Dakir Yag ni Ngam Athamgiliy e Tin Be Buch u Lan e Yafos Rom
GUR, bay ba ngiyal’ ni kari mooch’och lanin’um ni ga baadag ni nga mum’? Faanra arrogon ma aram e rayog ni ngam nang fan rogon laniyan’ Adriana. Ba gel e magafan’ nge kireban’ ni i tay miki lemnag ndakuriy e athap rok. Bay ba mit e m’ar rok ni ma k’aring ni nge par nib kireban’ ni gubin ngiyal’.
A kum lemnag be’ nib moon u Sapan ni ka nog Kaoru ngak. Ma ayuweg e gallabthir rok ni yow ba m’ar ma kar pilibthirgow. I yog ni gaar: “Ngiyal’ nem e gu be par ni gub mochuch ni bochan e maruwel rog. Ere munmun mug dabuy e abich miki kireb rogon e mol rog. Ma aram mug tabab ni nggu lemnag ni faanra gum’ ma ra m’ay e magawon rog.”
Be’ nib moon u Nigeria ni ka nog Ojebode ngak e yog ni gaar, “Gubin ngiyal’ nri ma kireban’ug ngaug yor. Ere ug lemnag rogon ni nggu lieg nggum’.” Machane ba tow’ath Ojebode, nge Kaoru, nge Adriana ndariy bagayad ni li’ ir nge yim’. Bin riyul’ riy e, gubin e duw ni bokum miriay e biyu’ e girdi’ ni yad ma lied yad ngar m’ad.
GIN NI NGAN PIRIEG E AYUW RIY
Ba ga’ ni piin pumoon e yad ma lied yad ngar m’ad ni bochan e boor i yad e ma tamra’ ni nge ning e ayuw. I yog Jesus ni piin nib m’ar e ba t’uf e togta ngorad. (Luke 5:31) Ere faanra ga be mochuch ma dab mu tamra’ ni ngam ning e ayuw. Boor e girdi’ ni yad be mochuch e kar pirieged ni faan yad ra un ko tafalay, ma aram e n’en nrayog ni nge ayuwegrad ni ngar athamgilgad u fithik’ e magawon rorad. Ojebode, nge Kaoru, nge Adriana e yad gubin ni kar uned ko tafalay ke yag ni ngan ayuwegrad, ma chiney e be yag ni ngar athamgilgad u fithik’ e magawon rorad.
Rayog ko togta ni nge pi’ e falay ngak be’ ni be mochuch, ara motoyil ngak u nap’an ni be weliy laniyan’, ara reb e rayog ni l’agruw e gali n’ey ni ngan rin’ ngak. Girdien e tabinaw nge fager ko pi girdi’ ney e ba t’uf ni ngar guyed rogon ngar nanged fan lanin’rad, mar gum’an’naged yad u puluwrad, mar ayuweged yad. Jehovah Got ni ir e bin th’abi fel’ e fager nra yag ngak be’ e ke pi’ e Thin rok ni aram e Bible ni nge ayuwegdad.
GUR BAY BAN’EN NRAYOG NI NGE PITHIG E RE MAGAWON NEY?
Piin ni yad be mochuch e rayog nib t’uf ba ngiyal’ nib n’uw nap’an ni ngan tafalaynagrad mar thilyeged boch ban’en ko par rorad. Machane faanra gur be’ ni ga be mochuch, ma rayog ni ngam athapeg e felfelan’ boch nga m’on ni bod rogon Ojebode. I yog ni gaar: “Gu be athapeg ni nge lebug fare thin ko Isaiah 33:24 ni ke yiiynag e ngiyal’ ndakuriy be’ u fayleng nra yog ‘nib m’ar.’” Ere nge fel’ lanin’um ko n’en ni ke micheg Got u murung’agen reb e “fayleng nib beech” ndakuriy e “amith” riy ni bod rogon e n’en ni fal’eg laniyan’ Ojebode. (Revelation 21:1, 4) Re n’ey e be yip’ fan nra taw ko ngiyal’ nem, ma dakuriy ban’en nra k’aring e amith nga lanin’dad. Ra chuw e kireban’ rom ni manemus. Ga ra “pag talin” ni gubin ma dakuriy ba ngiyal’ ni ga ra lemnag.—Isaiah 65:17.