LIBRARY U ONLINE ni fan ko Wulyang ko Damit
Wulyang ko Damit
LIBRARY U ONLINE
Waab
  • BIBLE
  • PI BABYOR
  • PI MUULUNG
  • w16 December pp. 8-12
  • Runguy rok Got e Ir e Ke Chuwegem u Tan Gelngin e Denen

Dariy e video ko n'en ni kam mel'eg.

Wenig ngom, dabiyog ni nge load e re video ney.

  • Runguy rok Got e Ir e Ke Chuwegem u Tan Gelngin e Denen
  • Fare Wulyang ko Damit Ni Be Weliy Morngaagen Gil’ilungun Jehovah—2016
  • Pi Subheading
  • Boch Ban'en ni Ku Taareb Rogon Ngay
  • BOCHAN E RUNGUY ROK GOT MA ARAM FAN NI KE N’AG FAN RODAD
  • BA GA’ FAN U WAN’DAD E RUNGUY NI KE DAG GOT NGODAD
  • RAYOG NI NGAM GEL KO RE CHAM NEY
  • Ngad Pininged e Magar ko Runguy ni Ke Dag Got Ngodad
    Fare Wulyang ko Damit Ni Be Weliy Morngaagen Gil’ilungun Jehovah—2016
  • Mu Weliy fare Thin nib Fel’ ni Murung’agen e Runguy rok Got
    Fare Wulyang ko Damit Ni Be Weliy Morngaagen Gil’ilungun Jehovah—2016
  • Mu Pag e Gol nge “Sumunguy” ni Nge Gagiyegnagem
    Fare Wulyang ko Damit Ni Be Weliy Morngaagen Gil’ilungun Jehovah—2022
  • Girdi’ Rok Got E Thingara Adaged Ni Ngaun Gol
    Fare Wulyang Ntagil’ E Damit Ni Be Weliy Morngaagen Gil’ilungun Jehovah—2004
Kum Guy Boch Ban'en
Fare Wulyang ko Damit Ni Be Weliy Morngaagen Gil’ilungun Jehovah—2016
w16 December pp. 8-12
Be machib apostal Paul u Roma

Runguy rok Got e Ir e Ke Chuwegem u Tan Gelngin e Denen

“Denen e thingari dab ki par ni ir e be gagiyegnagmed . . . ya gimed be par u tan e runguy rok Got.”​—ROM. 6:14.

TANG: 2, 29

UW ROGON NI GA RA FULWEG?

  • Mang fan ni fare biyul ni ke pi’ Got e ban’en ni ke pi’ ni bochan e runguy rok ngodad?

  • Mang fan nrayog ni nga dogned ni “kad m’ad rok e denen”?

  • Faanra rib ga’ fan u wan’dad e runguy ni ke dag Got ngodad, ma mang fan nra k’aringdad ni ngad siyeged urngin mit e denen?

1, 2. Mang nib ga’ fan fare thin ko Roma 5:12 u wan’ e Pi Mich Rok Jehovah?

MU SUSUNNAG ni ga be lemnag ni ngam yoloy boch e thin nu Bible nga but’ nri manang e Pi Mich Rok Jehovah ma kub ga’ ni yad ma fanay. Ere gur, fare thin u Roma 5:12 e aram e bin th’abi som’on e thin nu Bible nra yib ngan’um? Am lemnag urngin yay ni ga ma weliy murung’agen e re thin nu Bible nem ni be gaar: “Denen e yib nga fayleng u daken taabe’, ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng, ni bochan e urngin e girdi’ ni ngongliy e denen.”

