Fare Athap Ko Fas Ko Yam’​—Mang Fan E Re N’ey Ngom?

“Ba gaman urngin ni be pi’ ngorad nge yan i aw ni ke fel’ u wun’rad ni yad gubin e tin ni ke yog ngorad.”​—PSALM 145:16.

1-3. Mang athap e bay rok boch e girdi’ ko gabul nge langlath? Mu weliy boch.

CHRISTOPHER ni mereb e duw rok nge walagen ni pumoon nge walagen e nina rorow nge pumoon rok, nge gali fakrow, e kar machibgad u mit e tabinaw i yan ko gin nib chuchugur nga Manchester, England. Magazine rodad ni Awake!, e ke weliy e n’en ni ke buch. “U nap’an ni ke thig e yal’, ma ranod ko milekag ni ngar guyed boch yu yang ma ranod nga Blackpool ni bay u dap’e lay nib chuchugur ni yima yan ngay. Yad 6 u gubin ni yad ba ma un nga ku 12 e girdi’ ni ra m’ad nib tomgin u ba maadad ko karrow, ni rogon ni yog reb e polis e ba ‘magothgoth nib gel.’”

² Fare nep’ u m’on ni ke buch e re n’em, me un e re tabinaw nem ko Fol Babyor, ni murung’agen e yam’ e ni weliy. Ke yog e chitamangin ni gaar, “Christopher e ba pagel ni ri ma fal’eg i lemnag ban’en. Re nep’ nem e weliy nib tamilang murung’agen e bin nib biech e fayleng nge athap rok ko gabul nge langlath. Ma, nap’an ka gamad be weliy ban’en, mi yigi yog Christopher nib tomgin ni gaar: ‘Felngin ni gadad e Pi Mich rok Jehovah e aram rogon ni yam’ e ra k’aring e kireban’ ngodad, ma gad manang ni rayog ni ngada guyed gadad reb e rran.’ Dagu nanged ni ra yib ngan’mad e pi thin nem.”a

³ U m’on riy, ko duw ni 1940, ma reb e Mich rok Jehovah ni be’ nu Austria ma Franz fithingan e ka nog ni ngan li’ ngem’ ni ngan th’ab kangan’ ni ngan fanay e wasay nib muth ya bochan ni dabun ni nge dabki yul’yul’ ngak Jehovah. Franz ni immoy u kalbus u Berlin e yol ko nina rok ni gaar: “Gu manang, ni faan manga gu un ko [salthaw], ma kug denen ni gu ra yim’ riy. Ma ra kireb e re n’em ngog. Dabiyog ni ngan fasegeg ko yam’. . . . Chiney, Nina ni gab t’uf rog nge pi walageg ni pumoon nge ppin e nggog ngomed ni nog ngog e daba’, e n’en ni yira rin’ ma dagur tamdag ngay, ngan li’eg gabul ni kakadbul. Got e ke pi’ gelngig, ni bod e n’en ni ke buch ko tin riyul’ e Kristiano kakrom. . . . Faan gimed ra par ni gimed ba mudugil nge mada’ ko yam’, ma bayda mada’gad biyay u nap’an e fas ko yam’. . . . Reb e rran ngodad.”b

4. Mang e ke rin’ ngom fare n’en ni ke buch ni kan weliy u roy, ma mang e bin migid ni gad ra weliy?

⁴ Baga’ fan u wan’ Christopher nge Franz fare fas ko yam’. Ba riyul’ e re n’em u wan’row. Ba mudugil ni re chep ney e ke taw nga gum’irchadad. Ra nge gel e t’ufeg rodad ni fan ku Jehovah ma nge gel e athap rodad ko fas ko yam’, ma ngada weliyed ko mang fan ni bayi buch fare fas ko yam’ ma mang e ra rin’ e re n’ey ngodad ni be’ nge be’.

Fas ko Yam’ u Fayleng ni Ke Piliyeg e Changar Kan Guy

5, 6. Mang e be dag e n’en ni ke guy John ni apostal ni ke yoloy ko Revelation 20:12, 13?

