Mu Pigpig Ngak Got u Fithik’ e Yul’yul’, ni Yugu Demtrug e “Gafgow” ni Ga Ra Mada’nag

1. Mang fan ni dabi gin e pi tapigpig rok Got ko gafgow ni yira tay ngorad?

GUR, ga ra gin ngay ni thingar mu mada’nag boor e “gafgow” u m’on ni nge yag fare tow’ath ngom ni yafos ni manemus? Danga’. Yugu demtrug ko kafin mu un ko tin riyul’ ara ke n’uw nap’an ni kam pigpig ngak Jehovah, machane ga manang ni ga ra mada’nag e magawon u lan e re fayleng rok Satan ney.​—Rev. 12:12.

2. (a) Mang reb e magawon ni yugu ba thil ni ma mada’nag e piin Kristiano? (Mu guy e sasing ni bay u tabolngin e re article ney.) (b) Mini’ e be k’aring e pi magawon ni gad be mada’nag, ma uw rogon ni kad nanged e re n’ey?

² Bochan nde flont e girdi’ ma yad ma mada’nag e magawon. Machane piin Kristiano e ku bay reb e magawon ni yad ma mada’nag. (1 Kor. 10:13) Mang e re magawon nem? Bay e togopuluw ni ma yib ngorad ni bochan ni yad be fol ko pi motochiyel rok Got. I yog Jesus ngak pi gachalpen ni gaar: “Dariy reb e sib ni ba ga’ ngak e masta rok. Faanra kar gafgowniged gag, ma bay kur gafgowniged gimed.” (John 15:20) Mini’ e be k’aring e pi togopuluw ney? Ba mudugil ni Satan, ir e en ni be weliy e Bible ni bod ba “layon ni be tolul” ni be “gayiy” e girdi’ rok Got ni nge longuy. (1 Pet. 5:8) Boor e kanawo’ ni ma fanay Satan ya nge yag ni nge kirebnag e yul’yul’ ko piin ni yad be folwok rok Jesus. Gad ra guy e n’en ni buch rok apostal Paul.

GAFGOW NI SUM U LAN FARE MACH NU LYSTRA

3-5. (a) Mang gafgow e mada’nag Paul u nap’an ni immoy u Lystra? (b) Uw rogon nrayog ni nge pi’ fare thin ni yog Paul e athamgil nga lanin’dad?

³ Boor yay ni kan gafgownag Paul ni bochan e michan’ rok. (2 Kor. 11:23-27) Bay reb e ban’en ni buch rok u nap’an ni immoy u Lystra. Tomuren ni golnag Paul nge Barnabas be’ nib moon nib mugutgut ni ka nap’an nni gargeleg, ma aram me yog fapi girdi’ ni yow e got. Ma aram mi yow n’igin ni nge dabi tay fapi girdi’ farow! Ma de n’uw nap’an me taw boch e pi tayugang’ nu Jew, mi yad weliy boch ban’en nde riyul’ u murung’agen Paul nge Barnabas ngak fapi girdi’. De n’uw nap’an me thil e lem rorad! Ma aram mi yad malangnag Paul, mar paged ni kar lemnaged ni ke yim’.​—Acts 14:8-19.

⁴ U tomuren ni sul Paul nge Barnabas u Derbe mi “yow sul nga Lystra nga ranow u rom nga Ikonium, mi yow yan u Ikonium nge Antiok ni bay u lan yu Pisidia. Mi yow ayuweg e piin ni ke mich Jesus u wan’rad ngar piew e athamgil nga lanin’rad ni nguur pired ni yad ba yul’yul’ ko en ni ir e mich u wan’rad. Mi yow fil ngorad ni lungrow: ‘Thingar darod u fithik’ boor e gafgow ma gadad yan ko gin suwon Got.’” (Acts 14:21, 22) Som’on ma de lemnag fapi girdi’ nde puluw e re thin ney. Ya faan yad ra lemnag ni nga ranod u fithik’ boor e “gafgow” ma be mulan’rad, gathi be yib e athamgil nga lanin’rad. Ere, uw rogon ni yag rok Paul nge Barnabas ni ngar “ayuwegew e piin ni ke mmich Jesus u wun’rad” ko fapi thin ni kar weliyew ngorad u murung’agen yugu boch e magawon ni ku yad ra mada’nag?