2 Boor yay ni kan fanay e re thin nu Bible ney u lan fare ke babyor ni Mang e Ri Be Fil e Bible? Nap’an ni gimed ra fil pi fakam ara yugu boch e girdi’ e re ke babyor ney u taabang, ma dabisiy ni gimed ma beeg fare thin u Roma 5:12 u nap’an ni gimed be weliy murung’agen e n’en nib m’agan’ Got ngay ni fan ko fayleng, nge fare biyul, nge rarogon e piin ni kar m’ad nrogon ni bay ko guruy ni 3, nge 5, nge 6. Machane, uw urngin yay ni ga ma lemnag e re thin nu Bible ney u nap’an ni ga be lemnag rarogom u wan’ Jehovah, nge rogon e ngongol rom, nge athap rom ni fan ko gabul nge langlath?

3. Mang e thingar dab da paged talin u rarogodad?

3 Gad gubin ni gad bogi tadenen. Gubin e rran ni gad ma oloboch. Machane, ba pagan’dad ya gad manang ni manang Got ni gadad e fiyath, ma kub m’agan’ ngay ni nge runguydad. (Ps. 103:13, 14) I yog Jesus u lan fare kenggin e meybil ni ngad yibilayed ngak Got ni nge lungudad: “[Mu] n’ag fan u wun’um e denen romad.” (Luke 11:2-4) Ere, dariy rogon ni ngaud pared ma gad be lemnag e pi oloboch rodad ni ke n’ag Got fan. Yugu aram rogon, ma ra yib angin ngodad ni faan gad ra lemnag rogon ni ke n’ag fan e kireb ni ud rin’ed kafram nge rogon nrayog ni ngki n’ag fan e kireb rodad e chiney.

BOCHAN E RUNGUY ROK GOT MA ARAM FAN NI KE N’AG FAN RODAD

4, 5. (a) Mang e be ayuwegdad ni ngad nanged fan fare thin ni bay ko Roma 5:12? (b) Mang fare “runguy” ni kan weliy murung’agen ko Roma 3:24?

4 Bay boch e thin nib ga’ fan u lan fapi guruy u m’on ngu tomuren fare thin ni yog apostal Paul ko Roma 5:12, nib ga’ ni guruy ni 6. Re n’ey e ra ayuwegdad ni ngad nanged rogon nrayog ni nge n’ag Jehovah fan e denen rodad. Be gaar e guruy ni 3: “Ke denen urngin e girdi’ . . . . Machane u daken e tow’ath rok Got ndariy puluwon ni bochan e runguy rok ngak e girdi’, e ir e ke mat’awnag urngin e girdi’ riy ngak u daken Kristus Jesus, ni ir e ke pithigrad rok e denen.” (Rom. 3:23, 24) Mang e be yip’ Paul fan u nap’an ni yog murung’agen e “runguy”? I fanay bbugithin ni Greek ni be yip’ fan ni “ngan rin’ ban’en ni fan ngak be’ ndanir lemnag ni ngan pi’ puluwon.” Re n’ey ni kan rin’ ni fan ngak facha’ e ban’en ndariy rogon ni ngan rin’ ngak.

5 I yog be’ nib llowan’ ni ka nog John Parkhurst ngak ni gaar: “Nap’an ni yira fanay [e re bugithin ni Greek nem] u nap’an ni yibe weliy murung’agen Got ara Kristus, mab ga’ ni ma yip’ fan e tow’ath ni kar piew ndariy puluwon ara runguy ni kar dagew ni aram e kar chuwegew e girdi’ u tan gelngin e denen nge yam’.” Ere, aram fan nib puluw rogon ni kan pilyeg fare bugithin ni “runguy” ko fare Bible ni New World Translation. Machane, uw rogon ni ke dag Got e re runguy ney ngodad? Ma mang rogon ko athap nge tha’ u thilmew Got? Ngad weliyed rogon.

