Wuin e Tabab Gil’ilungun Got ko Gagiyeg?​—Guruy Ni 2

KAN SUL NGA DAKEN FARE LIK’AY ROK NEBUKADNEZZAR

Cameron: Kug felfelan’ Jon ni ke yag ni ngkud mada’gow. Gu baadag e pi n’en ni gadow ma weliy u lan e Bible.a Ke uw rogom boch?

Jon: Kammagar, kab fel’ rogog.

Cameron: Manigil. Fa yanem faram e ud weliyew fan ni ma yog e Pi Mich Rok Jehovah ni ke tabab Gil’ilungun Got ko gagiyeg ko duw ni 1914.b Kad weliyew faram nrayog ni ngad guyew reb i fan e re n’ey ko fare yiiy ni bay ko guruy ni 4 ko fare babyor rok Daniel. Ka ga manang faram e n’en ni be weliy murung’agen?

Jon: Be weliy murung’agen ba lik’ay ni tay Nebukadnezzar ni Pilung ni murung’agen ba ke gek’iy nib ga’ ken.

Cameron: Arrogon. Re lik’ay nem ni tay Nebukadnezzar e guy riy ba ke gek’iy nrib ga’ ken ni ke yan i tun nga lan e lang. Me rung’ag laman ba engel rok Got ni be yog ni ngan th’ab e re ke gek’iy nem nga but’, machane ngan pag muchun u fithik’ e but’. Tomuren “medlip e duw,” ma aram miki bugor e nof ko fare ke gek’iy bayay.c Kud weliyew faram ni l’agruw e kanawo’ ni ke lebug e re yiiy ney riy. Ka ga manang rogon ni ke lebug ko yay nsom’on?

Jon: Gathi yay nsom’on ni lebug e bay rogon ngak Nebukadnezzar? Gathi aram e ngiyal’ ni kireb lolugen u lan medlip e duw?

Cameron: Arrogon. I kireb lolugen Nebukadnezzar u lan ba ngiyal’, ere rayog ni nga nog ni ke magawon e gagiyeg rok. Machane, yay ni l’agruw ngay ni ki lebug e re yiiy ney e bay rogon ko gagiyeg rok Got ni kan magawonnag u lan medlip e duw. Kad filew faram ni tabab e re medlip i duw nem u nap’an nni gothey yu Jerusalem ko duw ni 607 B.C.E. Aram e ngiyal’ ndakuriy reb e pilung nu fayleng ni i gagiyeg ni owchen Jehovah Got. Machane, nap’an nra m’ay fare medlip i duw, ma aram e ra mel’eg Got be’ u tharmiy ni nge mang Pilung ko girdi’ rok. Rayog ni nga nog nnap’an ni m’ay fa medlip i duw ma aram e ngiyal’ ni tabab Gil’ilungun Got ko gagiyeg u tharmiy. Ere, kad mu’gow i weliy rogon ni ke tabab fare medlip i duw. Ma faan gadow ra nang ko uw n’umngin nap’an e re medlip i duw nem, ma aram e rayog ni ngad nangew ko wuin e tabab Gil’ilungun Got ko gagiyeg. Kam nang fan e pi n’ey ni kug weliy ngom?

Jon: Kug nang fan ma ke ayuwegeg ni ngki yib ngan’ug e pi n’en ni kad weliyew fa yanem.

Cameron: OK, manigil. Ere, chiney e ngad guyew rogon ni ngad nangew ko uw n’umngin nap’an e re medlip i duw nem. Pi n’ey e ka fin ug beeg bayay u m’on ni nggub gguyem, ya kug pagtalin boch ban’en riy. Ere, bay gu athamgil nggu weliy ngom u rogon nrayog rog.

Jon: OK.

NGIYAL’ NI MUS FA MEDLIP I DUW E ARAM E NGIYAL’ NI TABAB E TIN TOMUREN E RRAN

Cameron: Yay ni som’on ni lebug e re yiiy ney faram e bay rogon ngak Nebukadnezzar. Ma fa medlip i duw e taareb rogon ko duw ni gad ma theeg. Machane, yay ni l’agruw ngay ni lebug e bay rogon nga Gil’ilungun Got. Ere, faanra aram rogon me ere fa medlip i duw e ba mudugil ni ba ngiyal’ nib n’uw nap’an, ma gathi ri be yip’ fan medlip i duw.

Jon: Mang fan ni ka mog ni arrogon?

Cameron: Ya dab mu pagtalin faram ni kad filew ni fa medlip i duw e tabab u nap’an nni gothey yu Jerusalem ko duw ni 607 B.C.E. Ma faanra re medlip i duw nem e ri be yip’ fan e duw ni bod rogon ni gad ma theeg, ma gadow ra theeg nda tababgow ko 607 B.C.E. ma gadow ra mus ko 600 B.C.E. Machane, dariy ban’en nib ga’ fan ni buch ko re duw nem ni bay rogon ko gagiyeg rok Got. Maku reb e kud filew faram nnap’an ni immoy Jesus u fayleng me yog ndawori mus nap’an e re medlip i duw nem.

Jon: Ah arrogon, keb ngan’ug.

Cameron: Bay yu ngiyal’ ni yira weliy murung’agen e duw ko pi yiiy u Bible, ma yibe yip’ fan e rran.d Ere, fa medlip i duw e de taareb rogon ko duw ni gad ma theeg, ya ba mudugil ni be weliy murung’agen ba ngiyal’ nib n’uw nap’an. Maku reb e fapi duw e be yip’ fan e rran.

