Pagan’ Ko Thin Rok Jehovah

“Kug pagan’ug ko thin rom.”​—PSALMS 119:42, NW.

1. Mang e rayog ni ngam mog murung’agen rarogon nge lem rok e en ke yoloy fare Psalm 119?

RIB T’UF e thin rok Jehovah rok e en ke yoloy fare Psalm 119. Sana ir fare Hezekiah ni immoy ni Fak e Pilung nu Judah. Lem ko re tang ney ni kan thagthagnag e ba puluw ko ngongol ni i rin’ Hezekiah ni, “i par nib yul’yul’ ngak Jehovah” u nap’an ni i pigpig nib pilung nu Judah. (2 Kings 18:3-7) Reb e n’en nib mudugil e: En ni ke yoloy fare tang e ri ma lemnag ni rib t’uf rok e tirok Got ban’en.​—Matthew 5:3.

2. Mang e kenggin e thin ko Psalm 119, ma uw rogon ni kan yarmiy?

² N’en nrib ga’ fan ni yibe weliy ko Psalm 119 e aram e feni ga’ fan e thin rok Got.a Sana fan ni nge dabni pagtalin, ma ani ke yoloy fare tang e ke rin’ e re n’em e be fol ko fare yaram ko yol ara alphabetic. Fare 176 verses e kan fek ko yol ni Hebrew alphabet. Som’mon ma ra reb e 22 e guruy ko psalm ma bay 8 e line riy ni taab yol e be tabab riy. Re psalm ney e be weliy e motochiyel nge kenggin e motochiyel rok Got. U lan e re article ney nge bin migid, e yira weliy murung’agen e Psalm 119 ni rogon nib puluw ko Hebrew Bible ni kan thiliyeg nib fel’ rogon. Faanra ngada fal’eged i lemnag e n’en ni ke dag e pi tapigpig rok Jehovah kakrom nge ngiyal’ ney ma rayog ni nge gelnag e tamilangan’ rodad ko re tang ney ni kan thagthagnag ma ra gelnag i pining e magar ni bochan e Thin rok Got ni kan yoloy, ni fare Bible.

Ngam Fol ko Thin Rok Got Ma Ga Felfelan’

3. Ngam weliy fan ma ga dag rogon ko mang fan e dariy thibngin.

³ Bin riyul’ e felfelan’ e ma yan u rogon ni gad be fol ko motochiyel rok Got. (Psalm 119:1-8) Faanra ngada rin’ed ni aram rogon, ma ra tay Jehovah ni ‘dariy thibngidad.’(Psalm 119:1, NW) Gad ra par ni dariy thibngidad e gathi be yip’ fan ni kad flontgad, machane re n’ey e be dag ni gad be athamgil ni ngada rin’ed e tin nib m’agan’ Jehovah Got ngay. Noah e “be’ nib moon nib fel’ ni kemus ni ir e immoy ni kab fel’ u wan’ Got e ngiyal’ nem” me “par ni ba’ Got rok.” Noah ni chitamangin e pi chitamangiy nib yul’yul’ nib muun ngak e tabinaw rok e kar mageygad nib fas u nap’an ni ke yib e Ran ni Baga’ nge tharey e fayleng ya bochan ke fol ko tin ni ke yog Jehovah ni nge rin’. (Genesis 6:9; 1 Peter 3:20) Maku, gadra magey ni gad ba fas u nap’an ni yira gothey e re fayleng ney ni faanra ngada ‘folgad ko matochiyel rok Got’ nib fel’ rogon,’ ni aram e gad be rin’ e tin nib m’agan’ ngay.​—Psalms 119:4.