6. Uw rogon nrayog ni nge yib angin e runguy rok Got ko girdi’?

6 “Taabe’” e fek e denen nge yam’ “nga fayleng” ni aram Adam. Ere, bochan e “denen ni rin’ taabe’ me tabab e yam’ i gagiyegnag e girdi’.” Ki yog Paul ni ke yib e ‘runguy rok Got’ ngodad u daken “taabe’, ni er Jesus Kristus.” (Rom. 5:12, 15, 17) Ma re runguy rok nem e ke yib angin ngak urngin e girdi’. “Boor e girdi’ ni bayi mat’awnagrad Got ngak ni bochan taabe’ ni ke fol [ni aram Jesus].” Bin riyul’ riy e, runguy rok Got ngodad e aram e n’en nra fekdad i yan ko “yafos ni dariy n’umngin nap’an u daken Jesus Kristus.”​—Rom. 5:19, 21.

7. Mang fan ni fare biyul ni ke pi’ Got ni bochan gelngin feni ba gol ko girdi’ e ban’en ndariy rogon ni nge pi’?

7 Dariy rogon ni nge pi’ Jehovah Fak nge yib nga fayleng ni nge biyuliydad. Machane, bochan e runguy rok ngodad ma aram e ke bing e kanawo’ nrayog ni ngan chuwegdad u tan gelngin e denen nge yam’. Ma gad manang ndariy bagadad ni bay rogon ni ngan pi’ e re tow’ath ney ngak. Ere, denen rodad ni kan n’ag fan nge athap ni kan pi’ ngodad ni aram e yafos ndariy n’umngin nap’an boch nga m’on e rriyul’ ni aram e runguy ni kan dag ngodad ni ban’en ndariy rogon ni ngan rin’. Bochan e re n’ey, ma aram fan nthingari ga’ fan u wan’dad e runguy ni ke dag Got ngodad nib tow’ath ma gad pag e re n’ey ni nga i gagiyegnagdad ni gubin ngiyal’.

BA GA’ FAN U WAN’DAD E RUNGUY NI KE DAG GOT NGODAD

8. Mang reb e ban’en nde puluw nrayog ni nga i lemnag boch e girdi’ u murung’agen e denen ni yad ma rin’?

8 Bochan ni gadad pi fak Adam ndad flontgad, ma aram fan nib mom ni ngaud denengad. Machane, de puluw ni ngad lemnaged ni bochan ni ke runguydad Got ma aram e rayog ni nge lungudad: ‘Mus ni faanra kug denen u p’eowchen Got, ma dariy rogon ni nge magawonnag lanin’ug. Ya ra n’ag fan e denen rog.’ Rib gel e kireban’ riy, ya immoy boch e Kristiano ni ur lemgad ni aray rogon u nap’an ni kab fos e pi apostal. (Mu beeg e Jude 4.) Sana dab dogned ban’en ni aray rogon; machane rayog ni sana gad ma lemnag fa reb e af e mit ney e lem ngodad.

9, 10. Uw rogon ni chuw Paul nge ku boch e girdi’ u tan gelngin e denen nge yam’?

9 I tamilangnag Paul nthingar da siyeged fare lem ni ma tay boch e girdi’ ni yad ma gaar: ‘Manang Got fan. Ra n’ag fan e kireb rog.’ Mang fan? Ya rogon ni yog Paul e piin Kristiano e ‘kar m’ad rok e denen.’ (Mu beeg e Roma 6:1, 2.) Mang fan nrayog ni nga nog ni ‘kar m’ad rok e denen’ ni yugu aram rogon ni ka yad bay u fayleng ni ka yad ba fos?