⁵ Rayog ni ngad pirieged e fulweg ko re deer ney ni faan gad ra fal’eg i lemnag e thin ni yog Paul. Gathi kemus ni gaar: “Thingar danod u fithik’ boor e gafgow.” Ya yog ni gaar: “Thingar danod u fithik’ boor e gafgow ma gadad yan ko gin nsuwon Got.” Ere, ke pi’ Paul e athamgil nga laniyan’ pi gachalpen ni faan yad ra par ni yad ba yul’yul’ ma ra yib angin ngorad. Re tow’ath nem e gathi ban’en nde riyul’. I yog Jesus ni gaar: “En nra athamgil nge par nge mada’ ko tomur e ra fos.”​—Matt. 10:22.

6. Mang tow’ath e bay ni fan ngak e piin ni yad ra athamgil nge mada’ ko tomur?

⁶ Faan gad ra athamgil nge mada’ ko tomur, ma yira tow’athnagdad. Tow’ath ni fan ngak e pi Kristiano ni kan dugliyrad e aram e ngar uned ngak Jesus ko gagiyeg u tharmiy ma dab kur m’ad. Athap ni bay ni fan ko “yugu boch e saf” e ngar pared u fayleng ni dariy n’umngin nap’an ni “tin nib mat’aw e ngongol e bay i par riy.” (John 10:16; 2 Pet. 3:13) Machane, be tamilangnag Paul ni gad ra mada’nag boor mit e gafgow e ngiyal’ ney. Gad ra weliy l’agruw mit e gafgow nrayog ni ngad mada’naged.

TOGOPULUW

7. Miti mang togopuluw e rayog ni mada’nag e piin Kristiano?

⁷ I yog Jesus ni gaar: “Bay ra koled gimed ngar feked gimed nga lan tafen e pufthin. Ma bay nli’med u tafen e muulung i yan; ma bay ni piningmed nga p’eowchen e piin ni yad be yog e thin nge pi pilung ko nam.” (Mark 13:9) Rogon ni be tamilangnag e re thin nem e pi tayugang’ ko teliw ara am e rayog ni ngar k’aringed boch e girdi’ ni ngar togopuluwgad ara ngar gafgownaged boch e Kristiano. (Acts 5:27, 28) Mu lemnag e n’en ni rin’ Paul. Gur, i rus ni bochan ni manang ni yira gafgownag? Danga’.​—Mu beeg e Acts 20:22, 23.

8, 9. Uw rogon ni ke dag Paul ni ke dugliy ni nge athamgil, ma uw rogon ni ku be athamgil e pi walag e ngiyal’ ney?

⁸ De rus Paul ko togopuluw ni ma tay Satan, ya yog ni gaar: “Kug finey ni pogofan rog e dariy rogon ngog, ni fan e nge yog ni gu mu’nag e maruwel ni kan pag fan ngog mu gu mu’nag e maruwel ni Somol Jesus e ke pi’ ngog ni nggu rin’, ni aram e nggu weliy ngan nang fare Thin Nib Fel’ ni yib rok Got ni murung’agen feni t’uf e girdi’ rok Got.” (Acts 20:24) Ba tamilang nde rus Paul ko togopuluw ni yira tay ngak. Ya ke mudugil laniyan’ nra athamgil ni yugu demtrug e gafgow nra yib ngak. N’en th’abi ga’ fan u wan’ e aram e nge “weliy ngan nang” fare thin nib fel’ ni yugu aram rogon nra mada’nag e togopuluw.

⁹ Ngiyal’ ney e boor e pi walag ni yad ma athamgil u fithik’ e pi magawon nge togopuluw ni ma yib ngorad. Ni bod u reb e nam e bay e Pi Mich riy ni ke chugur ni nge gaman 20 e duw ni kan kalbusnagrad ni bochan ni dubrad ni ngar uned nga boch ban’en ko am nib togopuluw ko motochiyel rok Got. Ma pi walag ney e dan fekrad nga kort. Ma nap’an ni ur med u kalbus ma dan pag e girdi’ rorad ni ngar guyed yad, maku bay boch i yad ni un gafgownagrad.