4. Felfelan’ ni fel’ rogon rodad e be tor nga daken e mang?

⁴ Faanra ngada ‘pininged e sorok ngak Jehovah u fithik’ i gum’irchadad nib yul’yul’ mu uda folgad ko motochiyel rok’ ma ri dabi pagdad. (Psalm 119:7, 8) De pag Jehovah Joshua ni ir e ta yog e thin rok Israel, ni i fol ko fonow ni ngan ‘bieg e babyor ko motochiyel ni rran nge nep’ ya nge yog ni fol ko urngin ni kan yoloy. Me fel’ rogon riy me yog ni nge rin’ ban’en u fithik’ e gonop. (Joshua 1:8) Nap’an ni ke chuchugur ni nge yim’, ma ka be pining Joshua e sorok ngak Got me puguran ngak piyu Israel ni gaar: “Ri gimed manang u polo’ i gum’irchamed ngu polo’ e yafas romed ni dariy bugithin u fithik’ fapi thin nib fel’ ni ke yog Jehovah Got ngomed ni ke aw ni de riyul’.” (Joshua 23:14) Bod Joshua nge en ni ke yoloy fare Psalm 119, rayog ni nge yib e felfelan’ ngodad nge fel’ rogon ni faanra ngada pininged e sorok ngak Jehovah ma gad pagan’dad ko thin rok.

Thin Rok Jehovah e Ma Taydad ni Gadad Ba Biech

5. (a) Mu weliy ko uw rogon ni nguun par ni gab biech ko tirok Got ban’en. (b) Mang ayuw ni bay ko en ni fel’ yangaren ni ke rin’ e denen nib ubchiya’?

⁵ Faan gad ra fol ko thin rok Got ma rayog ni ngad pared nib biech ko tirok Got ban’en. (Psalm 119:9-16) Ku rayog ni nge ayuwegdad e re n’ey ni yugu aram rogon ni gallabthir rodad e dar daged rogon e ngongol nib fel’. Yugu aram rogon ni chitamangin Hezekiah e ma liyor ko liyos, me Hezekiah e ‘biechnag’ kanawoen e yafas rok, ni sana bochan e ngongol ko girdi’ ni dar nanged Got ni ke af ngak. Uw rogon ni faanra reb e fel’ yangaren ni be pigpig ku Got e chiney e ke denen nib ubchiya’. Rib t’uf e kalngan’ nge meybil nge ayuw ko gallabthir rok nge piin ni piilal u lan e ulung ni Kristiano ni nge ayuweg ni bod Hezekiah ni nge ‘biechnag kanawoen e yafas rok me ayuweg ir.’​—Jas. 5:13-15.

6. Mini’ gali ppin nem ni ‘kar biechnagew kanawoen e yafas rorow ma yow be kol ayuw nib puluw ko thin rok Got’?

⁶ Yugu aram rogon ni Rahab nge Ruth e ur moyew ni ke n’uw nap’an u m’on ni yoloy fare Psalm ni 119, machane ra ‘biechnagew e kanawoen e yafas rorow.’ Rahab e ir be’ nu Kanaan kakrom ni ma pi’ ir nchuway’, machane n’en ni kan nang riy e michan’ rok ni ma liyor ku Jehovah. (Hebrews 11:30, 31) Ruth ni be’ nu Moab e ke pag e pi liyos rok, me pigpig ku Jehovah me fol ko Motochiyel rok ni pi’ ngak piyu Israel. (Ruth 1:14-17; 4:9-13) Gali ppin ney ni gathi yow e girdi’ nu Israel e ‘ur kol ayuwgow nib puluw ko thin rok Got ma kar tow’athgow kar mangew boch e ga’ rok Jesus Kristus.​—Matthew 1:1, 4-6.

7. Uw rogon ni dag Daniel nge fa dalip i pagel ni Jew e ngongol nib fel’ u rogon ni kar pared ni yad ba biech ko tirok Got?

⁷ “Ka nap’an ni kabran e girdi’, ma ba kireb e lem rok,” machane piin ni fel’ yangaren e rayog ni ngar leked kanawoen e yafas nib biech, ni ki mus nga lan e re fayleng ney nib kireb ni Satan e be gagiyegnag. (Genesis 8:21; 1 John 5:19) U nap’an ni kan tay Daniel nge fa dalip e pagel ni yad piyu Jew u Babylon ma ur ‘kol ayuwgad nib puluw ko thin rok Got.’ Ni bod ni, kar dabuyed ni ngar alitnaged yad ‘dar ked e ggan ko pilung nib fel’ lamen.’ (Daniel 1:6-10) Piyu Babylon e yad ma kay ufin e gamanman nib alit, nrogon ko Motochiyel ni kan pi’ ngak Moses e dabni kay. (Leviticus 11:1-31; 20:24-26) Nap’an ni yad ra li’ e gamanman ni ngar ked ma darur puoged e racha’ riy, ma nap’an ni yad ra kay ufin e gamanman ni dan puog e racha’ riy ma kar th’abed e motochiyel rok Got ko racha’. (Genesis 9:3, 4) Dabni gin ngay ni fa aningeg i pagel ni yad piyu Israel e kar dabuyed ni ngar ked e ggan rok e pilung nib fel’ lamen! Pi pagel nem ni bay madgun Got u wan’rad e kar pared nib biech ko tirok Got ban’en ere kar daged e ngongol nib fel’ ni ngan fol riy.