10 Bochan fare biyul, ma aram me yag ni nge n’ag Got fan e denen rok Paul nge boch e girdi’ ni ur moyed e ngiyal’ nem. I n’ag Jehovah fan e denen rorad, me dugliyrad nga gelngin nib thothup, me fekrad ni ngar manged pi fak. Ki pi’ e athap ngorad ni nga ranod nga tharmiy. Faan yad ra par ni yad ba yul’yul’, ma aram e yad ra un ko par u tharmiy ngar gagiyeggad Kristus u taabang. Machane, nap’an ni ka yad bay u fayleng ni ka yad ba fos ni yad be pigpig ngak Got, ma rayog ni nge yog Paul ni ‘kar m’ad rok e denen.’ I weliy murung’agen e yam’ ni tay Jesus nib girdi’ min faseg nga reb e dowef ni gathi downgin e girdi’ me yan nga tharmiy nib kan ndab ki yim’ biid ya nge yag ni tamilangnag rogon e re n’ey. Nap’an ni fos Jesus ko yam’ ma dabkiyog ni nge par u tan gelngin e yam’. Ere, ku arrogon e pi Kristiano nem ni kan dugliyrad nrayog ni nga nog ‘ni kar m’ad rok e denen ma kar fosgad ni yad ba’ rok Got ni kar taab girdi’gad Kristus Jesus.’ (Rom. 6:9, 11) Ke thil e yafos rorad ko kafram. Dakurur ngongolgad ni yad be yan nga ar’aren lanin’rad. Ere, bod ni kar m’ad kar chuwgad ko bin baaram e yafos ni ur moyed riy kafram.

11. Mang fan nrayog ni nga nog ni gadad e piin ni gad be athapeg e yafos ni manemus u Paradis e “kad m’ad rok e denen”?

11 Ma uw rogodad? U m’on ndawor da manged Kristiano, mab ga’ ni ud denengad. Rayog nsana pi n’em ni ud rin’ed e dad nanged gelngin e kireb riy u mit Got. Ud moyed ni gad e “sib rok e tin nde machalbog nge tin nib kireb.” Ere, rayog ni nga nog ni ud moyed ni gad e “sib rok e denen.” (Rom. 6:19, 20) Machane, kad filed e tin riyul’ u Bible, kad thilyeged e ngongol rodad, ma kad ognaged e yafos rodad ngak Got, kad uned ko taufe. Ka aram nap’an i yib ni gad baadag ni ‘ngar ud folgad’ rok Got nge pi motochiyel rok. Bin riyul’ riy e, ‘kad chuwgad u pa’ e denen’ kad “manged sib rok e tin nib mat’aw.” (Rom. 6:17, 18) Ere, aram fan ni ku rayog ni nga nog ni “kad m’ad rok e denen.”

12. Ra bagadad ma mang e ba milfan ngak ni nge dugliy?

12 Yugu aram rogon, ma bay ban’en nib milfan ngodad ni ngad dugliyed ni ngad rin’ed. I gaar Paul: “Thingari dab ki par ni denen e be gagiyegnag dowmed ni bogi dowef ni bay yim’, ya ir e ma waliymed ngam folgad ko tin ni be yim’ e dowef romed ni bochan.” (Rom. 6:12) Rayog ni nge ‘par ni denen e be gagiyegnag dowdad’ ni faanra ud rin’ed e pi n’en ni baadag dowdad ni ngad rin’ed. Ere, bochan nrayog ni nge “par” ni denen e ir e be gagiyegnagdad maku rayog ni ngad siyeged ndab da paged ni nga i gagiyegnagdad, ma aram fan nib fel’ ni ngad fal’eged i lemnag ko, Mang e ri gad baadag? Mu fithem ni nge lungum: ‘Bay yu ngiyal’ ni gu ma pag e dowef rog nge lanin’ug ndawori flont ni nge waliyeg nga bang nib kireb, mug rin’ e n’en ni gu baadag? Fa gur, rayog ni nga nog ni ku gum’ rok e denen? Maku reb e, rayog ni nga nog ni kug fos ni gu bay rok Got ni kug taab girdi’gow Kristus Jesus, fa?’ Fulweg rodad ko pi deer ney e be yan u rogon feni ga’ fan u wan’dad e runguy ni ke dag Got ngodad ni aram e ke n’ag fan e denen rodad.