⁵ Tin ra buch u nap’an e Gagiyeg rok Jesus Kristus, u lan reb e Biyu’ e Duw e ke guy John ni apostal e fas ko yam’ ni ra buch u roy u fayleng. “Ma aram mu gguy e piin ni kar m’ad ni piin nib tolang nge piin nib sobut’,” miki yog ni gaar. “Ma aram me pi’ e day e pi yam’ ni bay riy. Ma yam’ nge gin ni ma par e piin ni kar m’ad riy e kur piew e yam’ ni ba’ rorow.” (Revelation 20:12, 13) Demtrug ko mini’​—“piin nib tolang” ara “piin nib sobut’”—​ni yad bay u Hades (Sheol), ni aram e low ko yam’, e yira fasegrad. Piin ni kar m’ad u maday e ku yira fasegrad ko ngiyal’ nem. Re n’en ni rib fel’ ney e bang ko tin nib m’agan’ Jehovah ngay.

⁶ Nap’an ni ra tabab Kristus ko gagiyeg rok u lan reb e biyu’ e duw, ma ra m’ag me kalbusnag Satan. Dariy be’ u fithik’ e piin ni kan fasegrad ko yam’ ara piin ni kar mageygad nib fas ko fare gafgow ni baga’ ni rayog ni nge bannagrad Satan ko ngiyal’ nem, ya dakuriy gelngin. (Revelation 20:1-3) Sana rib n’uw nap’an ngom reb e biyu’ e duw machane tin riyul’ riy, e re n’ey e kemus ni “taareb e rran” u puluwon Jehovah.”​—2 Peter 3:8.

7. Yira pufthinnag e girdi’ u nap’an e Gagiyeg rok Kristus u lan reb e biyu’ e duw ni bochan e n’en ni ke rin’ u mang ngiyal’?

⁷ Kan dag ko n’en ni kan guy, ni Gagiyeg rok Kristus u lan taareb e biyu’ e duw e eram e ngal’an e pufthin. John ni apostal e ke yoloy ni gaar: “Ma aram mu gguy e piin ni kar m’ad ni piin nib tolang nge piin nib sobut’ ni kar sak’iygad u m’on u tagil’ Got. Min pithig e babyor, mu kun pithig ba ken, ni fare ke babyor ni babyoren e piin kar fosgad. Ma piin kar m’ad e ni pufthinnagrad ni be yan u rogon e n’en ni ur ngongliyed, ni bod rogon ni kan yoloy nga lan fa yu ke babyor. Ma aram me pi’ e day e pi yam’ ni ba’ riy. Ma yam’ nge gin ni ma par e piin ni kar m’ad riy e kur piew e yam’ ni ba’ rorow. Ma yad urngin ni pufthinnagrad ni be yan u rogon e n’en ni ur ngongliyed.” (Revelation 20:12, 13) Mu lemnag ni re pufthin ney e dariy rogon ko n’en ni ke rin’ e girdi’ u m’on ni ke yim’. (Roma 6:7) Re n’ey e bay rogon ko “babyor” ni bay ni pithig. N’en ni ra rin’ be’ u tomren ni ke fil e tin ni bay ko fare babyor ni kan bachiy e ra ayuweg min nang ko kan yoloy fithingan nga lan “babyoren e piin ni kar fosgad” fa danga.

“Bay ni Fasegrad Mu Ur Pared nib Fas” ara “Bay ni Fasegrad Mini Gechignagrad”

8. Mang l’agruw ban’en ni rayog ni nge buch rok e piin ni yira fasegrad ko yam’?

⁸ U nap’an ni kefin ni guy John boch ban’en, min weliy murung’agen Jesus ni “bay e yam’ u pa’ nge gin ni bay nge piin ni kar m’ad riy.” (Revelation 1:18) Ma pigpig ku Jehovah ni ka nog e “tabolngin e yafas” ngak min pi’ gelngin ni nge pufthinnag e piin ni “ka yad ba fas nge piin ni kar m’ad.” (Acts 3:15; 2 Timothy 4:1) Uw rogon ni nge rin’ e re n’ey? Bay ni faseg e piin ni kar m’ad. Me yog Jesus ngak fapi girdi’ ni be machibnag ni gaar, “Dab mu gingad ko re bugithin ney, ya ba’ ba ngiyal’ ni be yib ni bayi taw ngay ma gubin e yam’ ni bay u lan e low ni bayi rung’ag laman mi yad yib u lan e low rorad nga wuru’. Me ulul ngay ni gaar: “Ma piin fel’ e tin ni ur ngongliyed e bay ni fasegrad mu ur pired ni yad ba fas, ma piin nib kireb e n’en ni ur rin’ed e bay ni fasegrad ko yam’ mi ni gechignagrad.” (John 5:28-30) Ere, mang e athap e be sonnag pi kakrom ni pumoon nge ppin nib yul’yul’.

