Kab Puluw ni NganMabgol​—“Nrogon e Mabgol ni Ma Tay e Piin ni Girdien Kristus,” Fa?

Bay boch e tapigpig rok Got ni yad ma yog boch e thin ni aray rogon u nap’an ni yad be gay be’ ni nge mang mabgol rorad. Yugu aram rogon, ma yad manang fare fonow ni pi’ apostal Paul ni faani yog nthingar da mabgolgad “nrogon e mabgol ni ma tay e piin ni girdien Kristus,” ara kemus ni yigoo tin riyul’ e Kristiano e rayog ni ngad leayed. (1 Kor. 7:39) Ere, mang fan ni ma yog boch e walag e pi thin ney?

FAN NI MA MARUWARAN’ BOCH E WALAG

Piin ni yad ma yog e pi thin ney e rayog ni yad be lemnag ni ka boor e walag nib pin ko walag ni pumoon u lan e ulung. Bay boch e nam nriyul’ e re n’ey riy. Bod nu Korea e 57 e pasent ko pi walag ni yad ba muchugbil e yad bogi ppin, ma 43 e pasent riy e walag ni pumoon. Mu Colombia e 66 e pasent e walag nib pin, ma 34 e pasent e walag ni pumoon.

U boch e nam e bayi n’en ma ma yog e gallabthir rok boch e walag nib pin ni gathi yad boch e tapigpig rok Got, nu m’on nrayog ni nge un fakrad nib pin ko mabgol, ma faen ni ngar mabgolgow e thingari pi’ e salpiy ni boor nge boch e tow’ath nib tolang puluwon. Ere, bay boch e walag ni pumoon ndabiyog rorad ni ngar pied e pi tow’ath ney. Bochan e re n’ey, ma rayog ni nge lemnag reb e walag nib pin ndabiyog ni nge pirieg be’ ni nge leay “nrogon e mabgol ni ma tay e piin ni girdien Kristus.” Ere, rayog ni nge fith ni gaar, “Gur, ba puluw ni nggu lemnag nrayog ni nggu pirieg be’ u fithik’ e pi Kristiano ni taareb e michan’ romow nrayog ni nggu leay?”a

BA T’UF NI NGE PAGAN’UY NGAK JEHOVAH

Faanra bay ba ngiyal’ ni kam lem ni aray rogon, ma dab mu pagtalin ni manang Jehovah e pi n’en ni be magafan’um ngay nge rogon lanin’um.​—2 Kron. 6:29, 30.

Machane, ke tamilangnag Jehovah ko Thin rok nthingar da mabgolgad nrogon e mabgol ni ma tay e piin girdien Kristus. Mang fan? Ya manang e n’en nib fel’ ni fan ko pi tapigpig rok. Gathi kemus ni baadag ni nge ayuweg e pi tapigpig rok ndabi yib wenegan ngorad boch ban’en ni kar mel’eged nde fel’, ya ku baadag ni ngar pared ni yad ba felfelan’. Boor e Jew u nap’an Nehemiah e ur leayed boch e ppin nu bang nda ur pigpiggad ngak Jehovah. Ere, aram fan ni weliy Nehemiah murung’agen e n’en ni rin’ Solomon nib kireb. Yugu aram rogon nib “t’uf rok Got,” machane, pi “ppin nu bang e ra pingeged . . . nge denen.” (Neh. 13:23-26, BT) Manang Got nra yib angin e pi fonow rok ngodad, ere aram fan ni ke tay chilen ko pi tapigpig rok e ngiyal’ ney nthingar ra leayed e piin taareb e michan’ rorad. (Ps. 19:7-10; Isa. 48:17, 18) Ma pining e tin riyul’ e Kristiano e magar ngak Got ni bochan e ma pi’ e fonow ngorad u fithik’ e t’ufeg, maku rayog ni nge pagan’rad ngay. Ere, faan gad ra fol rok ni ir e Pilung rodad, ma aram e rayog ni nge m’agan’dad ngay ni ir e En Th’abi Tolang u Ga’ngin e Palpalth’ib.​—Prov. 1:5.

De fel’ ni ngam ‘pachegem ngak’ be’ nrayog ni nge palognagem rok Got. (2 Kor. 6:14) Boor e Kristiano e ngiyal’ ney ni kar folgad ko re fonow rok Got ney, ma kar nanged nib fel’ e n’en ni kar rin’ed. Machane, bay boch i yad ni ke dugliy ndabi fol.