Thin Rok Got e Ba Ayuw Ko Ngan Yul’yul’

8. Mang lem nge tamilangan’ e ba t’uf rodad ni faanra ngada nanged fan e motochiyel rok Got ma nguuda folgad riy?

⁸ Ngan adag e thin rok Got e reb e n’en ni baga’ fan ni i ta’dad ni gad ba yul’yul’ ku Jehovah. (Psalm 119:17-24) Faanra gadad bod faen ma yoloy e tang ni kan thagthagnag, ma gad ra yim’ ni bochan ni ngad nanged fan e “pi n’en ni yira ngat ngay” ko motochiyel rok Got. Gad ra ‘lemnag ni gubin ngiyal’ e tin ni ke turguy Jehovah ni ngan rin’ ma ‘gad ra adag e pi puguran rok’. (Psalm 119:18, 20, 24) Gur faanra dawori n’uw nap’an ni kad ognaged gadad ngak Jehovah, ke ‘yib lamen e milik ngodad, ni milik nib machalbog ni fan nga lanin’dad’? (1 Peter 2:1, 2) Ba t’uf ni nge tamilang u wan’dad e pi kenggin e machib u Bible ma aram rayog ni ngada nanged fan e motochiyel rok Got ma u da folgad riy.

9. Mang e ngada rin’ed u nap’an ni motochiyel rok Got e ba togopuluw ko tin ni be tay e girdi’ chilen?

⁹ Sana gad ra adag e pi puguran rok Got, machane uw rogon nfaanra ra non e “pi fak e pilung” nib togopuluw ngodad? (Psalm 119:23, 24) Ngiyal’ ney, girdi’ ko liw nib tolang e baga’ ni ma towasariydad ni ngada ted nib m’on e motochiyel ko girdi’ ko motochiyel rok Got. Faanra tin ni be tay chilen e girdi’ e ba togopuluw ko tin nib m’agan’ Got ngay, ma mang e gad ra rin’? Felfelan’ rodad ko thin rok Got e ra ayuwegdad ni ngada pared nib yul’yul’ ku Jehovah. Nge bod rogon e pi apostal rok Kristus ni kan togopuluw ngorad, nga dogned ni: “Thingar gu folgad rok got ko bin ni nggu folgad ko girdi’”​—Acts 5:29.

10, 11. Mu weliy rogon ni rayog ni ngada pared ni gad ba yul’yul’ ku Jehovah u nap’an ni ra yib e skeng ngodad nib gel.

¹⁰ Rayog ni ngada pared nib yul’yul’ ngak Jehovah ni mus ko ngiyal’ ni keb e skeng ngodad ni rib mo’maw’. (Psalms 119:25-32) Faanra nge yog ni ngada pared nib yul’yul’ ku Got, ma thingarda adaged ni ngan fil ban’en ngodad ma u da meybilgad ngak nib gel ni ngad nanged e thin ni be yog ni ngan rin’. Maku thingarda mel’eged “fare kanawoen e yul’yul’.”​—Psalms 119:26, 30, NW.

¹¹ Hezekiah, ni sana ir e yoloy fare Psalm 119, e ke mel’eg “fare kanawoen e yul’yul’.” Me rin’ ni aram rogon ni yugu aram rogon ni boor e girdi’ ni yad ba liyeg ni yad ma liyor ko got ni googsur ma sana girdien tafen e puf oloboch e ur moningnaged. Baga’ ni, ‘de yog rok ni nge mol nib fel’ rogon ya ke kireban’ nib gel’ nbochan e re magawon nem. (Psalms 119:28) Machane ke pagan’ Hezekiah ngak Got, ma ba pilung nib fel’, ma ma rin’ e “tin nib mat’aw u p’eowchen Jehovah.” (2 Kings 18:1-5) Maku rayog ni ngada k’adedan’dad ko skeng u fithik’ e yul’yul’ ni gadad be pagan’ ngak Got.​—James 1:5-8.