10. Mang fan ndab da rusgad ko pi gafgow nrayog ni ngad mada’naged nib tomgin?

¹⁰ Pi walagdad u boch e nam e yad ma athamgil u fithik’ e pi gafgow ni ma yib ngorad nib tomgin. Faanra ke buch rom ni aram rogon, ma dab mu rus. Bfel’ ni ngam lemnag e n’en ni buch rok Josef. Nni pi’ ni chuway’ nga Egypt ni nge mang sib, machane Jehovah e ke “ayuweg nde buch ban’en rok.” (Acts 7:9, 10) Ku rayog ni nge ayuwegem Jehovah. Dab mu pagtalin ni Jehovah e “manang rogon ni nge ayuweg e piin ni yad ma fol rok ko gafgow ni ma yib ngorad.” (2 Pet. 2:9) Ga ra ulul nge pagan’um ngak Jehovah ni ga manang nrayog rok ni nge chuwegem ko re m’ag nib kireb ney, me tow’athnagem ko yafos ndariy n’umngin nap’an u tan Gil’ilungun? Bay fan ni ngam athamgil, me yag nim man u fithik’ e pi gafgow ni dab mu rus.​—1 Pet. 5:8, 9.

BOCH BAN’EN NIB MO’MAW’ NI NGAN NANG

11. Uw rogon nib thil e pi togopuluw ni ma yib nib tomgin ko pi gafgow ni ma yib u reb e kanawo’ nib mo’maw’ ni ngad nanged?

¹¹ Kub mit e magawon nrayog ni ngad mada’naged e ma yib u reb e kanawo’ nib mo’maw’ ni ngad nanged. Uw rogon nib thil e re n’ey ko togopuluw ni ma yib ngodad nib tomgin? Re n’ey e rayog ni ngad taarebrogonnaged nga reb e yoko’ nnap’an nra aw ma rayog ni nge kirebnag e naun rom ni ka chingiyal’ nem. Ma pi gafgow ni ma yib ngodad u reb e kanawo’ nib mo’maw’ ni ngad nanged e rayog ni ngan taarebrogonnag ko ngal nra longuy e naun rom ma ra munmun me puth. Ra ke mada’nag be’ e biney e magawon ma sana de nang ni bay e riya’ riy nge mada’ ko ngiyal’ ni ke sagaal.

12. (a) Mang reb e ban’en ni ma fanay Satan nib mo’maw’ ni ngad nanged, ma mang fan nrayog ni nge magawonnigey? (b) Mang e rin’ Paul u nap’an ni ke mulan’?

¹² Baadag Satan ni nge kirebnag e tha’ u thilmew Jehovah u daken e pi togopuluw ni ma yib ngodad nib tomgin ara boch ban’en nib mo’maw’ ni ngad nanged. Reb e kanawo’ ni ma rin’ Satan e re n’ey riy e aram e ma k’aringdad ni nge mulan’dad. Apostal Paul e yog ni immoy yu ngiyal’ ni ma mulan’. (Mu beeg e Roma 7:21-24.) Ere gur, mang fan ni yog Paul ni ir be’ nrib “gel” ko tirok Got ban’en, maku ir reb i chonggin fare ulung ni ma pow’iyey ko bin som’on e chibog ni kari “gafgow”? I yog ni aram rogon e tafinay rok ni bochan ni ir be’ nde flont. Gubin ngiyal’ ni baadag ni nge rin’ e tin nib mat’aw, machane yugu reb e ban’en e be maruwel u fithik’ i dow. Faanra yu ngiyal’ e ma mulan’um, ma sana bfel’ ni ngam lemnag ni ku bay e magawon ni i mada’nag apostal Paul ni taareb rogon ko magawon rom.

13, 14. (a) Mang boch ban’en ni ma k’aring e girdi’ rok Got ni nge mulan’rad? (b) Mini’ e baadag ni nge guy ni ke war e michan’ rodad, ma mang fan?

¹³ Yu ngiyal’ ma boor e pi walag ni ma mulan’rad, maku ma magafan’rad, maku yad ma lemnag ni dariy farad. Bod ni yog Deborah nreb e walag ni ma machib u polo’ e tayim rok ni gaar: “Ra bay ban’en nde puluw ni kug rin’, ma gubin ngiyal’ ni gu ma lemnag, ma ri be kireb e tafinay rog. Nap’an ni gu ra lemnag urngin ban’en ni kug rin’ nde puluw, ma gu ma lemnag ndakuriy be’ nga bayang ni ku rayog ni nge t’ufegeg ni ki mus ngak Jehovah.”

