yad manang ni bay ra m’ad, machane piin nib yam’ e dariy ban’en ni yad manang. Yad e dakuriy e tow’ath rorad.” (Eklesiastes 9:5) Ke ayuweg facha’ ni ir reb e Pi Mich Rok Jehovah e re ppin ney ni nge nang ndanir gafgownag e pi ga’ rok ni kar m’ad kakrom u fithik’ e nifiy ndabi math biid. Ya gowa kar molod ni yad be sonnag e ngiyal’ ni yira fasegrad ko yam’.
Bochan ni manang ni boor e girdi’ ndawor ra nanged e tin riyul’ u Bible, ma aram fan ni ke fol ko fare thin ni yog Jesus ni bay ko Matthew 24:14 ni be gaar: “Re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” Chiney e ma un Yeong Sug i machibnag fare thin nib fel’ ma be weliy murung’agen e athap rok ngak boch e girdi’.
“GUBIN E GIRDI’ MA TAAREB ROGORAD U WAN’ GOT”
Be gaar e Bible: “Gubin e girdi’ ma taareb rogorad u wan’ Got. En ni ba’ madgun Got u wan’ ma be rin’ e tin nib mat’aw e ra i par nib fel’ u wan’ Got ndemtrug ko be’ u kun nam.” (Acts 10:34, 35) Ireray e n’en nrayog ni ngad athapeged ni nge rin’ Got, ni ir faen nib t’uf rok e “tin nib mat’aw ma ba yal’uw.”—Psalm 33:5.