9. (a) Nap’an ni piin ni kar m’ad e yira fasegrad, mang e n’en ni dariy e maruwar riy ni nge nang boor e girdi’?(b) Mang maruwel nib gel e yira rin’?

⁹ Nap’an ni yira faseg ko yam’ e pi girdi’ ni kakrom ney ni yad ba yul’yul’, ma dabi n’uw nap’an mar nanged ni pi n’en nni micheg ni kar pagedan’rad ngay e ke riyul’. Ri yad ra adag ni ngar nanged ko mini’ faani Fak fare pin, ni kan weliy ko bin som’mon e yiiy u Bible, ni bay ko Genesis 3:15! Ri yad ra felfelan’ ni fare Messiah ni kan micheg, i Jesus, e ke par nib yul’yul’ nge mada’ ko yam’, me pi’ e yafas rok ni maligach! (Matthew 20:28) Piin ni yad ra yib ni ngar guyed yad ni kar fasgad ko yam’ e ri yad ra felfelan’ ni ngar ayuweged yad nge fel’ u wan’rad ni re bayul ney ni kan pi’ e be dag feni rib gol nge feni rib ta runguyey Jehovah. Nap’an ni ra nang e piin ni kan fasegrad ko yam’ e n’en ni be rin’ Gil’ilungun Got ni fan ni be lebuguy e tin nib m’agan’ Jehovah ngay ni fan ko fayleng, ma dariy e maruwar riy ni yad ra pining e sorok ngak Jehovah. Rayog ni ngara daged e yul’yul’ rorad ngak e Chitamangirad u tharmiy nge Fak. Ere urngin e girdi’ e yad ra felfelan’ ni ngara uned ko maruwel nib gel ni ngan fil ban’en ngak bokum bilyon e girdi’ ni kan fasegrad ko yam’, ma kub t’uf rorad ni nge fel’ u wan’rad e biyul’ ni ke pi’ Got.

10, 11. (a) Fare gagiyeg u lan Taareb e Biyu’ e Duw e ra bing e mab ngak urngin e girdi’ nu fayleng ko mang? (b) Susun mang e ra rin’ e re n’en ney ngodad?

¹⁰ Nap’an ni yira faseg Abraham ko yam’ ma ra felfelan’ ni nge yog ni nge par ko fare “binaw” ni be sonnag. (Hebrews 11:10) Job ni tapigpig rok Got kakrom nib yul’yul’ e ra felfelan’ ni nge nang ni tin ni ke rin’ kakrom e ke gelnag boch e tapigpig rok Jehovah ni kan skengnag e yul’yul’ rorad! Ma ri baadag Daniel ni nge nang u rogon ni ke lebug e yiiy ni kan thagthagnag ngak ke yoloy!

¹¹ Tin riyul’ riy, urngin e girdi’ ni ra par nib fas u lan e bin nib biech e fayleng mab mat’aw, ni demtrug ko yad e piin ni kan fasegrad ko yam’ ara kar mageygad nib fas u nap’an fare gafgow ni baga’, e boor ban’en ni yad ra fil u murung’agen e tin nib m’agan’ Jehovah ngay ni fan ko fayleng nge girdi’. Fare athap ko yafas ni manemus nge ngan pining e sorok ngak Jehovah ndariy n’umngin nap’an e ra felan’nag gubin e girdi’ u nap’an fare skul ni bay ni ta’ u nap’an e gagiyeg rok Jesus u lan bbiyu’ e duw ngar ni felan’ ngay. Machane, n’en ni gad ra rin’ ni bagadad nge bagadad u tomren ni kad filed e n’en ni bay u lan fare babyor ni kan bachiy e ir e n’en nib ga’ fan. Gur, gad ra rin’ e n’en ni kad filed? Gur, gad ra fal’eg i lemnag, ma gad fol ko n’en ni kad filed nib ga’ fan nra gelnagdad ni ngada togopuluwgad ngak Satan ni ri be athamgil ni nge palognagdad ko tin riyul’?