Thin Rok Jehovah e Be Gelnagey

12. Uw rogon ma rayog ni ngada folgad ko thin ni bay ko Psalm 119:36, 37?

¹² Ngan fol u rogon ni be pow’iyey e thin rok Got e ra gelnag lanin’dad ni ireray e n’en nib t’uf rodad ma rayog ni ngada gelgad ko pi skeng ni ma yib ngodad. (Psalms 119:33-40) Gad ma gay u fithik’ e sobut’an’ e thin ni be yog Jehovah ni ngan rin’ ma rayog ni ngauda folgad ko motochiyel rok “ni polo’ i gum’irchadad.” (Psalms 119:33, 34) Bod rogon fare psalmist, ngada ninged ku Got ni lungudad: “Mu ayuwegeg ni nggu adag e puguran rom, ma gathi salpiy,” ni aram, e salpiy ni ke yog ko kanawo’ ni de mat’aw. (Psalms 119:36) Bod Paul ni apostal, ‘gad baadag ni ngauda rin’ed e tin nib mat’aw ni gubin ngiyal’’ (Hebrews 13:18) Faanra baadag e masta rodad ni ngada rin’ed ban’en u fithik’ e sasalap, ma dabda rusgad ni ngad folgad ko thin ni be yog Got ni ngan rin’ ma ma taw’athnagdad Jehovah riy. Tin riyul’ riy, e ma ayuwegdad ni ngauda gagiyegnaged e lem nib kireb ni ma yib ngodad. Ere, ngada meybilgad ni gaar: “Mu ayuwegeg ni nggu siyeg ma dab gu guy ban’en ni dariy fan.” (Psalms 119:37) Dab da adaged ni ngada guyed ban’en ni dariy fan ni ma fanenikay Got. (Psalms 97:10) Re n’ey, e ra k’aringdad ni ngauda siyeged e kachido ni ma dag e ngongol ni darngal ara pi ngongol ko kan nib kireb, mab muun ngay yugu boch ban’en.​—1 Korinth 6:9, 10; Revelation 21:8.

13. Uw rogon ma pi gachalpen Jesus ni yibe gafgownagrad e ke yib gelngirad ni ngar machibgad ni dabra rusgad?

¹³ Tamilangan’ ko thin rok Got nib puluw e ra ayuwegdad ni ngada machibgad ni dab u da rusgad. (Psalms 119:41-48) Ma ba t’uf rodad e lem nib mudugil ma rayog ni ngada ‘pied e fulweg ngak e piin ni be yog e thin nib kireb ngodad.’ (Psalms 119:42) Yu ngiyal’, ma rayog ni ngada ngongolgad ni bodrogon e n’en ni rin’ e pi gachalpen Jesus ni un gafgownagrad, mi yad meybil ni gaar: “Somol, mu changar ko tin ni ka rogned ni yad ra rin’ ngomad, ma ga ayuwegmad e pi tapigpig rom nggu weliyed e thin rom ndab kug rusgad.” Mang angin ni yib? “Ma yad gubin ni yib i suguyrad fare Kan ni Thothup mi yad tabab i weliy e thin rok Got ngak e girdi’ ndaki yib e marus ngorad.” Re Somol ney ni Th’abi Tolang e ma pi’ gelngidad ni ngada machibnaged e thin rok ni dabda rusgad.​—Acts 4: 24-31.

