Deer Ko Piin Ma Beeg
Mini’ e piin yira fasegrad u roy u fayleng, ma mang e ra buch rorad u tomuren ni yira fasegrad?
Am lemnag rogon ni be pi’ e Bible e fulweg ko gal deer ney.
Be yog e Acts 24:15 (NW) ni bay ni “faseg ko yam’ e piin nib mat’aw nge piin nde mat’aw.” Piin nib mat’aw e aram e piin ur folgad rok Got u m’on ni ngar m’ad. Ere kan yoloy fithingrad nga lan fare ke babyoren e yafos. (Mal. 3:16) Ma piin nde mat’aw e ba muun ngay e piin nde yag ni nge mab e kanawo’ ngorad nib fel’ rogon ni ngar nanged murung’agen Jehovah u m’on ni ngar m’ad. Ere dan yoloy fithingrad nga lan fare ke babyoren e yafos.
Fa gal ulung i girdi’ ni be weliy e Acts 24:15 murung’agrad e ku aram e piin be weliy e John 5:28, 29 murung’agrad. I yog Jesus ni “piin nib fel’ e tin ni ur ngongliyed” e bay ni fasegrad “mu ur pired ni yad ba fos ma piin nib kireb e n’en ni ur rin’ed e bay ni fasegrad ko yam’ mi ni gechignagrad [“min pufthinnagrad,” NW].” Piin nib mat’aw e ur rin’ed e tin nib fel’ ban’en u m’on ni ngar m’ad. Ere nap’an ni yira fasegrad, mu ur pared ni yad ba fos ni bochan e kan mu’ i yoloy fithingrad nga lan fare ke babyoren e yafos. Machane piin nde mat’aw e aram e piin nib kireb e n’en ur rin’ed u m’on ni ngar m’ad. Ere yira fasegrad ko yam’ min pufthinnagrad. Bochan ndawor ni yoloy fithingrad nga lan fare ke babyoren e yafos, ma aram fan nib t’uf ba ngiyal’ ni ngan yaliy rogon e ngongol rorad. Yira bing e kanawo’ ngorad e ngiyal’ nem ni ngar filed murung’agen Jehovah me yag nni yoloy fithingrad nga lan fare ke babyoren e yafos.
Be yog e Revelation 20:12, 13 ni urngin e piin kan fasegrad e ra t’uf ni ngar folgad ko n’en ‘kan yoloy nga lan fa yungi babyor ni kan bachiy,’ ni aram boch e motochiyel nib beech ni yira pi’ ngodad u lan e bin nib beech e fayleng. Piin dab ra folgad e yira thangrad.—Isa. 65:20.
Be yiiynag e Daniel 12:2 ni bay boch e girdi’ ni kar m’ad ni bay ni fasegrad mu ur pared ni yad ba “fos ndariy n’umngin nap’an, ma boch i yad e bay ur pired ndariy n’umngin nap’an ni yad be tamra’ ma dakuriy farad.” Re verse ney e be weliy murung’agen e n’en nra buch rok e piin kan fasegrad ko tomur. Reb e nge yag e ‘yafos ndariy n’umngin nap’an’ ngorad fa reb e ngar pared ‘ndariy n’umngin nap’an ndakuriy farad.’ Ere ra yan i taw nga tungun fare 1,000 i duw ma boch i yad e ra yag e yafos ndariy n’umngin nap’an ngorad, ma boch e yira thangrad.—Rev. 20:15; 21:3, 4.
Baaray rogon nrayog ni ngan susunnag. Gal ulung i girdi’ ney ni yira fasegrad e rayog ni ngan taareb rogonnagrad ko girdi’ u reb e nam ni yad baadag ni nga ranod ra pared nga yugu reb e nam. Piin nib mat’aw e yad bod e piin kan pi’ e visa ngorad ara bangi babyor ni be pi’ mat’awrad ni ngar maruwelgad ara ra pared ko fare nam nib n’uw nap’an. Machane piin nde mat’aw e yad bod e girdi’ u yugu reb e nam ni kan pi’ reb e visa ngorad ni yima pi’ ko girdi’ ni kan pi’ mat’awrad ni ngar pared u daken e nam u lan bochi ngiyal’. Pi girdi’ ney e thingar ra ted fan mar folgad ko motochiyel ko fare nam u m’on ni ngan pagrad ni ngar ululgad ni ngar pared u rom. Ere ku arrogon e piin nde mat’aw ni yira fasegrad ko yam’ nib t’uf ni ngar folgad ko pi motochiyel rok Jehovah mar daged ni yad boch e girdi’ ni yad ba mat’aw ya nge yag nra pared u Paradis. Maku reb e demtrug rogon e visa ni kan pi’ ko girdi’ u reb e nam u nap’an nranod nga yugu reb e nam, machane rayog ni nge munmun min pag boch i yad ni ngar manged girdien fare nam, ma boch i yad e rayog ni ngan chuweg u daken fare nam. N’en nra buch rorad e be yan u rogon e ngongol rorad u nap’an ni yad be par ko fare nam. Ere ku arrogon ni n’en nra buch ko piin kan fasegrad ko tomur e be yan u rogon e yul’yul’ ni yad ra tay nge ngongol rorad u lan e bin beech e fayleng.
Jehovah e gathi kemus ni ir e Got ko t’ufeg, ya ku ir e Got ko tin nib mat’aw. (Deut. 32:4; Ps. 33:5) Ra m’ug e t’ufeg rok u nap’an nra faseg e piin nib mat’aw nge piin nde mat’aw. Machane yad gubin ni baadag ni ngar folgad ko pi motochiyel rok u murung’agen e tin nib fel’ nge tin nib kireb. Kemus ni yigoo piin nib t’uf Jehovah rorad ma yad be fol ko pi motochiyel rok e yira pagrad ni ngaur pared u lan e bin nib beech e fayleng.