12. Mang e ra ayuwegdad ni be’ nge be’ ni nge un ko maruwel ni ngan fil ban’en ngak e girdi’ maku ra un ko maruwel ni ngan fal’eg fare fayleng nge mang e paradis?

¹² Dab ni pagtalin e pi flaab ni ra yib ngodad nbochan kada folgad ko pi n’en ni keb ngodad u daken e biyul rok Kristus. Piin ni ran fasegrad ko yam’ e dabki yib e m’ar ngorad ni bod e m’ar ni bay rorad e chiney. (Isaiah 33:24) Dowef nib fel’ nge fare athap ni dabki yib e m’ar ngak e girdi’ e ra ayuweg urngin e girdi’ u lan fa bin nib biech e fayleng ni ngarda uned ko maruwel ni ngan skulnag bokum bilyon e girdi’ ni kan fasegrad ko yam’ u murung’agen kanawoen e yafas. Piin ni ra par u rom e ku yad ra un ko maruwel ni rib ga’ fan ni bay ni rin’ u fayleng​—ni ngan fal’eg e fayleng ni polo’ nge paradis min pining e sorok ngak Jehovah.

13, 14. Mang fan ni ngan pag Satan biyay ni nge skengnag e girdi’ u tomuren fare biyu’ e duw, ma mang e ra buch rodad?

¹³ Nap’an ni ran pag Satan u kalbus ni fan ni nge skengnag e girdi’, ma ra guy rogon ni nge bannagrad biyay. Rogon ni yog ko Revelation 20:7-9, urngin e ‘pi nam ara ulung ko girdi’ ni kan bannagrad’, ni kar awgad nga gelngin Satan nib kireb e bay rogon ni ngan thang e pogofan rorad: ‘Ra yib e nifiy u tharmiy nga but’ me urfiyrad.’ Piin nib kireb ni kan fasegrad ko yam’ u nap’an e gagiyeg u lan Taareb e Biyu’ e Duw, e yira thang e pogofan rorad ni dariy n’umngin nap’an. N’en nib thil riy, piin nib yul’yul’ ni kan fasegrad ko yam’ e yad ra fas ni dariy n’umngin nap’an. Tin riyul’ riy, e yira fasegrad “mu ur pired nib fas.”​—John 5:29.

¹⁴ Uw rogon ni fare athap ko yam’ e ra fal’eg lanin’dad ni mus ko chiney? N’en ni kab ga’ fan riy, e mang e thingarda rin’ed ni fan ni nge mudugil ni nge fel’ rogodad riy ko gabul nge langlath?

Ban’en ni Gad Ra Fil e Chiney

15. Uw rogon nra ayuwegdad e ngiyal’ ney fare athap ko fas ko yam’?

¹⁵ Sana kafin ni yim’ be’ nib t’uf rom ma ke magawonnigem nib gel. Fare athap ko fas ko yam’ e ra ayuwegem ni nge par nib gapas lanin’um ma bay gelngim ni dariy ko piin ni dar nanged e tin riyul’. I fal’eg Paul laniyan’ piyu Thessalonika ni gaar, “Pi walagmad ni girdien Kristus, gamad ba adag ni ngam nanged e tin nib riyul’ ni murung’agen e piin ni kar m’ad, ni bochan e nge siy i kireban’med ni bod e piin ndariy ban’en ni ke l’agan’rad ngay.” (1 Thessalonika 4:13) Ga be guyem u lan fa bin nib biech e fayleng, ni ga be guy e fas ko yam’ ni yibe ta’? Ere, mu par ni gab felfelan’ e chiney ni ga be fal’eg i lemnag e athap ni rayog ni ngam mada’nag biyay e piin nib t’uf rom.

16. Uw rogon ni ram thamiy u nap’an ni ra yib fare fas ko yam’?

¹⁶ Sana ga be gafgow ko pi magawon e chiney ni bochan e togopuluw ni tay Adam, ni sana keb e m’ar ngom. Dab mu pag e kireban’ ni ngeb riy ngom nge k’aringem ngam pagtalin fare athap ko fas ko yam’ ni bay rom ma ra fel’ fithik’ i dowam nge gelngim u lan fa bin nib biech e fayleng. Ngemu’ ma u nap’an ni kam pithig owchem ma kam guy e girdi’ nib felfelan’ ni nbochan e fas ko yam’ ni kam ta’, ma ba mudugil ni ngam pining e magar ngak Got nbochan e gol nib gel ni ke dag.

