3 Ra Ayuwegey ni Ngan Athamgil u Fithik’ e Magawon

M’AR NDAB KUN GOL RIY

I yog Rose ni gaar: “Bay ba mit e m’ar rog nni gargelnageg ma bay rog. Re miti m’ar ney e ma k’aring e amith nib gel ngog ni gubin ngiyal’. Kari lich e tin nrayog ni nggu rin’.” Reb e ban’en nri ma magafan’ ngay e aram e bay yu ngiyal’ ndabiyog ni nge tiyan’ ko fol Bible ni be tay nge pi n’en ni ma rin’ ni fan ko liyor ni ma tay. Machane, rib ga’ e ayuw ni ke pi’ fare thin ngak ni yog Jesus ko Matthew 19:26 ni be gaar: “Got e urngin ban’en ma rayog rok.” Ke nang Rose ni boor e kanawo’ nrayog ni nge fil e Bible rok riy. Rib mo’maw’ ni nge beeg e babyor ni bochan e yug ma par u fithik’ e amith. Ere, tabab ni nga i motoyil nga boch e thin nu Bible nge thin ni bay u lan yu ken e babyor nib puluw e thin riy ko Bible ni kan ngongliy nrayog ni ngan motoyil ngay.a I yog ni gaar, “Faan gomanga dariy e re n’ey, ma dag nang ko uw rogon nrayog ni nggu par nib fel’ e tha’ u thilmow Got.”

Nap’an nra kireban’ Rose ni bochan e dabkiyog ni nge rin’ boch ban’en ni i rin’ kafram, ma fare thin ni bay ko 2 Korinth 8:12 e ri ma pi’ e athamgil nga laniyan’. Be gaar e re thin nem: “Faanra ba pasigan’med ngay ni ngam pied ban’en, ma ra fek Got e tin ni kam pied nib tow’ath nrogon e tin nrayog ni ngam pied, ma gathi tin ndariy romed.” Pi thin ney e ma puguran ngak Rose nib m’agan’ Got ko n’en ni be rin’, ni bochan e be rin’ e tin nrayog rok.

KIREBAN’

Delphine ni faan kan weliy murung’agen ko fa binem e article ni ke yan e yog ni gaar: “Tomuren ni yim’ fare rugod ni fakag ni 18 e duw rok, ma rib gel e kireban’ nug tay. Ere gu lemnag ndakuriy rogon ni nggu par ni gub fos. Ke thil gubin ban’en.” Machane, i yag ni nge fal’eg fapi thin ko Psalm 94:19 (BT) laniyan’. U rom e yog fare psalmist riy ngak Got ni gaar: “Yu ngiyal’ ni der paslagan’ug ma ke magafan’ug, ma ga fal’eg lanin’ug nggu felan’.” I yog ni gaar: “Gu meybil ngak Jehovah ni nge ayuwegeg ni nggu pirieg boch ban’en ni nggu rin’ nra fal’eg lanin’ug.”

I ognag Delphine ir ni nge rin’ boch e maruwel ni yima ayuweg e girdi’ riy. Munmun, ma aram me taareb rogonnag ir ko crayong ko bitir ni mus ko tin ni ke m’ing nrayog ni ngkun fanay ni ngan achey e babyor ngay. Ere, yugu aram rogon ni be lemnag ni kaygi pag rogon e magawon ni ke yib ngak ndabkiyog ni nge athamgil u fithik’, machane ke nang nrayog ni ngki ayuweg yugu boch e girdi’. I yog ni gaar: “Kug pirieg ni faan gu ra fanay e pi kenggin e motochiyel nu Bible nge boch e thin nu Bible ni nggu fal’eg laniyan’ e piin ni gu ma fil e Bible ngorad, ma aram rogon ni be fal’eg Jehovah lanin’ug.” Ere, n’en ni rin’ e aram e yoloy fithingan boch e girdi’ u lan e Bible nga but’ nra mada’naged boch e magawon nrib gel e kireban’ ni yib riy ngorad. Ki yog ni gaar: “Pi girdi’ ney e yad boch e girdi’ ni yad ma meybil ni gubin ngiyal’.” Ki nang Delphine “ndabiyog ni nge pirieg be’ e fulweg ko pi magawon rok ni faanra dabi beeg e Bible.”

Ku bay yugu reb e ban’en ni ke tamilang u wan’ Delphine ko fol Bible ni ma tay. Ke nang nib t’uf ni nge l’agan’ ko pi n’en ni bay nga m’on ma gathi pi n’en ni ke thumur. Fare thin ni bay ko Acts 24:15 e ri ma pi’ e athamgil nga laniyan’. Be gaar e re thin nem: “Bayi faseg [Got] urngin e girdi’ ko yam’, ni tin nib fel’ nge tin nib kireb.” Uw gelngin e pagan’ rok ngay nra faseg Jehovah e re rugod ni fak nem? Baaray e fulweg riy ni ke pi’ ni be gaar: “Rayog ni nggu susunnag e ngiyal’ ni gamow ra mada’ fakag riy bayay. Kug mu’ i dugliy e n’en ni gamow ra rin’ ko ngiyal’ ni gamow ra ‘mada’’ bayay ko ngiyal’ ni ke dugliy Jehovah. Gu be susunnag yaamow u milay’ romow, ma gubin e pi n’ey nrib tamilang u wan’ug ni bod rogon e ngiyal’ ni baaram nug gargeleg riy.”