RAYOG NI NGAM GEL KO RE CHAM NEY

13. Mang boch ban’en ni i buch kakrom ni be micheg ngodad nrayog ni ngad talgad ko denen?

13 Pi tapigpig rok Jehovah e kar digeyed e “pi n’en ni [ur] ngongliyed” u m’on ni ngar nanged Got, me t’uf rorad, mar pigpiggad ngak. Pi n’en ni ur rin’ed kafram e rayog nib muun ngay boch e ngongol ni yima “tamra’ ngay” nra fekey i yan ko yam’. (Rom. 6:21) Machane, kar thilyeged e ngongol rorad. Aram e n’en ni buch rok boch e Kristiano u Korinth ni yol Paul ngorad. Immoy boch i yad ni ur meybilgad ko liyos, ara ur pared e piin ni gathi mabgol rorad, ara yad e pumoon ni ma darngalnag e pumoon, ara ppin ni ma darngalnag e ppin, ara yad ma moro’ro’, ara yad ma balyang ko rrum, ara yad ma rin’ boch e ngongol ni bod e tiney. Yugu aram rogon ma ‘kan beechnagrad’ min ‘pi’rad ngak Got.’ (1 Kor. 6:9-11) Rayog ni ku bay boch e girdi’ u lan e ulung u Roma ni aram rogorad kafram. Ere, nni thagthagnag nga laniyan’ Paul ni nge yol ngorad ni gaar: “Thingar dab kum paged fan bayang u dowmed ngak e denen ni ngan maruwel ngay ni fan ko tin nib kireb. Machane ngam pied gimed ngak Got, ni bod rogon e girdi’ ni kan chuwegrad ko yam’ kan fekrad ko yafos, mi gimed pi’med nge tafinay romed ni polo’ ngak ngan maruwel ngay ni fan ko tin nib mat’aw.” (Rom. 6:13) Manang Paul nrayog ni nga i par e pi Kristiano nem nib machalbog e ngongol rorad ma be yib angin e runguy rok Got ngorad.

14, 15. Mang e susun ni nge bagadad me fith ir riy u rogon e “fol” ni ma tay?

14 Ku arrogodad e ngiyal’ ney. Bay boch e walag u lan e ulung ni ur moyed kafram ni yad bod fapi Kristiano u Korinth. Machane, kar thilyeged e ngongol rorad. Kar digeyed e ngongol nib kireb ni ur rin’ed kafram ma ‘kan beechnagrad.’ Faanra aram rogon e n’en ni ke buch rom, me ere uw rogom u wan’ Got e chiney? Chiney ni ke mab e kanawo’ ngom nrayog ni ngam par u tan e runguy rok Got me n’ag fan e denen rom e kam dugliy u wan’um ndab kum ‘pag fan bayang u dowam ngak e denen,’ fa? Ma gur, ga ra ‘piem ngak Got, ni bod rogon e girdi’ ni kan chuwegrad ko yam’ kan fekrad ko yafos,’ fa?

15 Faanra ngad rin’ed e re n’ey, ma thingar da siyeged e pi denen ni i rin’ boch e walag u Korinth u m’on ni ngar manged boch e Kristiano. Faanra nga dogned ni ke yib angin e runguy rok Got ngodad ma dakir par e denen ‘ni ir e be gagiyegnagdad,’ ma aram e rib ga’ fan ni ngad rin’ed e re n’ey. Machane gur, kad dugliyed u wan’dad ni ‘ngar da folgad’ ni aram e ngad athamgilgad ni ngad siyeged boch e denen ni ma lemnag boch e girdi’ ni gathi rib gel e kireb riy, fa?​—Rom. 6:14, 17.

16. Uw rogon ni kad nanged ni piin Kristiano e gathi kemus nib t’uf ni ngar talgad i rin’ boch e ngongol nrib gel e kireb riy?