17, 18. Mang l’agruw ban’en ni thingar dabda paged talin?

¹⁷ Chiney, mu lemnag l’agruw ban’en ni thingar dabda paged talin. Reb riy e feni ga’ fan e pigpig ku Jehovah ni polo’ i yafas e chiney. Rogon ni gad be folwok rok e Masta rodad, ni Kristus Jesus, yafas rodad ni gad ma pagfan e be dag e t’ufeg rodad ni fan ku Jehovah nge piin ni buguli yoror rodad. Faanra togopuluw ara gafgow e ra magawonnag e yafas ara par rodad, gad ra par nib gel e michan’ rodad ni demtrug ko mang skeng e gad ra mada’nag. Faanra piin ni tatogopuluw e yad baadag ni ngara li’ed gadad ngad m’ad, ma fare athap ko fas ko yam’ e ra fal’eg lanin’dad me gelnagdad ni ngada pared nib yul’yul’ ngak Jehovah nge Gil’ilungun. Arrogon, bochan ni gad be par ni gad ba pasig ko maruwel ni ngan machibnag nge ngan skulnag e girdi’ e be ayuwegdad ni dabi aw u pa’dad e flaab ni ke chaariy Jehovah ni fan ku piin nib mat’aw.

¹⁸ Bin l’agruw ban’en ni gad ra fil e ba peth ko uw rogon ni ngada mada’naged e skeng nbochan e daworda flontgad. Tamilangan’ rodad ko fas ko yam’ nge ta’fan rodad ko gol nib gel ni ma dag Jehovah ngodad e ra gelnagdad ni ngada athamgilgad ni nge par nib gel e michan’ rodad. I ginangey Paul ni gaar, “Dabi t’uf romed e tin ni ba’ u roy u fayleng ara n’en nib mil fan nga fayleng. Faanra t’uf romed e tin ni bay u fayleng, ma aram de t’uf e en ni Chitamangiy romed. Gubin ban’en nib mil fan ngaray nga fayleng ni aram e tin nib tagan’ ban’en ni yima ar’arnag, ni tin nra guy e girdi’ ma yad ba adag ni nge yog ngorad, nge urngin ban’en ni bay u roy u fayleng nri ma uf e girdi’ ngay dariy reb e pi n’ey ni yib rok e en ni Chitamangiy; ya urngin me yib rok e fayleng.” (1 John 2:15-17) Fayleng ni be wawliydad u daken e tin ni bay riy, e dabi mit owchedad ngay ni faanra ngada taareb rogonnaged ko “bin riyul’ e yafas.” (1 Timothy 6:17-19) Faanra kan wawliydad ni ngada uned ko ngongol ni darngal, ma ri dabda uned ngay. Gad manang ni faanra ngada m’ad u m’on ni dawori yib fare Armagedon, ni kad ululgad ko ngongol ni dabun Jehovah ma gad ra bod e piin nib kireb ni dariy e athap rorad ko fas ko yam’.

19. Mang taw’ath ni rib fel’ ni thingar dab da paged talin?

¹⁹ N’en ni th’abi ga’ fan, e thingar dabda paged talin e taw’ath ni rib fel’ ni ngada felfelan’naged gum’irchaen Jehovah e chiney nge manemus. (Proverbs 27:11) Gad ra yul’yul’ nge mada’ ko yam’ ara nguuda yul’yul’gad nge mada’ ko ngiyal’ ni nge m’ay e re fayleng nib kireb ney e be dag ngak Jehovah ni gad bay u ba’ rok. Ngemu’ rib gel e felfelan’ ni ngada pared u Paradis u fayleng ni demtrug ko gad ra magay nib fas ko fare gafgow ni baga’ ara yira fasegdad ko yam’.

Be Pi’ e Tin ni Gad Be Yim’ ni Bochan

20, 21. Mang e ra ayuwegdad ni ngada pared nib yul’yul’ ni yugu aram rogon ni ka bay boch e deer rodad u murung’agen e fas ko yam’ ni dawor ni pi’ e fulweg riy? Mu weliy.

