Ngam Dag ni Ga Be Lemnag e Girdi’​—Ya Kam Fl’eg Rogon

¹ Faan gad ra fl’eg rogon ni ngad uned ko machib ma aram ma gad be dag ni gad be lemnag e girdi’. Uw rogon? Nap’an ni kad fl’eged rogon ko machib ma de magawon lanin’dad ko n’en ni gad ra weliy ma aram ma rayog ni ngad tedan’dad ko householder. Maku ma ayuwegdad ni ngad gelgad ko da’da’ ma rayog ni ngad weliyed e thin u gum’ercha’dad. Machane uw rogon nrayog ni ngad fl’eged rogon ni ngad weliyed e thin nib m’ag?

² Ngam Weliy e Thin nib M’ag: Ngam mel’eg reb e thin ni bay ko Machib Rodad Ni Fan Ko Gil’ilungun Got ko January 2005 nib m’ag ko binaw rom, ma ngam lemnag ko uw rogon ni ngam weliy ko thin rom. Ngam puluwnag ko binaw rom. Susun, faanra ga ra mada’nag e girdi’ ni ma un ko baraba’ i teliw ara girdi’ nu bang, ma ngam lemnag ko uw rogon ni ngam weliy e machib ni yad ra adag. Ngam puluwnag e thin rom nge m’ag ko piin ni ga be non ngak ma aram ma ga be dag ni riyul’ ni ga ba adag ni ngam ayuwegrad.​—1 Kor. 9:22.

³ Nap’an ni ngam tabab i weliy e pi thin ko presentation ma ngam ul’ul’ i mon’ognag. Baga’ fan e tin som’on e thin ni ngam weliy me ere ngam tiyan’um ko uw rogon u wan’ e girdi’. Kan pug e tafinay rorad? Kar pied e fulweg ko pi deer ni kam fith? Faanra danga’ ma ngam thiliyeg boch ban’en nge mada’ ko ngiyal’ ni kam pirieg e thin nib m’ag.

⁴ Pi N’en ni Ra Ayuweg nge Yib Boch Ban’en Nga Lanin’uy: Boor e girdi’ ma ma mo’maw ni nge yib ngan’rad e thin ni ngar rogned u nap’an ni yad bay u langan e mab. Faanra aram rogom, ma kam practicegow be’ ni ga be yog e thin ni ngam weliy? Aram e rayog ni nge ayuweg nge yib nga lanin’um e thin ni ngam weliy uw rogon nib puluw mab tamilang. Ku ra ayuweg ni ngam pi’ e fulweg ko yugu boch e thin nrayog ni nge yog be’ ngom.

⁵ Ku ban’en nra ayuweg nge par boch ban’en nga lanin’um e ngam yoloy nga but’ e thin ni ngam weliy ma ngam sap ko re ke babyor nem fin u m’on ni ngam taw nga langan e mab ko reb e naun. Boch e girdi’ ma kar pirieged ni re n’em e ma ayuwegrad dabra da’da’gad ma ngar sabethingad e girdi’. Aram boch e kanawo’ ni faanra gad ra fl’eg rogon ko machib ma ra ayuwegdad ngad daged ko girdi’ ni gad ba adag ni ngad ayuweged yad ko fare thin nib fel’.