14. Mang e ma ayuwegdad ni ngad machibgad ni dabda rusgad, ni bod rogon Paul?

¹⁴ Ra yib gelngidad ma rayog rodad ni ngada machibgad ni dabda rusgad ku be’ ni be yog e thin nib kireb ngodad ni faanra bat’uf rodad e “thin riyul’” ma ‘gad ma fol ko motochiyel rok got ni gubin ngiyal’.’ (Psalms 119:43, 44) Ngan gel i fil e thin rok Got e ra fal’eg rogodad ni ngada ‘machibnaged e pi puguran rok Got u p’eowchen e pilung.’ (Psalm 119:46) Maku meybil nge kan ni thothup rok Jehovah e ra ayuwegdad ma rayog ni nga dogned e thin nrogon nib puluw. (Matthew 10:16-20; Kolose 4:6) Paul e de rus ni nge weliy murung’agen e thin ni yog Got ni fan ko pi pilung ko bin som’mon e chibog. Bod rogon, ni machib ngak Felix ni Governor nu Roma, me “motoyil ngak Paul ni be weliy murung’agen rogon ni nge mich Kristus u wun’uy.” (Acts 24:24, 25) Maki machibnag Paul Festus ni Governor nge Agrippa ni Pilung. (Acts 25:22–26:32) U daken e ayuw rok Jehovah, maku rayog ni ngad machibgad ni dabda rusgad, ma dabda tamra’gad ko re “Thin ney nib Fel’.”​—Roma 1:16.

Thin Rok Got e Ma Fal’eg Lanin’dad

15. Uw rogon ni nge fal’eg e Thin rok Got lanin’dad u nap’an ni be moningnagdad boch e girdi’?

¹⁵ Thin rok Got e ba mudugil ni ma fal’eg lanin’uy. (Psalms 119:49-56) Bay yu ngiyal’ ni rib t’uf rodad ni ngan fal’eg lanin’dad. Yugu aram rogon ni gad ma machib ni darud rusgad ni gadad e Pi Mich Rok Jehovah, ma “piin ni ma rin’ ban’en ni dan pi’ mat’awrad” ni aram e piin ni ma rin’ ban’en ngak got ni dan pi’ matawrad​—e yu ngiyal’ ma yad ma ‘moningnagdad nib pag rogon.’ (Psalms 119:51, NW) Machane, nap’an e meybil, ma rayog ni ngeb ngan’dad e thin nib fel’ ni be yog e Thin Rok Got, ere ‘rayog ni nge fel’ lanin’dad riy.’ (Psalms 119:52, NW) Nap’an e meybil rodad nib gel, e rayog ni ngeb ngan’dad reb e motochiyel u Bible ara kenggin e motochiyel ni be fal’eg lanin’dad ma be pi’ gelngidad nib t’uf rodad u nap’an ni ke kireban’dad.

16. Mang e n’en ni de rin’ e pi tapigpig rok Got nyugu demtrug rogon ni kan gafgownagrad?

¹⁶ Piin ni ur rin’ed ban’en ni dan pi’ mat’awrad mu ur moningnaged faen ta tang ara psalmist e piyu Israel ni yad bang u ba nam ni kan ognag ku Got. Reb e ngongol ni yima tamra’ ngay! Machane, dabda boded yad, ya ngada dugliyed u lanin’dad ni dab da paloggad ko motochiyel rok Got. (Psalms 119:51) U nap’an e togopuluw ni ma tay yu Chiyamen nge boch e magawon ni aram rogon u lan boch e duw, ma bokum biyu’ e tapigpig rok Got ni dar paloggad ko motochiyel nge kenggin e motochiyel ni bay ko Thin Rok Got. (John 15:18-21) Ma gathi ba mo’maw’ ni ngan fol rok Jehovah, ya motochiyel rok e bod e tang ni be fal’eg lanin’dad.​—Psalms 119:54; 1 John 5:3.

Mu Pining e Magar ni Bochan e Thin Rok Jehovah

17. Tayfan ko thin rok Got e ra k’aringdad ni ngada rin’ed e mang?

¹⁷ Gad be dag ni gad be pining e magar ni bochan e thin rok Got nfan ni gad be fol riy. (Psalms 119:57-64) Fare psalmist e ke ‘micheg ni nge fol ko thin rok Jehovah,’ ki mus ko ‘lukngun e nep’ ma ma od ni nge pining e magar ngak Got ya bochan nib mat’aw rogon ni ke dugliy ban’en.’ Faan gad ra od ni nep’, ma ireray e tayim nib fel’ ni ngada meybilgad ni gad be pining e magar ngak Got! (Psalms 119:57, 62) Tayfan rodad ko thin rok Got e ra k’aringdad ni ngada gayed e thin rok ma ngada manged ngak boch e girdi’ ni ‘bay madgun Jehovah u wan’rad​—ni aram e girdi’ ni ri yad ma tayfan Got. (Psalms 119:63, 64) Gur ka bay e girdi’ nu fayleng ni kab fel’ ni ngan chag ngorad ko pi cha’ ney?