Jon: Ah kug nang fan e re n’ir ni ga be yog​—gathi ku yima gaar faram, ra reb e rran ma fen reb e duw?

Cameron: Arrogon. Fare babyor ni Revelation e boor e thin riy nib peth ko re babyor rok Daniel ney. Ma rayog ni nge ayuwegdow ni ngad nangew ko uw n’umngin nap’an fare medlip i duw ni gadow be weliy murung’agen. Re babyor nem ni Revelation e be weliy murung’agen dalip nge baley e duw. Re dalip nge baley i duw nem e 1,260 e rran n’umngin nap’an.e Ere, fa medlip i duw e 2,520 e rran u gubin. Ya l’agruw yay ni yira puthuy e dalip nge baley e duw nga taabang me yib medlip e duw riy. Kam nang fan?

Jon: Kug nang fan. Machane, ku dariy ban’en riy ni kug guy ni be dag ni ke tabab Gil’ilungun Got ko gagiyeg ko duw ni 1914.

Cameron: OK, son ngkud weliyew buchuuw. Faanra nda folgow ko n’en ni be yog faram e Bible nra reb e rran ma fen reb e duw, me ere fa medlip i duw e 2,520 e duw n’umngin nap’an. Ere, gadow ra theeg 2,520 e duw nda tababgow ko fare duw ni 607 B.C.E., ma gadow ra taw ko fare duw ni 1914.f Aram e n’en ni ke rin’ ma gamad ma yog ni 1914 e aram e ngiyal’ ni mus fare medlip i duw riy, maku aram e ngiyal’ ni tabab Gil’ilungun Got ko gagiyeg ni Jesus e ir e Pilung riy. Mab puluw e re n’ey ni bochan e ka nap’an e re duw nem ni 1914 ma aram e ngiyal’ ni tabab ni nge thil gubin ban’en u fayleng. Ma aram e pi n’en ni yiiynag e Bible nra buch u nap’an e tin tomuren e rran.

Jon: Mang e pi n’em?

Cameron: Am guy e n’en ni yog Jesus aray ko Matthew 24:7. I yog Jesus nnap’an nra tabab ko gagiyeg u tharmiy, ma ireray e pi n’en nra i buch u fayleng. I yog ni: “Bay reb e nam me cham ngak reb e nam, ma gin nsuwon reb e pilung e bayi mahl ko gin nsuwon reb e pilung. Ma bay i yib e uyongol nge durru’ u gubin yang.” Mu tay fanam i yan riy ni yog Jesus nap’an nra tabab e re ngiyal’ i n’em ma ra yoor e uyongol nge durru’ u gubin yang. Ma gathi aram e n’en ni gad be guy ni be buch ni ka nap’an fare chibog ni ke yan?

Jon: Riyul’ e re n’ir ni ka mog.

Cameron: Ki yog Jesus ko re verse ney nnap’an nra mang Pilung u Gil’ilungun Got, maku ra gel e mahl u fayleng. Ma fare babyor ko Bible ni Revelation e kun yiiynag riy ni pi mahl ney e gathi kemus ni mahl ni ma tay e girdi’ u reb e nam, ya kub muun ngay e mahl u thilin e pi nam u fayleng. Ma pi n’ey e nog nra i buch u nap’an e tin tomuren e rran.g Ka ga manang ko wuin e nni tay e bin som’on e mahl ko fayleng?

Jon: Nni tay ko duw ni 1914, re duw ni beer ni ga be yog ni tabab Jesus riy ko gagiyeg! Da ug lemnag e pi n’ey kafram.

Cameron: Gad ra fal’eg i yaliy e pi n’ey, nib muun ngay fare yiiy u murung’agen fa medlip i duw nge ku boch e yiiy ni murung’agen e tin tomuren e rran, ma gad ra guy nib puluw e pi n’ey. Ba mich u wan’ e Pi Mich Rok Jehovah ni tabab Jesus ko Gagiyeg u Gil’ilungun Got ko duw ni 1914, maku aram e re duw ni tabab e tin tomuren e rran.h

Jon: Gu be gay rogon ni nge tamilang e pi n’ey u wan’ug.

Cameron: Ku arrogog ko som’on. Kub n’uw nap’an mfini yag ni nggu nang fan. Machane, gu be athapeg ni pi n’en ni kad weliyew e ke ayuwegem ni nge tamilang u wan’um ni yugu aram rogon ndariy fare duw ni 1914 u lan e Bible, machane pi n’en ni ke mich u wan’ e Pi Mich Rok Jehovah u murung’agen e re duw nem e ba puluw ko Bible.

Jon: Ma ireray reb e ban’en ni gu baadag romed. Ya gubin ban’en ni gimed ma yog nib puluw ko Bible. Dariy ban’en ni gimed ma machibnag ni yigi sum u lanin’med. Mang fan nrib mo’maw’ ni ngan nang fan e pi n’ey? Mang fan nde yog Got u lan e Bible ni 1914 e aram e ngiyal’ nra tabab Jesus ko gagiyeg u tharmiy?

Cameron: Rib manigil e deer rom, Jon. Bin riyul’ riy e boor ban’en ndan tamilangnag u lan e Bible. Ere, mang fan ni bay boch ban’en ni tay Got nga Bible nib t’uf ni ngan fal’eg i gay murung’agen? Sana rayog ni nge yay ni migid ma gadow weliy e re n’ey.

Jon: Gu baadag.