¹⁴ Mang e ma k’aring boch e pi tapigpig rok Jehovah ni yad ba pasig ni nge mulan’rad ni bod Deborah? Dabisiy ni boor i fan ni ma mulan’rad. Sana bay boch i yad ni ma lemnag ni dariy ban’en nib fel’ ngay, maku dariy ban’en nib fel’ ko yafos rorad. (Prov. 15:15) Maku boch i yad e ma par nib kireb e lem rok ni bochan ba mit e m’ar. Yugu demtrug ko mang, machane dab da paged talin ko mini’ e en ni baadag ni ngad pared nib kireb e tafinay rodad. Mini’ e baadag ni nge mulan’dad ya nge dabki yag ni ngad ululgad ko pigpig ngak Jehovah? Maku mini’ e baadag ni ngam lemnag ni dariy fam? (Rev. 20:10) Ba mudugil ni Satan. Bin riyul’ riy e demtrug ko be fanay Satan e togopuluw ni nge k’aringdad ni nge mulan’dad ara be fanay yugu reb e kanawo’ nib mo’maw’ ni ngad nanged, machane n’en ni be nameg e nge magafan’dad, ya nge dabkud pasiggad ko machib, ma gad tal ko pigpig ngak Jehovah. Dariy e maruwar riy ni girdi’ rok Got e yad be cham ni fan ko tirok Got ban’en!

15. Uw rogon ni ngad daged ni gad be par ni gad ba mudugil ni dabi mulan’dad?

¹⁵ Mu dugliy ni dab mu tal ko pigpig ngak Jehovah. Mu yiluy owchem ko tow’ath ni bay nga m’on. I yol Paul ngak fare ulung i Kristiano u Korinth ni gaar: “Ereray fan nri der mulan’dad. Yugu ra be meewar dowdad i yan, ma lanin’dad e yibe beechnag u reb e rran ngu reb. Re gafgow ney ni gadad be tay nib gafgow nib achig ma dabi n’uw nap’an me m’ay e bayi fek i yib ngodad ba flaab ni ba ga’ ndabi m’ay biid, nri kab gel feni ga’ ko re gafgow ney.”​—2 Kor. 4:16, 17.

NGAN FAL’EG ROGOY E NGIYAL’ NEY NI FAN KO GAFGOW

16. Mang nib ga’ fan ni ngan fal’eg rogoy e ngiyal’ ney ni fan ko fare gafgow nib ga’?

¹⁶ Gad ma guy ni boor e kanawo’ ni ma lemnag Satan ni nge ‘bannagdad’ riy. (Efe. 6:11) Gad gubin nib t’uf rodad ni ngad folgad ko fare fonow ni bay ko 1 Peter 5:9 ni be gaar: “Um pired nib mudugil e michan’ romed.” Ra ngad rin’ed e re n’ey, ma ngad skulnaged e lem rodad e ngiyal’ ney, ya nge yag ni ngad rin’ed e tin nib mat’aw. Mu lemnag: Pi salthaw e ba ga’ ni yad ma fal’eg rogorad u m’on ni nga ranod ko mahl. Rayog ni ngan taareb rogonnag e re n’ey ko girdi’ rok Jehovah. Dawor da nanged ko uw rogon e togopuluw ni gad ra mada’nag boch nga m’on. Ere, ba puluw ni ngad fal’eg rogodad e ngiyal’ ney ni dawori taw nga nap’an ni ngan gafgownagdad. I yol Paul ngak piyu Korinth ni gaar: “Mu changargad ngomed ko gimed be par ni gimed be ngongol u fithik’ e michan’ romed ngak Kristus fa danga’.”​—2 Kor. 13:5.

17-19. (a) Uw rogon ni ngad fal’eged i yaliyed gadad? (b) Uw rogon nrayog ko piin bitir ni ngar weliyed e n’en nib michan’rad ngay u skul?

¹⁷ Reb e kanawo’ u rogon nrayog ni ngad folgad ko fare fonow ni yog Paul e ngad fal’eged i yaliyed gadad. Mu fithem u boch e deer ni bod e: ‘Gu ma athamgil ni nggu ulul ko meybil, fa? Nap’an nra towasariyeg e piin taab yangar rog, ma gu ma fol rorad ko bin ni nggu fol rok Got, fa? Gu ma un ko pi muulung ko Kristiano ni gubin ngiyal’? Gu ma weliy e n’en nib michan’ug ngay ni dab gu rus, fa? Gu ma n’ag fan e oloboch rok e pi walag u lan e ulung ni bod ni yad ma n’ag fan e oloboch rog? Gu ma fol rok e piin piilal u lan e ulung, ma kug ma fol ko ulung rok Got u ga’ngin yang e fayleng, fa?’