KAB M’AG NGODAD

I weliy Maggy,b nreb e walag ni ma par u Australia e n’en ni buch rok u nap’an ni tabab ni nge un ngak reb e pumoon nde taareb e michan’ rorow. I yog ni gaar: “Dakiyag ni ngaug un ko muulung ni bochan e gu ma un ko re pumoon nem. Ma rib papey ni gu meewar ko tirok Got ban’en.” Ratana ni ma par u India e fel’ e thin rorow be’ ni yow nga skul ni ka fini tabab ko fol Bible. Munmun, me gagiyel ni fan ni be fil fare pumoon e Bible e bochan ni nge yag ni un ko re walag ney. Ere, tomur riy me chuw e re walag ney ko tin riyul’, me un nga barba’ e teliw nib thil ni bochan e nge yag nra mabgolgow fare pumoon.

Ndenguè ni ma par u Cameroon e 19 e duw rok me un ko mabgol. I micheg e re pumoon ni baaram ni ka rognew ni ngar mabgolgow nnap’an ni yow ra mabgol, ma ra i pag ni nge un ko muulung. L’agruw e wik nga tomuren nra mabgolgow, ma aram me yog fare pumoon ngak ndab ki un ko muulung. I yog ni gaar: “Rib gel e kireban’ ni gu ma tay ma gu ma yor ni gubin ngiyal’. Gu nang ni gathi ka gag e gu be gagiyegnigeg. Ma gubin ngiyal’ ni ug par ni be kireban’ug.”

Riyul’ ni bay boch e Kristiano ni kar leayed boch e pumoon ara ppin ndarur pigpiggad ngak Jehovah, machane yad ba gol ma dar laniyan’gad. Machane, mus ni faanra ba gol e en mabgol rom, ma uw rogon nrayog ni nge magawon e tha’ u thilmew Jehovah? Ra uw rogon u wan’um ni faanra ga manang ndam fol ko fonow rok ni ke pi’ ni fan ngom? Ma bin th’abi ga’ fan riy e, ra uw rogon u wan’ e n’en ni kam dugliy?​—Prov. 1:33.

Boor e walag u ga’ngin yang e fayleng ni ka rogned nib puluw fare fonow rok Got ni faan be yog nthingar da mabgolgad “nrogon e mabgol ni ma tay e piin ni girdien Kristus.” Ma pi walag ni ka yad ba muchugbil e kar dugliyed u wan’rad ni ngar felfelan’naged Got ni aram e ngar leayed be’ ni ma pigpig ngak. Michiko e ir reb e walag nib pin ni ma par u Sapan, ma i guy girdien e tabinaw rok rogon ni ngar n’igined ni nge leay be’ nde taareb e michan’ rorow. Ma rib mo’maw’ e re n’ey ngak ni bochan e i guy boch e fager rok u lan e ulung ni yad be un ko mabgol. Ere, yog ni gaar: “Gubin ngiyal’ ni gu ma puguran ngog ni bochan ni Jehovah e ir reb e ‘Got nib felfelan’,’ ma aram fan ni felfelan’ ni gad ma tay e der yan u rogon ko gad ra un ko mabgol fa danga’.” (1 Tim. 1:11, NW) Munmun, ma aram me pirieg Michiko reb e walag u lan e ulung nib manigil, ma aram mar mabgolgow. Ma kari felfelan’ ni ke fol ko fonow rok Jehovah.

Ku bay boch e walag ni kar songad ke taw ko ngiyal’ ni kar pirieged be’ nib fel’ nrayog ni ngar leayed. Bill nreb e walag ni pumoon ni ma par u Australia e ir bagayad e pi walag ney. I yog ni bay yu ngiyal’ ni i guy boch e ppin u wuru’ e ulung ni baadag. Machane, ma guy rogon ndabi pacheg ir ngorad. Mang fan? Ya dabun ni nge ‘pacheg ir’ ngak be’ nde mich Got u wan’. Immoy boch e walag nib pin ni baadag, machane dar adaged e re walag ney. I son ni 30 e duw mfini pirieg reb e walag nib pin ni yow ra m’ag. I yog Bill ni gaar: “Dariy ban’en ni kug kalngan’ug riy.” Ki gaar: “Gub tow’ath ya gamow ma yan e ppin rog ko machib u taabang, ma gamow ma fil e Bible u taabang, maku gamow ma liyor ngak Got u taabang. Kug mada’nag e pi fager ko ppin rog maku gu ma chagil ngorad, ma gu be felfelan’ ko re n’ey ni bochan e yad gubin ni yad ma pigpig ngak Jehovah. Gamow ma fanay e ppin rog e pi kenggin e motochiyel u Bible ni nge ayuwegmow u rogon ni nge par e mabgol romow nib fel’.”