16 Am lemnag apostal Paul. Gad manang nda i rin’ boch e ngongol nrib gel e kireb riy ni kan weliy murung’agen ko 1 Korinth 6:9-11. Yugu aram rogon, ma kki yog ni be denen. I yoloy ni gaar: “Gag e gub girdi’ ni gu ra yim’, ni kan pieg ni chuway’ ngak e denen ni bod rogon ba sib. Dagur nang fan e n’en ni gu be rin’; ya dagur rin’ e tin ni gub adag ni nggu rin’, ma gu be rin’ e tin ndabug ni nggu rin’.” (Rom. 7:14, 15) Re n’ey e be dag ni immoy boch ban’en ni i rin’ Paul nrogon u wan’ e ku aram boch e denen, ma be guy rogon ni nge siyeg e pi ngongol nem. (Mu beeg e Roma 7:21-23.) Ere, manga yugu da athamgilgad ngad folwokgad rok ma gad athamgil ni ‘ngar ud folgad.’

17. Mang fan ni ga baadag ni ngam par ni gur be’ ni gab yul’yul’?

17 Bod ni, gad manang ni faanra ngad pigpiggad ngak Jehovah, ma thingar da yul’yul’gad. (Mu beeg e Proverbs 14:5; Efesus 4:25.) Gad manang ni Satan e ir “chitamangin urngin e malulifith.” Ku gad manang ni yim’ Ananias nge ppin rok ni bochan e ra ban gow. Ere, darud ban gad ni bochan e dubdad ni ngad boded e pi cha’ney. (John 8:44; Acts 5:1-11) Machane, faanra ngad pared ni gad ba yul’yul’, ma gathi kemus ni be yip’ fan ndab ud ban gad. Ya faanra rib ga’ fan e runguy rok Got u wan’dad, ma gad ra athamgil ni ngad yul’yul’gad u yugu boch e kanawo’.

18, 19. Faanra ngad yul’yul’gad, ma mang fan ni gathi kemus ndab ud ban gad ni lem rodad?

18 Ga ra ban, ma aram e ka mog ban’en nde riyul’. Machane, gathi kemus ni baadag Jehovah ndab i ban e pi tapigpig rok ni lem rorad, ya yog ngak piyu Israel kakrom ni gaar: “Ngam pired ni gimed ba thothup, yi gag e gub thothup; mi gag e Somol ni Got romed.” Tomuren ni yog e re thin ney ngorad, ma aram me yog boch e kanawo’ ni ngar pared ni yad ba thothup. I gaar: “Dab mu moro’ro’gad ara mu banniged be’, ara mu lifithed l’ugunmed.” (Lev. 19:2, 11) Ere, yugu aram rogon nsana dab da ban gad ni lem rodad, machane rayog ni ngad k’aringed boch e girdi’ ni nge mich ban’en nde riyul’ u wan’rad. Faan gad ra rin’ ban’en ni aray rogon ma aram e darud yul’yul’gad.

Be non reb e walag ni pumoon ngak e en nib ga’ ko maruwel rok ma bay boch i girdien e maruwel rok ni yad be motoyil ko n’en ni be yog

Kad dugliyed u wan’dad ndab ud ban gad ara da k’aringed be’ ni nge mich ban’en u wan’ nde riyul’, fa? (Mu guy e paragraph 19)

19 Bod nrayog ni nge yog reb e pumoon ko en nib ga’ ko maruwel rok ara piin ni yad nga maruwel nra bin migid e rran ma dabiyog ni nge yib ko maruwel ara ba t’uf ni nge chuw nib papey ni bochan e “ra yan i guy togta.” Machane, bin riyul’ riy e kemus ni nge yan i fek e falay rok u aspital ara nge yan i pi’ puluwon e tafalay rok. Bin riyul’ i fan ndabi maruwel ara nge chuw nib papey e bochan ni nge fal’eg rogon ko milekag nra tay ara be lemnag ni nga ranod chon e tabinaw rok nga dap’e yan’ ko fafel. Sana riyul’ ni nge yan facha’ “i guy togta,” machane gur, riyul’ e n’en ni ke yog, fa ke ban? Bay yu ngiyal’ ni ma ban boch e girdi’ ni bochan e nge fel’ ban’en riy ngorad ara yad be guy rogon ni nge dab ni gechignagrad. Mus ni faanra dawor da ban gad ni lem rodad, ma uw rogon u wan’dad fare thin ni ke yog Got ni ke gaar: “Dab mu . . . banniged be’”? Kum lemnag fare thin ni bay ko Roma 6:19 ni be gaar: “Aram rogon nthingar mu paged gimed ngam manged sib rok e tin nib mat’aw, ni fan ko tin nib thothup ban’en.”