²⁰ N’en ni kad weliyed u murung’agen e fas ko yam’ e be digey boch e deer ni dawor ni pi’ e fulweg riy. Mang e ra rin’ Jehovah ngak e piin ni ki yad ba mabgol u nap’an ni kar m’ad? (Luke 20:34, 35) Bay ni faseg e girdi’ ko gin ni kar m’ad riy fa? Yira faseg e girdi’ ko yam’ ko gin nib chuchugur ko tabinaw rorad? Ka bay boor e deer u murung’agen e yaram ko fas ko yam’ ni dawor ni fulweg. Yugu aram rogon, thingarda lemnaged e thin rok Jeremiah ni gaar: “Jehovah e ba fel’ ngak e en ni be pagan’ ngak, nge en ni ma gay Got. Ffel’ ni nge sonnag be’ e ayuw rok Jehovah me fas, ma dabi gungun.” (Lamentation 3:25, 26, NW) Nap’an ni ke taw ngal’an ni ke turguy Jehovah, yira fulweg urngin e deer rodad nib tamilang. Mang fan ni rayog ni ngad dogned ni riyul’ e re n’ey?

²¹ Mu fal’eg i lemnag e thin rok fare psalmist u nap’an ke tangnag u murung’agen Jehovah ni gaar: “Ba gaman urngin ni be pi’ ngorad nge yan i aw ni ke fel’ u wan’rad ni yad gubin e tin ni ke yog ngorad.” (Psalms 145:16) Nap’an ni gad be pilibthir i yan, ma be thil e n’en ni gad be yim’ ni bochan. N’en ni gad be athapeg u nap’an ni ka gad bitir e de taareb rogon ko chiney. Rogon ni gad ma changar ko yafas e ke thil nbochan e n’en ni ke buch rodad, nge athap rodad. Yugu aram rogon, urngin ban’en ni gad baadag nib puluw ni nge yog ngodad u lan e bin nib biech e fayleng, e ba mudugil ni ra pi’ Jehovah ngodad.

22. Mang fan nib manigil ni ngada pininged e sorok ngak Jehovah?

²² Tin nib ga’ fan e ra bagadad me lemnag e chiney ni nge par nib yul’yul’. “Re n’en ni ir e th’abi ga’ fan ni nge rin’ e cha’ ni ir e mmil fan e pi n’ey ngak e nge par nib yul’yul’ ngak e masta rok.” (1 Korinth 4:2) Ke mil fan ngodad fare thin nib fel’ ko Gil’ilungun Got. Bochan ni gad ba pasig i machibnag e thin nib fel’ ngak urngin e girdi’ ni gad ma mada’nag, re n’en ney e be ayuwegdad ni ngauda pared u kanawo’en e yafas. Dabmu pagtalin ni “ngal’an nge n’en ni dan lemnag” e bayi buch rodad ni gad gubin. (Eklesiastes 9:11, NW) Ngam mu chichiiy paam ko fare athap ko fas ko yam’ ni fan ni nge lich e magafan’ ndariy fan ni bochan e yafas rodad ni de mudugil. Susun ni nge mich u wan’um ni faan gara yim’ u m’on ni nge tabab fare Gagiyeg u lan Taareb e Biyu’ e Duw, ma ga ra lemnag ni rib riyul’ ni bay ni pithig e re magawon nem. Nap’an ngal’an Jehovah ma ga ra sul u daken fapi thin ni yog Job ngak faani Ta Sunmiy ni gaar: “Bay mu piningeg, ma gu ra fulweg lungum.” Susun ni ngan pining e sorok ngak Jehovah Got ni baadag ni nge faseg urngin e girdi’ ni yad bay u wan’ ko yam’!​—Job 14:15.

[Footnotes]

Ka Ga Manang?

• Yira pufthinnag e girdi’ u lan fare Taareb i Biyu’ e Duw ni be yan u rogon e mang?

• Mang fan ni boch e girdi’ e yira “fasegrad mi yad par nib fas” ma boch i yad e bay ni “fasegrad ko yam’ mi ni gechignagrad”?

• Uw rogon ma athap ko fas ko yam’ e ra fal’eg lanin’dad e chiney?

• Uw rogon ma thin ni bay ko Psalm 145:16 e ra ayuwegdad ko boch e deer u murung’agen e fas ko yam’ ni dawor ni pi’ e fulweg riy?

[Pictures on page 19]

Uw rogon ni nge ayuwegdad e michan’ rodad ko fas ko yam’ e chiney?