PI DEER NI BAY E FULWEG RIY U BIBLE

Riyul’ ni i faseg Jesus e yam’ fa danga’?

Be tamilangnag e Bible ni i faseg Jesus e piin ni kar m’ad kakrom. Pi n’em e gathi bogi yat ya bogi ban’en nriyul’ ni i buch, mab mudugil ngal’an nge yungi n’en ni i buch riy. Bod nnap’an e duw ni 31 C.E., me un ba ulung i girdi’ ngak Jesus nga ranod u Kapernaum nga Nain. Nap’an nra tawgad ngaram, mu kur mada’naged ba ulung e girdi’. Ma bay be’ nni faseg ko yam’ u rom. Rayog ni nge mich u wan’um e n’en ni buch ni migid ni bochan e bay murung’agen ko Thin rok Got u Bible, maku boor e girdi’ ni guy e n’en ni buch.​—Mu beeg e Luke 7:11-15.

Ki faseg Jesus Lazarus ni fager rok u tomuren ni ke gaman aningeg e rran ni ke yim’. Rayog ni nge mich u wan’um e n’en ni rin’ Jesus e rofen nem ni bochan e ku boor e girdi’ nra guyed.​—Mu beeg e John 11:39-45.

Mang fan ni i faseg Jesus e yam’?

I faseg Jesus e girdi’ ko yam’ ni bochan e bay e runguy rok. Ku i rin’ e re n’em ni bochan e nge dag ni ke pi’ e Chitamangin, ni ir e En ni Ke Sunmiy urngin ban’en nib fas gelngin ni nge gel ko yam’.​—Mu beeg e John 5:21, 28, 29.

Piin ni i fasegrad Jesus ko yam’ kakrom e rayog ni nge ayuwegdad ni nge mich u wan’dad e pi n’en ni ke micheg ni fan ngodad boch nga m’on. Boor e girdi’ nra fasegrad ko yam’ nib muun ngay e piin nde mat’aw ndariy ban’en u murung’agen Got ni yad manang. Yira bing e kanawo’ ko pi girdi’ ney ni ngar filed murung’agen Jehovah Got me t’uf rorad.​—Mu beeg e Acts 24:15.