¹⁸ L’agruw ko fapi deer e be weliy murung’agen rogon ni nge dab da rusgad ni ngad weliyed e michan’ rodad nge rogon ni ngad pared ni gad ba mudugil ni faanra towasariydad e piin taab yangar rodad. Boor e piin ni ku yad ma un nga skul ni thingar ra pared ni yad ba mudugil ni faanra towasariyrad e piin taab yangar rorad. Kar filed rogon ni nge dab ur tamra’gad ko michan’ rorad, ya yad ma machib ni dab ra rusgad. Bay boch e kanawo’ u rogon ni ngan rin’ e re n’ey ni bay ko magazine rodad. Fare Awake! ko July 2009 e be weliy rogon ni faanra bay be’ ni gimew nga skul ni fithem ko: “Mang fan nde mich u wan’um fare machib ni girdi’ e ke sum ko gamanman?” Ma rayog ni ngam fulweg ngak nim gaar: “Mang fan ni thingari mich u wan’ug fare machib ni girdi’ e ke sum ko gamanman? Ya mus ko piin llowan’ ma de taareb lanin’rad u murung’agen e re n’ey, ma susun ni yad e yad manang!” Gimed e piin gallabthir mu skulnaged e bitir romed, ya nge yag ni ngar fal’eged rogorad ni fan ko pi towasar ni yad ra mada’nag u skul.

¹⁹ Riyul’ ni gathi gubin ngiyal’ nib mom ni ngad weliyed e n’en nib michan’dad ngay ara ngad rin’ed boch ban’en ni ke yog Jehovah ni ngad rin’ed. U tomuren ni kad maruwelgad u polo’ reb e rran, ma sana ba t’uf ni ngad athamgilgad ya nge yag ni ngad uned ko muulung. Sana ba mo’maw’ rodad ni ngad odgad nri kakadbul ya nge yag ni ngad uned ko machib. Machane dab mu pagtalin: Ni faanra ba mecham ngom ni ngam m’oneg e tirok Got ban’en ko yafos rom, ma nap’an ni ga ra mada’nag boch e skeng nib mo’maw’, ma rayog ni ngam gel ngay.

20, 21. (a) Faanra ngad fal’eged i lemnag fare biyul, ma uw rogon nrayog ni nge ayuwegdad ni nge dabi mulan’dad? (b) Mang e thingar da athamgilyed ni ngad rin’ed ni yugu aram rogon ni boor e gafgow ni gad ra mada’nag?

²⁰ Uw rogon boch e magawon nrayog ni ngad mada’naged ni ma yib u reb e kanawo’ nib mo’maw’ ni ngad nanged. Uw rogon ni ngad athamgilgad ya nge dabi mulan’dad? Reb e kanawo’ u rogon ni ngad rin’ed e re n’ey e aram e ngad fal’eg i lemnag fare biyul. Ireram e n’en ni rin’ apostal Paul. Immoy yu ngiyal’ ni i par nib kireban’. Machane, manang ni yim’ Jesus ni fan ngak e piin tadenen, ma gathi piin nib flont. Paul e ir bagayad e pi girdi’ nem. I yoloy ni gaar: “Kug par riy ni bochan e ke michan’ug ngak e en ni Fak Got, ni ir e gub t’uf rok ma ke pi’ e pogofan rok ni fan ngog.” (Gal. 2:20) Arrogon, ke fel’ fare biyul u wan’ Paul. Ke nang ni fare biyul e ban’en nib ga’ fan ngak.

²¹ Faanra ga manang ni fare biyul e aram reb e tow’ath ni ke pi’ Jehovah ni fan ngom, ma rayog ni ayuwegem. Re n’ey e gathi be yip’ fan ni dabki mulan’um. Bay boch i gadad nra i mulan’ nge yan i mada’ ko ngiyal’ ni ke taw fa bin nib beech e fayleng. Machane, dab mu pagtalin ni: Yira tow’athnag e piin ni yad ra athamgil nge mada’ ko tomur. Gad be chugur ko ngiyal’ nra fek Gil’ilungun Got e gapas i yib, me ayuweg e piin ni yad ba yul’yul’ ni ngar flontgad. Mu athamgil ya nge yag nim par u tan Gil’ilungun Got, ni yugu aram rogon ni boor e gafgow ni ga ra mada’nag.