18. Uw rogon ni ma fulweg Jehovah taban e meybil rodad u nap’an ‘fare tal ko girdi’ nib kireb ni kan m’ag ngodad’?

¹⁸ Nap’an ni gad ra meybil ni kari yib u gum’ircharad ma gad be ning ngak Jehovah u fithik’ e sobut’an’ ni nge fil ban’en ngodad, e gad be ‘munguynag gum’irchaen’ ni gad be lemnag ni ngad fel’gad u wan’. Rib t’uf ni ngada meybilgad ko ngiyal’ ni ‘fare tal ko girdi’ nib kireb e kan m’ag ngodad.’ (Psalms 119:58, 61) Rayog rok Jehovah ni nge th’ab fare tal ni aram e n’en ni be talegdad ko maruwel rodad ma rayog ni nge puf rogodad biyay i machibnag fare Gil’ilungun min pingeg e girdi’ ngar manged gachalpen. (Matthew 24:14; 28:19, 20) Kan dag e re n’ey ni boor yay u lan e pi binaw ni yibe taleg e maruwel riy.

Ngan Pagan’uy ko Thin Rok Got

19, 20. Uw rogon ma bfel’ ni ngan gafgow?

¹⁹ Pagan’ ku Got nge thin rok e ra ayuwegdad ni ngada k’adedan’dad ko gafgow ma nguuda rin’ed e tin nib m’agan’ ngay. (Psalms 119:65-72) Yugu aram rogon ni piin ni ma rin’ ban’en ni dan pi’ mat’awrad e ka ‘rogned e thin nde riyul’,’ ma fare psalmist e ke yon’ e tang ni gaar: “Ffel’ ngog ni kan gafgownageg.” (Psalms 119:66, 69, 71) Gur uw rogon ni nge fel’ ngak reb e tapigpig rok Jehovah ni keb e gafgow ngak?

²⁰ Nap’an ni ra yib e gafgow ngodad, ma dariy e maruwar riy ni gad ra meybil ku Jehovah nib gel, ma re n’em e ra chuchugurnagdad ngak. Rayog ni ngada pied boch e tayim ni ngada filed e Thin rok Got ma ngarda athamgilgad ni ngada folgad riy. Ma ra yib e yafas nib felfelan’ ni bochan. Machane uw rogon ni faanra kada daged e ngongol nib kireb, ni bod ni faanra ke chalbadad me tolang lanin’dad? Ngan meybil nib gel mu daken e ayuw ko Thin rok Got nge kan ni thothup, e rayog ni ngada gelgad ko re oloboch nem ma rayog ni nga ‘don’ed e bin nib beech i gadad nga dakendad’ ni polo’.’ (Kolose 3:9-14) Maku, ra gel e michan’ rodad u nap’an ni gad ra k’adan’ ko gafgow. (1 Peter 1:6, 7) Ke fel’ rogon Paul ko pi gafgow ni tay ya bochan ke ayuweg ni ngari pagan’ ngak Jehovah. (2 Korinth 1:8-10) Gur gad ma pag e gafgow ni ngeb felngin ngodad?