NAP’AN NI GA BE SONNAG JEHOVAH

Mang e ngam rin’ u tomuren ni kam pag fan gubin ban’en ngak Jehovah? Rayog ni ngam lemnag ko mang fan ndawor mu un ko mabgol. Faanra ga be lemnag ndawor mu un ko mabgol ni bochan e ga be fol ko fare thin nu Bible ni be yog ni ngan mabgol “nrogon e mabgol ni ma tay e piin ni girdien Kristus,” mab manigil e n’en ni kam dugliy ni ngam rin’, ya ga be fol ko fonow rok Got. Ma dab mu pagtalin ni be felfelan’ Jehovah ni kam dugliy ni ngam fol ko n’en ni be yog e Thin rok. (1 Sam. 15:22; Prov. 27:11) Ere, rayog ni ngam ulul ni ngaum ‘weliy ngak urngin e magafan’ rom.’ (Ps. 62:8) Ma faanra um meybil ngak ni gubin ngiyal’, ma ga be ning e tin nib t’uf rom, ma rayog ni nge ga’ fan e meybil rom u wan’. Ku ra i gel e chugur ko tha’ u thilmew Got i yan ni faan ga ra athamgil ni ngam par ni gab mudugil ni yugu aram rogon ni bay boch ban’en ni ga baadag ara ga be ar’arnag ni ngam rin’ nde fel’. Dab mu pagtalin ni ma lemnag e En Th’abi Tolang e pi n’en nib t’uf ko pi tapigpig rok ni yad ba yul’yul’, mab ga’ fam u wan’. Ma lemnag e tin nib t’uf rom nge pi n’en ni ga be yim’ ni bochan. Gathi ke micheg nra pi’ be’ ni ngam leay. Machane, faanra ri ga baadag ni ngam un ko mabgol, ma manang Got e bin th’abi fel’ e kanawo’ nrayog ni nge yag ngom riy e n’en nib t’uf rom.​—Ps. 145:16; Matt. 6:32.

Sana bay yu ngiyal’ ni ga ma lem ni bod David ni fare psalmist, ni faani gaar: “Somol, mu non ngog e chiney! Kari mulan’ug. Dab mmithagem rog.” (Ps. 143:5-7, 10, BT) Faanra aray rogon, ma ngam pi’ e tayim ngak Jehovah ni nge dag ngom e n’en nib m’agan’ ngay ni ngam rin’. Rogon ni ngam rin’ e re n’ey e aram e ngaum tay e tayim ni ngaum beeg e Thin rok ma ga fal’eg i lemnag e pi n’en ni kam beeg. Ya faan ga ra rin’ ni aray rogon, ma ga ra nang e pi motochiyel rok, ma ka ga ra nang rogon ni i ngongol ngak e pi tapigpig rok kakrom. Faan ga ra motoyil ngak, ma ra pagan’um ni ngaum fol rok.

Ku mang reb e ban’en nra ayuwegem ni ngaum par ni gab felfelan’ ma boor ban’en ni ga be rin’ u nap’an ni gab muchugbil? Nap’an ni ka gab muchugbil, ma rayog ni ngam fil rogon ni ngaum gol ko girdi’, ma ga be maruwel nib gel, ma ga be sumunguy ko girdi’, ma ga be par ni gab yul’yul’ ngak Got, mab fel’ thim u wan’ e girdi’. (Gen. 24:16-21; Ruth 1:16, 17; 2:6, 7, 11; Prov. 31:10-27) Mm’oneg Gil’ilungun Got u wan’um ni aram e ngaum fanay e tayim rom ni fan ko machib nge boch e maruwel u lan e ulung, ya pi n’ey e ra ayuwegem ni nge dab mu dugliy boch ban’en ni ga ra kalngan’um riy ko tomur. Bill ni faan kad weliyed murung’agen e weliy murung’agen e pi duw ni baaram ndawori un ko mabgol ni gaar: “I yan e pi duw nem nrib papey! Ya ug fanay e pi tayim nem ni nggu pigpig ngak Jehovah ni gag reb e pioneer.”

Arrogon, kab puluw ni ngan mabgol “nrogon e mabgol ni ma tay e piin ni girdien Kristus.” Faan ga ra fol ko re fonow ney, ma aram e ga be tayfan Jehovah ma ga ra felfelan’. Be gaar e Bible: “Ke sorok Somol! Nge felan’ e en ni bay madgun Somol u wan’, ma rib felfelan’ ngay ni ma folwok ko tin ke yog ni ngan rin’. Tabinaw rok e bayi fel’ rogon me yoor ban’en riy, ma bayi flaab ni dariy n’umngin nap’an.” (Ps. 112:1, 3, BT) Ere, mu dugliy u wan’um ni ngam fol ko re motochiyel rok Got ney ni aram e ngam mabgol “nrogon e mabgol ni ma tay e piin ni girdien Kristus.”