20, 21. Mang e susun nra k’aringdad e runguy rok Got ni ngad rin’ed?

20 N’en ni gad be fil ko re n’ey e faanra rib ga’ fan u wan’dad rogon ni ke runguydad Got ma gathi kemus ni ngad siyeged boch e ngongol nib kireb ni i rin’ boch e walag u Korinth u m’on ni ngar manged Kristiano, ni bod rogon ni ngam parew be’ ni gathi mabgol rom, ara chingaw, ara ku boch e ngongol ni bod e tiney. Ra nge m’ug nib ga’ fan e runguy rok Got u wan’dad ma gathi kemus ni ngad siyeged e ngongol ndarngal, ya ku thingar da guyed rogon ndab da adaged ni ngaud chuweged e chalban rodad nga boch ban’en ni bay boch e ngongol nib kireb riy. Faanra da paged gadad ngad manged sib ko tin nib mat’aw ma gathi kemus nra ayuwegdad ndab ud chingawgad, ya ku ra ayuwegdad ndab da unumed nge chugur ni ngad chinggad. Sana ba t’uf ni ngad athamgilgad nib gel ya nge yag nda siyeged e tiney e ngongol nde mat’aw; machane, rayog ni ngad rin’ed e re n’ey.

21 Gad be nameg ni ngad siyeged boch e ngongol nrib gel e kireb riy nge ku boch ni gathi rib gel e kireb riy. Gad manang ni ku ra ud olobochgad. Machane, thingar da athamgilgad ni ngad rin’ed e re n’ey ni bod rogon Paul. I pi’ e athamgil nga laniyan’ pi walagen ni gaar: “Thingari dab ki par ni denen e be gagiyegnag dowmed ni bogi dowef ni bay yim’, ya ir e ma waliymed ngam folgad ko tin ni be yim’ e dowef romed ni bochan.” (Rom. 6:12; 7:18-20) Faan gad ra athamgil ni ngad siyeged urngin mit e denen, ma aram e gad be dag nib ga’ fan u wan’dad e runguy ni ke dag Got ngodad u daken Kristus.

22. Mang tow’ath e ra yag ngak e piin ni yad ra micheg nib ga’ fan e runguy rok Got u wan’rad?

22 Bochan e runguy rok Got ngodad, ma aram fan ni ke n’ag fan e kireb ni ud rin’ed kafram, maku rayog ni ngki ulul i n’ag fan boch e kireb nrayog ni ngaud rin’ed. Ere, ngad athamgilgad ngad siyeged boch e ngongol ni ma lemnag boch e girdi’ ni gathi rib gel e kireb riy. I tamilangnag Paul e tow’ath nra yag ngodad ni bochan e re n’ey ni gaar: “Chiney e kan chuwegmed u tan pa’ e denen kam manged sib rok Got; ma wenegan ni ke yib ngomed e kari mpied gimed nga pa’, ma tomren e biney e yafos ndariy n’umngin nap’an e bay yog ngomed.”​—Rom. 6:22.

    Yapese Publications (1984-2025)
    Mu Log Out
    Mu Log In
    • Waab
    • Mu Sharenag
    • Pi N'en Nrayog ni Ngam Mel'eg
    • Copyright © 2025 Watch Tower Bible and Tract Society of Pennsylvania
    • Rogon ni Ngan Fanay
    • Privacy Policy
    • Privacy Settings
    • JW.ORG
    • Mu Log In
    Mu Sharenag