Nguun Pagan’uy Ngak Jehovah

21. Mang e ra buch u nap’an ni nge gagiyegnag Got ni nge tamra’ e piin ni ma rin’ ban’en ni dan pi’ mat’awrad?

²¹ Thin rok Got e ke pi’ e def ngodad ni ngada pagedan’dad ngak Jehovah. (Psalms 119:73-80) Faanra riyul’ ni gad be pagan’ ngak e en Ke Sunmiydad, ma dariy tapgin ni ngada tamra’gad. Machane, bochan e n’en ni ma rin’ boch e girdi’, ma ba t’uf ni ngan fal’eg lanin’dad ma gad baadag ni ngada meybilgad ni gaar: “Nge tamra’ e piin ni ma rin’ ban’en ni dan pi’ mat’awon.” (Psalms 119:76-78) Nap’an ni ra gagiyegnag Jehovah ni nge tamra’ e pi cha’ nem, ma ra gagiyel e kanawo’ rorad nib kireb min thothupnag fithingan nib thothup. Rayog ni nge mudugil lanin’dad ni piin tatogopuluw ko girdi’ rok Got e dariy ban’en ni ra yog ngorad. Ni bod ni, de yog ngorad​—ma dabiyog rorad—​ni ngara thanged e Pi Mich rok Jehovah, ni kar pagedan’rad ngak Got ni polo’ gum’ircharad.​—Proverbs 3:5, 6.

22. Uw rogon ma fare psalmist e ke “bod e melor ni kan ngongliy ko keru’ e gamanman ni bay u fithik’ e ath”?

²² Thin rok Got e ra gelnag e pagan’ rodad ngak Got u nap’an ni yibe gafgownagdad. (Psalms 119:81-88) Bochan piin ni ma rin’ ban’en ndan pi’ mat’awrad e kar gafgownaged, ma ke lemnag fare psalmist ni “ir bod e melor ni kan ngongliy ko keru’ e gamanman u fithik’ e ath.” (Psalms 119:83, 86) U nap’an e Bible, ma melor ni kan ngongliy ko keru’ e gamanman e kan fanay ni ngan ta’ e ran ngay, nge wain nge tin nib ran ban’en. Nap’an ni dab ni fanay, ma ra giringiy ir nfaan yira tining u tooben e nifiy u lan ba singgil ni dariy tafen e ath riy. Gur magawon nib gel nge togopuluw e ke k’aring ni ngam thamiy ni “kam bod e melor ni kan ngongliy ko keru’ e gamanman u fithik’ e ath”? Faanra aram rogon, ma ga pagan’um ngak Jehovah, ma ngam meybil ni gaar: “Rogon e t’ufeg nib yul’ul’ ni ga ma dag mu ayuwegeg ni nggu magey ni gub fas, ma rayog ni nggu fol ko puguran ni ma yib u lugunam.”​—Psalms 119:88.

23. Mang e kada weliyed u nap’an ni kad sulod nga daken e Psalm 119:1-88, ma mang e ngada fithed gadad u nap’an ni gad be sap ko tayim ni ngan fil fare Psalm 119:89-176?

²³ N’en ni kad weliyed ko gin som’mon ko Psalm 119 e be dag ni Jehovah e ma dag e t’ufeg rok nib yul’yul’ ngak e pi tapigpig rok ya bochan kar pagedan’rad ko thin rok nge motochiyel rok. (Psalms 119:16, 47, 64, 70, 77, 88) Ke felfelan’ ya piin nib yul’yul’ ngak e yad be kol ayuw nrogon e thin rok. (Psalms 119: 9, 17, 41, 42) Chiney ni ga be sonnag e tayim ni ngan fil boch e thin ni ka ba’ ko re psalm ney nib fel’, ma ba fel’ ni ngam fithem ni ngam gaar, ‘Riyul’ ni gu be pag e thin rok Jehovah ni nge pi’ e tamilang nga kanawoeg?’

[Footnote]

Uw Rogon ni Ngam Pi’ e Fulweg?

• Felfelan’ nib riyul’ e be tor nga daken e mang?

• Uw rogon ni ma ayuwegdad e thin rok Jehovah ni nguuda pared nib biech ko tirok Got ban’en?

• Mang boch e kanawo’ ni thin rok Got e nge pi’ e athamagil nga lanin’dad min fal’eg lanin’dad riy?

• Mang fan ni thingarda pagedan’dad ngak Jehovah nge thin rok?

[Pictures on page 22]

Ruth, Rahab, nge piin ni Hebrew ni fel’ yangaren ni kan tayrad nga Babylon e ‘ur kol ayuwgad nrogon e thin rok Got’

[Picture on page 23]

I weliy Paul murung’agen e ‘puguran rok Got u p’eowchen e pi pilung’ ni de rus